އައްޑޫ ސިޓީގެ މަގުހެދުމާއި ފެން ހިންދުމުގެ ނިޒާމް ގާއިމްކުރުމުގެ 1 ބިލިއަން ރުފިޔާގެ މަޝްރޫއު ރައީސް ފައްޓަވައިދެއްވައިފި
27 މާރިޗު 2022 | އާދީއްތަ 12:09ގާތްގަނޑަކަށް 67 ކިލޯމީޓަރުގެ މަގުގައި ސިމެންތި ސްޓެބިލައިޒްޑް ބޭސް ލޭޔަރ އެޅުމަށް ވަނީ ހަމަޖެހިފައި
އައްޑޫ ސިޓީގެ މަގުހެދުމުގެ މަޝްރޫއާއި ފެންހިންދާ ނިޒާމް ގާއިމްކުރުމުގެ މަޝްރޫއު ރައީސް ފައްޓަވައިދެއްވަނީ
"އައްޑޫ ސިޓީ ޑިވެލޮޕްމަންޓް ޕްރޮޖެކްޓް"ގެ ދަށުން އައްޑޫ ސިޓީގެ މަގުތައް ޒަމާނީ ފެންވަރަށް ތަރައްގީކުރުމާއި، ފެނުގެ ނިޒާމް ގާއިމްކުުރުމުގެ 1 ބިލިއަން ރުފިޔާގެ މަޝްރޫއުގެ އަމަލީ މަސައްކަތް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ރަސްމީކޮށް ފައްޓަވައިދެއްވައިފިއެވެ.
އާދީއްތަ ދުވަހުގެ މެންދުރު އައްޑޫ ސިޓީގެ ހިތަދޫގައި ބޭއްވި ރަސްމިއްޔާތުގައި މި މަސައްކަތް ފައްޓަވައިދެއްވިއިރު ރައީސްގެ އަރިހުގައި އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ. އެސް ޖަޔަރ ޝަންކަރާއި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ބައިވެރިވެވަޑައިގެންނެވިއެވެ.
އިންޑިއަން އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން, އައްޑޫ ސިޓީގެ މަގުހެދުމާއި ފެން ހިންދުމުގެ ނިޒާމް ގާއިމްކުރުމަށްޓަކައި 21 ފެބްރުއަރީ 2021ގައި މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރާ އިންޑިއާގެ އެފްކޯންސް އިންފްރާސްޓްރަކްޗަރ ލިމިޓެޑާ ދެމެދު ސޮއިކުރެވުނެވެ. މި މަޝްރޫއުގެ އަގު 77،630،898.00 (ހަތްދިހަ ހަތް މިލިއަން ހަސަތޭކަ ތިރީސް ހާސް އަށްސަތޭކަ ނުވަދިހަ އަށް) ޔޫއެސް ޑޮލަރަށް އަރާއިރު, އެއީ ދިވެހި ރުފިޔާއިން ބަލާނަމަ 1,197,068,447.16 (އެއްބިލިއަން އެއްސަތޭކަ ނުވަދިހަ ހަތް މިލިއަން ފަސް ދޮޅަސް އަށްހާސް ހަތަރުސަތޭކަ ސާޅީސް ހަތް ރުފިޔާ ސޯޅަ ލާރި)އެވެ. މި މަޝްރޫއު ނިންމުމަށް ދީފައިވަނީ 730 ދުވަހެވެ.
މި މަޝްރޫއުގެ ކޮންސަލްޓަންޓަކީ އިންޑިއާގެ ކުންފުންޏެއްކަމަށްވާ "އެލް އެންޑް ޓީ އިންފްރާސްޓްރަކްޗަރ އިންޖިނިއަރިންގ- އެލް.އީ.އޭ އެސޯސިއޭޓް ސައުތު އޭޝިއާ ޖޭވީ"އެވެ. އައްޑޫސިޓީގެ މަގުހެދުމާއި ފެންހިންދުމުގެ ނިޒާމް ގާއިމްކުރުމުގެ މަޝްރޫއުގެ ދަށުން ތަރައްގީކުރާ މަގުތަކުގެ މަސައްކަތް ހަވާލުކޮށްފައިވަނީ, ޑިޒައިންކުރުމާއެކު ކޮންސްޓްރަކްޝަންގެ މަސައްކަތް ހިމެނޭ ގޮތަށެވެ. އެގޮތުން އައްޑޫ ސިޓީގައި ފެންބޮޑުވުމުގެ މައްސަލައަށް ދާއިމީ ހައްލެއް ހޯދުމަށް އައްޑޫ ސިޓީގެ ހިތަދޫ، މަރަދޫ، މަރަދޫފޭދޫ، ހުޅުދޫ އަދި މީދޫ ފެން ހިންދާ ނިޒާމް ގާއިމުކުރުން ހިމެނެއެވެ. އެގޮތުން ގާއިމްކުރާ ފެންހިންދާ ނިޒާމުގެ ޖުމްލަ ދިގުމިނުގައި 103 ކިލޯމީޓަރު ހުންނާނެއެވެ.
