އައްޑޫ ސިޓީގެ ބިން ހިއްކުމަށް ވެފައި އެ އޮތް ވައުދު އެގޮތަށް ނިމިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އައްޑޫ ސިޓީއަށް ކުރެއްވި ރަސްމީ ދަތުރުފުޅުގެ ތެރެއިން އައްޑޫ ސިޓީގެ ރައްޔިތުންނަށް ދެއްވި މާހެފުމުގައި ވާހަކަފުޅުދަައްކަވަމުންނެވެ. ރައީސް ވިދާޅުވީ ބިން ހިއްކުން އެއީ އައްޑޫ ސިޓީގެ ވައުދުނާމާގައި އޮތް ކަމެއް ކަމަށާއި، އެ ވައުދުނާމާ ތަންފީޒުކުރަމުންދާއިރު, އެކަން ކުރާނެކަމަށެވެ. ރައީސް ވިދާޅުވީ އޭގެ އަމަލީ މަސައްކަތް ކުރުމަށްޓަކައި ބަޔަކާ ހަވާލުކުރެވިފައިވާ ކަމަށާއި، އޭގައި ތިމާވެއްޓާބެހޭ މައްސަލަތަކެއް އަދި ކަންބޮޑުވުންތަކެއް ހުރިކަން އެނގިވަޑައިގަންނަވާކަމަށެވެ.

ރައީސް ވިދާޅުވީ ތަރައްގީގެ ކޮންމެ މަޝްރޫެރއްގައި، ތިމާވެެއްޓާ ގުޅުންހުރި މިފަދަ މައްސަލަތަކެއް ހުންނަ ކަމަށެވެ. އެހެންކަމާއެކު އީ.އައި.އޭ.އެއް ހަދަމުންދާ ކަމަށާއި، އެއަށްފަހު، ތިމާވެއްޓަށް ކުރާނެ އަސަރުތައް ދެނެގަނެ، އެކަން ހައްލުކޮށް، އެންމެ ގެއްލުން ކުޑަވާނެ ގޮތަކަށް ބަލައިގެން، އެފަދަ މަޝްރޫއުތައް ކުރިއަށްގެންދަވާ ކަމަށެވެ.

ރައީސް ވިދާޅުވީ އައްޑޫ ސިޓީގައި ބިން ހިއްކުމުގެ މައްސަލަވެސް ގެންދަވާނީ އެގޮތަށް ކަމަށެވެ. އަދި އީ.އައި.އޭ.ގެ ކޮންސަލްޓަންސީގެ ބައްދަލުވުންތަކެއް، މާރިޗު 9 ވަނަ ދުވަހު ބޭއްވި، އެންމެފަހުގެ ހުށަހެޅުންތައް އީ.ޕީ.އޭ.އަށް ހުށަހަޅައި، ފައިނަލް ކުރުމުގެ މަސައްކަތް ކުރިއަށްދާ ކަމަށެވެ. ރައީސް ވިދާޅުވީ ލަސްތަކެއްނުވެ އެޕްރޫވަލް ލިބިގެންދާނެ ކަމަށެވެ. އަދި އެއާއެކު އަމަލީ މަސައްކަތް ފަށައިގެން ކުރިއަށް ގެންދާނީ، މިޓިގޭޝަން މެޝަރސްތައް އޭގައި ހުރިގޮތަށް އަޅައިގެން ކަމަށާއި، އައްޑޫ ސިޓީގެ ބިން ހިއްކުމަށް ވެފައި އޮތް ވައުދު އެގޮތަށް ނިމިގެންދާނެ ކަމަށެވެ.

މި މަޝްރޫއުގެ ދަށުން ހިތަދޫއިން 90 ހެކްޓަރުގެ ބިން، ހުޅުމީދޫއިން 23.3 ހެކްޓަރުގެ ބިން ހިއްކުމާއި, ޓޫރިޒަމަށް ޚާއްސަކޮށްގެން ފަސް ހެކްޓަރުގެ 2 ރަށް ހިއްކުން ހިމެނެއެވެ. އަދި މަރަދޫ/މަރަދޫފޭދޫއިން 76 ހެކްޓަރުގެ ބިން ހިއްކުމާއި، ޓޫރިޒަމަށް ޚާއްސަކޮށްގެން ފަޅުތެރެއިން ހިއްކައިގެން އުފައްދާ 8.3 ހެކްޓަރުގެ 3 ރަށާއި 3.3 ހެކްޓަރުގެ 2 ރަށް ހިއްކުން ހިމެނެއެވެ.

ރައީސް ވިދާޅުވީ ބިން ހިއްކަމުންދާއިރު، ޓޫރިޒަމް ތަރައްގީކުރުމަށްޓަކައި ވެވަޑައިގެންނެވި ވައުދާ އެއްގޮތަށް، އެ ތަނުގައި 5 ރަށް ހިކިގެންދާނެ ކަމަށެވެ. އެކަން ވެގެންދާނީ، މި ސަރަހައްދަށް ޓޫރިޒަމް ގެނައުމަށްޓަކައި ކުރާ މަސައްކަތަށް ލިބިގެންދާނެ އިތުރު ހިތްވަރަކަށް ކަމަށެވެ. އަދި މިހާތަނަށްއައިއިރު، އިގުތިސާދަށް ކުރިމަތިވި ދަތިކަމާއެކު, އައްޑޫ ސިޓީގެ ތަރައްގީއަށްޓަކައި މިހާތަނަށް 1 ބިލިއަން ރުފިޔާ ޚަރަދުކޮށްފައިވާކަމަށް ރައީސް ވިދާޅުވިއެވެ.

ރައީސް ވިދާޅުވީ މިއީ މުޅި ރާއްޖޭގެ ތަރައްގީއަށްޓަކައި މިވޭތުވެދިޔަ 3 އަހަރު ބަޖެޓުން ކުރި ޚަރަދުގެ ބޮޑު ބައެއް ކަމަށެވެ. އައްޑޫ ސިޓީގައި ކުރަން ޖެހިފައި ހުރި މަސައްކަތްތައް ގިނަ ކަމަށާއި، އައްޑޫ ސިޓީ ބޭނުންވާ ޚިދުމަތްތައް ބައިވަރު އެބަހުރި ކަމަށެވެ. އަދި މި ކަންތައްތައް ކުރެވޭނީ އެގޮތަށް، މި ޚަރަދުތައް ކޮށްގެން ކަމަށާއި، މިއީ ބޭކާރު ޚަރަދެއް ނޫންކަމަށެވެ. ރައީސް ވިދާޅުވީ މީގެ ފައިދާ އައްޑޫ ސިޓީގެ ރައްޔިތުންނަށް ލިބިގެންދާނެއެވެ.