އެމްޑީޕީގެ ތެރޭގައި ބަރުލަމާނީއަށް ތާއީދުކުރާ މީހުން 10 އިންސައްތައަށްވެސް އަރާނެކަމަށް އަންދާޒާނުކުރެއްވޭކަމަށް އެޕާޓީގެ ޗެއާޕަސަން އަދި އިކޮނޮމިކް މިނިސްޓަރ ފައްޔާޒު އިސްމާއީލު ވިދާޅުވެއްޖެއެވެ.
ހުކުރު ދުވަހުގެ ރޭ އެމްޑީޕީ ކޮންގްރެސް ފެށުމަށް ހަމަޖެހިފައިވާއިރު ކޮންގްރެސްގައި ނިންމާނެ އެންމެ މުހިންމު ކަމަކީ އެޕާޓީގެ ރައީސް، ރައީސް މުހައްމަދު ނަޝީދު ހުށަހަޅުއްވާފައިވާ ބަރުލަމާނީ ނިޒާމަށް ވެރިކަމުގެ ނިޒާމު ބަދަލުކުރުމާއި ވެރިކަމުގެ އޮނިގަނޑާގުޅޭގޮތުން ހުށައަޅުއްވާފައިވާ ގަރާރާއި މެދުއެވެ. ބަރުލަމާނީ ނިޒާމު ގެނައުމަށް ނަޝީދު ވަކާލާތުކުރައްވާ ސިލްސިލާކޮށް ބައްދަލުވުންތައް ބާއްވަވަމުން ގެންދަވާއިރު އެމްޑީޕީގެ އެންމެ އިސް ލީޑަރ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ބަރުލަމާނީ ނިޒާމަށް ތާއީދުނުކުރައްވާކަމަށް ވިދާޅުވެ ގަރާރު އަނބުރާ ގެންދިޔުމަށް އެދިވަޑައިގަންނަވާފައެވެ.
ކޮންގްރެސްގައި ބައިވެރިވުމަށް ރަށްރަށުން އަންނަ މީހުންނަށް މަރުޚަބާ ވިދާޅުވުމަށް އެސަރަހައްދަށް ވަޑައިގެން ނޫސްވެރިން ކުރި ސުވާލުތަކަށް ޖަވާބު ދެއްވަމުން އެމްޑީޕީގެ ޗެއާޕަރސަން ފައްޔާޒު ވިދާޅުވީ ރައީސް ނަޝީދު ޖައްސަވަމުން ގެންދަވާ އަދަދުތަކަކީ އެމަނިކުފާނަށް ފެނިވަޑައި ގަންނަވާގޮތްކަމަށެވެ. އެއީ ކޮންމެހެން އެކަން ވާންޖެހޭ ގޮތް ނޫންކަމަށް ފައްޔާޒު ވިދާޅުވިއެވެ.
ބަރުލަމާނީ އަށް ތާއީދުކުރާ މީހުން އެމްޑީޕީ އާއި ދިވެހި ރައްޔިތުންގެ ތެރޭގައިވެސް ތިބޭނެކަމަށާއި ނަމަވެސް ގިނަ ބަޔަކު ބަރުލަމާނީ އަށް ތާއީދުކުރާކަމަށް ދެކެވަޑައި ނުގަންނަވާކަމަށް ފައްޔާޒު ވިދާޅުވިއެވެ. ފައްޔާޒު ވިދާޅުވީ ގިނަ ދިވެހިން ބޭނުންވަނީ އަމާންކަމާއެކު ކުރިޔަށްދާ، ޑިމޮކްރަޓިކް މުޖުތަމައުއެއް ކުރިޔަށްގެންދެވޭނެ ގޮތެއްކަމަށެވެ.
އަޅުގަނޑު އަންދާޒާ ކުރާއިރު އަޅުގަނޑު ނުދަންނަވާނަން 10 ޕަސެންޓު ވެސް ބަރުލަމާނީއަށް ތާއީދު އެމްޑީޕީގެ ތިބި ކަމަކަށް، އަދި މުޅި ރާއްޖެއަށް ބަލާއިރު އަޅުގަނޑު ނުބުނާނަން އެއާ ވެސް ކައިރި ކުރާނެ ކަމަކަށް، އުސޫލު އެބައޮވޭ ރިފަރަންޑަމަކަށް ދާން. ދެދުވަހުން އެއްދުވަހު ކޮންމެސް ބޭފުޅެއް އެހެން ވިދާޅުވެގެން ރައްޔިތުންނާ ހަމައަށް ރިފަރަންޑަމަކާ ހަމައަށް ނުދެވޭނެ. މިކޮންގްރެސްގައި އެވަރުގެ ސަޕޯޓެއް އޮތިއްޔާ ފެންނާނެފައްޔާޒު އިސްމާއީލު / އެމްޑީޕީގެ ޗެއާޕަސަން
ފައްޔާޒު ވިދާޅުވީ ޕާޓީގެ ތެރޭގައި އޮތް ނުތަނަވަސްކަމަކީ އެއީ ނިޒާމު ބަދަލުކުރަންޖެހޭ ސަބަބެއް ނޫންކަމަށެވެ.
