ކެރީބިއަން ސަރަހައްދުގެ ޤައުމެއްކަމަށްވާ ހެއިޓީއަށް ބާރުގަދަ ބިންހެލުމެއް އަތުވެއްޖެއެވެ.

ބީބީސީގައި ރިޕޯޓު ކޮށްފައިވާ ގޮތުން އެ ޤައުމުގެ ހުޅަނގު ސަރަހައްދަށް އައި މި ބިންހެލުމުގައި 7.2 މެގްނިޓިއުޑްގެ ބާރުމިން ހުންނާނެއެވެ. އަދި ބިންހެލުމުގެ ސަބަބުން ބައެއް ސަރަހައްދުތައް ސުންނާފަތިވެފައިވާއިރު، މިހާތަނަށް މަރުވެފައިވަނީ ކިތައް މީހުންކަމެއް ސާފެއް ނުވެއެވެ. ނަމަވެސް ބިންހެލުމުގެ ސަބަބުން ބައެއްގެ ފުރާނަ ގޮސްފައިވާކަން ކަށަވަރުކުރެވޭ ކަމަށް ހެއިޓީގެ ޑިރެކްޓަރ އޮފް ސިވިލް ޕްރޮޓެކްޝަން ޖެރީ ޗާންދްލަރ ވަނީ އޭއެފްޕީ ނޫހަށް މައުލޫމާތު ދެއްވަމުން ވިދާޅުވެފައެވެ. ބިންހެލުމުގައި އަނިޔާވި ބައެއް މީހުންނަށް މިހާރުވެސް ހޮސްޕިޓަލުގައި ފަރުވާދެމުންދާކަން އޭނާ ފާހަގަ ކުރެއްވިއެވެ.

ކަނޑުގެ 10 ކިލޯމީޓަރު އަޑިއަށް އައި މި ބިންހެލުމުގެ އަސަރު ކެރީބިއަން ކަނޑުގެ ބޮޑު ސަރަހައްދަކަށް ކޮށްފައިވާކަމަށް ރިޕޯޓުތައް ބުނެއެވެ.

ހެއިޓީއަށް 2010 ވަނަ އަހަރުވެސް ބާރުގަދަ ބިންހެލުމެއް އައިސް އެތައް ގެއްލުންތަކެއް ވެފައިވާއިރު، އަދިވެސް އެ ބިންހެލުމުގެ ސަބަބުން ލިބުނު ގެއްލުންތަކުން އަރައިގަނެވިފައިނުވާކަމަށް ބީބީސީގައި ރިޕޯޓު ކޮށްފައިވެއެވެ. އެ އަހަރު ހެއިޓީއަށް އެރި ބިންހެލުމުގައި ދެލައްކައަށްވުރެ ގިނަ މީހުން މަރުވެ، އެ ޤައުމުގެ އިޤްތިޞާދަށް ބޮޑު ލޮޅުމެއް އައެވެ. އަދި ޤައުމުގެ ޢުމްރާނީ ތަރައްޤީއަށްވެސް ބޮޑެތި ހުރަސްތަކެއް ކުރިމަތިވެގެން ދިޔައެވެ.

ހެއިޓީއަށް ބިންހެލުމެއް އައިސްފައި މިވަނީ އެ ޤައުމުގެ ސިޔާސީ މަސްރަހުވެސް ވަރަށް ބޮޑަށް ހަލަބޮލިވެފައިވާ ދަނޑިވަޅެއްގައެވެ. އެގޮތުން ދާދިފަހުން ހެއިޓީގެ ރައީސް ޖޮވެނަލް މޮއިސް އަވަހާރަކޮށްލުމާއެކު އެ ޤައުމުގައި ސިޔާސީ ބޮޑެތި ހަމަނުޖެހުންތަކެއް މިހާރުވެސް ދަނީ ހިނގަމުންނެވެ.