ހުޅުމާލޭގައި ހަފްލާތައް ބޭއްވުން މެދުކަނޑާލައިފި

މާލޭގައި ކޮވިޑް ކޭސްތައް އިތުރުވަމުން އަންނާތީ، ހުޅުމާލޭގެ އެކި ސަރަހައްދުތަކުގައި ގިނަ މީހުން އެއްވާ ހަފްލާތަކާއި ހަރަކާތްތައް ބޭއްވުން މެނދުކަނޑާލައިފިއެވެ.

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ބުނީ އެ ކޯޕަރެޝަނުން ހަފްލާތަކާއި ހަރަކާތްތައް ބޭއްވުމަށް ދޫކުރަމުން އަންނަ ހުއްދަތައް ވަގުތީ ގޮތުން މެދުކަނޑާލާފައިވާ ކަމަށެވެ. ކޮވިޑް ކޭސްތަކުގެ އަދަދު އިތުރުވަމުންދާތީ މިހާރު ފިޔަވަޅުތައް އަންނަނީ ހަރުކަށި ކުރަމުންނެވެ. ފުލުހުން ވަނީ މާސްކު އެޅުން ތަންފީޒުކުރުމަށް ނިކުންނާނެ ކަމަށް ބުނެފައެވެ.

މާލޭގައި ކުރިއަށްދާ ނައިޓް މާކެޓު ފަދަ ތަންތަނަށް ހުއްދަ ދޫކުރުން މާލޭ ސިޓީ ކައުންސިލުން މެދު ކަނޑާލުމަށްފަހު ގިނަ ބައެއްގެ އެދުމުގެ މަތިން، އާންމު ފިހާރަތަކުގައި ވިޔަފާރިކުރާ އުސޫލުން ނައިޓް މާކެޓް ބޭއްވުމުގެ ހުއްދަ ދިނުމަށް އެޗްޕީއޭއިން އެ ކައުންސިލަށް މިހާރު އަންގާފައިވާ ކަމަށާއި އެހެން ކަމުން އެޗްޕީއޭއިން ކަނޑައަޅާފައިވާ މިންގަނޑާއި އެއްގޮތަށް ނައިޓްމާކެޓް ބާއްވަން އެއްބަސްވާ ފަރާތްތަކަށް ހުއްދަ ދިނުމަށް ނިންމާފައިވާ ކަމަށް ސިޓީ ކައުންސިލުން ބުނެއެވެ.

ކޮވިޑާ ގުޅިގެން ދޮޅު އަހަރެއްހާ ދުވަހު ނައިޓް މާކެޓްތައް ބޭއްވުން ހުއްޓުމަކަށް އައުމަށްފަހު، ދާދިފަހުން ވަނީ ހަތަރު ނައިޓް މާކެޓެއް މާލެ ސިޓީގައި ބާއްވާފައެވެ. ހުޅުމާލެ ރުށްގަނޑު ސަރަހައްދުގައި ދެ ނައިޓް މާކެޓަކާއި ދަރުބާރުގޭގެ އިރުމަތީގައި އޮންނަ ހުސް ބިމުގައި އަދި ރަސްފަންނު ސަރަހައްދުގައިވެސްވަނީ ނައިޓް މަރކެޓެއް ބާއްވާފައެވެ.

ހުޅުމާލެއަކީ ގިނަ އަދަދެއްގެ މީހުން އެއްވެ ހަފްލާތައް ބާއްވަމުން އަންނަ ތަނެކެވެ. ކޮވިޑް ކޭސްތައް މަދުވެ ދިން ލުއިތަކާއެކު ގިނަ ބަޔަކު ގެންދަނީ އެކި ހަފްލާތައް ބާއްވަމުންނެވެ.