އަގުބޮޑުވި ޓެކްސީ ދަތުރުތަކާއެކު، މިނީ ބަހުގެ ޚިދުމަތަށް ކެތްމަދުވެފައި

މުޅި ދުނިޔެއަށްވެސް އިންތިހާއަށް ދަތި ދުވަސްވަރެކެވެ. ބޮޑު ބަލިމަޑުކަމަކާ މުޅި ދުނިޔެއިން ހަނގުރާމަކުރަމުންދާއިރު، ގައުމުތަކުގެ މެދުގައިވެސް ކުރިއަށްދަނީ ހަނގުރާމައެވެ. މިއީ މިފަހަކުން ގައުމުތަކަށް އެންމެ ބޮޑު ގޮންޖެހުމެއް ކުރިމަތިކުރުވި ދެ ކަމެވެ. އިގްތިސާދުތައް އިންތިހާއަށް ދަށްވަނީއެވެ. އަސާސީ މުދާ ލިބުމަށް ދަތިވަނީއެވެ. ތަކެތީގެ އަގު އިންތިހާއަށް އުފުލެނީއެވެ. ޚިދުމަތްތަކުގެ އަގުވެސް މެއެވެ. ހައްތަހާވެސް ދަތިތަކެވެ.

ތެލަކީ ހަގީގަތުގައި ވަރަށް މުހިންމު އެއްޗެކެވެ. އަހަރުމެންނަށް މި ލިބޭ ކަރަންޓަކީ ތެޔޮ އަންދައިގެން އުފައްދާ އެއްޗެކެވެ. އަހަރުމެން ދުއްވާ އުޅަނދުފަހަރަށް އަޅަނީ ތެލެވެ. އަދިވެސް މި ނޫން އެތައް މުހިންމު ކަމަކަށް ތެޔޮ ބޭނުންކުރާއިރު، ތެލުގެ އަގު އިންތިހާއަށް އުފުލިގެން ދިއުމަކީ ސީދާ ރައްޔިތުންނަށް ދަތިވި ކަމެކެވެ. ރައްޔިތުންގެ ޖީބުން ދާ އެއްޗެއް ބޮޑުވި ކަމަކަށެވެ. މިއާއެކު ޚިދުމަތްތަކުގެ އަގުވެސް ބޮޑުވީއެވެ.

ރާއްޖެއަށް ބަލާލާ ކަމުގައިވާނަމަ އެއް ރަށުން އަނެއް ރަށަށް ދަތުރުކުރާ ލޯންޗުތަކުންނާއި، ބޯޓުތަކުން ނަގާ އަގުވެސް ދެގުނަ ބޮޑުކޮށްފިއެވެ. ތެލުގެ އަގު އުފުލެން ފެށި ހިސާބުން ޓެކްސީތަކުންވެސް ދަތުރުތަކުގެ އަގު ބޮޑުކުރަން ހިފާލިއެވެ. އެހެންނަމަވެސް އޭރު ޓްރާންސްޕޯޓް މިނިސްޓްރީން އަގުބޮޑު ނުކޮށް ވޭތޯ ވަރަށް ބޮޑަށް ބެލިއެވެ. އެހެންނަމަވެސް އެގޮތަށްވެސް ބެލޭނީ ވަކި ވަރަކަށްކަން ގަބޫލުކުރަމެވެ. އިތުރު ގޮތެއް ނެތިގެން މިއަދު މިވަނީ ޓެކްސީތަކުގެ ދަތުރުތަކުގެ އަގު ބޮޑުކޮށްފައެވެ.

މިކަމާއި ރައްޔިތުންގެ ބޮޑެތި ކަންބޮޑުވުންތަކެއް ހުންނާނެކަން ޔަގީނެވެ. އެހެންނަމަވެސް އަދުގެ ހާލަތު ވަރަށް ސާފެވެ. މިނޫން އިތުރު ގޮތެއް ނެތީ ކަމަށް ވެދާނެއެވެ. އެހެންނަމަވެސް، ރައްޔިތުންގެ ޖީބުން ދާ އެއްޗެއް އަނެއްކާވެސް އިތުރުވާއިރު، މި ދަނޑިވަޅުގައި ގިނަ ބަޔަކު ދަނީ އަގު ހެޔޮކޮށް އެއް ތަނުން އަނެއް ތަނަށް ދަތުރުކުރުމަށް ބަސް ދަތުރުތައް ޚިޔާރުކުރަމުންނެވެ. ހުޅުމާލެއާއި މާލެއާ ދެމެދު ދަތުރުކުރުމަށް ބަސް ޚިޔާރުކުރާއިރު، މިހާރު ރައްޔިތުން ކެތްމަދުވެފައިވަނީ މާލެ އެތެރޭގައި ފަށަން ނިންމާފައިވާ މިނީ ބަހުގެ ޚިދުމަތަށެވެ.

މިއީ ހެޔޮ އަގެއްގައި މާލެ ތެރޭގެ އެއް ތަނުން އަނެއް ތަނަށް ދަތުރުކުރެވޭނެ ފަހި މަގެކެވެ. މި މަސައްކަތް ފެށުމަށް އެމްޓީސީސީއާ ހަވާލުކޮށްފައިވާއިރު، އެމްޓީސީސީން މަސައްކަތްކުރަމުންދަނީ މި ހިނގާ ޖުލައި މަހުގެ ތެރޭގައި މި ޚިދުމަތް ފެށުމަށެވެ. މި މަސްތެރޭގައި މާލޭގެ ބޮޑެތި މަގުތަކުގައި މިނީ ބަހުގެ ޚިދުމަތް ފަށަން ނިންމާފައިވާއިރު، މިއީ ރައްޔިތުންނަށް ފަސޭހަތަކެއް ވާނެ ކަމެއްކަން ޔަގީނެވެ. ހަމަގައިމުވެސް މި ދަނޑިވަޅުގައި މިކަން ފަށައިފިނަމަ ރައްޔިތުންގެ ޖީބަށް ވަރަށް ބޮޑަށް ލުއިވާނެއެވެ. މިއީ މާލެ ސަރަޙައްދުގައި ދަތުރުފަތުރުގެ ކަންކަން ހަރުދަނާކުރުމަށް ކުރަމުންދާ މަސައްކަތަށް އެޅިގެންދާނެ ހަރުދަނާ ފިޔަވަޅެއްވެސް މެއެވެ.

މިއަދު ދުނިޔޭގައި ހިނގަމުންމިދާ ކަންކަމަށް ބަލާފައި، އަތްމައްޗަށް ލުއިވާނެ ގޮތެއް ޚިޔާރުކުރަންޖެހެއެވެ. ޚަރަދު ކުޑަކުރަން ވިސްނަން ޖެހެއެވެ. މާދަމާ ވާނެ ގޮތެއް އެއްވެސް މީހަކަށް ނޭނގޭނެއެވެ.