ރާއްޖޭގެ ސިޔާސީ މަސްރަހުގައި މިވަގުތު ހުރި އެންމެ ނުފޫޒުގަދަ މީހަކީ ރައީސް ޞާލިޙު- ރީކޯ

ރާއްޖޭގެ ސިޔާސީ މަސްރަހުގައި މިވަގުތު ހުރި އެންމެ ނުފޫޒުގަދަ މީހަކީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކަމަށް އެމްޑީޕީގެ ކުރީގެ ޗެއަރޕާރސަން މޫސާ މަނިކު (ރީކޯ) ވިދާޅުވެއްޖެއެވެ.

މޫސަ ވިދާޅުވީ، މިއީ މިހާރު ސީޔާސީ ދާއިރާގެ އެންމެންވެސް ގަބޫލުކުރާނެ ހަގީގަތެއް ކަމަށެވެ. ކޮންމެ ފާޑުކިޔުމެއްވެސް ރައީސް ޞާލިޙާ ހިސާބުން ނިމޭ ސަބަބަކީ މިއީ ކަމުގައި މޫސަ ވިދާޅުވިއެވެ. އެގޮތުން ބަޔަކު ޕާޓީއެއް ހެދިޔަސް، އަމިއްލަޕާޓީ ތެރެއިން ބޮޑާހޭކިޔަސް، އަދި އިދިކޮޅުން ރައްދެއްދިނަސް އަމާޒުވަނީ ހަމަަ ރައީސް ޞާލިޙާ 2023ގެ ރިޔާސީ އިންތިޚާބާ އަޅުވާފައިކަމަށް މޫސަ ވިދާޅުވިއެވެ.

މޫސަ މިހެން ވިދާޅުވެފައި މިވަނީ، ރައީސް ސާލިޙާއެކު ސިޔާސީ މަސައްކަތް ކުރެއްވުމަށް ނުވިސްނަވާކަމަށް ރައީސް ނަޝީދު ވިދާޅުވެފައިވާ ދަނޑިވަޅެއްގައެވެ. ދާދިފަހުން އޮތް "އާސްކް ސްޕީކަރ"ގެ 3ވަނަ ޕްރޮގްރާމްގައި ރައީސް ނަޝީދު ވަނީ، ރައީސް ޔާމީނާއެކު ސިޔާސީ މަސައްކަތްތައް ކުރައްވަން ތައްޔާރަށް ހުންނެވިކަން ދޭހަވާފަދަ ގޮތަކަށް ވާހަކަފުޅު ދައްކަވާފައެވެ. މައުލޫމާތު ލިބޭ ގޮތުގައި ރައީސް ނަޝީދު ގެންދަވަނީީ އެމަނިކުފާނުގެ މި ޚިޔާލުފުޅު އެމްޑީޕީގެ ލީޑަރޝިޕްގެ އިސްވެރިންނާވެސް ހިއްސާ ކުރައްވަމުންނެެވެ. ދާދި ފަހުން ރައީސް ނަޝީދު ވަނީ އެމްޑީޕީގެ މެމްބަރުން ނުރުހުނުކަމަށް ވިޔަސް، ސިޔާސީ މަސައްކަތުގައި ރައީސް ޔާމީނުގެ އެހީއަށް އެދިވަޑައިގަންނަވާނެކަން ހާމަ ކުރައްވާފައެވެ.

އެމްޑީޕީގެ ޤައުމީ މަޖިލީހުގެ ވަޓްސްއަޕް ގްރޫޕުގެ ތެރެއިން ދައުރުވަމުންދާ މެސެޖުތަކުގައި ރައީސް ނަޝީދު ވިދާޅުވެފައިވަނީ ރައީސް ޞާލިޙާ ޒާތީ ގޮތުން އެއްވެސް މައްސަލައެއް ނެތް ކަމަށެވެ. ފިކުރީ ގޮތުން ޚިޔާލު ތަފާތީކަމަށެވެ.

އެމްޑީޕީގެ ތެރޭގައި ހަރުކަށި ފިކުރު އާލާވަމުންދާކަން ފާހަގަ ކުރައްވައި ރައީސް ނަޝީދު ވަނީ، އެމަނިކުފާނު ބޭނުންފުޅު ވަނީ ދީނީ ގޮތުން މެދުމިނުގެ ފިކުރެއްކަމަށް ވިިދާޅުވެފައެވެ. އަދި ރައީސް ޔާމީނާއި ޕީޕީއެމްއިން މެދުމިނުގެ ދީނީ ސިޔާސަތަށް ތާއީދު ކުރައްވާނަމަ އެފަރާތްތަކުގެ އެހީއަށް އެދިވަޑައިގަންނަވާނެކަންވެސް ރައީސް ނަޝީދު ވަނީ ހާމަކުރައްވާފައެވެ.