ސިޓީ ކައުންސިލުން ޢާންމުކޮށް ހުޅުވާލައިގެން ކުރިއަށްގެންދާ ބައްދަލުވުން މި ޙާލަތުގައި ފަސްކުރެވިދާނެ: އެލްޖީއޭ
ބައްދަލުވުން ކުރިއަށްގެންދާނީ އެޗްޕީއޭއާއި އެލްޖީއޭއާ މަޝްވަރާ ކުރުމަށްފަހު
ސިޓީ ކައުންސިލުން ބުރާސްފަތި ދުވަހު އެލްޖީއޭއާއެކު ބޭއްވި ބައްދަލުވުން
ރައްޔިތުންނަށް ޢާންމުކޮށް ހުޅުވާލާފައިވާ ބައްދަލުވުމެއް ކޮންމެ އަހަރަކު ފެބްރުއަރީއާއި ޖުލައި މަހު ސިޓީ ކައުންސިލުންނާއި ރަށްރަށުގެ ކައުންސިލްތަކުން ބާއްވަންވާނެކަމަށް ލާމަރުކަޒީ ޤާނޫނުގައި ބަޔާންކޮށްފައިވީ ނަމަވެސް، ކޮވިޑުގެ މި ޙާލަތަށް ބަލައި އެބައްދަލުވުން ފަސް ކުރެވިދާނެކަމަށް ލޯކަލް ގަވަރމަންޓް އޮތޯރިޓީ (އެލްޖީއޭ) އިން ބުނެފިއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ ގޮތުން ހިންގުމުގެ ޤާނޫނުގެ 110 ވަނަ މާއްދާގައި ބަޔާންކޮށްފައިވަނީ ރައްޔިތުންނަށް ޢާންމުކޮށް ހުޅުވާލާފައިވާ ބައްދަލުވުމެއް ކޮންމެ އަހަރަކު ފެބްރުއަރީއާއި ޖުލައިމަހު ސިޓީ ކައުންސިލުންނާއި ރަށްރަށުގެ ކައުންސިލްތަކުން ބާއްވަންވާނެއެވެ ކަމަށެވެ. އަދި ފެބްރުއަރީ މަހު ބާއްވާ ބައްދަލުވުމުގައި ފާއިތުވި އަހަރުގެ އަހަރީ ރިޕޯޓާއި، މާލީ ރިޕޯޓާއި، އޮޑިޓް ރިޕޯޓު ރައްޔިތުންނަށް ހުށަހަޅަންވާނެކަމަށް ބަޔާން ކޮށްފައިވެއެވެ.
އޭގެ އިތުރުން، ޖުލައި މަހުގައި ބާއްވާ ޢާންމު ބައްދަލުވުމުގައި ކައުންސިލްގެ ކުރިއަށް އޮތް އަހަރުގެ މަސައްކަތު ތާވަލާއި ބަޖެޓް ރައްޔިތުންނަށް ހުށަހަޅައި ޚިޔާލު ހޯދަންވާނެ ކަމަށްވެސް ވަނީ ބަޔާންކޮށްފައެވެ. އެގޮތުން ރައްޔިތުންނާއި ބައްދަލުކުރުމުގެ 7 ދުވަސް ކުރިން އެ ރިޕޯޓުތަކާއި ޕްލޭނާއި ބަޖެޓުގެ މަޢުލޫމާތު ޢާންމުކޮށް ހާމަކުރަންވާނެކަމަށްވެސް އެ މާއްދާގައި ބަޔާން ކޮށްފައިވެއެވެ.
ޤާނޫނުގައި ބަޔާންކޮށްފައިވާ ގޮތުން ތަރައްޤީގެ ޕްލޭނަށް ޢަމަލީ ސިފަ އަންނަމުންދާ ގޮތުގެ މަޢުލޫމާތު މަދުވެގެން ދެ މަހުން އެއްމަހު ކައުންސިލުން ޢާންމުކޮށް ހާމަކުރަންވާނެއެވެ.
