އެމްޑީޕީ އޮފީސްތެރޭގައި ހިންގި މާރާމާރީގެ މައްސަލާގެ ފުރިހަމަ ޖިނާއީ ތަހުގީގެއް ހިންގުމަށް ގޮވާލައިފި
2 ސެޕްޓެމްބަރު 2021 | ބުރާސްފަތި 18:42މައުލޫމާތު ލިބޭގޮތުގައި އޭނާގެ ބޮލުގެ ފުއްކިބައިން ވަނީ ފަޅައިގެން ގޮސްފައި
މަންދީ އޭޑީކޭ ހޮސްޕިޓަލަށް ގެންދަނީ
ދިވެހި ރައްޔިތުންގެ ޑިމޮކްރެޓިކް ޕާޓީ(އެމްޑީޕީ) އޮފީސްތެރޭގައި ހިންގި މާރާމާރީގެ މައްސަލާގައި ފުރިހަމަ ޖިނާއީ ތަހުގީގެއް ހިންގުމަށް ގޮވާލައިފިއެވެ.
ބުރާސްފަތި ދުވަހު އެމްޑީޕީ އޮފީހުގައި ހިންގި މާރާމާރީގައި މަރްޔަމް ޒުބައިރު (މަންދީ)ގެ ބޯ ވަނީ ފަޅާލާފައެވެ. މައުލޫމާތު ލިބޭ ގޮތުގައި މަންދީގެ ބޮލުގެ ފުއްކިބައިން ވަނީ ފަޅައިގެން ގޮސްފައެވެ.
އަނިޔާވެރި މާރާމާރީގެ އަމަލު ކުށްވެރިކޮށް އެޕާޓީން ބުނީ، އެމްޑީޕީ ސެކްރެޓޭރިއެޓްގައި ހިމެނޭ ފިރިހެން މުވައްޒަފަކު އޮފީސްތެރޭގައި އަންހެން މުވައްޒަފަކަށް ހަމަލާދީ ވަރަށް ބޮޑަށް އަނިޔާކޮށްފައިވާ ކަމަށާއި، އެފަދަ އަމަލުތައް ޓޮލަރޭޓް ނުކުރާނެ ކަމަށެވެ.
މީގެ އިތުރުން އެމްޑީޕީން ބުނީ މި މާރާމާރީގައި ޕާޓީގެ އޮފީހުގެ އެހެން ފިރިހެން މުވައްޒަފަކަށް ވެސް ހަމަލާދީފައިވާ ކަމަށެވެ.
މި މައްސަލައިގެ އަވަސް އަދި ފުރިހަމަ ޖިނާއީ ތަހުގީގެއް ކޮށްދިނުމަށް އެމްޑީޕީން ފުލުހުންނަށް ގޮވާލާފާފައިވާއިރު، އެޕާޓީގެ ފަރާތުން މައްސަލަ ވަނީ ފުލުހުންނަށް ހުށަހަޅާފައެވެ. މިމާރާމާރީ ހިންގިކަމުގެ ރިޕޯޓު ފުލުހުންނަށް ލިބިފައިވަނީ 12:30 އެހާކަންހާއިރުއެވެ.
އަނިޔާ އެންމެ ބޮޑަށް ލިބުނު އަންހެން މުވައްޒަފަށް އެޑީކޭ ހޮސްޕިޓަލްގައި ދަނީ ފަރުވާ ދެމުންނެވެ.
