އައްޑޫ ސިޓީ ހިތަދޫ ފިހާރައެއްގައި އަލިފާން ރޯކޮށްލި މީހަކު ހޯދަނީ

އައްޑޫ ސިޓީ ހިތަދޫ ބްލޮސަމް ފިހާރައިގައި އަލިފާން ރޯކޮށްލި މައްސަލައާ ގުޅިގެން އައްޑޫ ސިޓީ ހިތަދޫ ޕޮލިސް ސްޓޭޝަނުން ކުރަމުންދާ ތަހުގީގަށް މީހަކު ހޯދުމަށް އިއުލާންކޮށްފިއެވެ.

އެކަމާއި ގުޅިގެން ފުލުހުން ބުނީ މިހާތަނަށް ކުރި މަސައްކަތުން އެމީހާއަކީ ކާކުކަން ދެނެގަނެވިފައިނުވާތީ ނުހޯދިފައިވާ މީހެއްކަމަށެވެ. މިހާދިސާ ހިނގާފައިވަނީ ސެޕްޓެމްބަރ މަހުގެ 5 ވަނަ ދުވަހުގެ ވަގުތެއްގައެވެ.

ވީޑިއޯއިން ފެންނަ މީހާއާ ބެހޭ އެއްވެސް މައުލޫމާތެއް ލިބިފައިވާނަމަ އައްޑޫ ސިޓީ ހިތަދޫ ޕޮލިސް ސްޓޭޝަންގެ ނަންބަރު 9791612 އަށް ގުޅުމަށް ފުލުހުން އެދެއެވެ.

ފުލުހުން އާންމުކޮށްފައިވާ ވީޑިއޯއިން ފެންނަނީ މޫނާއި ބޯ ނިވާކޮށްގެން ހުރި މީހަކު ގަލެއް ކަހަލަ އެއްޗަކުން ޖަހައި ފިހާރައިގެ ބިއްލޫރިގަނޑު ތަޅާލާ މަންޒަރެވެ. އެއަށް ފަހު އަތުގައި އޮތް ފުޅިއަކުން ފިހާރަ ތެރެއަށް ފެޓްރޯލް އުކުމަށްފަހު އަލިފާން ރޯކޮށްލައެވެ.