މިކަމާއި ގުޅޭގޮތުން ރާއްޖެއެމްވީން ސުވާލުކުރުމުން ސިޓީ ކައުންސިލުގެ މީޑިއާ އޮފިޝަލު ވިދާޅުވީ، އެ ބައްދަލުވުން ބޭއްވުމަށް ގޮތެއް ކަނޑައަޅަން އެލްޖީއޭއާއި އެޗްޕީއޭއާއި މަޝްވަރާކުރަން ނިންމާފައިވާކަން ރަސްމީ އާންމު ޖަލްސާގައި މާލެ ސިޓީގެ މޭޔަރ ޑރ. މުޙައްމަދު މުއިއްޒު ވިދާޅުވެފައިވާކަމަށެވެ. އެގޮތުން ކޮވިޑުގެ މި ޙާލަތުގައި 50ށް ވުރެ ގިނަ މީހުން އެއްވެ އުޅުން އެޗްޕީއޭއިން މަނާކޮށްފައިވާއިރު، ރައްޔިތުންގެ އެފަދަ އާންމު ބައްދަލުވުމެއް ބާއްވާނަމަ ގިނަ މީހުން ބައިވެރިވާނެކަން ސިޓީ ކައުންސިލުން ފާހަގަ ކުރެއެވެ.
އެހެންނަމަވެސް، މި ބައްދަލުވުމަށް ވާންޖެހޭ ހުރިހާ ތައްޔާރީއެއް ސިޓީ ކައުންސިލުން ވެފައިވާކަމަށްވެސް އޭނާ ވިދާޅުވިއެވެ. އަދި މި ބައްދަލުވުން ކުރިއަށްގެންދާނީ އެޗްޕީއޭއާއި އެލްޖީއޭއާ މަޝްވަރާ ކުރުމަށްފަހުކަމަށްވެސް ވިދާޅުވިއެވެ.
ސިޓީ ކައުންސިލުން ބުރާސްފަތި ދުވަހު އެލްޖީއޭއާއެކު ބޭއްވި ބައްދަލުވުމުގައިވެސް އެކަމާއި ގުޅިގެން މަޝްވަރާ ކުރެވިފައިވެއެވެ.
އެކަމާއި ގުޅޭގޮތުން ރާއްޖެއެމްވީން ސުވާލުކުރުމުން އެލްޖީއޭގެ ސީއީއޯ އަފްޝަން ލަތީފް ވިދާޅުވީ، ސިއްޙީ ކުއްލި ނުރައްކަލުގެ ޙާލަތުގައި އަޅާފައިވާ ފިޔަވަޅުތަކަށް ބަލައި، ޤާނޫނުގައި ބަޔާންކޮށްފައިވާ މުއްދަތުގައި ބައްދަލުވުން ނުބޭއްވި ނަމަވެސް ކައުންސިލް ކުށްވެރި ނުވާނެކަމަށް ވިދާޅުވެފައިވާނެ ކަމަށެވެ. އެގޮތުން ކޮވިޑުގެ ޙާލަތަށް ބަލައި ބައްދަލުވުން ކުރިއަށް ގެންދިއުމަށް އިއުތިރާޒެއް ނެތްކަންވެސް އަފްޝަން ވަނީ ފާހަގަކުރައްވާފައެވެ.
އެލްޖީއޭއާއެކު ބޭއްވި މި ބައްދަލުވުމުގައި މާލޭ ސިޓީ ކައުންސިލުން ކުރުމަށް ކުރިއަށް ރާވާފައިވާ ކަންކަމާއި، ކައުންސިލަށް ދިމާވާ ދަތިތަކާއި އަދި އެހީތެރިކަން ބޭނުންވާ ކަންކަމާއި ގުޅޭގޮތުން ވަނީ މަޝްވަރާ ކުރައްވާފައެވެ.
