އިންޑިޔާގެ ދެރައްޔިތުން ކީރިތި ރަސޫލާ މުހައްމަދު ސައްލަﷲ އަލައިހި ވަސައްލަމް އަށާއި އިސްލާމްދީނަށް ފުރައްސާރަކުރި މައްސަލަ މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އިން ކުށްވެރިކޮށްފިއެވެ.
އެ ޕާޓިން ހޯމަ ދުވަހު ނެރުނު ބަޔާނެއްގައި ބުނީ އިންޑިއާގެ ވެރިކަން ކުރާ ބަހާރަތިޔަ ޖަނަތާ ޕާޓީ (ބީޖޭޕީ) ގެ އިސް ތަރުޖަމާނު ކީރިތި ރަސޫލާއަށް ފުުރައްސާރަ ކުރި މައްސަލައިގައި ނުރުހުން ފާޅު ކުރާ ކަމަށާއި އެކަން ހަރުއަޑުން ކުށްވެރި ކުރާ ކަމަށެވެ. މިއީ އިސްލާމް ދީނަށް ފުރައްސާރަ ކުރުމުގެ އަމަލެއް ކަމަށް ދެކޭ ކަމަށް ވެސް އެ ބަޔާނުގައި ވަނީ ބުނެފައެވެ.
އެމްޑީޕީން ބުނީ ބީޖޭޕީ ފަދަ ދީންތަކަށް އިހުތިރާމު ކުރާ ޕާޓީއެއްގެ އިސް ފަރާތްތަކުން އެފަދަ ނާތަހުޒީބު އަމަލެއް ހިންގުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެކަން ކުރި ފަރާތާ މެދު ފިޔަވަޅު އަޅާފައިވާތީ ތަރުހީބު ދޭ ކަމަށް ވެސް އެ ޕާޓީން ވަނީ ބުނެފައެވެ.
ބީޖޭޕީގެ އިސް ތަރުޖަމާނު ރަސޫލާއަށް ފުރައްސާރަ ކުރުމުން ދިވެހި ސަރުކާރުން ވެސް ވަނީ އެކަން ހަރުކަށި އިބާރާތުން ކުށްވެރިކޮށްފައެވެ. އެގޮތުން، ހަގީގަތާޚިލާފު ވާހަކަ ދެއްކުމަކީ ދިވެހި ރާއްޖޭގެ ސަރުކާރުން އެއްވެސް ގޮތަކަށް ބަލައިގަންނާނެ ކަމެއް ނޫންކަމަށް ސަރުކާރުން ނެރުނު ބަޔާނުގައި ވަނީ ބުނެފައެވެ.
ފޮރިން މިނިސްޓްރީން މިކަމާ ގުޅިގެން ނެރުނު ބަޔާނުގައި ވަނީ މިފަދަ ހުރިހާ އަމަލެއް ސަރުކާރުން ވަރަށް ހަރުކަށި އިބާރާތުން އަބަދުވެސް ކުށްވެރިކުރާ ކަމަށް ބުނެފައެވެ. އެގޮތުން އިސްލާމް ދީނާއި ކީރިތި ރަސޫލާ އުނގަންނައިދެއްވި ރިވެތި އުސޫލުތަކާ ދެކޮޅަށް ހިންގާ ހުރިހާ ހަރަކާތްތައް ސަރުކާރުން އެންމެ ހަރުކަށިކޮށް ކުށްވެރިކުރާއިރު، އިސްލާމްދީނާއި ރަސޫލާއަށް އަމާޒުކޮށް ދޮގު ވާހަކަތައް ދެއްކުމަކީވެސް ސަރުކާރުން އެއްވެސް ހާލަތެއްގައި ބަލައިގަންނާނޭކަމެއް ނޫންކަމަށް ބަޔާނުގައި ބުނެފައިވެއެވެ.
ރަސޫލާއަށް ފުރައްސާރަކޮށް ބީޖޭޕީގެ އިސް ތަރުޖަމާން ނުޕުރު ޝަރުމާ ވާހަކަދައްކާފައިވަނީ އިންޑިއާގެ ޓީވާ ޗެނަލެއްގައެވެ. އެ މައްސަލައާއި ގުޅިގެން އިސްލާމީ ގިނަ ގައުމުތަކުން ނުރުހުން ފާޅުކޮށް ބަޔާން ނެރުމާ ގުޅިގެންނާއި އިންޑިއާގެ މުސްލިމުން އެކަމާ ދެކޮޅަށް އިހްތިޖާޖުކުރަން ފެށުމުން ބީޖޭޕީން ވަނީ އޭނާ އާއި ޕާޓީގެ މީޑިއާ އިންޗާޖުގެ ގޮތުގައި ހުރި ނަވީން ކުމާރު ޕާޓީގެ މަގާމުތަކުން ސަސްޕެންޑްކޮށްފައެވެ.
