އައްޑޫ ސިޓީގެ ލޭންޑް ޔޫސް ޕްލޭން ހަދަން ހަވާލެއް ނުކުރޭ: ރިޔާން
މި މަސައްކަތް އެ ކުންފުންޏާ ހަވާލުކޮށްފައިވާ ކަމަށް ވާހަކަ ދެކެވޭ
އައްޑޫ، ހިތަދޫ
އައްޑޫ ސިޓީގެ ލޭންޑް ޔޫސް ޕްލޭން ހަދަން ރިޔާން ޕްރައިވެޓް ލިމިޓެޑާ ހަވާލުކޮށްފައި ނުވާކަމަށް އެކުންފުނިން ބުނެފިއެވެ.
އައްޑޫ ސިޓީގެ ތަރައްގީގެ ޕްލޭން އަދި ލޭންޑްޔޫސް ޕްލޭންގެ މަސައްކަތް ލަސްވަމުންދާތީ މިކަމާއި ގުޅިގެންނާއި، ރިޔާން ޕްރައިވެޓް ލިމިޓެޑަށް އައްޑޫ ސިޓީގެ ލޭންޑް ޔޫސް ޕްލޭން ހަދަން ހަވާލުކޮށްފައިވާކަމަށް ދެކެވެމުންދާ ވާހަކަތާކާއި ގުޅިގެން އެކުންފުނިން ނެރުނު ބަޔާނެއްގައި ވަނީ އައްޑޫ ސިޓީގެ ލޭންޑް ޔޫސް ޕްލޭން ހަދަން އެކުންފުންޏާ ހަވާލުކޮށްފައި ނުވާ ކަމަށެވެ.
އެކުންފުންޏާ ހަވާލުކޮށްފައިވާ މަސައްކަތަކީ އައްޑޫ ސިޓީގެ ސަސްޓެއިނަބަލް އާރބަން ޑިވެލޮޕްމެންޓް މާސްޓަރ ޕްލޭން އެކުލަވައިލުމާއި، އައްޑޫ ސިޓީގެ ލޭންޑްޔޫސް ޕްލޭން ރިވިއުކުރުމުގެ މަސައްކަތް ކަމަށެވެ.
މާސްޓަރ ޕްލޭންގެ މަސައްކަތް ލަސްވަމުންދަނީ ބިމުގެ ސަރވޭ މެޕްތައް ކައުންސިލުން ފައިނަލްކޮށް ހަވާލުކޮށްފައި ނުވާތީ ކަމަށް އެ ކުންފުނިން ބުނެފައިވެއެވެ. އެގޮތުން ކައުންސިލާއެކު އެއްބަސްވެފައިވާ ފަދައިން ލޭންޑްޔޫސް ޕްލޭންގެ މަސައްކަތް ނިންމަންޖެހޭނީ ސަރވޭ މެޕްތައް ލިބޭތާ 3.5 މަސްދުވަސް ތެރޭގައި ކަމަށް ރިޔަން އިން ބުނެފައިވެއެވެ.
ސަރވޭ މެޕްތައް ހޯދުމަށް ތަކުރާރުކޮށް އައްޑޫ ސިޓީ ކައުންސިލްގައި އެދިފައިވާނެ ކަމަށާއި، މިމަސައްކަތް ކުރަންޖެހޭ ފަރާތަކީ އައްޑޫ ސިޓީ ކައުންސިލް ކަމަށް ރިޔާންއިން ބުނެފައިވެއެވެ.
މިގޮތުން އައްޑޫ ސިޓީގެ ސަސްޓެއިނަބަލް އާރބަން ޑިވެލޮޕްމެންޓް މާސްޓަރ ޕްލޭން އެކުލަވައިލުމާއި އަދި އައްޑޫ ސިޓީގެ ލޭންޑްޔޫސް ޕްލޭން ރިވިއުކުރުމުގެ މަސައްކަތްތަކުގައި 1 އޭޕްރިލް 2021 ގައި ގެނައި އިސްލާހުގެ 4 ވަނަ މާއްދާގެ (ރ) ގައި މަސައްކަތް ކުރިއަށް ގެންދިއުމުގައި، "ކޮންޑިޝަން ޕްރެސިޑެންޓް" ނުވަތަ "ޝަރުތު ސާބިޤު" ތަކެއް ކަނޑައަޅައިފައި ވާކަމަށް ވެސް ރިޔަން އިން ބުނެފައިވެއެވެ.
އައްޑޫ ސިޓީއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރެވޭނީ ލޭންޑް ޔޫސް ޕްލޭން ނިންމިގެން ކަމަށް އައްޑޫސިޓީގެ މޭޔަރ ޢަލީ ނިޒާރު ވަނީ ވިދާޅުވެފައެވެ. އައްޑޫގެ ލޭންޑް ޔޫޒް ޕްލޭން ހެދުމަށް ޙަވާލުކޮށްފައިވަނީ ރިޔާން ޕްރައިވެޓް ލިމިޓެޑާ ކަމަށާއި، އައު ކައުންސިލްގެ މިދައުރަށް 5 މަސްވީއިރުވެސް މިމަސައްކަތް ނުނިމިވާކަމަށް މޭޔަރ ނިޒާރު ވިދާޅުވެފައިވެއެވެ.
