ފިޔަވައްޗަށް ވަން މައްސަލައިގައި ޝުޖާއުގެ ރައްދު - އަޅުގަނޑު ތައްޔާރު، ދައްކަން ލައްކަ ވާހަކަ އެބަހުރި
ޝުޖާއު ފިޔަވައްޗަށް ވަދެ އުޅުނު ކަމަށާއި، އަދި ބައެއް މީހުން އެތަނަށް ވައްދަން އޭނާ މަސައްކަތް ކޮށްފައިވާ ކަމަށް ރިޕޯޓުގައި ބަޔާންކޮށްފައިވޭ
ޝުޖާއު - ފިޔަވައްޗަށް ވަން މައްސަލައިގައި ފިޔަވަޅު އެޅުމަށް ވަނީ އެދިފައި
ހުޅުމާލޭގައި ހުންނަފިޔަވައްޗަށް ވަން މައްސަލައިގައި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއަށް ފިޔަވަޅުއަޅަން އެދިފައިވާތީ، އެކަމަށް ތައްޔާރު ކަމަށާއި ދައްކަން ލައްކަ ވާހަކަ އެބަހުރި ކަމަށް އޭނާ ވިދާޅުވެއްޖެއެވެ.
ޝުޖާއު ފިޔަވަތީގެ ތެރެއަށް ވަދެ އެތަނުގައި ތިބި ކުދިންނާ ވާހަަކަ ދެއްކި މައްސަލަ ބެލުމަށް ރައްޔިތުންގެ މަޖިލީހުގެ ހިއުމަންރައިޓް އެންޑް ޖެންޑަރ ކޮމެޓީން ލޯކަލް ގަވަރުމަންޓް އޮތޯރިޓީއަށް ހުށަހެޅުމަށް ވަނީ ނިންމާފައެވެ. ފިޔަވަތީގައި ހިނގައި ދިޔަ ހާދިސާގެ ރިޕޯޓް ހިއުމަން ރައިޓްސް ކޮމިޝަނުންނާއި ޗިލްޑްރެންސް އޮމްބަޑްސްޕާސަން އިން ތައްޔާރުކުރި ރިޕޯޓްގައި ހިމަނާފައިވާ ކަންކަމާ ގުޅޭ ގޮތުން އާދީއްތަ ދުވަހު ކުރިއަށް ދިޔަ ކޮމިޓީގެ ބައްދަލުވުމުގައި ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް ވިދާޅުވީ ފިޔަވަތީގެ ކުދިން ނުކިޔަމަންތެރިކަން ދައްކައި ފުރާޅަށް އަރައިގެން އުޅުނު ވަގުތު ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ފިޔަވައްޗަށް ވަދެ އުޅުނު ކަމަށެވެ. އަދި އިތުރު ބައެއް މީހުން އެތަނަށް ވައްދަން އޭނާ މަސައްކަތް ކޮށްފައިވާ ކަމަށް ރިޕޯޓުގައި ބަޔާންކޮށްފައިވާތީ އެކަން ހިނގައި ދިޔަގޮތް ބަލަން އެލްޖީއޭއަށް އެންގުމަށް މުމްތާޒް ހުށަހެޅުއްވިއެވެ.
ޝުޖާއުގެ މައްސަލަ ބަލަން ހުށަހަޅަން ނިންމާފައިވާތީ އެ މައްސަލައާއި ގުޅިގެން ޝުޖާއު ވިދާޅުވީ އޭނާ ތައްޔާރު ކަމަށާއި، ލައްކަ ވާހަކަ ދައްކަން އެބަހުރި ކަމަށެވެ. އަދި ރައްޔިތުންގެ މަޖިލީހުގެ ހިއުމަންރައިޓްސް އެންޑް ޖެންޑާ ކޮމިޓީ އަށް ވެސް ދެވިދާނެ ކަމަށާއި، އިދިކޮޅު ޕީޕީއެމުން ޖެންޑާ މިނިސްޓަރ ޖަވާބުދާރީ ކުރުވުމުގެ މަސައްކަތް ކުރިއަށްދާ ކަމަށެވެ.
އާދީއްތަ ދުވަހު ބޭއްވި ޖެންޑަރ ކޮމިޓީގެ ބައްދަލުވުމުގައި މަޝްވަރާކޮށް، ދިރާސާކޮށްފައިވަނީ އެޗްއާރްސީއެމް އަދި ޗިލްޑްރަންސް އޮމްބަޑްޕާސަން ހުށަހަޅާފައިވާ ރިޕޯޓާ ބެހޭ ގޮތުންނެވެ. ކޮންމެ މުއައްސަސާއަކުން ވެސް ވަނީ ދެ ރިޕޯޓެއް ހުށަހަޅާފައެވެ. ރިޕޯޓުގައި މައިގަނޑު ގޮތެއްގައި ހަތަރު ކަމެއް ފާހަގަކޮށްފައިވެއެވެ. ޖާގައަށްވުރެ ގިނައިން އެތަނުގައި ކުދިން ގެންގުޅުމާއި، މުވައްޒަފުންނަށް ވުރެ އެތާގައި ބަލަހައްޓާ ކުދިންގެ އަދަދު ގިނަވުމެވެ. އަދި ތަނުގެ މުވައްޒަފުން ތަމްރީން ކޮށްފައިވަނީ ތުއްތު ކުދިން ބަލަހައްޓަން ކަމަށާއި ނަމަވެސް އުމުރުން 14 އަހަރުގެ ކުދިން އެތަނުގައި މިހާރު އެބަތިބި ކަމަށެވެ. މުވައްޒަފުންނަށް ބޮޑެތި ކުދިން ބެލެހެއްޓޭނެ ތަމްރީން ލިބިފައި ނެތުމާއި، ނަފްސާނީ ގޮތުން އެހީތެރިކަން ބޭނުންވާއިރު އެ އެހީތެރިކަން ލިބެމުން ނުދާ ކަަމަށެވެ. ފިޔަވަތީގައި އުޅެމުންދާ ކުދިންނަށް ނަފްސާނީ ގޮތުން އެހީތެރިކަން ބޭނުންވާ ކަމަށް ރިޕޯޓުގައި ފާހަގަކޮށްފައިވެއެވެ.
