ސެޕްޓެމްބަރު މަހު 76 އިންސައްތަ މައްސަލަ ޕީޖީ އޮފީހަށް ސާބިތުކުރެވުނު
ސެޕްޓެމްބަރު މަހު މަހު 214 މައްސަލަ ޑިއުޓީ ޕްރޮސެކިއުޝަނަށް ހުށަހެޅިފައިވޭ
ޕްރޮސެކިއުޓަރ ޖެނެރަލް ހުސައިން ޝަމީމް
ޕްރޮސެކިއުޓަރ ޖެނެރަލް އޮފީސް (ޕީޖީ)ން ދައުވާކޮށްފައިވާ މައްސަލަތަކުގެ ތެރެއިން ސެޕްޓެމްބަރު މަހު 76 އިންސައްތަ މައްސަލަ ސާބިތުކުރެވުނު ކަމަށް އެ އޮފީހުގެ ތަފާސްހިސާބުތަކުން ދައްކައިފިއެވެ.
ޕީޖީ އޮފީހުގެ ތަފާސްހިސާބުތައް ދައްކާގޮތުން، ސެޕްޓެމްބަރު މަހު 214 މައްސަލަ ޑިއުޓީ ޕްރޮސެކިއުޝަނަށް ހުށަހެޅިފައިވެއެވެ. އެގޮތުން ސެޕްޓެމްބަރު މަހު ފުލުހުން ވަނީ 202 މައްސަލައެއް ޕީޖީ އޮފީހުގެ ޑިއުޓީ ޕްރޮސެކިއުޝަނަށް ހުށަހަޅާފައެވެ. އެޗްއާރްސީއެމުންވެސް 2 މައްސަލައެއް ހުށަހަޅާފައިވާއިރު، އޭސީސީން 10 މައްސަލައެއް ހުށަހަޅާފައިވެއެވެ.
ސެޕްޓެމްބަރު މަހު އެންމެ ގިނަ ދައުވާ ހުށަހެޅިފައިވަނީ ޑްރަގް ކޯޓަށެވެ. އެގޮތުން ޑްރަގް ކޯޓަށް 55 ދައުވާއެއް ހުށަހެޅިފައިވާއިރު، ކްރިމިނަލް ކޯޓަށް 37 ދައުވާއެއް، އަދި އެހެނިހެން ކޯޓުތަކަށް 32 ދައުވާއެއް ހުށަހެޅިފައިވެއެވެ.
ޕީޖީ އޮފީހުން މައުލޫމާތުދޭ ގޮތުގައި ޖުމުލަ 193 ދައުވާއެއް ކޯޓުތަކަށް ހުށަހެޅިފައިވެއެވެ. އޭގެ ތެރޭގައި ތަކުރާރުކޮށް ހުށަހެޅުނު 89 މައްސަލައަކާއި އަލަށް ދައުވާ ކުރެވުނު 104 މައްސަލައެއް ހިމެނެއެވެ.
އޭގެ ތެރެއިން އެންމެ ގިނައީ މަސްތުވާތަކެއްޗާ ގުޅުންހުރި ދައުވާއެވެ. އެގޮތުން މަސްތުވާތަކެތި ބޭނުން ކުރުމުގެ 61 ދައުވާ، ވައްކަން ކުރުމުގެ 20 ދައުވާ ހުށަހެޅިފައިވެއެވެ.
މަސްތުވާތަކެތީގެ އިތުރުން، ވައްކަމާއި، ކުޑަކުދިންނަށް ޖިންސީ ގޯނާ ކުރުމާއި، ބަނގުރާ ބުއިމާއި، މާރަމާރީ ހިންގުމުގެ މައްސަލަތައްވެސް ހުށަހެޅިފައިވެއެވެ.
ވަކިވަކި މީހުންގެ މައްޗަށް އުުފުލާފައިވާ ދައުވާތަކަށް ބަލާއިރު، 150 މީހަކަށް ދައުވާ އުފުލާފައިވެއެވެ. އޭގެ ތެރޭގައި 17 އަހަރާ 25 އަހަރާ ދެމެދުގެ 35 މީހުން ހިމެނޭއިރު، 26 އަހަރާ 35 އަހަރާ ދެމެދުގެ 71 މީހުން އަދި 36 އަހަރާ 49 އަހަރާ ދެމެދުގެ 37 މީހަކު ހިމެނެއެވެ. އޭގެ އިތުރުން 50 އަހަރުން މަތީގެ 7 މީހެއްވެސް ހިމެނެއެވެ.
ސެޕްޓެމްބަރު މަހު ކޯޓުތަކުގައި ތާވަލުކުރި މައްސަލަތަކަށް ބަލާއިރު، 2،124 ކޯޓަކަށް ދައުވާތައް ހުށަހަޅައި، 1،262 މައްސަލައެއް ކުރިއަށްގެންދެވިފައިވެއެވެ.
ޑްރަގް ކޯޓު ފިޔަވައި އެހެން ކޯޓުތަކުގައި ކުރިއަށް ދިޔަ މައްސަލަތަކަށް ބަލާއިރު، އޭގެ ތެރެއިން 76 އިންސައްތަ މައްސަލަ ސާބިތުވެފައިވެއެވެ. އެއީ 103 މައްސަލައެވެ. 30 މައްސަލައެއް ސާބިތުނުވާކަމަށް ނިންމާފައިވާއިރު، 2 މައްސަލައެއްގައި މަދަނީ މިންގަނޑުން ދައުވާ ބާތިލު ކުރުމަށް ވަނީ ނިންމާފައެވެ.
