ޕާޓީ ހިންގުމަށް ގިނަގުނަ ހެޔޮ ބަދަލުތަކެއް ހަސަން ލަތީފު ގެނެސްދެއްވާފައިވޭ: އެމްޑީޕީ

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަންކަމުގެ 5 އަހަރުގެ ދައުރު ފުރިހަމަކޮށް ހިންގުމަށް ގިނަގުނަ ހެޔޮ ބަދަލުތަކެއް ހަސަން ލަތީފު ގެނެސްދެއްވާފައިވާ ކަމަށް އެޕާޓީން ބުނެފިއެވެ.

ހަސަން ލަތީފް ކޮށްދެއްވި މަސައްކަތްތަކަށް ޚާއްސަ ޝުކުރެއް ދަންނަވައި އެމްޑީޕީން ބުނީ ޕާޓީގެ އިދާރީ ހިންގުމުގެ އެންމެ އިސް ފަރާތެއްގެ ގޮތުގައި ހުންނަވައި، އެ މުއްދަތުގެ ތެރޭގައި އިދާރީ ހިންގުމަށް ގިނަގުނަ ހެޔޮ ބަދަލުތަކެއް ގެނެސްދެއްވާފައިވާ ކަމަށާއި، އިދާރީ މަގާމުތަކުގައި ތިބޭ މުވައްޒަފުންގެ މެދުގައި މަސްލަހަތު ހިފެހެއްޓުމަށް ގިނަ މަސައްކަތްތަކެއް ކޮށްދެއްވާފައިވާ ކަމަށެވެ. އަދި ޕާޓީގެ އެކިއެކި ގުނަންތައް ވަރުގަދަކުރުމަށާއި، މެމްބަރޝިޕް އިތުރުކުރުމަށް މަސައްކަތް ކުރުމުގެ އިތުރުން ރާއްޖޭގައި އޮތް އެންމެ ބޮޑު ސިޔާސީ ޕާޓީގެ ގޮތުގައި ޕާޓީ ނެގެހެއްޓުމަށް ވެސް ބުރަ މަސައްކަތްތަކެއް ކޮށްދެއްވާފައިވާ ކަމަށް އެމްޑީޕީން ބުނެއެވެ.

އެމްޑީޕީއިން ބުނީ މިދިޔަ ސަރުކާރުގެ ޚުދުމުޚުތާރު އަނިޔާވެރިކަމުގެ ދުވަސްވަރުގައި އެ ޕާޓީ ރުކުރުވާލައި، ސިޔާސީ ހަރަކާތްތައް އެންމެ މަތީ ދަރަޖައަކަށް އިންތިޒާމްކޮށް ސާބިތުކަން ހިފަހެއްޓުމަށް ޗެއާޕާރސަންގެ ހައިސިއްޔަތުން ހަސަން ލަތީފް ލީޑަރޝިޕް ދައްކުވައިދީފައިވާ ކަމަށެވެ. އަދި ހަސަން ލަތީފުގެ ޗެއާޕާސަންކަމުގެ ދަށުން، ޕާޓީގެ އެންމެ މުހިއްމު އެއް މަގުސަދުކަމުގައިވާ އެކިއެކި ގައުމީ އިންތިޚާބުތަކަށް އެޕާޓީގެ ފަރާތުން ވާދަކޮށް ހުރިހާ އިންތިޚާބެއް އެމްޑީޕީން ކާމިޔާބުކޮށްފައިވާކަން އެމްޑީޕީން ފާހަގަކޮށްފައިވެއެވެ.

ހަސަން ލަތީފް ޗެއާޕާސަންކަމުގެ މަގާމަށް އިންތިޚާބުވެވަޑައިގަތުމާއެކު އެ މަގާމާ ހަވާލުވެވަޑައިގެންފައިވަނީ 12 ފެބްރުއަރީ 2017 ގައެވެ. އަދި އެމްޑީޕީގެ ޗެއާޕާރސަންކަމުގެ 5 އަހަރު ދުވަހުގެ މުއްދަތު މިހާތަނަށް އެއްކޮށް ފުރިހަމަކުރެއްވި ހަމައެކަނި ބޭފުޅަކީ ވެސް ހަސަން ލަތީފެވެ.