ޝުޖާއު ފިވައްޗަށް ވަން މައްސަލައިގައި އޭނާގެ ދިފާއުގައި ޕީޕީއެމުން ވަނީ ބަޔާނެއް ނެރެފައެވެ. ޕީޕީއެމުން ނެރުނު ނޫސްބަޔާނުގައި ބުނެފައިވަނީ ދައުލަތުން ކުޑަކުދިން ބެލެހެއްޓުމަށް ހުޅުމާލޭގައި ޤާއިމުކޮށްފައިވާ "ފިޔަވަތި" އިމާރާތުގެ އެތެރޭގެ ހާލަތު ގޯސްވެ އެތަނުގެ ތެރޭގައި ހިނގައި ދިޔަ ހަމަނުޖެހުން ކޮންޓްރޯލު ނުވެ އިމާރާތުގައި އަލިފާން ރޯވާ ހިސާބަށް ދިޔައިރުވެސް، ކުދިން ބެލެހެއްޓުމުގެ ޒިންމާ އާއި ހަވާލުވެ ތިއްބެވި ސިޔާސީ ވެރިން ފިޔަވަޅު ނާޅައި ހާލަތު ގޯހުން ގޯހަށް ދިއުމަށް ދޫކޮށްލައިގެން ތިއްބާ އަވަސް ފިޔަވަޅުތަކަކާއެކު، އެކަން ޙައްލު ކުރައްވާ މުޅި ތަން ކޮންޓްރޯލު ކުރުމުގައި އިސް ދައުރެއް އަދާ ކުރައްވާފައިވަނީ މާލޭ ސިޓީގެ ހުޅުމާލެ އަށް ނިސްބަތްވެވަޑައިގަންނަވާ ކައުންސިލަރު، ޝުޖާއު ކަމަށެވެ.
އަދި ފިޔަވަތީގައި ރޯވެފައިވާ އަލިފާންގަނޑު ނިއްވާލުމުގައި ވެސް ދިވެހި ސިފައިންނާއެކު ހަރަކާތެތެރިވެފައިވާ ކަމަށާއި، އެވަގުތު އެފަދަ އަވަސް ފިޔަވަޅުތަކެއް ޝުޖާއު އަޅުއްވާ އެތަނުގެ ތެރޭގައި ހިނގި ހަމަނުޖެހުންތައް ކޮންޓްރޯލު ކުރައްވާ ނަމޫނާ ދެއްކެވުމުގެ ސަބަބުން ދިވެހި ރައްޔިތުންގެ ނުރުހުން ސަރުކާރަށް އަމާޒުވެ، ފިޔަވަތީގައި ކުޑަކުދިން ބެލެހެއްޓުމުގެ ޒިންމާއާއި ހަވާލުވެ ތިބި ސިޔާސީ ފަރާތްތަކަށް ފާޑުކިއުންތައް ގިނަވެ، އިބްރާހީމް ޝުޖާއަށް ރައްޔިތުން ތައުރީފް ކުރުން ހަޖަމު ނުވެގެން ރައްޔިތުންގެ މަޖިލީހުގެ ކޮމިޓީއަކުން ފިޔަވަޅު އެޅުމަށް ނިންމައި އެ މައްސަލަ އެލްޖީއޭ އަށް ހުށަހަޅުއްވަން ނިންމެވި ނަމަވެސް އިބްރާހީމް ޝުޖާއުގެ ރައްޔިތުންނަށް ޚިދުމަތް ކުރުމުގައި ފަހަތަށް ނުޖެއްސޭނެ ކަމަށެވެ.
ޕީޕީއެމުން ބުނީ ފިޔަވަތީގެ މައްސަލަތައް ހައްލު ކުރެއްވުމުގައި އިސްކޮށް މަސައްކަތް ކުރައްވާ އެކަމުގައި ދައުލަތުގެ ކަމާބެހޭ މުއައްސަސާތައް ހޭލައްވާލި އިބްރާހީމް ޝުޖާއަކީ ހުޅުމާލޭގެ ރައްޔިތުންގެ ވޯޓުން އެ ދާއިރާގެ ރައްޔިތުން ތަމްސީލު ކުރެއްވުމަށް މާލޭ ސިޓީ ކައުންސިލަށް އެރައްޔިތުން އިންތިޚާބު ކުރައްވާފައިވާ ކައުންސިލަރު ކަން މަޖިލީހުގެ ކަމާބެހޭ ކޮމިޓީއަށް އެނގިވަޑައިނުގަތުމަކީ ހިތާމަ ހުރި ކަމެއް ކަމަށެވެ. އަދި ދާއިރާއަށް ދިމާވަމުންދާ އެންމެހާ އިޖުތިމާއީ މައްސަލަތައް ހައްލުކުރެވުމުގައި އިބްރާހީމް ޝުޖާއު ނަމޫނާ ދައްކަވާ، ކުރައްވަމުން ގެންދަވާ މަސައްކަތްޕުޅުތަކަށް ކޯލިޝަން ފަޙުރުވެރިވާ ކަމަށެވެ.
