ޓެރަރިޒަމްގެ ޢަމަލެއް ހިންގުމުގެ ތުހުމަތުގައި އައްޑޫސިޓީން ހައްޔަރުކުރި އެންމެން ދޫކޮށްލައިފި

މިދިޔަ މާރޗްމަހުގެ ފަހުކޮޅު އައްޑޫސިޓީގައި ފުލުހުން ހިންގި ޚާއްސަ އޮޕަރޭޝަނެއްގައި ޓެރަރިޒަމްގެ ޢަމަލެއް ހިންގި ކަމަށް ތުހުމަތު ކުރެވިގެން އެސިޓީން ހައްޔަރުކުރި އެންމެން ދޫކޮށްލައިފިއެވެ.

ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން  އައްޑޫގައި ހިންގި އެއޮޕަރޭޝަންގައި ހައްޔަރުކުރީ 9 މީހުންނެވެ. މިމީހުންގެ ތެރެއިން 3 މީހުން ކުރިން ދޫކޮށްލުމަށްފަހު އަނެއް 6 މީހުންގެ  ބަންދާއި މެދު ގޮތެއް ނިންމުމަށް ކޯޓަށް ޙާޒިރު ކުރުމުން ހިތަދޫ މެޖިސްޓްރޭޓް ކޯޓުންވަނީ އެ 6 މީހުންގެ ބަންދަށް  7 ދުވަސް ޖަހާފައެވެ.

މިއަދަށް އެ 7 ދުވަސް ހަމަވެފައިވުމާއެކު އެ 6 މީހުން ދޫކޮށްލީ އިތުރަށް ބަންދުގައި ބައިތިއްބަން ނުފެންނާތީ ކަމަށް ފުލުހުން މަޢުލޫމާތު ދެއެވެ.

ޓެރަރިޒަމްގެ ތުހުމަތުގައި އައްޑޫން ބަޔަކު ހައްޔަރުކުރީ ރައީސް އިބްރާހީމް މުޙައްމަދު ޞާލިޙްގެ ދެކަނބަލުންނާއި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަންޔަމް ޖައިޝަންކަރާއި އދ.ގެ އާންމު މަޖިލީހުގެ ރައީސް އަދި ފޮރިން މިނިސްޓަރު އަބްދުﷲ ޝާހިދާއި ހޯމް މިނިސްޓަރު ޢިމްރާން އަބްދުﷲ އާއި ރައްޔިތުންގެ މަޖިލީހުގެ ބައެއް މެންބަރުންނާއި ސަލާމަތީ ޚިދުމަތްތަކުގެ އެންމެ އިސްވެރިން ވެސް އައްޑޫގައި ތިއްބަވަނިކޮށެވެ. މިބޭފުޅުން އައްޑޫސިޓީއަށް ވަޑައިގެންނެވީ އައްޑޫގައި ސަރުކާރުން ހިންގާ ތަރައްޤީގެ މަޝްރޫތައް ފެއްޓެވުމާއި އަދި ބައެއް މަޝްރޫއުތައް ނިންމުމުގެ ރަސްމިއްޔާތުތަކުގައި ބައިވެރިވެވަޑައިގަތުމަށްޓަކައެވެ.