ރާއްޖެޓީވީ އިން ގެނެސްދޭ އިންތިއާއި ފައްޔާޒުގެ ބަހުސް މި މަހުގެ 11 ވަނަ ދުވަހުގެ ރޭ
ބަހުސް އޮންނާނީ މެއި 11 ވާ ބުދަ ދުވަހުގެ ރޭ 10:30 ގައި
އެމްޑީޕީގެ ޗެއަރޕާސަންގެ އިންތިޚާބުގައި ވާދަކުރައްވާ ދެ ކެންޑިޑޭޓުން
މި މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޗެއަރޕަރސަންގެ އިންތިޚާބުގައި ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒު ފަހްމީ (އިންތި)އާއި އިކޮނޮމިކް މިނިސްޓަރ ފައްޔާޒު އިސްމާއީލް އާއި ދެބޭފުޅުންގެ ދެމެދުގައި ރާއްޖެޓީވީން ބާއްވާ ބަހުސް މި މަހުގެ 11 ވާ ބުދަ ދުވަހުގެ ރޭ ބާއްވާގޮތަށް ހަމަޖައްސައިފިއެވެ.
މި ބަހުސް ބޭއްވުމަށްޓަކައި ވާންޖެހޭ ތައްޔާރީތައް މިހާރު އަންނަނީ ވަމުންނެވެ. ބަހުސް އޮންނާނީ މި މަހުގެ 11 ވާ ބުދަ ދުވަހުގެރޭ 10:30 ގައެވެ. އަދި މި ބަހުސް ވަގުތުން ރާއްޖެޓީވީން ދުރަށް ދައްކާނެއެވެ. މީގެ އިތުރުން ރާއްޖެޓީވީގެ ސޯޝަލް މީޑިއާ އެކައުންޓްތައް މެދުވެރިކޮށް ވެސް ވަގުތުން މި ބަހުސް ބަލާލެވޭނެއެވެ.
މި ބަހުސް ބޭއްވުމަށްޓަކައި, މި މަގާމަށް ވާދަކުރައްވާ 2 ކެންޑިޑޭޓުންނަށް ވަނީ ދައުވަތު އަރުވާފައެވެ. އަދި 2 ކެންޑިޑޭޓުންވެސް ވަނީ ދައުވަތު ގަބޫލުކުރައްވާފައެވެ. މިއީ 2 ކެންޑިޑޭޓުންގެ މެދުގައި މިފަދަ ބަހުސްއެއް ޓީވީ ސްޓޭޝަނަކުން ބާއްވާ ފުރަތަމަ ފަހަރެވެ.
އެމްޑީޕީގެ އެތެރޭގެ އިންތިޚާބުގެ ތެރެއިން އެންމެ ފޯރިގަދަވާނެކަމަށް ބެލެވޭ މި އިންތިޚާބުގައި ވާދަ ކުރައްވާ ދެ ކެންޑިޑޭޓުން ބަހުސް ރާއްޖެ ޓީވީން ގެނެސްދޭން ނިންމާފައިވަނީ، ދެ ކެންޑިޑޭޓުން އެއްތަނަކަށް ގެނެސް, ދެ ކެންޑިޑޭޓުންގެ ތަސައްވަރު ހާމަކޮށް, އާންމުން މިފަދަ ބަހުސްއެއް ބަލައިލަން ބޭނުންވާތީ އެ ފުރުސަތު ފަހިކޮށްދިނުމަށެވެ.
އެމްޑީޕީގެ އެތެރޭގެ އިންތިޚާބު ރޯދަމަހާ ދިމާވާތީ, ގައުމީ މަޖިލީހުގެ އަޣުލަބިއްޔަތުން އެ އިންތިޚާބު މި މަހުގެ 14 ވަނަ ދުވަހަށް ވަނީ ފަސްކޮށްފައެވެ. މެއި 14 ވާ ހޮނިހިރު ދުވަހު ބާއްވާ މި އިންތިޚާބަށް 2 ކެންޑިޑޭޓުން ވެސް އަންނަނީ ފޯރިއާއެކު ކެމްޕެއިން ކުރައްވަމުންނެވެ.
