ބިދޭސީންގެ މައްސަލައަކީ ޒަމާނުއްސުރެ ހައްލު ނުވެ އޮތް މައްސަލައެކެވެ. މި މައްސަލަ ހައްލުކޮށްދޭނެ ކަމަށް ބުނެ އެކި ސަރުކާރުތަކުން ވަނީ ވައުދުތައް ވެފައެވެ. އެ އުސޫލުގެ ދަށުން މި ސަރުކާރުން ވެސް ވަނީ ބިދޭސީންގެ މައްސަލަ ހައްލުކޮށްދޭނެ ކަމަށް ބުނެފައެވެ. އެގޮތުން ބިދޭސީން ރެގިއުލަރައިޒް ކުރުމަށް ޕްރޮގްރާމްތަކެއް ވެސް ފެށިއެވެ.
ރެގިއުލަރައިޒް ކުރަން ފެށި މަސައްކަތުގައި 43،000 މީހުން ރަޖިސްޓްރީ ކޮށްފައިވާއިރު ކޮވިޑާ ހެދި މީހުން ގެނެސްގެން އެކަން ކުރުން މަޑު ޖެހިފައި އޮތް ކަމަށް އިކޮނޮމިކް މިނިސްޓްރީން ވަނީ ބުނެފައެވެ.
ރަޖިސްޓަރ ކުރި މީހުންގެ ތެރެއިން 8،938 މީހުން އެދިގެން ފުރުވާލާފައިވާއިރު 2020 ވަނަ އަހަރުގައި 15،000 މީހުން އަމިއްލައަށް ފުރައިގެން ދިޔައެވެ. ހަމައެއާއެކު، 2021 ގައި 3،000 މީހުން ފުރައިގެން ދިޔުމާއެކު ޖުމްލަ 27،000 މީހުން މިހާރު ފުރައިގެން ގޮސްފައިވާ ކަމަށް ވެސް އިކޮނޮމިކް މިނިސްޓްރީން ވަނީ ބުނެފައެވެ.
ރާއްޖޭގައި 281،000 ބިދޭސީން އެބަތިބި ކަމަށް ތަފާތު ހޯދުންތަކުން ދައްކައެވެ. މިއީ ރާއްޖެ ފަދަ ކުޑަ ގައުމުކާއި އަޅާބަލާއިރު ނިސްބަތުން ބޮޑު އަދަދެކެވެ. ރާއްޖޭގެ މުޅި ޖުމްލަ އާބާދީގައި ވެސް އުޅެނީ ހަތަރު ލައްކައެއްހާ ދިވެހިންނެވެ.
މިހާ ގިނަ އަދަދަކަށް ރާއްޖެއަށް ބިދޭސީން އެތެރެވުމުގައި ވަރަށް ގިނަ ބަޔެއްގެ އިހުމާލު ބޮޑެވެ. ރާއްޖޭގައި ނުގަވާއިދުން ދިރިއުޅެމުންދަނީ ކިހާ އަދަދެއްގެ ބިދޭސީންކަމެއް ބުންނަވެސް ދައްޗެވެ. މިކަމުގެ ނޭދެވޭ އަސަރު މިހާރު މި މުޖުމަތައުން ވެސް މިވަނީ ފެންނަން ފަށާފައެވެ.
މިހާ ގިނަ އަދަދެއްގެ ބިދޭސީން ރާއްޖޭގައި އުޅެމުންދާއިރު ކުށުގެ ވެއްޓަށް ހުށަހެޅޭ ބިދޭސީންގެ އަދަދު ދުވަހެއް ދުވަހަކަށް މި އަންނަނީ އިތުރުވަމުންނެވެ. ބިދޭސީންގެ މެދުގައި މާރާމާރި ހިންގުމާއި ފުލުހުންނާއި ކުރިމަތިލުމާއި ވައްކަން ކުރުމުގެ އިތުރުން ޑޮލަރުގެ ވަގު ވިޔަފާރި ކުރުން ވެސް ހިމެނެއެވެ. މިހިސާބުން ނިމުނީކީ ނޫނެވެ. ކުޑަކުދިންނަށް ޖިންސީ ގޯނާ ކުރުމާއި މަސްތުވާތަކެތީގެ ވިޔަފާރި ކުރުމާއި މަސްތުވާތަކެތި ބޭނުންކުރުމުގައި ދިވެހިންނެކޭ އެއް ހަމައެއްގައި ބިދޭސީން ދަނީ ހަރަކާތްތެރިވަމުންނެވެ.