މި މަޝްރޫއުގައި ހިމެނޭ, މަގުހެދުމުގެ މަސައްކަތުގެ ދަށުން އައްޑޫ ސިޓީ ހިތަދޫ، މަރަދޫ، މަރަދޫފޭދު، ފޭދޫ، ހުޅުދޫ އަދި މީދޫ ހިމެނޭގޮތަށް ޖުމްލަ 40 ކިލޯމީޓަރުގެ މަގު، ތާރު އަޅައިގެންނާއި ގައު އަތުރައިގެން ތަރައްގީކުރާނެއެވެ. ހަމައެއާއެކު ގާތްގަނޑަކަށް 67 ކިލޯމީޓަރުގެ މަގުގައި ސިމެންޓް ސްޓެބިލައިޒްޑް ބޭސް (ސީ.އެސް.ބީ) ލޭޔަރ އެޅުމަށް ވަނީ ހަމަޖެހިފައެވެ. މި ސީ.އެސް.ބީ ލޭޔަރގެ މަގުސަދަކީ ގާއިމްކުރާ ފެންހިންދާ ނިޒާމުގެ ތެރެއަށް ވެލި އެޅި އެ ނިޒާމަށް ދިމާވެދާނެ މައްސަލަތަކުން އެ ނިޒާމު ރައްކާތެރިކުރުމެވެ. ސީ.އެސް.ބީ ލޭޔަރ އެޅޭ މަގުތައް, ތާރު ނުވަތަ ޕޭވަރ ބްލޮކް މަގުތަކެއްގެ ގޮތުގައި އިތުރަށް ތަރައްގީކުރުމަށާއި، މިމަޝްރޫއުގައި ނުހިމެނޭ ބައެއް މަގުތައް ތަރައްގީކުރުމަށް ހިމެނުމަށާއި، އަދި ފޭދޫގައި މިހާރު ގާއިމުކުރެވިފައިވާ ފެންހިންދުމުގެ ނިޒާމުގައި ނުހިމެނޭ ސަރަހައްދުތަކުގައި މިނިޒާމު ގާއިކުރުމުގެ މަސައްކަތް އިންޑިއަން އެގްޒިމް ބޭންކުގެ އެލް.އޯ.ސީގެ ދަށުން ކުރިއަށް ގެންދިއުމަށް ޕްރޮޕޯސަލް ހުށަހެޅި, މިހާރުވަނީ އެޕްރޫވްކުރުމުގެ މަރުހަލާގައެވެ.
މި މަޝްރޫއުގެ މަސައްކަތްތައް ނިމޭއިރު އައްޑޫ ސިޓީގައި މިހާރު ތާރުއަޅާފައިވާ މަގުތަކުގެ ތެރެއިން ޖުމްލަ 4.3 ކިލޯމީޓަރު މަގުގެ ރީސަރފޭސިންގ މަސައްކަތް ކުރުމަށާއި, ތަރައްގީކުރާ މަގުތަކުގައި މަގުބައްތިއާއި ސީސީޓީވީ ކެމެރާ ހަރުކުރުމާއި އެހެނިހެން ޓްރެފިކް ރައްކާތެރިކަމުގެ ފިޔަވަޅުތައް ގާއިމްކުރުމަށް ވަނީ ހަމަޖެހިފައެވެ. މި ކަންކަމުގެ އިތުރުން، އައްޑޫ ސިޓީ ހަންކެޑެ ހިމެނޭ ސަރަހައްދުގައި މިހާރު ބޭނުންކުރަމުންދާ ލިންކް ރޯޑުގެ ހުޅަނގުން ހަންކެނޑެއަށް ނާރާ ގޮތަށް ހިތަދޫ ގައުކެޑިއާއި މަރަދޫއާއި ގުޅާލުމަށްޓަކައި 463.1 ކިލޯމީޓަރުގެ އައު 4 ލޭންގެ ޑީޓުއަރ ލިންކް ރޯޑެއްވެސް މިމަޝްރޫއުގެ ދަށުން ގާއިމްކުރެވޭކަމީ އައްޑޫ ސިޓީގެ ރައްޔިތުންނަށް ލިބޭނެ ތަރައްގީގެ އާ އަރުތަތަކެކެވެ.
