ހައިޓީގެ ބޮޑުވަޒީރު އިސްތިއުފާދެއްވައިފި

ހައިޓީގެ ވަގުތީ ބޮޑުވަޒީރު ކަމުގައި ހުންނެވި ކުލޯޑު ޖޯސެފް އެމަގާމުން އިސްތިއުފާދެއްވައިފިއެވެ.

ހައިޓީގެ ވަގުތީ ބޮޑުވަޒީރުކަމުގައި ކުލޯޑު ޖޯސެފް ހުންނެވީ ޖުލައި މަހުގެ 7 ވަނަ ދުވަހު އެގައުމުގެ ރައީސް ޖޮވެނެލް މޮއީސް އަވަހާރަކޮށްލުމާ ގުޅިގެންނެވެ. ބޮޑުވަޒީރުކަމުން އިސްތިއުފާދެއްވައި، މަގާމުގެ ބާރުތައް ބައިނަލްއަޤްވާމީ ދުނިޔެ ގަބޫލުކުރާ ބޭފުޅަކަށް ދެއްވުމަށް އެއްބަސްވެވަޑައިގަންނަވާ ކަމަށް ހޯމަ ދުވަހު ވޮޝިންގޓަން ޕޯސްޓަށް ދެއްވި އިންޓަރވިއުއެއްގައި ޖޯސެފް ވަނީ ވިދާޅުވެފައެވެ.

ޖޯސެފް އެއިޝާރާތްކުރައްވަނީ މޮއިސް އަވަހާރަކޮށްލުމުގެ ދެ ދުވަސް ކުރިން ބޮޑުވަޒީރުކަމަށް އައްޔަނުކުރެއްވި އެރިއަލް ހެންރީއަށެވެ. އުމުރުން 71 އަހަރުފުޅުގެ ހެންރީ އަކީ ނިޔުރޯސަރޖަންއެކެވެ. ހެންރީ އަދި މަގާމާ ހަވާލުވެ ވަޑައިގެންފައެއްނުވެއެވެ.

ވޮޝިންގޓަން ޕޯސްޓަށް ދެއްވާފައިވާ އިންޓަރވިއުގައި ޖޯސެފް ވިދާޅުވެފައިވަނީ މަގާމުން އިސްތިއުފާދެއްވުމަށް އެއްބަސްވެވަޑައިގަތީ ގައުމަށް ފައިދާ ހުރި ގޮތަކީ އެއީ ކަމަށްވާތީ ކަމަށެވެ. އަދި ވީއެންމެ އަވަހަކަށް ބާރުތައް ބަދަލުކުރެއްވުމަށް ތައްޔާރަށް ހުންނެވި ކަމަށެވެ. އަދި އޭނާއަކީ ކާކުކަން އެނގިވަޑައިގަންނަވާ ކޮންމެ މީހަކަށްވެސް، މިޒާތުގެ ކަންކަމަށް އޭނާގެ ހިތްޕުޅުގައި ޝައުގުވެރިކަން ނުހުންނަކަން އެނގޭނެކަމަށް ވިދާޅުވިއެވެ.

" ރައީސަކީ އަހަރެންގެވެސް ރައްޓެއްސެއް. އޭނާއަށް އިންސާފު ލިބުން އަހަރެންގެވެސް އެދުމަކީ" ޖޯސެފް ވިދާޅުވެފައިވެއެވެ.

11 މިލިއަން މީހުން ދިރިއުޅެމުން އަންނަ ހައިޓީއަކީ ސިޔާސީ ހަމަނުޖެހުން ބޮޑު ގައުމެކެވެ. އެކި ފަހަރުމަތިން އެގައުމުގެ ސަރުކާރުތައް ވައްޓާލުމުގައި ބޭރުގެ ފަރާތްތަކުގެ ބައިވެރިވުންވެސް ވަނީ ހިމެނިފައެވެ.

ހެއިޓީގެ ރައީސް ޖޮވެނަލް މޮއިސް އަވަހާރަކޮށްލާފައިވަނީ އެ ގައުމުގައި ސިޔާސީ ހަމަނުޖެހުންތައް އިތުރުވެފައިވާ ދަނޑިވަޅެއްގައެވެ. އެގޮތުން ވެރިކަން ކުރާ ރަށުގައި ބޮޑެތި ހަމަނުޖެހުންތަކެއް އުފެދިފައިވާއިރު މި ހަމަނުޖެހުންތަކުގައި އެތައްބަޔަކު ވަނީ މަރުވެފައެވެ. ސިޔާސީ ހަލަބޮލިކަމުގެ އިތުރުން ކޮވިޑްގެ އާލަމީ ވަބާގެ ސަބަބުން ވެސް އެގައުމަށް އައީ އިތުރު ހަމަނުޖެހުންތަކާއި އުނދަގޫތަކެއް ކުރިމަތިވަމުންނެވެ.