ރާއްޖެ ހިނގަމުންދަނީ ބޭރުގެ މަދު ބައެއްގެ ބާރުގައި: އާޒިމް

ދިވެހިރާއްޖެ ހިނގަމުންދަނީ ބޭރުގެ ނުފޫޒު ގަދަ މަދު ގައުމުތަކެއްގެ ބާރުގައިކަމަށް މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި އަންގާރަ ދުވަހުގެ ރޭ ވާހަކަ ދައްކަވަމުން އަލީ އާޒިމް ވިދާޅުވީ، ދިވެހިރާއްޖެ ހިންގުމުގައި ރައީސް ޔާމީންގެ ކޮންޓްރޯލެއް ނެތް ކަމަށާއި މި ގައުމު ހިނގަމުންދަނީ ބޭރުގެ މަދު ގައުމުތަކެއްގެ ނުފޫޒާއި އެއްގޮތަށް ކަމަށެވެ.

ގަތަރާއެކު އޮތް 33 އަހަރުގެ ޚާރިޖީ ގުޅުން ކަނޑާލުމާއި ގުޅޭ ގޮތުން އަލީ އާޒިމް ވިދާޅުވީ، އެހާގިނަ ދުވަހު އޮތް ގުޅުމެއް ކަނޑާލުމަކީ ދިވެހި ރައްޔިތުންނަށް ވަރަށް ބޮޑު ހިތާމައެއް ލިބިގެންދާނެ ކަމެއް ކަމަށެެވެ.

ރާއްޖޭގެ ޚާރިޖީ ސިޔާސަތު މިހާރު ކަނޑައަޅަނީ ރާއްޖޭގެ ރައްޔިތުންގެ މަސްލަހަތާއި ފައިދާއަށް ވިސްނާފައި ނޫން ކަމަށް އާޒިމް ވިދާޅުވި އެވެ.

"ހަގީގަތަކީ ރާއްޖެއަށް ވަރަށް ގިނަ ގޮތްގޮތުން އެހީވާ ގައުމަކާއި މިފަދަ ގޮތަކަށް ގުޅުން ކަނޑާލުން އެއީ އެއްވެސްވަރަކަށް ވިސްނާފައި ކުރެއްވިކަމެއް ނޫންކަން. ދިވެހި ރައްޔިތުންނާއި ސިޔާސީ އެއްވެސް ކަމަކާބެހޭ ފަރާތަކާއި މަޝްވަރާކުރުމަށްފަހު ނިންމެވި ނިންމެވުމެއް ނޫން" އާޒިމް ވިދާޅުވިއެވެ.

ސައުދީގެ ރިޔާޒުން އަންނަ ފޯނު ކޯލަކުން ގައުމަކާއި އޮންނަ ޚާރިޖީ ގުޅުން ކަނޑާލާ ނަމަ ދިވެހިރާއްޖެ ވަރަށް ދަށު ދަރަޖައިގައި ކަމަށް އާޒިމްވިދާޅުވިއެވެ. މި ހިސާބަށް ކަންކަން ދިއުމުން ރައީސުލްޖުމްހޫރިއްޔާގެ މެޑިކަލް ކަންޑިޝަނާއި ދޭތެރޭ ދިވެހިން ކުރާ ސުވާލަށް އެމަނިކުފާނު ޖަވާބުދެއްވަން ޖެހިވަޑައިގަންނަވާ ކަމަށް އޭނާ ވިދާޅުވިއެވެ.

މިހާރު ދިމާވެގެން އުޅޭ ގަތަރުގެ މި މައްސަލައަކީ އަރަބި ގައުމުތަކާއި ޖެހިގެން އުޅޭ މައްސަލައެއްކަމަށާއި، ރާއްޖެއިން މިކަމުގެ ތެރެއަށް ވަންނަން ޖެހޭ ސަބަބެއް ނުވިސްނޭކަމަށް އާޒިމް ވިދާޅުވިއެވެ.

ރާއްޖެ މިވަގުތު ހިނގަނީ ބޭރުގެ މަދު ގައުމަކުން ބުނާގޮތަކަށް ކަމަށާއި، އެގޮތަށް ކަން ނުކޮށްފިނަމަ، ސަރުކާރުން ބޭނުންވާ ފައިސާއާއި ބޭނުންވާ ސާމާނު އެ ބޭނުންވާ މީހާއަށް ލިބުމާއި ދޭތެރޭގައި ޝައްކު އުފެދޭކަމަށް ވެސް އާޒިމް ވިދާޅުވި އެވެ.

"މިހާރު ސައުދީއާއި ޗައިނާއިން ފިއްތާލުމުން އެމީހުން ބޭނުންވާ ގޮތަށް ކަން ކުރާތަން މި ފެންނަނީ" އާޒިމް ވިދާޅުވިއެވެ.

މިއަދު ޓެރަރިސްޓުންނަކީ ކޮބައިކަން އޮޅިއްޖެކަމަށާއި، ރައީސް ނަޝީދަށް ޓެރެރިސްޓެއްގެ ލަގަބު ދިން އިރު ރާއްޖެއިން އައިސިސްއަށް ދާ މީހުންގެ އަދަދު ދުވަހުން ދުވަހަށް އިތުރުވާ ކަމަށް އާޒިމް ވިދާޅުވިއެވެ. ޓެރެރިޒަމާއި ދެކޮޅަށް އަޅުގަނޑުމެން ފިޔަވަޅެއް އެޅުމުގެ ކުރިން ސީރިޔާއަށް ހަނގުރާމައަށް މީހުން ދިއުން ހުއްޓުވުން މާ ރަނގަޅުވާނެކަަމަށް އާޒިމް ވިދާޅުވިއެވެ.

އެކަން ނުހުއްޓުވާ އެހެންގައުމެއްގެ ދާޚިލީ ކަންކަމުގެ ތެރެއަށް ރާއްޖެއިން ވަނުމުގެ ބޭނުންނެތް ކަމަށް އޭނާ ވިދާޅުވިއެވެ. ޓެރެރިޒަމް ހުއްޓުވުމަށް ހިތްވަރު ދިނުމަށް ކަމަށް ބުނެ މެދު އިރުމަތީގައި އޮތް މި މައްސަލަގަނޑުގެ ތެރެއަށް ރާއްޖެއިން ވަނީ އަމިއްލަ ފައިދާގަނޑަކަށް ކަމަށް އާޒިމް ވިދާޅުވިއެވެ.