އައްޑޫގައި ކުޑަކުއްޖަކަށް ޖިންސީ ގޯނާކުރި ފުލުސްމީހާއަށް ދައުވާކޮށްފި
10 ނޮވެމްބަރު 2021 | ބުދަ 12:34ޕީޖީ އޮފީހުން އޭނާގެ މައްޗަށް ކުރީ 18 އަހަރު ނުފުރޭ ކުއްޖަކަށް ބިރުދައްކައިގެން ޖިންސީ އަމަލެއް ހިންގިކަމުގެ ދައުވާ
އައްޑޫ ސިޓީ ސްކޮޔަރ
އައްޑޫސިޓީ ހިތަދޫގައި ކުޑަ ކުއްޖަކަށް ބިރު ދައްކައިގެން ޖިންސީ ގޯނާކުރިކަމުގެ ތުހުމަތުގައި ހައްޔަރުކުރި ފުލުސްމީހާއަށް ދައުވާކޮށްފިއެވެ. މިމައްސަލާގައި ހައްޔަރުކޮށްފައިވަނީ ފުވައްމުލައް މާދަޑު އޮމާން، އުމުރުން 34 އަހަރުގެ އަޙްމަދު ނަޒްމީންގެ މައްޗަށެވެ. ފުލުހުންގެ ސަބް އިންސްޕެކްޓަރު ރޭންކުގައި ހުރި ނަޒްމީން ވަނީ, މި މައްސަލައާ ގުޅިގެން ޝަރީއަތް ނިމެންދެން ބަންދުގައި ބަހައްޓަން ކޯޓުން އަމުރުކުރުމުން، ވަޒީފާއިން ސަސްޕެންޑުކޮށްފައެވެ.
މި މައްސަލައިގެ ތަހުގީގު ނިންމައި ފުލުހުން ޕީޖީ އޮފީހަށް މައްސަލަ ހުށަހެޅުމުން އެ އޮފީހުން ވަނީ މިދިޔަ ހޯމަ ދުވަހު ނަޒްމީންގެ މައްޗަށް ދައުވާކޮށް، އެމައްސަލަ ހިތަދޫ މެޖިސްޓްރޭޓު ކޯޓަށް ހުށަހަޅާފައެވެ.
ޕީޖީ އޮފީހުން ވަނީ ނަޒްމީންގެ މައްޗަށް ދައުވާކުރީ، މިދިޔަ އަހަރުގެ ކުރީކޮޅުން ފެށިގެން، އިތުބާރު ކުރެވޭ މަގާމެއްގައި ހުރެ، އުމުރުން 18 އަހަރު ނުފުރޭ ކުއްޖަކަށް ބިރުދައްކައިގެން، އެ ކުއްޖާގެ އޮރިޔާން މަންޒަރު ދައްކުވައިދޭ ފޮޓޯ ނަގައި، އެ ފޮޓޯ ބޭނުންކޮށްގެން ބްލެކްމެއިލްކޮށް އެ ކުއްޖާއަށް އެކި ދުވަސް މަތިން ޖިންސީ ގޯނާ ކޮށްފައިވާ ކަމަށް ބުނެއެވެ.
ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްސަ އުސޫލުތަކުން އަމަލުކުރުމުގެ ގާނޫނުގެ ދަށުން އޭނާގެ މައްޗަށް ކުރީ، ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގުމުގެ ކުށުގެ ދައުވާ އެވެ. މި ކުށުގެ އަދަބަކީ 15 އަހަރާ 18 އަހަރާ ދެމެދުގެ މުއްދަތަކަށް ޖަލަށްލުމެވެ.
މިދިޔަ ސެޕްޓެމްބަރު މަހުގެ 16ވަނަ ދުވަހުގެ ރޭ އޭނާ ހައްޔަރު ކުރީ، މިމައްސަލަ ހުށަހެޅުމުންވެސް ހައްޔަރުނުކުރުމުން، ހިތަދޫގެ ގިނަ ބަޔަކު މަގުމައްޗަށް ނުކުމެ ކުރި އިޙުތިޖާޖަކަށްފަހުއެވެ.
ޖިންސީ ގޯނާގެ ޝިކާރައަކަށްވި އަންހެން ކުއްޖާއަކީ ނަޒްމީންގެ އަންހެނުންނާ އާއިލީ ގޮތުން ގުޅުން އޮންނަ ކުއްޖެކެވެ.
