މުދައްރިސުންގެ މުސާރައަށް އައި ބަދަލާއެކު މުދައްރިސުން ހޯދުމުގައި ވަރަށް ބޮޑަށް ފަސޭހަވެފައިވާކަަމަށް އެޑިއުކޭޝަން މިނިސްޓްރީން ބުނެފިއެވެ.

ދިރާސީ އާ އަހަރުގެ ކިޔެވުން ފެށުމަށް ވަމުންދާ ތައްޔާރީތަކާ ގުޅޭގޮތުން ބޭއްވި މައުލޫމާތު ހިއްސާކުރުމުގެ ބައްދަލުވުމެއްގައި ވާހަކަފުޅުދައްކަވަމުން އެޑިއުކޭޝަން މިނިސްޓްރީގެ ޕަރމަނަންޓް ސެކްރެޓަރީ އަހުމަދު އަލީ ވިދާޅުވީ، ކުރިން މުދައްރިސުންނާއި ޕްރިންސިޕަލުން ހޯދުމަށް އެޑިއުކޭޝަން މިނިސްޓްރީން ކުރާ އިއުލާންތަކަށް އިޖާބަދޭ މިންވަރު ދަށްކަން ވަރަށް ބޮޑަށް ފާހަގަކުރެވޭކަމަށެވެ. އަދި މުދައްރިސުން ހޯދުމަށް އެދި ކުރާ އިއުލާންތަކަށް އެކަށީގެންވާ ތަރުހީބެއް ނުލިބުމުގެސަބަބުން، ބައެއް ހާލަތުތަކުގައި ދެތިން ފަހަރު އެއް މަގާމަކަށް މީހުން ހޯދަން އިއުލާންކުރަން ޖެހިފައިވާ ކަމަށްވެސް އޭނާ ވިދާޅުވިއެވެ.

މުދައްރިސުންގެ މުސާރައަށް އައި ބަދަލާއެކު ބައެއް މުދައްރިސުންނަށް 10،000 ރުފިޔާގެ ކުރިއެރުމެއް ލިބިފައިވާއިރު، ގިނަ މުދައްރިސުންނަށް މުސާރައިގެ ގޮތުގައި20،000 ރުފިޔާ ލިބޭނެކަމަށް އެޑިއުކޭޝަން މިނިސްޓްރީން ވަނީ ބުނެފައެވެ. މި ބަދަލާއެކު، އުނގަންނައިދިނުމުގެ ދާއިރާގައި ތިބި މީހުންވެސް އަލުން އެ ދާއިރާއަށް ޚިދުމަތްކުރުމުގެ ޝައުގުވެރިކަން ފާޅުކުރަމުންދާކަމަށާއި، ރިޓަޔަރކޮށްފައިވާ ޕްރިންސިޕަލުންވެސް އަލުން އެ ދާއިރާއަށް ޚިދުމަތްކުރުމުގެ ޝައުގުވެރިކަން ހުރިކަމަށް އެ ވުޒާރާއިން ވަނީ ފާހަގަކޮށްފައެވެ.

މިއަދުގެ މައުލޫމާތު ދިނުމުގެ ބައްދަލުވުމުގައި އެ ވުޒާރާއިން ވަނީ، މުދައްރިސުންގެ މުސާރަ ބޮޑުކުރިއިރު މުދައްރިސުން ފާޅުކުރި ބައެއް ކަންބޮޑުވުންތަކާމެދު ވާހަކަދައްކާފައެވެ. އެގޮތުން މުސާރައިގެ އޮނިގަނޑަށް ބަދަލު ގެނައުމުގެ ކުރިން ލިބެމުންދިޔަ އެލަވަންސްތައް ނުލިބޭތީ މުދައްރިސުން އެކަމާމެދު ކަންބޮޑުވުން ފާޅުކޮށްފައިވާކަން އެ މިނިސްޓްރީއިން ވަނީ ފާހަގަކޮށްފައެވެ. އެލަވަންސްތައް މުސާރައިގެ އޮނިގަނޑުގައި ނުހިމެނެނީ، މިހާރު މުސާރަ އެކުލަވާލާފައިވާ ގޮތުން، އެލަވަންސްތަކުގެގޮތުގައި ވަކި އަދަދެއް ހިމަނާފައިނުވާތީ ކަަމަށްވެސް އެ ވުޒާރާއިން ބުނެއެވެ. އެހެންނަމަވެސް އެ ބަދަލާއެކު މުދައްރިސުންގެ މުސާރައަށް 4000އާ 10،000އާ ދެމެދު އިތުރުވެފައިވާނެކަމަށް އެ ވުޒާރާއިން ބުނެއެވެ.

އެޑިއުކޭޝަން ޑިވެލޮޕްމަންޓު ޕްރޮފެޝަނަލުންނަށް ބަލާއިރު، އެންމެ ދަށް ރޭންކުގެ މުވައްޒަފަކަށްވެސް 20000ށްވުރެ ބޮޑު މުސާރައެއް ލިބޭނެކަމަށާއި، އެންމެ މަތީ ރޭންކުގެ މުވައްޒަފަކަށް 32218 ރުފިޔާގެ މުސާރައެއް ލިބޭނެކަމަށްވެސް ފިނޭންސް މިނިސްޓްރީން ވަނީ ބުނެފައެވެ.