"2023 ކާމިޔާބު ކުރުމަށް ފާޓީއާމެދު ގެއްލެމުންދާ އިތުބާރު ހޯދަން ޖެހޭ"
ބަހުސް ކުރިއަށް ގެންގޮސްފައިވަނީ، 5 ބުރަކަށް ބަހާލައިގެން
ޗެއަރޕާސަން ބަހުސް 2022ގެ ތެރެއިން
2023 ކާމިޔާބު ކުރުމަށް ފާޓީއާމެދު ގެއްލެމުންދާ އިތުބާރު ހޯދަން ޖެހޭ ކަމަށް މޯލްޑިވިަން ޑިމޮކްރެޓިކް ޕާޓީގެ ޗެއަރޕާސަންގެ މަގާމަށް ވާދަކުރައްވާ ދެ ކެންޑިޑޭޓުން ވިދާޅުވެއްޖެއެވެ.
ރާއްޖެޓީވީން ކުރިއަށްގެންދިޔަ "ޗެއަރޕާސަން ބަހުސް 2022"ގައި ވާހަކަފުޅު ދައްކަވަމުން ޗެއަރޕާސަންގެ މަގާމަށް ވާދަކުރައްވާ ކެންޑިޑޭޓް ނަމްބަރު 1، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ، 2023 އިންތިޚާބު އެމްޑީޕީން ކާމިޔާބު ކުރަންޖެހޭ ކަމަށެވެ. އެކަމަށްޓަކައި މިހާރު ކުރަން ޖެހޭ އެންމެ މުހިންމު ކަމަކީ، ޕާޓީއާ މެދު ގެއްލެމުންދާ އިތުބާރު ހޯދުން ކަމަށެވެ. އަލުން އަނބުރާ ކުރީގެ ރޫހު ޕާޓީއަށް ގެންނަން ޖެހޭ ކަމަށް އިންތި ވިދާޅުވިއެވެ. އެމްޑީޕީން ވެފައިވާ ވައުދުތައް ފުއްދަން ޖެހޭ ކަމަށް އިންތި ވިދާޅުވިއެވެ. އިކޮނޮމިކް މިނިސްޓަރާ ހަވާލު ކުރެވިފައިވާ މަސްއޫލިއްޔަތު އަދާކުރާނަމަ އެމްޑީޕީން ވެފައިވާ ވައުދުތައް ފުއްދުން އަވަސްވެގެންދާނެ ކަމަށް ވިދާޅުވެ އިންތިވަނީ އިކޮނޮމިކް މިނިސްޓަރ ފައްޔާޒު އިސްމާއީލަށް ރައްދު ދެއްވާފައެވެ.
މި ބަހުސްގައި ވާހަކަފުޅު ދައްކަވަމުން ޗެއަރޕާސަންގެ މަގާމަށް ވާދަކުރައްވާ ކެންޑިޑޭޓް ނަމްބަރު 2، އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ، ޕާޓީގެ ތެރޭގައި އުފެދިފައިވާ ފިތުނަ ނައްތާލަން ޖެހޭކަމަށެވެ. އެ ފިތުނަ ނައްތާލައި 2023 ކާމިޔާބު ކުރުމަށް މަސައްކަތް ކުރަން ޖެހޭ ކަމަށެވެ. ފައްޔާޒު ވިދާޅުވީ، ހުރިހާ ބާވަތެއްގެ ފިތުނައާއި ފަސާދަ ނައްތާލަން ޖެހޭ ކަމަށާއި، 2023 ކާމިޔާބު ކުރުމަށް ގެއްލިފައިވާ އިތުބާރު އަނބުރާ ގެންނަ ޖެހޭ ކަމަށެވެ. ފައްޔާޒު ވިދާޅުވީ، ޕާޓީގެ ތެރޭގައި ވަކި ބަޔަކު ބޭނުން ގޮތަކަށް ކުރާ ކަންކަން ހުއްޓުވަން ޖެހޭ ކަަމަށެވެ.
