އަޅުގަނޑު އާދޭހާއެކު ދަންނަވަން އޮތީ ކޮމިޓީއެއް ހައްދަވައިގެން ތުހުމަތުތައް ބައްލަވާށޭ - ފައްޔާޒު
ވާދަވެރި ކެންޑިޑޭޓަށް އާދޭހާއެކު ދަންނަވަން ބޭނުންވަނީ، ކޮމިޓީއެއް ހައްދަވައިގެން އެކަންކަން ބެއްލެވުމަށް
އެމްޑީޕީގެ ޗެއަރޕަރސަންގެ މަގާމަށް ވާދަކުރައްވާ ދެ ކެންޑިޑޭޓުންގެ މެދުގައި ކުރިއަށްގެންދެވުނު ބަހުސް
ހުޅުވާލާފައިވާ އާންމު އިންކުއަރީއެއްގެ ގޮތުގައި މަޖިލީހުގެ ތެރެއިން މަސައްކަތްކުރައްވައި ޖަވާބުދާރީވާނެ ފުރުސަތެއް އެރުވުމަށް އެމްޑީޕީގެ ޗެއަރޕާސަންގެ އިންތިޚާބުގައި ވާދަކުރައްވާ އިކޮނަމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.
އެމްޑީޕީގެ އެތެރޭގެ އިންތިޚާބުތަކުގެ ތެރެއިން، އެންމެ ފޯރިގަދަވާނެކަމަށް ބެލެވޭ ޗެއަރޕަރސަންގެ އިންތިޚާބުގައި ވާދަކުރައްވާ 2 ކެންޑިޑޭޓުން ކަމަށްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީއާއި އިކޮނަމިކް މިނިސްޓަރ ފައްޔާޒު އިސްމާއީލް އަލަށް އެއް ޕްލެޓްފޯމަކަށް ވަޑައިގެން ވަނީ ބަހުސްކުރައްވާފައެވެ. ރާއްޖެޓީވީން ގެނެސްދިން މި ބަހުސްގައި އިމްތިޔާޒު ދެއްކެވި ވާހަކައަށް ރައްދު ދެއްވައި ފައްޔާޒު ވިދާޅުވީ، ތިލަފަތުގެ ރަމްޒަކީ ހަމަހަމަކަން ކަމަށާއި، ތިލަފަތުގެ ރަމްޒަކީ ފިތުނަވެރި ވާހަކަ ދެއްކުމެއް ނޫން ކަމަށެވެ.
ތިލަފަތުގެ ރަމްޒަކީ އިންސާފުވެރިކަމާއެކު މީހުންނާދޭތެރޭގައި ވާހަކަދެއްކުން ކަމަށާއި، މީހަކަށް ތުހުމަތެއް ކޮށްފިނަމަ އެކަމެއް ރައްޔިތުންނާ ހަމައަށް ސާފުކޮށްދެއްވަންވާނެ ކަމަށެވެ.
ފައްޔާޒު ވިދާޅުވީ އޭނާގެ ވާދަވެރި ކެންޑިޑޭޓަށް އާދޭހާއެކު ވިދާޅުވަން ބޭނުންވަނީ ކޮމިޓީއެއް ހައްދަވައިގެން އެކަންކަން ބެއްލެވުމަށް ކަމަށެވެ. ކޮންމެ ތަނެއްގައި އެހެން ވިދާޅުނުވުމަށާއި، ބަހުސްގައި ވަކިކަމެއްގެ ވާހަކަ ސާފުކޮށް ވިދާޅުވެދެއްވުމަށެވެ.
ނަޒާހަތްތެރިކަމަކީ އިނގިލި ދިގުކުރުމެއް ނޫންކަމަށާއި، ނަޒާހަތްތެރިކަމަކީ އެއްކޮށް މަސައްކަތްކުރަމުން އަންނަ ބަޔަކާ ދޭތެރޭގައި އެފަދަ ވާހަކަތަކެއް ދައްކާއިރު، ސާބިތު ހިފޭގޮތަށް އެކަން ގެންދިއުން ކަމަށެވެ.
ފައްޔާޒު ވިދާޅުވީ، އިންތިއާ ބެހޭގޮތުން ތުހުމަތުކުރާނެ ވާހަކަ އެބަހުރި ކަމަށާއި، އެކަމަކު އެބޭފުޅުން ނަޒާހަތްތެރި ވީމައި، ސާބިތު ނުހިފޭނެ ވާހަކަތަކަށްވާތީ އެ ވާހަކަ ނުދައްކަވާނެ ކަމަށެވެ. އަދި ޒިންމާދާރު ގޮތަކީ އެފަދަ ތުހުމަތުތަކެއް ހުރިނަމަ ސާބިތުކޮށްދެއްވުން ކަމަށެވެ.
