ޖިންސީ ގޯނާގެ ގިނަ ދައުވާތަކެއް ރައްދުވާ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ އޮންލައިންކޮށް ކުރިއަށް ގެންދިޔުމުގައި ބޮޑެތި ގޮންޖެހުންތަކެއް އެބަހުރި ކަމަށް ޕްރޮސެކިއުޓާރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) ޖާމިނުކުރުމަށްފަހު އަލީ ވަހީދު ބޭސްފަރުވާއަށް ވަޑައިގެންނެވުމަށް ޕާސްޕޯޓު ދޫކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ. ޖާމިނުވުމުގެ އެއްބަސްވުމުގައިވާ ހަތަރު މަސްދުވަހުގެ މުއްދަތު ހަމަވުމާއެކު ޝަރީއަތުގެ އަޑުއެހުންތައް އޮންލައިންކޮށް ބާއްވައިދޭން އަލީ ވަހީދު ހުށަހަޅުއްވާފައި ވާކަމަށް ކްރިމިނަލް ކޯޓުން މައުލޫމާތުދެއެވެ.
މިކަމާ ގުޅޭ ގޮތުން ޕީޖީ ވިދާޅުވީ، ދައުވާ ލިބޭ މީހާ ރާއްޖޭގެ އިޚްތިޞާސް ނުހިނގާ ތަނެއްގައި ހުރުމުން ބޮޑެތި ގޮންޖެހުންތަކެއް ހުންނާނެ ކަމަށެވެ. މިސާލެއްގެ ގޮތުން، އެފަދަ މީހަކު ކޯޓުގެ ހުރުމަތް ކަނޑައިފިއްޔާ ހެދޭނެ ގޮތަކާމެދު ސުވާލު އުފެދޭކަމަށް ވިދާޅުވިއެވެ.
އަޅުގަނޑަށް ގަބޫލު ކުރެވެނީ އޭގައި ވަރަށް ބޮޑެތި ގޮންޖެހުންތަކެއް ހުންނާނޭ، ދައުވާ ލިބޭ މީހާ ރާއްޖޭގެ ޖުރިސްޑިކްޝަން ނުހިނގާ، ރާއްޖޭގެ ބާރު ނުހިނގާ ތަނެއްގަ ހުރީމަ. މިސާލަކަށް އޮންލައިން އަޑުއެހުމެއްގަ ރާއްޖޭން ބޭރުގަ ހުރެފަ ކޯޓުގެ ހުރުމަތް ކަނޑާލީ. ދެން ކިހިނެތް ހަދާނީ އަޅުގަނޑުމެން. މިދެންނެވީ ދެން ވަރަށް ދެރައޭ. ދެން ހުރުމަތް ކަނޑާލީތާއޭ. މި ބުނި ކިހިނެތްހޭ ދެން ހަދާނީ، ތަންފީޒު ކުރެވޭ ނިޒާމެއް އޮންނަންޖެހޭ އެހެން ނޫނީ ބޮޑު ޖޯކަކަށޭ ވާނީ.ޕްރޮސެކިއުޓާ ޖެނެރަލް ހުސައިން ޝަމީމް
ޝަމީމް ވިދާޅުވީ، އެގޮތަށް ޝަރީއަތް ކުރުމަކީ ނިޒާމާ އެއްގޮތަށް ހިނގާނެ ކަމެއް ކަމަށް ގަބޫލު ނުކުރެއްވޭ ކަމަށެވެ. އަދި ދައުވާ ލިބޭ މީހާ ހުންނަން ޖެހޭނީ ރާއްޖޭގެ އިޚްތިޞާސް ހިނގާ ތަނެއްގައި ކަމަށް ގަބޫލުކުރެއްވޭ ކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ، މައްސަލަތަކުގައި ދައުވާ ރައްދުވާ އެހެން މީހުންނެކޭ ވެސް އެއްގޮތަށް އަލީ ވަހީދުއާ ވެސް ސީދާ މުއާމަލާތު ނުކުރާ ކަމަށެވެ. ވަރަށް ޚާއްސަ ހާލެއްގައި މެނުވީ ދައުވާ ލިބޭ ފަރާތްތަކާއި މުއާމަލާތު ކުރަނީ ފުލުހުން މެދުވެރިކޮށް ކަމަށް ޝަމީމް ވިދާޅުވިއެވެ.
އެހެން ނަމަވެސް ކްރިމިނަލް ކޯޓުގެ ފަނޑިޔާރުންނާއި ނުވަތަ ފަނޑިޔާރުންގެ ސެކްޝަނާއި އަލީ ވަހީދުއާ ދެމެދު މުއާމަލާތު ތަކެއް ކުރެވޭކަމުގެ މައުލޫމާތު އެނގިވަޑައިގެންފައި ވާކަމަށް ޝަމީމް ވިދާޅުވިއެވެ. އެކަމަކު މުއާމަލާތު ކުރެވެނީ ކޮންގޮތަކަށް ކަމެއް އެނގިފައި ނުވާ ކަމަށް ޝަމީމް ވިދާޅުވިއެވެ.
އަޑުބަރޭ ޖާމިނުކުރި އެއްބަސްވުމުގެ މުއްދަތު ހަމަވުމުން، ކްރިމިނަލް ކޯޓުން އަޑުއެހުމެއް ތާވަލުކުރިއެވެ. އެހެން ނަމަވެސް ޝަރީއަތުގެ އަޑުއެހުންތައް އޮންލައިންކޮށް ބާއްވައިދޭން އަލީ ވަހީދު ހުށަހަޅުއްވާފައި ވުމުން އެ އަޑުއެހުން ވަނީ ކެންސަލްކޮށްފައެވެ.
މި މައްސަލައިގައި ކްރިމިނަލް ކޯޓުން އިތުރު އަޑުއެހުމެއް ތާވަލުކޮށްފައިވަނީ ހޯމަ ދުވަހަށެވެ. މި އަޑުއެހުމުގައި އޮންލައިންކޮށް ޝަރީއަތް ކުރިއަށް ގެންދިޔުމާމެދު ކޯޓުން ގޮތެއް ނިންމާނެ ކަމަށް ޕީޖީ ޝަމީމް ވިދާޅުވިއެވެ.