ޕާޓީގެ ތެރޭގައި ބައިބައިވުން އުފެދުމާއި ގުޅޭގޮތުން ޗެއާޕާސަން ހޮވުމަށް ބޭއްވި އިންތިޚާބުގެ ތެރޭގައިވެސް އެގޮތަށް ވާހަކަދެކެވުނުކަމަށް ވިދަޅުވިއެވެ. އެމްޑީޕީ އަކީ ވަރަށް ހާމަކަން ބޮޑުގޮތެއްގައި ސިޔާސީ ވާހަކަ ދައްކާ ޕާޓީއެއްކަމަށާއި ކޮންމެ ޚިޔާލެއްވެސް ކޮންމެ މެމްބަރަކުވެސް ފާޅުކުރާ ޕާޓީއެއްކަމަށެވެ. ޚިޔާލުތަފާތުވުންތަކާއެކުވެސް ނަތީޖާ ނެރެވިގެންދާނެކަމަށާއި އުންމީދުކުރައްވަނީ ރަނގަޅު ނަތީޖާ ތަކަކާއެކު ގުޅުންތައް ބަދަހިވެގެން ކޮންގްރެސް ނިމިގެންދިޔުންކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ އެމްޑީޕީއަކީ ބައިބައިވެގެން ދާވަރަށްވުރެ ސިޔާސީ ގޮތުން މާބޮޑަށްވެސް ތަސައްރަފު ފުދިފައިވާ ޕާޓީއެއްކަމަށެވެ.
އެއްގޮތަކަށްވެސް ނޭދެން ޕާޓީ ބައިވައިވާކަށް. އެއަށްވުރެ ގަބޫލުކުރާ ގޮތުގައި ސިޔާސީ ގޮތުން މާބޮޑަށްވެސް މެޗުއަރ ޕާޓީއެއް މިޕާޓީއަކީ. އެގަރާރާ އެއްކޮޅު ބޭފުޅުންވެސް އެބަތިއްބެވި ދެކޮޅު ބޭފުޅުންވެސް އެބަ ތިއްބެވި. ކޮންމެސް އެއްބަޔަކު މޮޅުވާނީ. ދެން ދަށްވާ ބަޔަކު ވަކިވެގެން ދާންވީމާ އެއީކީ ނޫން ޑިމޮކްރަސީގައި ކުރަމުން އައި މަސައްކަތަކީ. ޚިޔާލު ތަފާތުވުންތަކާއެކު މޮޅުވާ ބަޔަކާއެކު ދެވޭނެ ގޮތަކަށް ޖެހޭނީ ދާން.ފައްޔާޒު އިސްމާއީލު / އެމްޑީޕީގެ ޗެއާޕަސަން
ފައްޔާޒު ވިދާޅުވީ ކޮންގްރެސް އާއިއެކު ކުރިޔަށް އޮތް އިންތިޚާބުގެ ކެމްޕެއިންގެ ކަންކަން ފެށިގެންދާނެކަމަށެވެ. އަދި ކޮންގްރެސްގެ ތެރެއިން ސަރުކާރުން ކުރަމުންދާ މަސައްކަތްތަކުގެ މައުލޫމާތު ދެއްވާނެ ކަމަށް ފައްޔާޒު ވިދާޅުވިއެވެ.
އެމްޑީޕީގެ ހަތަރުވަނަ ކޮންގްރެސް އޮންނާނީ މި މަހުގެ 19-21 އަށް ސޯޝަލް ސެންޓަރުގައެވެ. މިއީ މިހާތަނަށް އެންމެ ގިނަ ބަޔަކު ބައިވެރިވާނެ ކޮންގްރެސްއަށް ވެގެންދާނެ ކަމަށް އެމްޑީޕީ އިން ބުނެއެވެ. އެގޮތުން މިހާރުވެސް 1447 ޑެލިގޭޓުން ބައިވެރިވާން ޖެހޭ ކަމަށް އެ ޕާޓީން ބުނެއެވެ.
