ޗެއަރޕާސަންގެ އިންތިހާބު – ރިޔާސީ އިންތިހާބުގެ ގޮތް ނިންމާނެ އިންތިހާބަކަށް ވެދާނެތަ؟

ރާއްޖޭގައި މިފަހަކުން ބޭއްވި އިންތިހާބުގެ ތެރެއިން އެންމެ ފޯރިގަދަ އެއް އިންތިހާބަކީ 2018 ވަނަ އަހަރުގެ ރިޔާސީ އިންތިހާބެވެ. އަނިޔާވެރިކަމާއި ވައްކަމާއި ރައްޔިތުންގެ އަޑު ކަނޑުވާލަން މަސައްކަތް ކުރި ވެރިކަމެއް ނިމުމަކަށް ގެންނަން ދިވެހި ރައްޔިތުން ނުކުމެ ވޯޓި ދިން އިންތިހާބެކެވެ. އެންމެ ފޯރިގަދަ އަދި އެތައް ހާސް ބަޔަކު އެކަމަށް އިންތިޒާރު ކުރި އިންތިހާބެކެވެ.

އޭގެ ފަހުން ވެސް 2 އިންތިހާބެއް ނިމިގެން ހިނގައްޖެއެވެ. މަޖިލިސް އިންތިހާބު ވެސް ވެގެންދިޔައީ ފޯރިގަދަ އިންތިހާބަކަށެވެ. އަދި މިއާއެކު ލޯކަލް ކައުންސިލް އިންތިހާބު ވެސް ފޯރިގަދައެވެ. ނަމަވެސް ދެން އޮންނަ ރިޔާސީ އިންތިހާބެއްގައި ރާއްޖޭގެ އެންމެ ބޮޑު ސިޔާސީ ޕާޓީން ނެރޭނެ ނަތީޖާއަކާއި މެދު ސުވާލު އުފައްދާނީ ހޮނިހިރު ދުވަހު ބޭއްވޭ އެމްޑީޕީގެ އެތެރޭގެ އިންތިހާބުގެ ތެރެއިން ވެސް ޗެއަރޕާސަންގެ އިންތިހާބާއެކުއެވެ.

އެމްޑީޕީ އޮތީ ދެބައިވެފައިކަން އެ ޕާޓީގެ އާންމު މެންބަރުންނާއި އާންމު ބައެއް ރައްޔިތުން ދައްކާ ވާހަކައަކީ މިއަދު ފެންނަން އޮތް ހަގީގަތެކެވެ. ނަމަވެސް މި ދެބައިވުން އެއްކޮށް އެކައްޗެއްގެ ގޮތުގައި ހަދަން ދެން އިންތިހާބު ކުރެވޭ ޗެއަރޕާސަންއެއް މަސައްކަތް ކުރަންޖެހޭނެއެވެ. މި އިންތިހާބުގެ ނަތީޖާ ކޮންމެ ގޮތަކަށް ނުކުތް ނަމަވެސް ރިޔާސީ އިންތިހާބަށް މުޅި ޕާޓީ އެކަތިގަނޑަކަށް ވާންޖެހޭނެއެވެ.

ނަމަވެސް އުފެދޭ ސުވާލަކީ ޕާޓީން އެ ޕާޓީގެ ގައުމީ މަޖިލީހުންނާއި އަސާސީ ގަވާއިދުން ބުނެފައިވާ ކަންކަން ޗެއަރޕާސަންއަކަށް ހުންނަ ފަރާތެއް ތަންފީޒުކުރާނެތޯ، މި ސުވާލެވެ. އެމްޑީޕީގެ މެންބަރަކު ރައީސުލްޖުމްހޫރިއްޔާ ކަމުގައި ހުންނަވާނަމަ އޮޓޮމެޓިކުން ދެވަނަ ދައުރެއް ދޭންޖެހޭކަމަށް ބުނެފައިވެއެވެ. ނަމަވެސް އުފެދޭ ސުވާލަކީ އެކަން އެހެންވެދާނެތޯއެވެ.