ވައުދުތައް ފުއްދުމަށް ޕާޓީ ސަރުކާރުގެ ފަހަތުގައި ވަރުގަދައަށް އޮންނަން ޖެހޭ ކަމަށާއި، ކޮވިޑްގެ ހާލަތުގައި ޕާޓީ ގަދަޔަށް އޮތްނަަމަ މިއަށްވުރެ ރަނގަޅަށް ކަންކަން ކުރެވުނީސް ކަމަށް ފައްޔާޒު ވިދާޅުވިއެވެ. އެމަނިކުފާނުގެ ޗެއަރޕާސަން ކަމުގެ ދަށުން ޕާޓީން ސަރުކާރަށް އެއްބާރުލުން ދެއްވާނެ ކަމަށް ފައްޔާޒު ވިދާޅުވިއެވެ.
ކެމްޕެއިންގައި އެކި ރަށްރަށަށް ވަޑައިގެން އާންމު މެމްބަރުންގެ ކަންބޮޑުވުންތައް އަޑުއެއްސެވިކަން ދެ ބޭފުޅުންވެސް ފާހަގަކުރެއްވިއެވެ.
އިންތި ވިދާޅުވީ، އެމްޑީޕީގެ ހިންގުމާމެދު އާންމު މެމްބަރުންގެ އެންމެ ބޮޑު ކަންބޮޑުވުމަކީ، އެމްޑީޕީގެ މެމްބަރުންގެ ބައިވެރިވުމާ ނުލާ ވެރިކަން ހިންގާކަން ކަމުގައެވެ. ވައުދުތައް ސަރުކާރުން ފުއްދިގެން ނުދާކަން މެމްބަރުން ފާހަގަކުރާ ކަމަށާއި، މާލޭގެ ރައްޔިތުންނަށް ބޯހިޔާވަހިކަން ފޯރު ކޮށްދިނުމުގެ ވައުދު އަދި ނުފުއްދިވާކަން މެމްބަރުން ފާހަގަކުރާ ކަމަށާއި، މަރުތަކުގެ މައްސަލަ އަދި ރައީސް ނަޝީދަށް ދިން ހަމަލާގެ މައްސަލަ ނުބެލިވާކަމުގެ ޝަކުވާ މެމްބަރުންގެ ފަރާތުން ލިބިފައިވާ ކަމަށް އިންތި ވިދާޅުވިއެވެ.
މި ވާހަކަތަކަށް ރައްދު ދެއްވައި އފައްޔާޒު ވިދާޅުވީ، މެމްބަރުންގެ ފަރާތުން އަޑުއިވުނީ، އެމްޑީޕީގެ މެމްބަރުންގެ ބައިވެރިވުމާ ނުލާ ވެރިކަން ހިންގާކަން ނޫން ކަމަށެވެ. އެ މެމްބަރުން ޕާޓީން ބާކިވެފައިވާކަން ކަމުގައި ފައްޔާޒު ވިދާޅުވިއެވެ. އެމްޑީޕީ ވެރިކަމުގައި އޮވެ ސަރުކާރު ބަދުނާމު ކުރަމުންދާކަން މެމްބަރުން ފާހަގަރާ ކަމަށެވެ. ޕްރޮޖެކްޓްތައް ކުރިއަށް ގެންދިޔުން ލަސްކަން ގަބޫލްކުރައްވާ ކަމަށެވެ. އެހެންނަމަވެސް އެންމެ ބޮޑު ކަންބޮޑުވުމަކީ ޕާޓީ ނުހިނގާކަމާއި، ޖަގަހަތައް ނުހިގާކަން ކަމުގައި ފައްޔާޒު ވިދާޅުވިއެވެ. އަދި 2023 ކާމިޔާބު ކުރަން ބޭނުންނަމަ ޕާޓީ އެކަތި ގަނޑަކަށްވާން ޖެހޭ ކަމަށް މެމްބަރުން ގަބޫލް ކުރާ ކަމުގައި ފައްޔާޒު ވިދާޅުވިއެވެ.
މި ބަހުސް ކުރިއަށް ގެންގޮސްފައިވަނީ، 5 ބުރަކަށް ބަހާލައިގެންނެވެ.
