އެމްޑީޕީގެ ޕީޖީ ލީޑަރަކަށް އަސްލަމް

މޯލްޑިވިއަން ޑިމޮކްރަޓިކް ޕާޓީ އެމްޑީޕީގެ ޕާލަމަންޓަރީ ގްރޫއްޕުގެ ލީޑަރަކަށް ހިތަދޫ އުތުރު ދާއިރާގެ މެމްބަރ މުޙައްމަދު އަސްލަމް ހޮވިވަޑައިގެންފިއެވެ.

ހުކުރު ދުވަހު ބޭއްވި އެމްޑީޕީ ޕާލަމެންޓްރީ ގްރޫއްޕުގެ އިންތިހާބު 2022 ގެ ވަގުތީ ނަތީޖާ ދައްކާ ގޮތުން، އެ ޕާޓީގެ ޕީޖީ ލީޑަރުކަމަށް އަސްލަމް ހޮވިވަޑައިގެންނެވީ 40 ވޯޓުންނެވެ. އަސްލަމްގެ އިތުރުން މި މަގާމަށް ވާދަކުރެއްވި މެދުހެންވޭރު ދާއިރާގެ މެމްބަރ ޢަލީ އާޒިމް އަށް ލިބިވަޑައިގެންނެވީ 25 ވޯޓެވެ.

ޑެޕިއުޓީ ޕީޖީ ލީޑަރުކަމަށް ކުރިމަތިލެއްވި 3 ބޭފުޅުންގެ ތެރެއިން އެ މަގާމަށް 2 ބޭފުޅަކު ހޮވާ އިރު، އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) އަށް 49 ވޯޓު ލިބިވަޑައިގެން ވަނީ މަގާމު ކަށަވަރުކުރައްވާފައެވެ. ދެން މި މަގާމަށް ވާދަ ކުރެއްވި ހެންވޭރު ދެކުނު ދާއިރާގެ މެންބަރު ޙުސައިން ޝަހީމް (އަނދުން ޙުސައިން) އާއި ހުޅުދޫ ދާއިރާގެ މެންބަރު އިލްޔާސް ލަބީބަށް ލިބިވަޑައިގެންނެވީ 34 ވޯޓެވެ. އެހެންކަމުން ހުސައިން ޝަހީމާއި އިލްޔާސް ލަބީބު ދެވަނަ ބުރަކަށްދާނެއެވެ.

އަމީން އާންމުގެ މަގާމަށް ކުރިމަތިލެއްވީ އެންމެ ބޭފުޅެކެވެ. އެއީ ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީއެވެ. އޭނާއަށް 63 ވޯޓު ލިބިވަޑައިގެންނެވިއެވެ. ޑެޕިއުޓީ އަމީން އާންމުގެ މަގާމަށް ވާދަކުރެއްވި ފޭދޫ ދާއިރާގެ މެންބަރު މުހައްމަދު ނިހާދާއި، ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒެވެ. ނިހާދަށް 35 ވޯޓު ލިވަޑައިގެންނެވި އިރު، މުއިއްޒަށް ލިބިވަޑައިގެންނެވީ 29 ވޯޓެވެ.

ޗީފް ވިޕުންގެ ގޮތުގައި 2 ބޭފުޅުން ކުރިމަތިލެއްވި އިރު، އެ މަގާމް ކަށަވަރު ކުރައްވާފައިވަނީ ތިނަދޫ އުތުރު ދާއިރާގެ މެންބަރު މުޣުނީއެވެ. މުޣުނީއަށް 34 ވޯޓ ލިބިވަޑައިގެންނެވި އިރު، ދެން އެމަގާމަށް ވާދަ ކުރެއްވި މަކުނުދޫ ދާއިރާގެ މެންބަރު މުހައްމަދު ރާޢީ އަށް ލިބިވަޑައިގެންނެވީ 31 ވޯޓެވެ.

ޗީފް ވިޕުންގެ ގޮތުގައި 6 ބޭފުޅަކު އައްޔަން ކުރަން ހަމަޖެހިފައިވީ ނަމަވެސް، އެ މަގާމަށް ވާދަ ކުރެއްވީ 5 މީހުންނެވެ. އަދި އެ 5 ބޭފުޅުން ވެސް ވަނީ ހޮވިވަޑައިގެންފައެވެ. އެއީ ކޮމަންޑޫ ދާއިރާގެ މެންބަރު މުހައްމަދު ރާޝިދު (ރާޑޯ) އާއި ވައިކަރަދޫ ދާއިރާގެ މެންބަރު ހުސައިން ޒިޔާދާއި، އިހަވަންދޫ ދާއިރާގެ މެންބަރު މުހައްމަދު ޝިފާއު އާއި މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމް އަދި ފޮނަދޫ ދާއިރާގެ މެންބަރު މޫސާ ސިރާޖެވެ. މި މަގާމަށް ވެސް އަދި އިތުރު ބޭފުޅަކު އައްޔަން ކުރުމަށް އިންތިހާބު ބޭއްވޭނެއެވެ.