ބައި އިލެކްޝަންތައް ކާމިޔާބުވުމަކީ ޕާޓީއަށް ލިބުނު މުހިންމު ކާމިޔާބީއެއް: ރައީސް

ތ. ގާދިއްފުއްޓާއި މ. ދިއްގަރު ރަށު ކައުންސިލްގެ ބައި އިލެކްޝަން، ވެރިކަންކުރާ މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ކެންޑިޑޭޓުން ކާމިޔާބުކުރުމަކީ ޕާޓީއަށް ލިބުނު މުހިންމު ކާމިޔާބީއެއްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ހޮނިހިރު ދުވަހު ކުރިޔަށްދިޔަ މި ދެރަށުގެ ބައި އިލެކްޝަންގެ ދެގޮނޑިވެސް އެމްޑީޕީން ކާމިޔާބުކޮށްފައިވަނީ އިދިކޮޅު ޕީޕީއެމް ކެންޑިޑޭޓާ ވާދަކޮށްގެންނެވެ.

އިލެކްޝަން ކޮމިޝަން (އީސީ)ން އާންމުކޮށްފައިވާ އިންތިޚާބުގެ ވަގުތީ ނަތީޖާއަށް ބަލާއިރު، ތ. ގާދިއްފުށީ ކައުންސިލަށް މެމްބަރަކު ހޮވުމަށް ނެގުނު ވޯޓުގައި ޕީޕީއެމް ކެންޑިޑޭޓް ހައްވާ އަބްދުލްހާދީއަށް ލިބިފައިވަނީ 201 ވޯޓެވެ. އެއިންތިޚާބުގައި އެމްޑީޕީން ވާދަކުރި ކެންޑިޑޭޓް ޒުލައިޚާ އަހުމަދަށް ލިބިފައިވަނީ 210 ވޯޓެވެ. އަމިއްލަގޮތުން ވާދަކުރި ފާތިމަތު މަލްދާއަށް ލިބިފައިވަނީ 4 ވޯޓެވެ. މ. ދިއްގަރު ކައުންސިލަށް މެމްބަރަކު ހޮވުމަށް ނެގުނު ވޯޓުގައި އެމްޑީޕީ ކެންޑިޑޭޓް އަބްދުﷲ އާރިފަށް ލިބިފައިވަނީ 375 ވޯޓެވެ. ޕިޕީއެމް ކެންޑިޑޭޓް އަބްދުލްހަންނާން އަހުމަދަށް ލިބިފައިވަނީ 320 ވޯޓެވެ.

ދެ ގޮނޑި އެމްޑީޕީއަށް ކާމިޔާބުވުމާއެކު ރައީސް ޞާލިހު ކުރެއްވި ޓްވީޓުގައި ވަނީ އިންތިޚާބު ކާމިޔާބުކުރެއްވި ދެ ކެންޑިޑޭޓުންނަށް މަރުޚަބާ ވިދާޅުވެފައެވެ. އަދި ކެމްޕެއިނަށް އެހީތެރިވި މެންބަރުންނަށާއި ކެމްޕޭން ޓީމަށް މަރުހަބާ ވިދާޅުވެފައެވެ.

ދިއްގަރު ކައުންސިލްގެ ގޮނޑި ހުސްވީ އެ ކައުންސިލަށް އަމިއްލަ ގޮތުން ވާދަކުރައްވައި، ހޮވިވަޑައިގަތް އިބްރާހީމް ޚަލީލް އިސްތިއުފާ ދެއްވުމާ ގުޅިގެންނެވެ.

ގާދިއްފުށީ ކައުންސިލްގެ ގޮނޑި ހުސްވީ އެ ކައުންސިލްގައި އިންނެވި އެމްޑީޕީ މެންބަރު މަރްޔަމް ހަސަން އިސްތިއުފާ ދެއްވުމުންނެވެ.