މީގެއިތުރުން ރާއްޖޭގައި ނުގަވާއިދުން ވިޔަފާރިތައް ވެސް އަންނަނީ ހިންގަމުންނެވެ. ކޮންމެ ވިޔަފާރިއަކަށް ބަލައިލިކަމުގައިވީނަމަވެސް ބިދޭސީންގެ އަތް ނުފޯރާ ވިޔަފާރިއެއް މަދުވާނެއެވެ. ރާއްޖޭގައި 18،000ށްވުރެ ގިނަ ވިޔަފާރި ރަޖިސްޓްރީ ކޮށްފައި އޮތް ނަމަވެސް މީގެ އަޑީގައި ބިދޭސީން އުޅެނީ ކިތައް ވިޔަފާރީގައިތޯ ހޯދިފައެއް ނެތެވެ.
"އަން ޑޮކިއުމެންޓެޑް" ނުވަތަ ގަވާއިދާ ޚިލާފަށް އުޅެމުން އަންނަ ބިދޭސީންގެ މައްސަލަ އޮތީ ފާލުން ނެއްޓިފައެވެ. މި ވާހަކައަކީ އަލަށް ދައްކާ ވާހަކައެއް ނޫނެވެ. އަދި ބަޔަކަށް ނޭގޭ ވާހަކައެއްވެސް ނޫނެވެ. މި ވާހަކަތަކަކީ އެންމެނަށް އެނގޭ އެކަމަކު ނުހުއްޓުވި އޮތް ބޮޑު ފެއިލްވުމެކެވެ.
އަބަދުވެސް ބިދޭސީން ވިޔަފާރިކޮށް ދިވެހިންނަށް އޮތް ފުރުސަތު ގެއްލުވާލާ ވާހަކައާ ހިސާބުން ސަރުކާރުން ދައްކަނީ ގާނޫނެއްގެ ވާހަކަ ނުވަތަ ކޮންމެވެސް ސިސްޓަމެއް ނެތް ވާހަކައެކެވެ. ބިދޭސީން ރާއްޖެ އެތެރެކޮށް އެކަމުން މަންފާ ހޯދާ ބަޔަކު އުޅޭކަމީ ފެންނަން އޮތް ހަގީގަތެކެވެ. ހައްލުކުރުމުގެ ބަދަލުގައި ދައްކާ ބަހަނާތައް ވަނީ ގިނަވެފައެވެ.
ދިވެހިންނެކޭ އެއް ހަމައެއްގައި ބިދޭސީން ވެސް ކުށްތަކަށް އަރައިގަންނަމުންދާއިރު ހިތްހަމަނުޖެހޭ ކަންތައްތައް ދިމާވުމުން މުޒާހަރާ ވެސް ކޮށް ހަދައެވެ. ބިދޭސީންގެ ކަންތައްތައް މިހާ ހިސާބަށް ގޮސްފައިވާއިރު މި ހަގީގަތުގައި ވެސް ސަރުކާރުން ތަންކޮޅެއް ސީރިއަސް މައްސަލައެއްގެ ގޮތުގައި ވިސްނަން ޖެހިފައި އޮތް ކަމެކެވެ. ބަޔަކު މީހުން އަމިއްލަ މަންފާ ހޯދުމަށްޓަކައި ކުރިކަމަކުން މިއަދު ގައުމުގެ ހާލަތު މިއޮތީ މިހިސާބަށް ގޮސްފައެވެ.
ދިވެހިން އުޅޭ ހުރިހާ ގޮތްތަކަށް އުޅެމުން ނުވަތަ އުޅުމަށް ބިދޭސީން ގެންދަނީ މަސައްކަތް ކުރަމުންނެވެ. ބައެއް ފަހަރު މިއީ އެމީހުންގެ އަމިއްލަ ގައުމު ނޫންކަން ވެސް ހަނދާން ނެތޭ ކަހަލައެވެ. ކުރުގޮތަކަށް ބުނާނަމަ ބިދޭސީންނަށް މަދުވަނީ މިހާރު ހަމައެކަނި އައިޑީކާޑެކެވެ.
