އައްޑޫ ބިމުގެ މައްސަލައިގެ ވަގުތީ އަމުރަށް ޖަވާބުދާރީވުމަށް އައްޑޫ ސިޓީ ކައުންސިލަށް ފަސް ދުވަހުގެ މުއްދަތު ހިތަދޫ މެޖިސްޓްރޭޓް ކޯޓުން ދީފިއެވެ.

މައްސަލަ ހުށަހެޅި ފަރާތުން އެދިފައިވަނީ ގޯތި ނެގުން ހުއްޓުވުމުގެ ވަގުތީ އަމުރެއް ނެރެދިނުމަށާއި، މައްސަލަ ބާތިލް ކޮށްދިނުމަށެވެ.

އައްޑޫ އިކުއިޓޯރިއަލް ހޮސްޕިޓަލްގެ އިރުމަތީ ފާރާތާއި ހުޅަނގު ފަރާތުން ދޫކޮށްފައިވާ ބިންތައް އެހެން ސަރަހައްދަކަށް ބަދަލުކުރަން އައްޑޫ ސިޓީ ކައުންސިލުން ނިންމި ނިންމުން ބާތިލުކޮށްދިނުމަށް އެދި ކޯޓަށް މައްސަލަ ހުށަހަޅާފައިވަނީ އަމިއްލަ ފަރާތަކުންނެވެ. ބުދަ ދުވަހު ބޭއްވި އަޑު އެހުމުގައި އައްޑޫ ސިޓީ ކައުންސިލުން ވަނީ ޖަވާބުދާރީވުމަށް އިތުރު ވަގުތު ދިނުމަށް އެދިފައެވެ.

ކޯޓުން ނިންމީ، ވަގުތީ އަމުރަށް ޖަވާބުދާރީ ވުމަށް ފަސް ދުވަސް، އަދި މައްސަލައިގައި ޖަވާބުދާރީ ވުމަށް 10 ދުވަސް ދިނުމަށެވެ.

އެ މައްސަލައިގައި ބުނެފައިވަނީ ބިން ބަދަލުކުރުމުގެ މަސައްކަތް ވަގުތީ ގޮތުން ހުއްޓާލުމަކީ އެ މައްސަލަ ރައްދުވާ ސިޓީ ކައުންސިލާއި އެ މައްސަލަ ހުށަހެޅި ގޯތީގެ ވެރިފަރާތުގެ މަސްލަހަތަށް އެންމެ ރަނގަޅު ގޮތް ކަމަށެވެ. ކައުންސިލުން ގޯތި ބަދަލުކުރަން ނިންމި ނިންމުން މުޖާރާޖަޢާ ކޮށްދިނުމަށް ހުށަހަޅާފައިވަނިކޮށް އެ ފުރުސަތު ދީފައިނުވާ ކަަމަށް ވެސް މައްސަލަގައި ބުނެފައިވެއެވެ. އަދި އެ ފުރުސަތު ދިނުމެއް ނެތި ސަރުކާރު ބަންދު ދުވަސްތަކުގައި ކައުންސިލް އިދާރާގެ އޮފީސް ހުޅުވައިގެން އިދާރީ ގޮތުން ކުރަން ޖެހޭ ކަންކަން ކޮށްފައިވާ ކަމަށެވެ. ގޯތީގެ ވެރިފަރާތުގެ ބަހެއް ހޯދުމެއް ނެތި ގޯތި ބަދަލު ކުރުމުގެ މަސައްކަތް ކުރަން ނިންމި ނިންމުމަކީ ގާނޫނާ ހިލާފަށް ނިންމާފައިވާ ނިންމުމެއް ކަމަށް ވެސް އެ މައްސަލައިގައި ބުނެފައިވެއެވެ.

ބަންޑާރަ ބިމަކީ ދައުލަތުގެ މިލްކިއްޔާތެއް ނަމަަވެސް ގޯތި ދޫކުރުމަށްފަހު، ދައުލަތުން އެ ބިން ބޭނުން ވެއްޖެ ހާލަތެއްގައި ވެރިފަރާތާ މަޝްވަރާ ކުރުމަށްފަހު އަދުލުވެރި އިންސާފުވެރި ބަދަލެއް ދިނުމަށްފަހު ބިން ނެގުމުގެ ބާރު ދައުލަތަށް ލިބިގެންވެއެވެ. މީގެ ކުރިން އަމަލުކޮށްފައިވަނީ ވެސް މިގޮތަށެވެ. ކުޅުދުއްފުށި ސިޓީގެ އެއަރޕޯޓު އެޅުމަށްޓަކައި ބިން ދައުލަތަށް ނެގުމުގައި ވެސް އަމަލުކޮށްފައިވަނީ މިފަދައިންނެވެ.

އައްޑޫސިޓީގެ ބިމުގެ މައްސަލައިގައި އެ ގޯތިތަކުގެ ވެރިފަރާތުގެ އެންމެ ބޮޑު ޝަކުވާއަކީ، އެއްވެސް މަޝްވަރާކުރުމެއް ނެތި ކައުންސިލުން އެ ގޯތިތައް ނެގުމަށް ނިންމުމެވެ.

މި މައްސަލައިގެ އަޑު އެހުންތައް މިއަދު ބޭއްވީ ދެ ފަރާތުން ވެސް ކޯޓަށް ހާޒިރުވެގެން ކަމަށްވިއަސް ދެން ބާއްވާ އަޑުއެހުންތައް އޮންލައިންކޮށް ކުރިއަށް ގެންދަން ދެ ފަރާތުން ވެސް ބޭނުންވާތީ އެގޮތަށް ކުރިއަށް ގެންދަން ގާޒީ ވަނީ ނިންމަވާފައެވެ.

ކައުންސިލުން ވަނީ ޖުލައި މަހުގެ 15 ވަނަ ދުވަހު އެ ސަރަހައްދުން ގޯތި ލިބިފައިވާ ބައެއް ފަރާތްތަކަށް ސިޓީ ފޮނުވައި އެ ގޯތިތަކުގައި އެއްވެސް މަސައްކަތެއް ނުކުރަން އަންގާފައެވެ. އަދި ބަދަލެއް ދޭން ޖެހޭނަމަ ކައުންސިލާއެކު އެކަމާ މެދު މަޝްވަރާ ކުރުމުގެ ފުރުސަތު އޮންނާނެ ކަމަށް ވެސް ބުނެފައިވެއެވެ.

އެ ސަރަހައްދުން ބިންތައް ނެގުމަށް ކައުންސިލުން ނިންމި ނިންމުމާ ގުޅިގެން ބައެއް ފަރާތްތަކުން ހިތްހަމަނުޖެހުން ފާޅުކުރަމުންދާއިރު އެ ނިންމުމުގެ ސަބަބުން ކައުންސިލަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ.

އައްޑޫ ކައުންސިލުން ބުނިގޮތުގައި އޭއީއެޗްގެ ވަށައިގެން ހުރި ގޯތިތައް ނެގުމަށް ނިންމީ އެބިންތައް ކުއްޔަށް ދޫކޮށް ކައުންސިލަށް އާމްދަނީ ހޯދުމަށެވެ. އެގޮތުން އެ ސަރަހައްދުން 44 ގޯތި ނެގުމަށް ވަނީ ނިންމާފައެވެ. އަދި މިއީ ގާނޫނާ އެއްގޮތްވާ ގޮތުގެ މަތީން ކުރާ ކަމެއް ކަމަށް ވެސް ކައުންސިލުން ބުނެއެވެ.