"ޖަޒީރާ މަސްރޭސް 2021" މިފަހަރު މިއީ ސްޕޯޓްސް ފިޝިންގ ރޭހެއް
4 ނޮވެމްބަރު 2021 | ބުރާސްފަތި 11:45މި ފަހަރުގެ މުބާރާތް ވަނީ މުޅި ރާއްޖެއަށް ހުޅުވާލާފައި
ޖަޒީރާ މަސްރޭސް 2021
ކުރިއަރަމުން އަންނަ ސްޕޯޓްސް ފިޝިންގއަށް ޚާއްސަކޮށްގެން އައްޑޫސިޓީގައި "ޖަޒީރާ މަސްރޭސް 2021"ގެ ނަމުގައި މުބާރާތެއް ބާއްވަން ތައްޔާރުވެއްޖެއެވެ.
ކޮންމެ އަހަރަކު އެއްފަހަރު ބާއްވަމުން އަންނަ ޖަޒީރާ މަސްރޭސް މިފަހަރު ކުރިއަށްދަނީ ބަދަލުތަކަކާއެކު ހަމައެކަނި ސްޕޯޓްސް ފިޝިންގއަށް ޚާއްސަކޮށްގެންނެވެ. މި މުބާރާތް ފުރަތަމަ ބާއްވަން ހަމަޖެހުނީ މި އަހަރުގެ ދުނިޔޭގެ ފަތުރުވެރިކަމުގެ ދުވަހާ ގުޅުވައިގެންނެވެ. އެހެންނަމަވެސް ކޮވިޑްގެ ހާލަތާ ގުޅިގެން އައްޑޫސިޓީގައި އެދުވަސް ކުލަގަދަކޮށް ފާހަގަ ނުކުރާތީ މިހާރު މި މުބާރާތް ބާއްވަން ނިންމާފައިވަނީ ނޮވެންބަރ މަހުގެ 11 ވަނަ ދުވަހުއެވެ. މި މުބާރާތް ކުރިއަށްދާނީ އައްޑޫސިޓީ މަރަދޫގައެވެ.
މިއީ އިކުއެޓޯރިއަލް ފިޝިންގ ކްލަބާއި އައްޑޫސިޓީ ކައުންސިލާއި އަދި ޓޫރިޒަމް މިނިސްޓްރީ ގުޅިގެން ރާއްޖޭގައި މުޅިން އަލަށް ތައާރަފުވެފައިވާ, ސްޕޯޓްސް ފިޝިންގއަށް ޒުވާނުން ޝައުގުވެރިކޮށް، މި ކުޅިވަރުގެ ތެރެއިން ރާއްޖޭގެ ފަތުރުވެރިކަން ކުރިއެރުވުމުގެ މަގުސަދުގައި ބާއްވާ މުބާރާތެއް ކަމަށް އިކުއެޓޯރިއަލް ފިޝިންގ ކްލަބުން މަޢުލޫމާތު ދެއްވައެވެ.
މުޅިރާއްޖެއަށް ހުޅުވާލައިގެން ކުރިއަށްދާ މި މުބާރާތުގައި މިހާތަނަށް 11 ޓީމު ބައިވެރިވެފައިވެއެވެ. މި މުބާރާތުގައި ބައިވެރިވުމުގެ ފުރުސަތު އަންނަ ހޮނިހިރު ދުވަހާ ހަމަޔަށް ހުޅުވިފައިވާއިރު، މިހާތަނަށް ރާއްޖޭގައި ސްޕޯޓްސް ފިޝިންގއިން މަޝްހޫރުކަން ހޯދަމުން އަންނަ މޫސާ ކަލީމް, އަދި ކުރީގެ ފުޓްބޯޅަ ކުޅުންތެރިޔާ ޝަމްވީލް ގާސިމް(ބޮންޑާ) ފަދަ ފަރާތްތަކުގެ ޓީމްތައް ބައިވެރިވެފައިވެއެވެ. މި މުބާރާތުގައި އެހެން ފަހަރުތަކެކޭ ވެސް އެއްގޮތަށް "ބޮނޑަމަހާ" ނުވަތަ އެންމެ ބޮޑުމަސް ބޭނިފަރާތް ހޮވުން އޮންނާނެއެވެ. އޭގެ އިތުރުން މުޅި މުބާރާތުން 1 ވަނަ 2 ވަނަ 3 ވަނަ ހޮވާނެއެވެ.
މުބާރާތުން އެއްވަނައަށް ހޮވޭ ޓީމަށް ކަނޑައެޅިފައިވާ އިނާމަކީ 30،000 ރުފިޔާއެވެ. ދެވަނަ ޓީމަށް 20،000 ރުފިޔާ އަދި ތިންވަނައަށް ހޮވޭ ޓީމަކަށް 10،000 ރުފިޔާގެ އިނާމް ކަނޑައެޅިފައިވެއެވެ.
މި މުބާރާތުގެ ކޯ ސްޕޮންސަރަކީ ޝޮޕް އެންޑް ގޯއެވެ. ސިލްވާ ސްޕޮންސަރަކީ ޗޮކޯ ބްލާސްޓްއެވެ. އިތުރު ސްޕޮންސަރުންގެ ތެރޭގައި އެކޫޑާ، ސްޓާރޓް ބެޓެރީސް، ޔަމަހާ/އެލިޔާ، އަދި ބޮބްމާލިން ގިއަރ ހިމެނެއެވެ.
މިދިޔަ އަހަރުގެ ޝޮޕްއެންގޯ ޖަޒީރާ މަސްރޭހުގައި 16 ޓީމަކުން ވާދަކުރިއެވެ. އެ މުބާރާތުގައި އެންމެ ބޮޑުމަސް ބޭނި މީހާއާއި ޓީމުގެ އިތުރަށް އެންމެ ގިނަ ޕޮއިންޓް ހޯދި ޓީމާއި އެންމެ ގިނަ މަސްބޭނި ޓީމް ހޮވާފައިވެއެވެ.
