ކުޑަކުދިން ބަންދު ކުރަން އެކަށީގެންވާ ތަނެއް ޤާއިމުކުރެވޭނެ އިރެއް އެންގުމަށް، ހޯމް މިނިސްޓްރީގައި ޕީޖީ އެދިވަޑައިގެންފި
ދާދި ފަހުން މަރުގެ މައްސަލަތަކެއްގައި ހިމެނޭ ކުޑަ ކުދިންތަކެއް ބަންދުން ދޫކޮށްލާފައިވޭ
ޕްރޮސެކިއުޓަރ ޖެނެރަލް ޙުސައިން ޝަމީމް- ޕީޖީ ވިދާޅުވީ، ކުޑަކުދިން ބަންދު ކުރުމަށް ޤާނޫނުގައި ލާޒިމުކުރާ، އަދި ހުއްދަކުރާ މިންވަރުގެ ތަނެއް ޤާއިމުވާން ޖެހޭކަމަށް
ކުޑަކުދިން ބަންދުކުރަން އެކަށީގެންވާ ތަނެއް ހެދޭނެ އިރެއް އެންގުމަށް ހޯމް މިނިސްޓްރީގައި ޕްރޮސެކިއުޓަރ ޖެނެރަލް ޙުސައިން ޝަމީމް (ޕީޖީ) އެދިވަޑައިގެންފިއެވެ.
އެކަން ހާމަ ކުރައްވާފައިވަނީ އާދިއްތަ ދުވަހު ޕީޖީ ބޭއްވެވި ނޫސްވެރިންގެ ބައްދަލުވުމުގައެވެ. އެގޮތުން ދާދި ފަހުން، މަރުގެ މައްސަލަތަކެއްގައި ހިމެނޭ ކުޑަ ކުދިންތަކެއް ބަންދުން ދޫކޮށްލި މައްސަލައާ ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޕީޖީ ވިދާޅުވީ، އެކުދިން ހެއްކަށް ނުފޫޒު ފޯރުވުމުގެ ފުރުސަތު އެބައޮތް ކަމަށާއި، އެއީ ކަންބޮޑުވެވަޑައިގަންނަވާ ކަމެއް ކަމަށެވެ. ނަމަވެސް އަނެއްކޮޅުން ބަލާއިރު، އެކުދިން ބަންދު ކޮށްފައި ތިބި ތަނާ ބެހޭގޮތުން ކޯޓުން ލިޔެފައިވާ ސަބަބުތައް ބެއްލެވިއިރު، ރަނގަޅު ވާހަކަތައް ކޯޓުންވެސް ފާހަގަކޮށްފައިވާ ކަމަށެވެ. އަދި ވިސްނާލަން ޖެހޭ ވާހަކަތައްވެސް އޭގައި އެބަހުރި ކަމަށް ޕީޖީ ވިދާޅުވިއެވެ.
ޕީޖީ ވިދާޅުވީ، ކުޑަކުދިން ބަންދު ކުރުމަށް ޤާނޫނުގައި ލާޒިމުކުރާ، އަދި ހުއްދަކުރާ މިންވަރުގެ ތަނެއް ޤާއިމު ކުރެވޭނީ ކިހާ ދުވަހަކުންތޯ އަންގަވައި ދެއްވުމަށް އެދިވަޑައިގެންފައިވާނެ ކަމަށެވެ. އަދި އެކަން ސާފުވުމުން މަރުގެ މައްސަލަތަކުގައި ދައުވާ އުފުލުމަށްފަހު ބަންދުން ދޫކޮށްލާފައިވާ ކުދިން، އަލުން ބަންދު ކުރުމަށް ކުރަންޖެހޭ ކަންކަން ކުރިއަށް ގެންދަވާނެކަމަށް ޕީޖީ ވިދާޅުވިއެވެ.
"ތަނެއް ނެތި، މިހާރު އެގޮތަށް އޮއްވައި ބަންދުގައި ބެހެއްޓުމަކީ، އަނެއްްކޮޅުން ބަލާއިރުގައި، ކޯޓުން އެ ވިދާޅުވާ ގޮތަށް އަޅުގަނޑުމެންނަށް ކުރަންވެސް އުނދަގޫ ކަމެއް"ޕީޖީ ވިދާޅުވިއެވެ.
ޕީޖީ ވިދާޅުވީ އެކުދިން ދޫކޮށްލުމަށް ކޯޓުން ނިންމި ނިންމުން ހައިކޯޓުގައި އިސްތިއުނާފު ކޮށްގެން އެ މަރުޙަލާގައި ދައްކަވާނެ ވާހަކައެއްވެސް ނޯންނާނެކަމަށެވެ. އެއާއެކު، އެ ނިންމުން ރަނގަޅު ނަމަވެސް ނުވަތަ ގޯސް ނަމަވެސް، ހައިކޯޓުގައި ދައްކަވާނެ ވާހަކައެއް ނެތްނަމަ، ހައިކޯޓުގައި އިސްތިއުނާފު ކޮށްގެން ނެރެވޭނެ ނަތީޖާއެއް ނޯންނާނެކަން ޕީޖީ ފާހަގަ ކުރެއްވިއެވެ.
މިއަހަރުގެ ޖޫން މަހުގެ ތެރޭގައި ހުޅުމާލެ ފޭސް ދޭއްގައި، މަރާލާފައި ފޮއްޓަކަށްލުމަށްފަހު އެއްލާލައިފައި އޮއްވާ ފެނުނު 13 އަހަރުގެ ކުޑަކުއްޖާގެ މައްސަލައިގައި ދައުވާލިބޭ 17 އަހަރުގެ ކުއްޖާ، ދާދި ފަހުން ވަނީ ގޭބަންދަށް ބަދަލުކޮށްފައެވެ. އެ ކުއްޖާގެ މައްޗަށް އުފުލާފައިވަނީ ގަސްތުގައި މީހަކު މެރުމުގެ ދައުވާއެވެ. އެގޮތުން ކުޑަކުދިން ބަންދުކޮށްފައި ބައިތިއްބަން އެކަށީގެންވާ ޖަލެއް މި ވަގުތު ރާއްޖޭގައި ނެތްކަމަށް ހިއުމަން ރައިޓްސް ކޮމިޝަނުން އެކުލަވާލާފައިވާ ރިޕޯޓަކަށް ރިއާޔަތްކޮށް، ޖުވެނައިލް ކޯޓުން އެކުއްޖާ ގޭބަންދަށް ބަދަލުކުރީއެވެ.
އޭގެ އިތުރުންވެސް ބައެއް މައްސަލަތަކުގައި ހިމެނޭ ކުޑަކުދިން ޖަލު ބަންދުން ދޫކޮށްލާފައިވާއިރު، އައްސޭރި ޖަލުގައި އެއްވެސް މައްސަލައަކާ ގުޅިގެން ކުޑަކުދިން ބަންދު ނުކުރުމަށް އެޗްއާރްސީއެމް އިން ވަނީ ކަރެކްޝަންސްއަށްވެސް އަންގާފައެވެ.
