ބަޑީގެ ޙަމަލާތަކަކުން ހެއިޓީގެ ވަގުތީ ބޮޑުވަޒީރު ސަލާމަތްވެވަޑައިގެންފި

ހެއިޓީގެ ވަގުތީ ބޮޑުވަޒީރު އެރިއަލް ހެންރީ ހުންނެވި ތަނަށް އަމާޒުކޮށް ބަޑީގެ ޙަމަލާތަކެއް ދީފިއެވެ.

ހޮނިހިރު ދުވަހު ދިން މި ޙަމަލާގެ ވީޑިއޯ ފުޓޭޖުތައް މިހާރު އާންމުވެފައިވާއިރު، އޭނާއަށް އަމާޒުކޮށް ބަޑީގެ ޙަމަލާތައް ދީފައިވަނީ އެ ޤައުމުގެ މިނިވަން ދުވަސް ފާހަގަ ކުރުމަށް ބޭއްވި ރަސްމިއްޔާތަކަށް ވަޑައިގަންނަވައިގެން ހުންނަވަނިކޮށެވެ. އެގޮތުން މިނިވަން ދުވަހާއި ގުޅިގެން ޚާއްސަ ތަޤުރީރެއް ކުރެއްވުމަށް ކުރިން ތާވަލުކޮށްފައި އޮތް ނަމަވެސް މި ޙަމަލާއިން ދިފާއުވުމަށް ސެކިއުރިޓީން ވަނީ ވަގުތުން އޭނާ އެތަނުން ބޭރަށް ނެރުއްވާފައެވެ. މި ޙަމަލާއާއި ގުޅިގެން ފުލުހުންވެސް ރައްދު ޙަމަލާތަކެއް ދީފައިވާއިރު، އެކަކު މަރުވެ، 2 މީހަކަށް އަނިޔާތަކެއް ވެފައިވާކަމަށް ރިޕޯޓުތައް ބުނެއެވެ.

އެކަމާ ގުޅޭގޮތުން އެ ޤައުމުގެ ބޮޑުވަޒީރު އޮފީހުން ބުނެފައިވަނީ، ޙަމަލާ ދީފައިވަނީ އެ ޤައުމުގައި ޙަރަކާތްތެރިވާ ހަނގުރާމަވެރި ގޭންގުތަކުން ކަމަށެވެ. އެގޮތުން ފާއިތުވި ދުވަސްތަކުގައިވެސް އެފަދަ ގިނަ ޙާދިސާތަކެއް ހިނގާފައިވާކަމަށް ރިޕޯޓުތައް ބުނެއެވެ.

ވަގުތީ ބޮޑުވަޒީރު އެރިއަލް ހެންރީ ވަނީ އެފަދަ ޙަމަލާތަކެއް އޭނާއަށް އަމާޒުވުމުގެ ބިރު މީގެ ކުރިންވެސް އޮތްކަމަށް ވިދާޅުވެފައެވެ.

ހެއިޓީގެ ސިޔާސީ މަސްރަހު ހަލަބޮލިވެފައިވާއިރު، ބޮޑުވަޒީރުކަމަށް ހެންރީ އައްޔަން ކުރައްވާފައިވަނީ ގައުމު ހުއްޓުމަކަށް އައިސް އޭރު ހުންނެވި ވަގުތީ ބޮޑުވަޒީރު މަގާމުން އިސްތިއުފާ ދެއްވުމާ ގުޅިގެންނެވެ. ހެންރީ ވިދާޅުވެފައިވަނީ އެމަނިކުފާނުގެ ސަރުކާރުގެ އަމާޒަކީ އިންތިޚާބެއް ބޭއްވޭނެ އެންމެ އަވަސް މަގެއް ފަހިކޮށްދިނުން ކަމަށެވެ.

ޖުލައި 7 ވަނަ ދުވަހު ހެއިޓީގެ ރައީސް މޮއިސް އަވަހާރަކޮށްލުމާ ގުޅިގެން ގައުމުގައި ސިޔާސީ ހަލަބޮލިކަން އިތުރުވެފައިވާ އިރު، ގައުމު އޮތީ ނާދިރު ފައްތަރެއްގައެވެ. މޮއިސް އަވަހާރަކޮށްލި ހާދިސާގައި އަނބިކަނބަލުންނަށް ވެސް ޒަހަމްތަކެއް ލިބިވަޑައިގެންނެވިއެވެ.

އެ ޤައުމުގެ ރައީސް އަވަހާރަކޮށްލި ގްރޫޕްގައި ހިމެނެނީ އެކި ގައުމުތަކުގެ އަސްކަރިއްޔާގައި އުޅުމަށްފަހު ރިޓަޔަރވެފައިވާ ކޮމާންޑޯއިން ކަމަށް ބޭރުގެ މީޑިއާތަކުގައި ވަނީ ރިޕޯޓުކޮށްފައެވެ. ހެއިޓީގެ ރައީސް އަވަހާރަކޮށްލުމާއެކު އެޤައުމުގައި ވެރިކަމުގެ ބާރުތަކާމެދު ވެސް ވަނީ ނުތަނަވަސްކަން އުފެދިއެވެ. ގާނޫނު ހަދާ މަޖިލިސް ހުއްޓުމަކަށް އައިސްފައިވާއިރު، ގާނޫނުގައި ބުނާ ގޮތުން، ރައީސެއް ނެތް ހާލަތެއްގައި ގައުމުގެ ހިންގުމާ ވަގުތީ ގޮތުން ހަވާލުވާނީ ސުޕްރީމް ކޯޓުގެ ރައީސެވެ. ނަމަވެސް ސުޕްރީމް ކޯޓުގެ ރައީސް ވަނީ ކޮވިޑްގައި އަވަހާރަވެފައެވެ.