މި ސަބަބާއި ހުރެ އެމްޑީޕީ އެއްކުރެވިދާނެތޯއެވެ. މިސާލަކަށް ބަލާނަމަ ޗެއަރޕާސަންކަމަށް ވާދަކުރައްވާ އިކޮނަމިކް މިނިސްޓަރ ފައްޔާޒު އިސްމާއިލް ހޮވިވަޑައިގެންފިނަމަ މިހާރު އެމްޑީޕީގެ ޓިކެޓުގައި ރާއްޖޭގެ ވެރިކަމުގައި ހުންނެވި ރައީސް އިބްރާހިމް މުހައްމަދު ސޯލިހަށް ދެވަނަ ދައުރެއް ދިނުމަށް ތާއިދުކުރައްވާ ކަމަށް ވިދާޅުވިއެވެ. ނަމަވެސް މާފަންނު އުތުރުދާއިރާގެ މެންބަރު އިމްތިޔާޒު ފަހުމީ ވިދާޅުވަނީ ޕްރައިމަރީއެއް އޮންނާނެ ކަމަށެވެ. ދެން އުފެދޭ ސުވާލަކީ ދެން ވާނީ ކިހިނެއް ހެއްޔެވެ.

އިންތި ހޮވިވަޑައިގެންފިނަމަ ޕްރައިމަރީއަކަށް ބާރުއަޅުއްވާނީ ތޯއެވެ. ފައްޔާޒު ހޮވިވަޑައިގެންފިނަމަ ރިޔާސީ ޓިކެޓް ރައީސް ސޯލިހަށް ދެއްވާނީތޯއެވެ. އެހިސާބުން 2023ށް ޕާޓީ އެއްކުރަން ކުރަންޖެހޭ މަސައްކަތް ގޮސް ޖެހޭނީ ކޮންތާކުބާއެވެ. ދެފަޅިވެފައިވާ އެމްޑީޕީ އެއްކުރެވޭނެ ފޯމިއުލާއަކީ ކޮބައިބާވައެވެ.

ކޮންމެ ގޮތެއް ވިޔަސް ޕާޓީއެއްގެ ތެރޭގައި ދެބައިވުން އުފެދިފައިވަނިކޮށް ނެރޭ ކެންޑިޑޭޓަކަށް އާންމު ހުރިހާ މެންބަރުން ތާއިދު ނުކުރާނެއެވެ. އެހިސާބުން އިދިކޮޅު ފަރާތްތަކުން އެކަމުގެ ފައިދާ ނަގައި އެމްޑީޕީގެ ބަލިފައިގައި ހިފާ ކުރިއަށް ދެވޭނެ މަގު ނިކަން ފަސޭހައިން ހޯދާނެއެވެ.

އެމްޑީޕީ މިހާރަށްވުރެ ވަރުގަދަކުރަން އާންމު މެންބަރުންގެ ހަރަކާތްތެރިވުން އިތުރުކުރަން ޖެހެއެވެ. އާންމު މެންބަރުންގެ ބަސް ވިކޭ ގޮތަށް ރަށްރަށުގައި ހަރަކާތްތައް އިތުރުކޮށް ޖަގަހަ ޖަލްސާތައް ބާއްވާ ޕާޓީގެ އިސް ސަފުގައި އޮތް ނުރުހުން އެއްފަރާތްކުރަންޖެހެއެވެ. ރިޔާސީ އިންތިހާބު އޮތީ ބޯމަތިވެފައެވެ. އިންތިހާބު އޮންނާނީ 2023 ގައެވެ. 2023 ހޯދަން ބޭނުން ނަމަ ޕާޓީ އެއްކުރަންވީ މިއަދުއެވެ. ފަހުން އެކަން ކުރަން ތިބެގެން އެކަމެއް ނުވާނެއެވެ.