ޓީޗަރުންގެ މުސާރަ ބޮޑުކުރުމަށް މިސަރުކާރުން ވެފައިވާ ވައުދުގެ ދަށުން މެއި މަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހާމަކުރެއްވުމުން ދިވެހިރާއްޖޭގެ ޤައުމީ ޔުނިވާސިޓީގެ ޗާންސެލަރު ޑރ. ހަސަން ހަމީދު ތައުރީފުކުރައްވައިފިއެވެ.
މިއަހަރަށް ރިޔާސީ ބަޔާން އިއްވަވަމުން ރައީސް ވިދާޅުވީ ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ 56 އިންސައްތަ ބޮޑުވެގެންދާނެކަމަށެވެ.
އެކަމާއި ގުޅިގެން ޑރ. ޙަސަން ކުރެއްވި ޓްވީޓެއްގައި ވިދާޅުވީ ޓީޗަރުންގެ މުސާރަ 56 އިންސައްތައިން ބޮޑުކުރުން މިއީ ރާއްޖޭގެ ތާރީޚުގައި ވެސް ނުވާވަރުގެ ކަމެއް ކަމަށެވެ. އަދި ލިބުން ޙައްޤު މިކުރިއެރުމާއެކު ހުނަރުވެރި ތައުލީމީ ރަށްވެހިންގެ އައު ޖީލެއް ބިނާކުރުމަށްޓަކައި ޤާބިލު ދަރިވަރުން ކެރިއަރެއްގެ ގޮތުގައި ޓީޗިންގ ނަގާނެ ކަމަށް ޑރ. ޙަސަން ލަފާކުރެއްވިއެވެ.
ޗާންސެލަރ މިމޭރުމުން ޓްވީޓްކުރައްވާފައިވާއިރު އެޑިޔުކޭޝަން މިނިސްޓަރު ޑރ. އައިޝަތު ޢަލީ ކުރެއްވި ޓްވީޓެއްގައިވެސް ވަނީ މީގެ ކުރީން ދުވަހަކުވެސް ބޮޑު ކޮށްދީފައި ނުވާ މިންވަރަކަށް މުދައްރިސުންގެ މުސާރަ ބޮޑުކޮށްދެއްވަން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއުލާންކުރެއްވުމަކީ ސްކޫލްތަކާއި ގުޅިފައިވާ ހުރިހާ ފަރާތްތަކަށް ލިބުނު މަތިވެރި އުފަލެއްކަމަށް ވިދާޅުވެފައެވެ. އަދި ހުނަރުވެރި ދަރިވަރުން މުދައްރިސްކަމާއި ކުރިމަތިލާ، މޮޅެތި މުދައްރިސުން ވަޒީފާގައި ދެމިތިބޭން މިނިސްޓަރު ވަނީ އެދިވަޑައިގަންނަވާފައެވެ.
