ހިޔާ ފްލެޓުތަކަށް ފެން ވަންނަ މައްސަލަ ހައްލުކުރުމުގެ މަސައްކަތް މިހާރު ކުރިއަށް ދާކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ސުހައިލް ވިދާޅުވީ ހިޔާ ފްލެޓްގައި ދިމާވި މައްސަލަތަކުގެ ތެރެއިން އެ ތަނުގެ ކުޑަ ދޮރުތަކުން ފެން ވަންނަ މައްސަލަ ހައްލުކުރުމާއި، ހިޔާ ފްލެޓުގެ ކޮރިޑޯތަކުގައި ފެން ބޮޑުވާ މައްސަލަ ހައްލުކުރުމަށް މަސައްކަތް ކުރަމުންދާ ކަމަށެވެ. އެ މައްސަކަތް ކުރަމުން ދަނީ، މިހާރު ކުރަމުންދާ ހުޅަނގު މޫސުމުގެ ވިއްސާރައިގެ އަސަރު އެންމެ ބޮޑުކޮށް ކުރާ ފްލެޓްތަކާއި، އެފަދަ މައްސަލަތައް ކުރިން ރިޕޯޓްކޮށްފައިވާ ފަރާތްތަކަށް އިސްކަން ދީގެން ކަމަށް ވެސް ސުހައިލް ވިދާޅުވިއެވެ. މީގެ އިތުރުން ހިޔާ ފްލެޓް ސަރަހައްދުގައި ލިބެން ހުރި އަސާސީ ޚިދުމަތުގެ ފެންވަރު ރަނގަޅުކުރުމަށް މަސައްކަތްތަކެއް ކުރަމުންދާ ކަމަށް ވެސް އޭނާ ވިދާޅުވިއެވެ. 

ފަލަސުރުޚީ ޕްރޮގްރާމްގައި ވާހަކަދައްކަވަމުން ސުހައިލް ވަނީ، ހިޔާ ފްލެޓުގެ އިތުރުން ފޭސް 2ގައި ލިބެން ހުރި އެހެނިހެން ޚިދުމަތްތަކުގެ ފެންވަރު ރަނގަޅުކުރުމަށް މަސައްކަތް ކުރަމުންދާކަން ފާހަގަކުރައްވާފައެވެ. އެގޮތުން ހިޔާ ފްލެޓް ސަރަހައްދާއި ފޭސް2ގެ އެހެން ސަރަހައްދުތަކުގެ މަގުތައް ހެދުމުގެ މަސައްކަތް ކުރަމުންދާކަމަށް އޭނާ ވިދާޅުވިއެވެ. މީގެ އިތުރުން މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ ދަތިކަމަށް ހައްލެއް ހޯދައިދިނުމުގެ ގޮތުން، ހުޅުމާލެއިން ދޫކުރުމަށް ހަމަޖެހިފައިވާ 1000 ގޯތި ދިނުމަށް ހަމަޖެހިފައި ވަނީ ފޭސް 2ގެ ސަރަހައްދުތަކުން ކަމަށް ސުހައިލް ވަނީ ވިދާޅުވެފައެވެ. ގޯތި ދޫކުރާނެ ސަރަހައްދުތަކުގެ ތަފްސީލް ހިމެނޭ ޕްލޭނެއް މިހާރު ހައުސިން މިނިސްޓްރީ އާއި ހިއްސާކޮށްފައިވާ ކަމަށް ސުހައިލް ވިދާޅުވިއެވެ. މީގެ އިތުރުން، ހުޅުމާލެއިން ގޯތި ދިނުމަކީ ފޭސް2 އެކުލަވާލިއިރު ޕްލޭންގައި ހިމެނިފައިވާ ކަމަކަށް ނުވާތީ، އެ ސަރަހައްދުން ގޯތި ދިނުމަށް ނިންމުމާއި ގުޅިގެން ފޭސް2ގެ ޕްލޭނަށް ބައެއް ބަދަލުތައް ގެނެސްފައިވާނެ ކަމަށް ސުހައިލް ވިދާޅުވިއެވެ.

މީގެއިތުރު ން ސުހެއިލް ވަނީ ހުޅުމަލޭ ފޭސް 2ގައި މަގު ހުރަސް ކުރާ މީހުންނަށް ޚާއްސަ ސޯލަރ އެނަރޖީ ލައިޓްތަކެއް ހަރުކުރުމުގެ މަސައްކަތް ކުރަމުންދާ ކަމަށް ވެސް ވިދާޅުވެފައެވެ.