އާބާދީގައި 35000އަށްވުރެ ގިނަ އަދަދަކަށް މީހުންދިރިއުޅޭ އައްޑޫސިޓީގައި ކޮވިޑް ފެތުރޭ މިންވަރު ދުވަހަކަށްވުރެ ދުވަހެއް އިތުރުވެ، މިބަލީގެ އެކްޓިވް ކޭސް 397އަށް މިވަނީ އަރާފައެވެ. މިއަދު އެކަނިވެސް އައްޑޫސިޓީން 30 މީހުން ޕޮޒިޓިވްވެފައިވާއިރު، ހަފުތާ އެއްކޮށް މިދިޔައީ ކޮންމެ ދުވަހަކު ކަހަލަ ގޮތަކަށް 20ން، 30ން، 40ން މީހުން ޕޮޒިޓިވް ވަމުންނެވެ. މިއަދުވެސް ހިތަދޫއިން 19 މީހަކާއި މަރަދޫއިން 6 މީހުންނާއި މަރަދޫފޭދޫއިން 2 މީހުންނާއި ފޭދޫގެ 3 މީހުން ޕޮޒިޓިވްވިއެވެ. މިވަގުތު ހިތަދޫގައި އެކަނިވެސް މިބަލިޖެހިފައިވާ 200އަށްވުރެ ގިނަ މީހުން ތިބިއިރު، ހިތަދޫ ފިޔަވައި ދެން އެންމެ ގިނަ އަދަދަކަށް މީހުން ޕޮޒިޓިވް ވެފައިވަނީ މަރަދޫއާއި ފޭދޫންނެވެ. މިހަފުތާ ފެށިގެން އައިއިރު، ހުޅުދޫއާއި މީދޫއިންވެސް ގިނަ ބަޔަކު ކޮވިޑަށް ޕޮޒިޓިވް ވުމުގެ ސަބަބުން، އެ ދެއަވަށުގެ އެކްޓިވްކޭސްވެސް 34އަށް އަރާފައިވެއެވެ.

ޑައިރެކްޓް ކޮންޓެކްޓުންގެ ގޮތުގައި މިވަގުތު އައްޑޫސިޓީގައި 246 މީހުން ތިބިއިރު، އޭގެތެރެއިން 2 މީހުންނަށް މިހާރުވެސް ކޮވިޑް ފެސިލިޓީގައި އެޑްމިޓްކޮށްގެން ފަރުވާދެމުން އަންނަކަން ފާހަގަ ކޮށްލެވެއެވެ. އައްޑޫސިޓީގައި މިހާތަނަށް މިބަލީގައި 10 މީހަކުވަނީ ނިޔާވެފައެވެ.

އައްޑޫގެ އާންމު ހާލަތަށް ބަލާއިރު، ކޮވިޑް ޖެހުމުގެ އިތުރުން، ގިނަ ބަޔަކު އަންނަނީ ލޮލުރޯގާ، ޑެންގީ، އަދި ވައިރަލް ހުމަށް ޕޮޒިޓިވް ވަމުން ކަން އައްޑޫ އިކުއެޓޯރިއަލް ހޮސްޕިޓަލުން ހާމަކޮށްފައިވެއެވެ. މިދިޔަ އޮގަސްޓްމަހުން ފެށިގެން މިސިޓީ ވަނީ މޮނިޓަރިންގައެވެ. އެގޮތުން އަޅާފައިވާ ފިޔަވަޅެއްގެ ގޮތުން، ރޭގަނޑު 9ން ފަތިހު 4އަށް ކާފިއު އިއުލާން ކުރުން ފިޔަވައި އިތުރު ފިޔަވަޅެއް އަޅާފައެއް ނުވެއެވެ.

