މަދަނީ ޖަމްއިއްޔާތަކުގެ އިހަވަންދޫ މަހާސިންތާގައި ސެޝަންތަކެއް ނަގައިދީފި
ތައުލީމީ ދާއިރާގައި ހަރަކާތްތެރިވާ ފަރާތްތަކުގެ ދައުރާގުޅޭ ސެޝަންތަކެއް ވަނީ ނަގައިދީފައި
ހއ.އިހަވަންދޫ
މަދަނީ ޖަމްޢިއްޔާތަކަށް ޚާއްސަ ކޮށްގެން މިނިސްޓްރީ އޮފް ޔޫތު އެންޑް ކޮމިއުނިޓީ އެމްޕަވަރމެންޓުން 2021 އޮކްޓޯބަރު 20ން 27ށް ހއ. އިހަވަންދޫގައި ކުރިޔަށް ގެންދިޔަ ހއ، ހދ އަދި ށ އަތޮޅުގެ މަދަނީ ޖަމްއިއްޔާތަކުގެ މަހާސިންތާގައި ސެޝަންތަކެއް ނަގައިދީފިއެވެ.
ހއ. އިހަވަންދޫގެ އިތުރުން ހއ.ހޯރަފުށި އަދި ހއ. ދިއްދޫގައި މަސައްކަތްކުރާ ޓީޗަރުންނަށް އަމާޒުކޮށްގެންވެސް މިފަދަ އިތުރު ސެޝަންތަކެއް ވަނީ ކުރިޔަށް ގެންގޮސްފައެވެ. މަހާސިންތާގެ މުއްދަތަކީ 3 ދުވަހެވެ. މިނިސްޓްރީ އޮފް ޔޫތް އެންޑް ކޮމިއުނިޓީ އެމްޕަވަރމެންޓުން ނެރެފައިވާ ނޫސް ބަޔާނުގައި ވާގޮތުން މި މަހާސިންތާގެ މަގުސަދަކީ ޖަމްއިއްޔާތަކުގެ މެދުގައި އޮންނަ ގުޅުން މިހާރަށްވުރެ ވަރުގަދަކޮށް، އެކުގައި މަސައްކަތް ކުރުމުގެ ރޫހު ދިރުވައި އާލާކުރުމެވެ.
މަހާސިންތާ މެދުވެރިކޮށް ޖަމްއިއްޔާތަކުގެ ހިންގުން ހަރުދަނާކުރުމަށް ބޭނުންވާ ތަފާތު ފަންނީ މައުލޫމާތުތަކާއި، އަހަރީ ރިޕޯޓް ތައްޔާރު ކުރުމާއި، އެނޫންވެސް ހަރަކާތްތައް ރާވައި އިންތިޒާމް ކުރާނެ ގޮތުގެ މައުލޫމާތު ވަނީ ދީފައެވެ. ޖިސްމާނީ އަދި ނަފްސާނީ ދުޅަހެޔޮކަމާއި ގުޅުން ހުރި ހަރަކާތްތަކާއި ދަރިން ތަރުބިއްޔަތު ކުރުމުގައި ގެންގުޅެންވީ ގޮތްތަކާ ގުޅޭގޮތުންނާއި، އަދި މުޖްތަމައުގެ ހަމަޖެހުމާއި އަމާންކަން ދެމެހެއްޓުމަށްޓަކައި ޖަމްއިއްޔާތަކުންނާއި، ތައުލީމީ ދާއިރާގައި ހަރަކާތްތެރިވައި ފަރާތްތަކުގެ ދައުރާ ގުޅޭގޮތުން ވެސް ސެޝަންތަކެއް ވަނީ ނަގައިދީފައެވެ.
