ވިލިމާލޭގެ ރައްޔިތުންނަށް ހެދި ޕާކިންގ ޒޯނުން ޖާގައަށް އެދުމުގެ ފުރުސަތު ހުޅުވާލައިފިއެވެ.

ސިޓީ ކައުންސިލުން ބުނީ މާލެސިޓީގައި ދުއްވުމަށް ރަޖިސްޓަރީކޮށްފައިވާ އުޅަނދުފަހަރުގެ ތެރެއިން ވިލިމާލޭގައި ދިރިއުޅުއްވާ ފަރާތްތަކުން ގެންގުޅޭ ހަތަރު ފުރޮޅުލީ ވެހިކަލްތައް، އަގުނަގައިގެން ޕާރކްކުރުމަށް ޖާގަ ދޫކުރުމަށް ހަމަޖެހިފައިވަނީ ކާރު، ވޭން އަދި 350 ކިލޯގެ ޕިކަޕްއަށް ކަމަށެވެ. ޖާގަ ދޫކުރުމަށް ހަމަޖެހިފައިވަނީ ތިން ރުއް ޕާކު (ސުނާމީ ބިނާ) ސަރަހައްދުގައި ހަދާފައިވާ ޕާކިން ޒޯން އިން 20 ޖާގައެވެ.

ޕާރކިންގ ޒޯންގެ ޖާގައަށް އެދޭ ފަރާތްތަކުން 16 އޯގަސްޓުގެ 14:00 ގެ ކުރިން މާލޭ ސިޓީ ކައުންސިލްގެ ޢާއްމު ޚިދުމަތްތަކާބެހޭ ބަޔަށް އެކަމަށް އެދި ސިޓީއާއެކު، އައިޑީކާޑުގެ ކޮޕީ، ވެހިކަލްގެ ރަޖިސްޓްރީ ކޮޕީ ހުށަހެޅުމަށާއި ވިލިމާލޭގައި ދިރިއުޅޭ އެހެންނަމަވެސް ވިލިމާލޭގެ ރަށްވެއްސަކަށް ނުވާ ފަރާތެއްކަމުގައިވާނަމަ މިތަކެތީގެ އިތުރުން، ވިލިމާލޭގައި ދިރިއުޅޭ ފަރާތެއްކަން އެނގޭނެ ފަދަ ސިޓީއެއް ގޭގެ ވެރިފަރާތުގެ ނަމުގައި ހުށަހަޅަންވާނެ ކަމަށް ވެސް ސިޓީ ކައުންސިލުން ބުންޏެވެ.

މީގެ އިތުރުން މިސިޓީ ހުށަހަޅަންވާނީ ސިޓީގައި ވިލިމާލޭ ސެކްޝަނުން ޞައްޚަކަމަށް ކަނޑައަޅާފައިވާ ތައްގަނޑު ޖެހުމަށްފަހު ކަމަށާއި ޖާގަ ހޯދުމަށް އެދި ސިޓީ ހުށަހަޅަންވާނީ ވެހިކަލްގެ ވެރިފަރާތުން ނުވަތަ ޕަވަރ އޮފް އެޓަރނީ ލިބިފައިވާ ފަރާތުން ނުވަތަ އެއްބަސްވުމެއްގެ ދަށުން ވެހިކަލް ބޭނުންކުރާ ފަރާތުން ކަމަށް ވެސް ވަނީ ބުނެފައެވެ. ޕާކިންގ ޒޯނުން ޖާގަ ލިބޭ ފަރާތްތައް ކަނޑައެޅޭނީ އެންމެ މަތިން ޕޮއިންޓް ލިބޭ ފަރާތްތަކުގެ މެދުގައި ގުރުއަތު ލައިގެން ކަމަށް ސިޓީ ކައުންސިލުން ބުންޏެވެ.

ލޭ ސިޓީ ކައުންސިލްގެ ޕާކިންގް ޒޯންތަކުން މިހާރު ޖާގަ ދޫކުރުމުގައި ކައުންސިލުން ނިންމާފައިވަނީ ޓެކްސީ ބޯޑްޖެހި ކާރަށާއި ޕިކަޕަށް މަހަކު 750.00 ރުފިޔާ ނެގުމަށެވެ. އެހެނިހެން އުޅަނދުތަކަށް މަހަކު 1500.00 ރުފިޔާނެގުމަށެވެ. އެހެންނަމަވެސް މި ދުވަސްވަރަކީ ކޮވިޑް – 19 ގެ ހާލަތުގެ ދުވަސްވަރު ކަމުން މި ޙާލަތު ބަދަލުވެއްޖެކަމަށް ކައުންސިލުން ކަނޑައަޅަންދެން މިފަދަ އުޅަނދުފަހަރަށް ނަގާނީ މަހަކު 1000.00 ރުފިޔާއެވެ.

ވިލިމާލެ އަކީ އާއްމު އުސޫލެއްގެ ގޮތުން އިންޖީނު އެޅި އެއްގަމު އުޅަނދުފަހަރު އެރުވުމާއި ރަށުގައި ދުއްވުން މަނާ ރަށެކެވެ.