މިވަގުތު އައްޑޫގެ %90 މީހުން ވެކްސިން ޖަހާފައިވާތީ، ނެގެޓިވް ޕީސީއާރް ޓެސްޓާއެކު މިސިޓީއަށް އަންނަ އައުން ނިމުމަކަށް ގެނެސް، ދަތުރުފަތުރު ކުރުމުގައި ލުއިފަސޭހަ ތަކެއް ވަނީ ދީފައެވެ. ރޯގާފެތުރުންވެސް ގިނަވެފައިވުމުން ގޭގޭގައި އެކަހެރި ވެގެންވެސް ގިނަ ބަޔަކު ތިބެން މަޖުބޫރު މިހާލަތުގައި، ސްކޫލްތަކަށް ގޮސްގެން ކިޔަވަމުންދާތީ، ފިލާވަޅު ނުލިބި ގޭގައި ތިބެންޖެހޭ އެތައް ކުދިންނެއްގެ ބެލެނިވެރިން ދަނީ މިކަމުގެ ކަންބޮޑުވުން ފާޅުކުރަމުންނެވެ.

މާދަމާއަކީ މިއަހަރުގެ ޖުމްހޫރީ ދުވަހެވެ. މިދުވަހަށް އައްޑޫސިޓީގައި ވަނީ ގިނަ ކުޅިވަރުތަކެއް ބާއްވަން ތައްޔާރުވެފައެވެ. ފަލިޖެހުމުގެ މުބާރާތެވެ. ސްޕޯޓް ފިޝިން މުބާރާތެވެ. ސްކޫލްތަކުގެ ހަރަކާތްތަކާއި ގޭމްތަކެވެ. މިހުރިހާ ކަމަކަށް ފަރިތަ ކުރުމުގެ ހަރަކާތްވެސް ދިޔައީ މިހަފުތާގެ ތެރޭގައި ބާރަށް ކުރިއަށެވެ.

އައްޑޫސިޓީގައި ބަލިތައް މިހާ ގިނައިރުވެސް މިކަމާ އަޅާލާ ބަޔަކުނެތެވެ. ފިޔަވަޅުތަކެއް ނާޅައެވެ. އެއްވެ އުޅުމެއް ނުހުއްޓުވައެވެ. ފިޔަވަޅުތައް ވަރުގަދަނުކޮށް އޮތީ އައްޑޫސިޓީ ކައުންސިލުން ހާމަކުރާގޮތުން، ލޮކްޑައުންއަކީ ހައްލަކަށް ނުވާތީއެވެ. ކޮވިޑާއެކު މިއަދު އުޅެން ޖެހިފައިވާތީއެވެ. ތަންތަން ބަންދުކޮށް ފިޔަވަޅު އެޅުމުން ވިޔަފާރިވެރިންނަށް ގެއްލުން ވެ އެކަމުގެ ޝަކުވާ ކުރާނެތީއެވެ. އެހެނިހެން ޚިދުމަތްތަކަށް ވެސް ބުރޫ އެރުމުން ރައްޔިތުން ކަންބޮޑުވާނެތީއެވެ.

އައްޑޫސިޓީގެ ސިއްހީ ނިޒާމުގެ ހާލަތު ބަޔަކަށް އޮޅިފައެއް ނުވެއެވެ. މުވައްޒަފުންގެ ދަތިތައް އިންތިހާއަށް އޮތް ތަނެކެވެ. ވަސީލަތްތަކާއި ރީތި ޢިމާރާތެއް ހުރުން ފިޔަވައި ތަނުގެ ޚިދުމަތް ސުމެކެވެ. އަބަދުވެސް އިވެނީ ރަނގަޅު ކުރުމަށް ގިނަ މަސައްކަތްތަކެއް ކުރެވޭ ވާހަކައެވެ. މިތަންތަނުން އެކަށީގެންވާ ޚިދުމަތެއް ލިބެންދެން ވެސް އަޅުގަނޑުމެންގެ ސިއްހަތު ސަލާމަތުން ބެހެއްޓޭނީ، ހަލުވި ކަމާއެކު ގައިންގަޔަށް އަރާ ބަލިތަކުން ރައްކާތެރިވެ ތިބެގެންނެވެ. ކަންކަން ގޯހުން ގޯހަށް ނުދަނީސް ފިޔަވަޅުއެޅުން ބުއްދިވެރިއެވެ.