ޑްރަގް ޓްރީޓްމެންޓްގެ ޚިދުމަތް ފޯރުކޮށްދިނުމަށް ގާއިމްކުރި ''ވިލުނު'' ހުޅުވައިފި

ޑްރަގް ޓްރީޓްމެންޓް އެންޑް ރިހެބިލިޓޭޝަންގެ ޚިދުމަތް ފޯރުކޮށްދިނުމަށް ގާއިމްކުރި ''ވިލުނު'' ސެންޓަރ ހުޅުވައިފިއެވެ.

މި ސެންޓަރު ހުޅުއްވައި ދެއްވީ ހެލްތް މިނިސްޓަރު އަހުމަދު ނަސީމް، ފޮރިން މިނިސްޓަރު އަބްދުﷲ ޝާހިދު އަދި އިންޑިއާގެ އެކްސްޓާނަލް އެފެއަރޒް މިނިސްޓަރު ޑރ. ސުބްރަމާނިޔަމް ޖައިޝަންކަރް، މިތިން ބޭފުޅުންނެވެ.

ވިލުނު އަކީ ސަދަން ރީޖަންއަށް އަމާޒުކުރެވިގެން ޑްރަގް ޓްރީޓްމެންޓް އެންޑް ރިހެބިލިޓޭޝަންގެ ހިދުމަތް ފޯރުކޮށްދިނުމަށް އިންޑިއާ ސަރުކާރުގެ އެހީގައި ގާއިމްކޮށްފައިވާ ފަރުވާދޭ މަރުކަޒެކެވެ. މިތަނުގެ އިންހައުސް ކެޕޭސިޓީއަކީ 60 އެވެ.

ނޭޝަނަލް ޑްރަގް އެޖެންސީން ބުނީ ވިލުނު ސެންޓަރުން ދެވޭ ފަރުވާގެ ޕްރޮގްރާމް ފަރުމާ ކުރެވިފައިވަނީ ޑަބްލިއުއެޗްއޯގެ ކޮންސަލްޓެންސީގެ އެހީގެ ދަށުން ކަމަށާއި، ވިލުނުގެ ޕްރޮގްރާމްތައް ބިނާވެގެންވަނީ ސައިކޮތެރަޕީގެ ދަށުން ނަފްސާނީ، ޖިސްމާނީ، އިޖްތިމާއީ އަދި ރޫހާނީ ދުޅަހެޔޮކަން އިތުރުކުރުމަށް ވަށާޖެހޭ ފަރުވާގެ ނިޒާމެއްގެ ތެރެއިން ކަމަށެވެ. އަދި މިތަނުގައި ހިންގޭ ފަރުވާގައި ހިމެނެނީ ޑިޓޮކްސިފިކޭޝަން، ޓްރީޓްމަންޓް، ރެސިޑެންޝިއަލް ޓްރީޓްމެންޓް، ކޮމިއުނިޓީ ރީހެބިލިޓޭޝަން, އަދި ރީއިންޓެގްރޭޝަން ފަރުވާ ކަމަށް ޑްރަގް އެޖެންސީން ބުނެއެވެ.

މިތަނުން ދެވޭ ފަރުވާގެ މުއްދަތު ބިނާވެގެންވާނީ ފަރުވާ ހޯދާ މީހާގެ ބޭނުންތަކަށާއި އަދި ފަރުވާއާއެކު އެމީހެއްގެ ހާލަތު ރަގަޅުވަމުންދާ ވަރެއްގެ މައްޗަށެވެ.

ވިލުނުގެ ޚިދުމަތް ފެށުމުގެ ގޮތުން ސ. ހުޅުމީދޫގެ ރަށު ކައުންސިލް، ހެލްތް ސެންޓަރ، އެން.ޖީ.އޯސް،، ޕޮލިސް ފަދަ ކަމާ ގުޅުންހުރި ދާއިރާތަކަށް ވަނީ ސެންސިޓައިޒޭޝަން ޕްރޮގްރާމެއް ހިންގިފައެވެ. މި ޕްރޮގްރާމްގެ މަގުސަދަކީ މަސްތުވާތަކެތީގެ މައްސަލައާއި ގުޅޭ ގޮތުން ހޭލުންތެރިކުރުމާއި، ގުޅުންހުރި ދާއިރާތަކުގެ އެއްބާރުލުން ފަރުވާގެ ޕްރޮގްރާމް ހިންގުމަށް ހޯދުމެވެ. އަދި މީގެ އިތުރުން ޕްރޮގްރާމްގައި ހަރަކާތްތެރިވާ ޓެކްނިކަލް މުވައްޒަފުންނަށް ފަރުވާއާއި ގުޅޭ ތަމްރީން ދެވިފައިވާ ކަމަށް ޑްރަގް އެޖެންސީން ބުނެއެވެ.