ހުޅުމާލޭ ދެވަނަ ފިޔަވަހީގައި ހަދަމުން އަންނަ ޕްރައިމަރީ ސްކޫލްތަކުގެ ތެރެއިން ފުރަތަމަ ސްކޫލް އަންނަ އާދިއްތަ ދުވަހު ހުޅުވައި، ކިޔަވައިދޭން ފަށާނެކަމަށް އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ބުދަ ދުވަހު ރައްޔިތުންގެ މަޖިލީހުގެ ޖަލްސާގައި ހުޅުމާލެ ދާއިރާގެ މެމްބަރު އަލީ ނިޔާޒު ކުރެއްވި ސުވާލަކަށް ޖަވާބުދެއްވަމުންނެވެ. މިނިސްޓަރ ވިދާޅުވީ ހުޅުމާލެއަށް ބަދަލުވާ މީހުންގެ އަދަދު އިތުރުވެ، ހުޅުމާލޭގެ ސްކޫލްތަކަށް ދަރިވަރުން ވައްދަން އެދެމުން އަންނަކަމަށެވެ. އެހެންކަމުން، ސްކޫލްތަކުގެ ކެޕޭސިޓީ އިތުރު ކުރަމުން ގެންދާކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އާދީއްތަ ދުވަހު ހުޅުވާ، ކާމިލް ދީދީ ޕްރައިމަރީ ސްކޫލަކީވެސް 824 ކުދިންގެ ޖާގައިގެ ސްކޫލެއްކަމަށެވެ. އަދި ޖަމީލް ދީދީ ޕްރީސްކޫލުގެ ނަމުގައި ހުޅުމާލޭ ދެވަނަ ފިޔަވަހީގައި ހަދަމުން އަންނަ ޕްރީސްކޫލުގެ މަސައްކަތް ނިމި އަންނަ އޮކްޓޯބަރު މަހު ކިޔަވައިދޭން ފަށާނެކަމަށްވެސް މިނިސްޓަރ ވިދާޅުވިއެވެ.
ހުޅުމާލޭގައި މިވަގުތު ކުރަމުން އަންނަ މަސައްކަތްތަކާ ގުޅޭގޮތުން މައުލޫމާތު ދެއްވަމުން އެޑިއުކޭޝަން މިނިސްޓަރ ވިދާޅުވީ، ފުރަތަމަ ފިޔަވަހީގައިވެސް ދެ ސްކޫލެއްގެ މަސައްކަތް ކުރިއަށްދާކަމަށެވެ. އަދި ދެވަނަ ފިޔަވަހީގައި ކާމިލް ދީދީ ޕްރައިމަރީ ސްކޫލާއި ޖަމީލް ދީދީ ޕްރީސްކޫލުގެ އިތުރުން އިތުރު ދެ ސްކޫލެއްގެ މަސައްކަތްވެސް ކުރަމުން އަންނަކަމަށް މިނިސްޓަރ ވިދާޅުވިއެވެ.
ފޭސް 1ގަ ދެ ސްކޫލުގެ މަސައްކަތް ކުރިއަށް އެބަދޭ. އެއީ އަޖީލާލް ބައި ލިންގުއަލް ސްކޫލް. އެއީ 800 ކުދިންގެ ޖާގައިގެ ސްކޫލެއް. ދެން ސީއެޗްއެސްސީ އާ އިމާރާތް. އެއީ 1100 ކުދިންގެ ޖާގައިގެ ސްކޫލެއް. ދެން ފޭސް 2ގަ މިހާރު އަލަށް އާބާދުވާ ދަރިވަރުންނަށް އަމާޒުކޮށްގެން އަޅުގަނޑުމެން އަޅަމުންގެންދާ ސްކޫލްތަކުގެ ތެރޭގަ އެބަ ހިމެނޭ ސަލާހުއްދީން ސްކޫލް. އެއީ 1200 ކުދިންގެ ޖާގައިގެ ސްކޫލެއް. ދެން އަޅުގަނޑުމެން ނަން ނުކިޔާ ސްކޫލެއްގެ މަސައްކަތްވެސް ކުރިއަށް އެބަދޭ. އެވެސް 1200 ކުދިންގެ ޖާގައިގެ ސްކޫލެއް. މާލޭގަވެސް އަޅުގަނޑުމެން ދަރުމަވަންތަ ސްކޫލުގެ މަސައްކަތް ކުރިއަށް އެބަގެންދަން.އެޑިއުކޭޝަން މިނިސްޓަރ ޑރ. އާއިޝަތު އަލީ
އާދީއްތަ ދުވަހު ހުޅުވާ ކާމިލް ދީދީ ޕްރައިމަރީ ސްކޫލުގައި ކިޔަވައިދޭނީ ޕްރީސްކޫލުން ފެށިގެން ގްރޭޑް 6އާ ހަމައަށެވެ. ޖުމްލަ 12 ކްލާސް ރޫމް ހިމެނޭ އަހުމަދު ކާމިލްދީދީ ޕްރައިމަރީ ސްކޫލް ހަދަން އެސްޖޭ ކޮންސްޓްރަކްޝަން ކުންފުންޏާއެކު އެޗްޑީސީން ސޮއިކުރީ މިދިޔަ މާޗު މަހުއެވެ. އެއީ 165 ދުވަސް ތެރޭގައި ނިންމާގޮތަށެވެ.
މި ސްކޫލް ހުޅުވަން އެންމެ ފުރަތަމަ މަސައްކަތްކުރީ މި ފެށި ދިރާސީ އައު އަހަރަށެވެ. ނަމަވެސް ރަޝިއާ-ޔޫކްރޭން ހަނގުރާމައާ ގުޅިގެން، ކޮންސްޓްރަކްޝަނަށް ބޭނުންވާ ސާމާނު ލިބުމުގައި ދަތިވެ މަސައްކަތް ކުޑަކޮށް ލަސްވިއެވެ. މަސައްކަތްތައް ލަސްވުމާގުޅިގެން، މި ސްކޫލުން ޖާގަ ލިބުނު ދަރިވަރުން ސްކޫލް ހުޅުވެންދެން ކިޔަވަމުން ދަނީ ހުރަވީ ސްކޫލާއި ރެހެންދި ސްކޫލާއި ޣާޒީ ސްކޫލްގައެވެ.
