ވެރިކަމުގެ ނިޒާމާ ގުޅޭ ވޯޓެއް ނުނަގަން ވިދާޅުވެއްޖެނަމަ އެ ގެއްލެނީ ރައްޔިތުންގެ އިތުބާރު ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ބަރުލަމާނީ ނިޒާމާ ގުޅޭގޮތުން ބުރާސްފަތި ފުވަހުގެ ރޭ ބޭއްވި މަޝްވަރާ ބައްދަލުވުމެއްގައި ރައީސް ނަޝީދު ވިދާޅުވީ އެންމެ މުހިންމު އިގްތިސާދީ ހަތިޔާރަކީ އިތުބާރު ކަމަށާއި އިތުބާރު ގެއްލިއްޖެއްނަމަ އިގްތިސާދީ ކަންކަން ކައްސާލައިގެން ދިއުމަކީ ވަރަށް ފަސޭހައިން ވާކަމެއް ކަމަށެވެ. އެހެންވެ، ވެރިކަމުގެ ނިޒާމާ ގުޅޭ ވޯޓެއް ނުނަގަން ވިދާޅުވެއްޖެނަމަ އެ މީހެއްގެ އިތުބާރު ގެއްލުނީ ކަމަށް އެމަނިކުފާނު ވިދާޅުވިއެވެ.

ރާއްޖޭގެ ވެރިކަން ކުރުމުގެ ނިޒާމު, ބަރުލަމާނީ ނިޒާމަކަށް ބަދަލު ކުރުމަށް ގާނޫނު އިސްލާހު ކުރުމާ ގުޅޭގޮތުން ރައީސް ނަޝީދު ވަނީ އެމްޑީޕީގެ ހަތަރުވަނަ ކޮންގްރެސްއަށް ހުށަހަޅުއްވާފައެވެ. އެކަމާ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު އަދި ރާއްޖޭގެ ސިޔާސީ އެހެން ބައެއް އިސް ފަރާތްތަކުން ވެސް ދެކޮޅު ކަމަށް ވިދާޅުވެފައިވާއިރު ރައީސް ނަޝީދު ވިދާޅުވީ ނިޒާމީ ވާހަކަތަކުގެ ތެރެއަށް ރައީސުލްޖުމްހޫރިއްޔާ ވަދެވަޑައިގަންނަވަން ޖެހިވަޑައިނުގަންނަވާ ކަމަށެވެ. އަދި އެއީ ރައީސުލްޖުމްހޫރިއްޔާއާ ބެހޭ ވާހަކައެއް ނޫން ކަމަށް ވެސް ވިދާޅުވިއެވެ.

އިލްމީ ބަހުސެއް ކުރަން ފުރުސަތު ދެއްވަން ޖެހޭ ކަން ފާހަގަ ކުރައްވައި ނަޝީދު ވިދާޅުވީ އެފަދަ ބަހުސެއްގައި ޕާޓީގެ އެއްވެސް ގުނަނަކުން ފިއްތުންތައް ކުރިމަތިކޮށްގެން ނުވާނެ ކަމަށެވެ. އަދި ޒުވާން ޖީލުވެސް ބޭނުން ވަނީ ވެރިކަމުގެ ނިޒާމު ބަދަލު ކުރަން ކަމަށާއި ރައްޔިތުންގެ ގާތުގައި ކަމަކު ބުނުމަށް އެއްވެސް ޑިމޮކްރެޓިކް މުއައްސަސާއަކުން ނޫނެކޭ ބުނެގެން ނުވާނެ ކަމަށް ވެސް އެމަނިކުފާނު ވިދާޅުވިއެވެ.

ރައީސް ނަޝީދު ވިދާޅުވީ އެމަނިކުފާނު ބަރުލަމާނީ ނިޒާމެއް ބޭނުންފުޅުވެގެން އުޅުއްވަނީ އަވަށްޓެރި ލަންކާއަށް ދިމާވެފައިވާ ހާލަތަށް ބެއްލެވުމަށްފަހު ކަމަށެވެ. އެގޮތުން އެ ޤައުމުގެ އިގްތިސާދީ ހާލަތު ދަށްވެ އެއިން އަރައިގަންނަން، ޤައުމުގެ ވެރިކަމުގެ ނިޒާމު ބަދަލު ކުރަން ޖެހެނީ ޤައުމު ބަނގުރޫޓުވެފައިވާ ދުވަސްވަރެއްގައި ކަމަށާއި ރާއްޖޭގެ ދަރަނިވެސް އިތުރުވެފައިވާއިރު އެފަދަ ހާލަތެއް އައުމުގެ ކުރިން ކަންކަން މެނޭޖު ކުރުމަށް ނިޒާމު ބަދަލު ކުރަން ޖެހޭކަމަށް ދެކެވަޑައިގަންނަވާތީ ކަމަށެވެ.

ނިޒާމާ ގުޅޭ ގަރާރެއް އެމްޑީޕީގެ ކޮންގްރެސްއަށް ހުށަހެޅި ނަމަވެސް ކޮންގްރެސްގައި ސައްޙަ ވޯޓެއް ނުނެގޭނެ ކަމަށް އަޑު އިވެމުންދާކަމަށް ވެސް ނަޝީދު ވިދާޅުވިއެވެ. ނަމަވެސް ނިޒާމު ބަދަލު ކުރަން ފެއްޓެވި ކެމްޕޭން ދުވަހަކުވެސް ހުއްޓާނުލައްވާނެ ކަމަށާއި އެ ވޯޓު ނުނެގި ނުދާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ބަރުލަމާނީ ނިޒާމުގެ ވާހަކަތަކަކީ މަދު ބަޔަކު ދައްކާ ވާހަކަތައް ކަމަށް ވިދާޅުވަމުން ގެންދާ ކަމަށާއި އެގޮތަށް ވިދާޅުވުމުން ވަރަށް ގިނަ ބަޔަކާ "މޫނު ކެނޑިގެން" ދާނެ ކަމަށް ވެސް ރައީސް ނަޝީދު ވަނީ ވިދާޅުވެފައެވެ.

ވެރިކަމުގެ ނިޒާމާ ގުޅޭ ގަރާރެއް ރައީސް ނަޝީދު އެމްޑީޕީގެ ކޮންގްރެސްއަށް ހުށަހަޅުއްވާފައިވާއިރު ރައީސުލްޖުމްހޫރިއްޔާ އަދި އެމްޑީޕީގެ އިސް ލީޑަރު އިބްރާހިމް މުޙައްމަދު ސާލިހު ވަނީ އެ ގަރާރު އަނބުރާ ގެންދިއުމަށް އެދިވަޑައިގެންފައެވެ. ނަމަވެސް އެ ގަރާރު އަނބުރާ ނުގެންދިއުމަށް ނިންމައި މިހާރު ވަނީ ގަރާރާ ގުޅޭ ބަހުސް ވެސް އެޖެންޑާ ކޮށްފައެވެ. އެގޮތުން، ހުކުރު ދުވަހުގެ ރޭ ފަށާ އެމްޑީޕީގެ ކޮންގްރެސްގެ އެންމެ ފަހު ހަރަކާތެއްގެ ގޮތުގައި އާދީއްތަ ދުވަހަށް އެ ބަހުސް ވަނީ އެެޖެންޑާ ކޮށްފައެވެ.