އެމްޑީޕީގެ ދާއިރާތަކުގައި ވޯޓުލެވޭ މެމްބަރުންގެ ދާއިމީ ލިސްޓު އާންމުކޮށްފި

އެމްޑީޕީގެ ދާއިރާތަކުގެ އިންތިޚާބު 2021ގައި ވޯޓުލެވޭ މެންބަރުންގެ ދާއިމީ ލިސްޓު އާންމުކޮށްފިއެވެ.

މިލިސްޓުއާންމުކުރުމަށްފަހު އެމްޑީޕީން ބުނީ ދާއިމީ ލިސްޓުގައި ނަން ހިމެނިފައި ނުވާ އެއްވެސް ފަރާތަކަށް ވޯޓު ނުލެވޭނެ ކަމަށެވެ.

މިލިސްޓަށް ޝަކުވާ ހުށަހެޅުމަށް 11 ސެޕްޓެމްބަރުވީ ހޮނިހިރު ދުވަހުން ފެށިގެން 13 ސެޕްޓެމްބަރުވާ ހޯމަ ދުވަހުގެ މެންދަމު 12:00އާ ހަމައަށް ވަނީ ފުރުސަތު ހުޅުވާލާފައެވެ. މިލިސްޓަކީ 25 އޭޕްރީލް 2021ގައި ލިސްޓަށް ޝަކުވާ ހުށަހެޅުއްވުމަށް ހުޅުވާލެވި، 28 އޭޕްރީލް 2021ގައި ޝަކުވާ ހުށަހެޅުއްވުމަށް ވަގުތު އިތުރުކޮށް, ދެވުނު ފުރުސަތުގައި ޝަކުވާ ހުށަހެޅި ބޭފުޅުންގެ ޝަކުވާތައް ބަލައި ގެންނަންޖެހޭ ބަދަލުތައް ގެނައުމަށްފަހު އާންމު ކޮށްފައިވާ ދާއިމީ ލިސްޓު ކަމަށް އެމްޑީޕީން ބުނެފައިވެއެވެ.

އެމްޑީޕީން ބުނީ މި ބަދަލުތައް ގެނައުމަށްފަހު މިހާރު އާންމުކޮށްފައިވާ ލިސްޓަށް ޝަކުވާ ހުށަހެޅުމަށް ހުޅުވާލާފައިވާއިރު، ޝަކުވާ ހުށަހެޅުމުގެ ފޯމު މެދުވެރިކޮށް ޝަކުވާ ހުށަހެޅޭނެ ކަމަށެވެ. އަދި ޝަކުވާ ހުށަހަޅާއިރު، ކުރިން ޝަކުވާ ހުށަހަޅަން ބޭނުން ކުރި އައިޑީކާޑު ނަންބަރު ބޭނުންކޮށްގެން މިފަހަރުވެސް ޝަކުވާ ހުށަހެޅޭނެ ކަމަށެވެ. އެހެން ގޮތްގޮތުން ފޮނުވާ ޝަކުވާ ބަލައިނުގަނެވޭނެ ކަމަށް އެމްޑީޕީން ބުނެފައިވެއެވެ.

އެމްޑީޕީގެ ދާއިރާތަކުގެ އިންތިޚާބު 25 ސެޕްޓެމްބަރު ވާ ހޮނިހިރު ދުވަހު ބޭއްވުމަށް އެ ޕާޓީން ވަނީ ނިންމާފައެވެ. އެމްޑީޕީން، ކުރިން ދާއިރާތަކުގެ އިންތިޚާބު ބޭއްވުމަށް ނިންމީ މެއި މަހުގެ ތެރޭގައެވެ. އެހެންނަމަވެސް ފަހުން ވަނީ ސެޕްޓެމްބަރަށް ފަސްކޮށްފައެވެ.

އެމްޑީޕީން މިނިންމުން ނިންމީ ޕާޓީގެ ރައީސް، ރައީސް މުޙައްމަދު ނަޝީދުގެ ފުރާނަފުޅު ދުއްވާލުމަށް ނުރައްކާތެރި ޓެރަރިސްޓް ހަމަލާއެއްދީ، އެމަނިކުފާނުގެ ހާލުކޮޅު ސީރިއަސްވެ، އެމަނިކުފާނު ފަރުވާ ހޯއްދަވަމުން ގެންދަވާތީ ދާއިރާތަކުގެ އިންތިޚާބު 29 މެއި 2021ގައި ބޭއްވުމަކީ ރަނގަޅު ކަމެއް ކަމުގައި ނުފެންނާތީއެވެ.

ރައީސް ނަޝީދު ދިރިއުޅުއްވާ ކެނެރީގެ ކައިރީގައި އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. އެތަކެތި ނެގުމަށް 16 ގަޑިއިރުގެ އޮޕަރޭޝަންތަކެއް ކުރިއެވެ.

މި ހާދިސާއާ ގުޅިގެން ބަޔަކު ހައްޔަރުކޮށްފައިވާއިރު, މިނިވަން ތަހުގީގަކަށް ފަހު އިންސާފުގެ ކުރިމައްޗަށް އެމީހުން ގެނެވޭނެ ކަމަށް ރައީސް ޞާލިޙް ވަނީ ވިދާޅުވެފައެވެ. އަދި ހަމަލާގެ ފަހަތުގައި ތިބި އެހެން މީހުން ވެސް ހޯއްދަވާނެ ކަމަށް އެމަނިކުފާނު ވަނީ ވިދާޅުވެފައެވެ.