އާންމުން އެންމެ ކަންބޮޑުވަނީ ސިއްހީ ޚިދުމަތްތަކުގައި ދިމާވާ މައްސަލަތަކާއި މެދު: އެޗްއާރުސީއެމް
ދައުލަތުގެ އިދާރާތަކުގައި އިންސާނީ ހައްގުތައް ހިމާޔަތްކުރެވޭ މިންވަރު ބެލުމަށް ވަނީ ހަމަޖެހިފައި
އެޗްއާރުސީއެމް
ރާއްޖޭގައި އިންސާނީ ހައްގުތަކާއި ގުޅުން ހުރި ކަންކަމުގެ ތެރެއިން އާއްމުން އެންމެ ބޮޑަށް ކަންބޮޑުވާ މައްސަލަ އަކީ ސިއްހީ ޚިދުމަތް ދިނުމުގައި ހުރި މައްސަލަތައް ކަަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ބުނެފިއެވެ.
ރާއްޖެޓީވީގެ ފަލަސުރުހީގައި ވާހަކަދައްކަވަމުން އެޗްއާރުސީއެމްގެ ރީސަރޗް އެންޑް މޮނިޓަރިން އޮފިސަރ މުހައްމަދު ޒަޔާން ވަނީ ރާއްޖޭގައި އިންސާނީ ހައްގުތައް ރައްކާތެރިކުރުމަށް ކަމާއި ބެހޭ އިދާރާތަކުން އަޅާ ފިޔަވަޅުތަކާއި ޚިދުމަތް ދިނުމުގައި ދިމާވާ ކަންކަން ބަލަހައްޓާ މޮނިޓަރ ކުރުމުގެ މަަސައްކަތް އެ ކޮމިޝަނުން ކެނޑިނޭޅި ކުރަމުންދާ ކަަމަށް ވިދާޅުވެފައެވެ. އެގޮތުން އެކި ދާއިރާތަކުން ދިރާސާކޮށް އިންސާނީ ހައްގުތަކާއި ގުޅޭގޮތުން ރާއްޖޭގައި ދިމާވާ މައްސަލަތައް ދެނެގަތުމަށް އެ ކޮމިޝަނުން ގިނަ މަސައްކަތްތަކެއް ކުރަމުންދާކަމަށް އޭނާ ވިދާޅުވިއެވެ. އަދި އިދާރާތަކާއި މުއައްސަސާތައް މޮނިޓަރ ކުރުމުގެ އިތުރުން އާއްމުންނާއި ވާހަކަދައްކާ އާއްމުންގެ ކަންބޮޑުވުންތައް ހުރީ ކޮން ކަންތައްތަކަކާއި ގުޅިގެން ކަން ދެނެގަތުމައް މަސައްކަތް ކުރާ ކަަމަށް ވެސް އޭނާ ވިދާޅުވިއެވެ.
އެ ކޮމިޝަނުން މިހާތަނަށް ކޮށްފައިވާ މަސައްކަތުން އެންމެ ބޮޑަށް އާއްމުން ކުރާ ޝަކުވާ އަކީ ސިއްހީ ޚިދުމަތްތައް ދިނުމުގައި ދިމާވާ މައްސަލަތައް ކަން އެ ކޮމިޝަނަށް ފާހަގަކުރެވޭ ކަމަށް ވެސް އޭނާ ވިދާޅުވިއެވެ. މީގެ އިތުރުން އިދާރާތަކުން ޚިދުމަތް ހޯދުމުގައި ދިމާވާ ބައެއް މައްސަލަތަކާއި، ގައިދީންނާއި މައްސަލަތަކުގައި ހައްޔަރުކުރާ މީހުންގެ ހައްގުތަކާއި ގުޅޭ މައްސަލަތައް ވެސް ފާހަގަކުރެވިފައިވާ ކަމަށް އޭނާ ވިދާޅުވިއެވެ.
އެޗްއާރުސީއެމް އިން ވަނީ ދައުލަތުގެ އިދާރާތަކުގައި އިންސާނީ ހައްގުތައް ހިމާޔަތްކުރެވޭ މިންވަރު ބެލުމަށް މި އަހަރު ދިރާސާ ކުރިއަށް ގެންދިއުމަށް ނިންމާފައެވެ. އެ ދިރާސާގެ ދަށުން ދައުލަތުން ފޯރުކޮށްދޭ ޚިދުމަތްތައް ފޯރުކޮށްދޭނީ ކިހާ މިންވަރަކަށްތޯ ބަލާނެއެވެ. އަދި މި ދިރާސާ އަމާޒުކޮށްފައި ހުރީ އެންމެ ނާޒުކު ގްރޫޕަށް ޚިދުމަތްތައް ލިބެނީ ކިހާ މިންވަރަކަށްތޯ ބެލުމަށް ކަމަށާއި، އެގޮތުން ފިޔަވައްޗަށް ޒިޔާރަތްކޮށް މައުލޫމާތު އެއްކުރެވިފައިވާ ކަަމަށް އެ ކޮމިޝަނުން ވަނީ ބުނެފައެވެ.
