އައްޑޫ މަސައްކަތްތެރިންގެ މަސައްކަތުބައްދަލުވުން ފަށައިފި
ޕްރޮގްރާމްގެ ތެރެއިން ޖުމްލަ 3 ސެޝަން ބާއްވާނެ
އައްޑޫ މަސައްކަތްތެރިންގެ މަސައްކަތު ބައްދަލުވުމުގެ ތެރެއިން
ވިޔަފާރިއެއް ފަށައިގަތުމަށް އެހީތެރިވެދީ ކާމިޔާބު މަސައްކަތްތެރިއަކަށް ވުމަށް ބޭނުންވާނެ ހުނަރާއި މަޢުލޫމާތު ފޯރުކޮށްދިނުމަށްޓަކައި ބާއްވާ މަސައްކަތު ބައްދަލުވުންތައް އައްޑޫގައި ފަށައިފިއެވެ. އިއްޔެ ހުޅުމީދޫގައި ފެށި މި ސިލްސިލާގެ ފުރަތަމަ ސެޝަން އޮތީ އެ ދެ އަވަށުގެ މަސައްކަތްތެރިންނާ އެކުގައެވެ.
މިއަދުގެ ބައްދަލުވުން އޮތީ ފޭދޫ ސްކޫލްގައެވެ. 1 ޖެހިއިރު ފެށިގެން ކުރިއަށްދާ މި ބައްދަލުވުން އަމާޒުކޮށްފައިވަނީ މަރަދޫ، މަރަދޫފޭދޫ އަދި ފޭދޫގެ މަސައްކަތްތެރިންނަށެވެ. ކޮންމެ ދުވަހަކު 5 ގަޑިއިރަށް ކުރިއަށްދާ މި ޕްރޮގްރާމްގެ ފަހު ސެޝަން އޮންނާނީ މާދަމާ އައްޑޫ ހައިސްކޫލް ހޯލްގައެވެ. މިއީ ހިތަދޫގެ މަސައްކަތްތެރިންނަށް ޚާއްސަކުރާ ސެޝަނެކެވެ. ހިތަދޫގެ ސެޝަންގައި ބައިވެރިވުމުގެ ފުރުސަތު މިހާރުވެސް ހުޅުވާފައިވާއިރު ބައިވެރިވާން ބޭނުންވާ ފަރާތްތަކުން 9336787 މި ނަންބަރަށް ގުޅުއްވައިގެން ނަންނޯޓް ކުރެއްވުމަށް ޑަބްލިއުޑީސީން އެދެއެވެ.
އައްޑޫ އަންހެނުންގެ ތަރައްޤީއަށް މަސައްކަތް ކުރާ ކޮމިޓީން މަޢުލޫމާތުދޭގޮތުގައި، މިސެޝަންތަކުގައި، ފަހަށް ރައްކާކުރުމާއި، ކޭޝް ފްލޯ އެންޑް ބަޖެޓިންގއާއި، ބަންދުކުރުމާއި، ލޭބަލްކުރުމުގެ އިތުރުން، ވިއްކުމާއި މާކެޓްކުރުމާއި، އަގުހެދުމާއި، ރައްކާތެރި ގޮތުގައި ކާބޯތަކެތި ތައްޔާރު ކުރުމާއި އަދި ނަފްސާނީ ދުޅަހެޔޮ ކަމުގެ މައްޗަށް މަޢުލޫމާތު ދެވޭނެއެވެ.
މި މަސައްކަތު ބައްދަލުވުންތަކުގައި މަޢުލޫމާތު ދެއްވަނީ ބޭންކް އޮފް މޯލްޑިވްސްއާއި، ބިޒްނަސް ސެންޓަރ މޯލްޑިވްސްއާއި، އައްޑޫ އެކުއެޓޯރިއަލް ހޮސްޕިޓަލާއި، މޯލްޑިވްސް އިސްލާމިކް ބޭންކާއި، މޯލްޑިވްސް ރެޑް ކްރެސެންޓްގެ ކަމާބެހޭ ތަޖުރިބާކާރުންނެވެ.
މިއީ ކޮވިޑް 19ގެ ޞިއްޙީ ބަލިމަޑުކަމުގެ ތެރޭގައި ވަޒީފާތައް ގެއްލި އާމްދަނީލިބޭނެ ވަޞީލަތެއްނެތި ގޭގައި އުޅެންޖެހިފައިވާ ފަރާތްތަކާއި، އަމިއްލަ މަސައްކަތެއް ފެށުމަށް ޝައުގުވެރިވާ ފަރާތްތަކަށް ބޭނުންވާ މަޢުލޫމާތުތައް ފޯރުކޮށްދީ، މިކަމުގައި އެހީތެރިވެދިނުމުގެ ގޮތުން އައްޑޫސިޓީ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ހިންގާ ޕްރޮގްރާމެކެވެ.
