ޒައިދު ސަސްޓެއިނެބިލިޓީ އެވޯޑާއެކު ޙިރާ ސްކޫލްގެ ޓީމް އައްޑޫއަށް
މި އެވޯޑަކީ ދެމެހެއްޓެނިވި ޙައްލު ހޯދާ ފަރާތްތަކަށް ދުބާއީ ސަރުކާރުން ދޭ ޚާއްޞަ އެވޯރޑެއް
ޙިރާ ސްކޫލްގެ ޓީމަށް މަރުޙަބާ ކިއުން
ޖެނުއަރީ މަހުގެ 17 ވަނަ ދުވަހު ބޭއްވުނު ޒައިދު ސަސްޓެއިނެބިލިޓީ ޕްރައިޒް އެވޯޑް ޙަފްލާގައި ލިބުނު ފަޚުރުވެރި އެވޯޑާއެކު އައްޑޫސިޓީ ޙިރާ ސްކޫލްގެ ޓީމު އައްޑޫސިޓީއަށް އެނބުރި ގޮސްފިއެވެ.
ޙިރާ ސްކޫލްގެ ޓީމު އައްޑޫސިޓީއަށް އެނބުރި ގޮސްފައިވަނީ ހޮނިހިރު ދުވަހުގެ ވަގުތެއްގައެވެ.
މި އެވޯޑަކީ، ދެމެހެއްޓެނިވި ހައްލު ހޯދާ ފަރާތްތަކަށް ދުބާއީ ސަރުކާރުން ދޭ ޚާއްސަ އެވޯޑެކެވެ. އެގޮތުން މި އަހަރުވެސް މި އެވޯރޑަށް ކުރިމަތިލުމަށް ރެކޯޑު އަދަދަކަށް ވަނީ ހުށައެޅުންތައް ލިބިފައެވެ. 4000 ޕްރޮޖެކްޓު އެކި ތަންތަނުން ހުށައަޅާފައިވާއިރު، އޭގެ ތެރެއިން ފައިނަލަށް ގޮސްފައިވަނީ 30 ޕްރޮޖެކްޓެކެވެ. އޭގެ ތެރެއިންވެސް އިނާމު ލިބިފައިވަނީ 10 ޕްރޮޖެކްޓަކަށެވެ. އެގޮތުން ޙިރާ ސުކޫލަށް ލިބިފައިވަނީ ގްލޯބަލް ހައިސްކޫލް ކެޓެގަރީން ސައުތު އޭޝިއާ ރީޖަންގެ އެއްވަނައެވެ.
ޙިރާ ސްކޫލްގެ ޓީމަށް ގަމުގެ ބައިނަލްއަޤްވާމީ ވައިގެ ބަނދަރުން މަރުޙަބާ ވިދާޅުވީ އައްޑޫސިޓީގެ މޭޔަރ އަލްފާޟިލް ޢަލީ ނިޒާރާއި، ޙިރާ ފައުންޑޭޝަންގެ އިސްވެރިންނާއި ސްކޫލްގެ މެނޭޖްމަންޓާއި، ބައެއް މުދައްރިސުންނާއި ދަރިވަރުންނާއި ބެލެނިވެރިންނެވެ.
ޙިރާ ޓީމާ ބައްދަލުކުރައްވައި މޭޔަރ ޢަލީ ނިޒާރު ވަނީ، މި އެވޯޑަކީ އައްޑޫސިޓީގެ އިތުރުން މުޅި ރާއްޖެވެސް ފަޚުރުވެރިވާފަދަ އެވޯޑެއްކަން ފާހަގަ ކުރައްވާފައެވެ. އަދި މީގެ އިތުރުން ޙިރާ ސްކޫލުން ހޯދަމުންދާ ކާމިޔާބީއަށްޓަކައި ސްކޫލްގެ ދަރިވަރުންނާއި މެނޭޖްމަންޓަށް މޭޔަރު މަރުޙަބާ ވިދާޅުވިއެވެ. އަދި ޙިރާ ސްކޫލުން މި އެވޯޑް ޙާޞިލުކުރި ޕްރޮޖެކްޓް ތަންފީޒު ކުރުމުގައި އައްޑޫ ސިޓީ ކައުންސިލްގެ ފުރިހަމަ އެއްބާރުލުން ލިބިގެންދާނެކަމުގެ ފުރިހަމަ ޔަޤީންކަން މޭޔަރު ދެއްވާފައިވާކަމަށް ޙިރާ ސުކޫލުން މަޢުލޫމާތު ދެއެވެ. މި ބައްދަލުވުމުގައި، ޙިރާ ސްކޫލްގެ މެނޭޖްމަންޓްގެ ފަރާތުން ވަނީ، އެ ޓީމަށް މަރުޙަބާ ވިދާޅުވުމަށް މޭޔަރު ވަޑައިގެންނެވުމަކީ ލިބިގެންދިޔަ ޝަރަފެއްކަން ފާހަގަ ކޮށްފައެވެ.
އެ ސުކޫލުން ހުށަހަޅާފައިވަނީ ރައްކާތެރިކަމާއި ދެމެހެއްޓެނިވި ގޮތެއްގައި ފެން ބޭނުން ކުރުމާގުޅޭ ޕްރޮޖެކްޓެކެވެ. އެގޮތުން ވާރޭފެން ޖަމާކޮށް، ސާފުކުރުމަށްފަހު، ބޭކާރު ނުވާގޮތަށް އެކި ބޭނުންތަކަށް ބޭނުން ކުރެވޭނެ ގޮތްތައް މި ޕްރޮޖެކްޓުގެ ދަށުން ވަނީ ނިޒާމީ ގޮތެއްގައި ދައްކުވައިދީފައެވެ. އަދި ފެން އަލުން ސާފުކޮށްގެން އެހެނިހެން ބޭނުންތަކަށް ބޭނުން ކުރެވޭނެ މޮޑެލްއެއްވެސް މި ޕްރޮޖެކްޓުގެ ދަށުން ދައްކުވައިދީފައިވެއެވެ.
