މެތަޑޯން ފަރުވާ ހޯދަމުންދަނިކޮށް މަރުވެފައި އޮއްވާ ފެނުނު ލިއުޝާ ޝާކިރުގެ މައްސަލަ ބަލަމުން އަންނަ ކަމަށާއި، މައްސަލައިގެ ރިޕޯޓު ނިންމުމާ ގާތްވެފައިވާ ކަމަށް ހިއުމަން ރައިޓްސް ކޮމިޝަން (އެޗްއާރްސީއެމް) އިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ކޮމިޝަނާ މުއުމިނާ ވަހީދު ވިދާޅުވީ މަރުވެފައި އޮއްވާ ފެނުނު ލިއުޝާގެ މައްސަލައަކީ ކޮމިޝަނުން އިސްނަގައިގެން ބަލަމުންދާ މައްސަލައެއް ކަމަށާއި، އަމިއްލަ ފަރާތަކުން މި މައްސަލަ ހުށަހަޅާފައިނުވާ ކަމަށެވެ. މުއުމިނާ ވިދާޅުވީ މައްސަލައިގެ ރިޕޯޓު ވަރަށް އަވަހަށް އާންމު ކުރެވިގެންދާނެ ކަމަށާއި، މިހާރު ކުރިއަށްދަނީ ތަހުގީގު ބަޔާން ނަގަންޖެހޭ ފަރާތްތަކުން ބަޔާން ނެގުމާއި އޭގައި ހަދަން ޖެހޭ ފޮރެންސިކް އެނަލިސިސް ހެދުމުގެ މަސައްކަތްތައް ކަމަށެވެ. އަދި ވިދާޅުވީ މިވަގުތު ބަލަމުންދާ މައްސަލައަކަށްވާތީ އިތުރު ތަފްސީލު ހާމަ ކުރެވެން ނެތް ކަމަށެވެ.
ނޭޝަނަލް ޑްރަގް އެޖެންސީން (އެންޑީއޭ)އަށް އިޝާރާތް ކުރައްވާ މުއުމިނާ ވިދާޅުވީ މި މައްސަލަ މީޑިއާގައި ފެންމަތިވުމާ ގުޅިގެން އެންޑީއޭއަށް ޒިޔާރަތްކޮށް، އެތަނުގެ ކަންކަން ވަރަށް ގާތުން ބަލާފައިވާ ކަމަށެވެ. އެގޮތުން އެންޑީއޭގެ މައްސަލަތަކެއް ވެސް ފާހަގަކުރެވިފައިވާ ކަމަށާއި، މި މައްސަލައާ ގުޅިގެން އާއްމު ކުރާ ރިޕޯޓުގައި ތަފްސީލުތައް ހާމަކުރަނެ ކަމަށް މުއުމިނާ ވިދާޅުވިއެވެ. އަދި ވިދާޅުވީ އެންޑީއޭއަށް ވެސް ވަކިން ރިޕޯޓު ފޮނުވާނެ ކަމަށެވެ.
މި މައްސަލައަކީ އަޅުގަނޑުމެން އަމިއްލައަށް އިސްނަގައިގެން ބަލަމުންދާ މައްސަލައެއް. މި މައްސަލައިގައި އަޅުގަނޑުމެން މިހާރު މިދަނީ ތަހުގީގު ކުރަމުން. މި މައްސަލަ އަޅުގަނޑަށް ތަފްސީލެއް ހިއްސާކުރެވޭކަށް ނެތް. އެކަމަކު މި މައްސަލައިގައި އަޅުގަނޑުމެން އެތަނަށް ގޮސް އެތަނުގައި ހުރި ހިންގުމުގައި ހުރި ކަންކަން ވެސް ބަލައިފިން. އެކަމާ ގުޅޭ ގޮތުން އަޅުގަނޑުމެން ރިޕޯޓެއް ވެސް ތައްޔާރު ކުރަމުން މިދަނީ. މިއާއެކު މި މައްސަލައިގެ ތަހުގީގު ބަޔާން ނަގަންޖެހޭ ފަރާތްތަކުން ބަޔާން ނެގުމާއި އޭގައި ހަދަން ޖެހޭ ފޮރެންސިކް އެނަލިސިސްގެ މަސައްކަތްތައް އަޅުގަނޑުމެން ކުރިއަށް ދަނީ. މި މައްސަލަ މިހާރު ނިމުމަކާ ގާތްވެފައިވާ މައްސަލައެއް ކަމަށް ދެންނެވިދާނެ.ކޮމިޝަނާ މުއުމިނާ ވަހީދު
ލިއުޝާއަކީ މަސްތުވާތަކެތިން ސަލާމަތްވުމަށް މެތަޑޯން ފަރުވާ ނަގަމުން އައި ޒުވާނެކެވެ. ނަމަވެސް މެއި މަހުގެ 21 ވަނަ ދުވަހުގެ ފަހުން ފަރުވާއަށް ގޮސްފައެއް ނުވެއެވެ. އޭގެ ފަހުން މަރުވެފައި އޮއްވާ ފެނުނީ ދިރިއުޅެމުން ދިޔަ ކޮޓަރިންނެވެ.
މިކޭހާ ގުޅޭގޮތުން ރާއްޖެއެމްވީއަށް އެންޑީއޭއިން ބުނީ ލިއުޝާ ފަރުވާއަށް ނައުމުން އޭނާގެ އިތުރުން ލިއުޝާގެ އާއިލާއަށް ގުޅުމަށް މަސައްކަތް ކުރި ކަމަށެވެ. ނަމަވެސް ކޮންޓެކްޓް ނުވެ އުޅެނިކޮށް ލިބުނީ މަރުވި ޚަބަރު ކަމަށެވެ. އެންޑީއޭއިން ބުނީ މެތަޑޯން ފަރުވާގައި އަންނަން ޖެހޭ ގޮތަށް ފަރުވާ ނުނަގާނަމަ އޮޓޯއިން ޕްރޮގްރާމުން ވަކި ވާނެ ކަމަށެވެ.
އެންޑީއޭއިން ބުނީ މެތަޑޯންގެ ފަރުވާ ނަގައިގެން ބައެއް މީހުން އެއްކޮށް މަސްތުވާތަކެތިން ސަލާމަތްވެފައިވާ ކަމަށެވެ. އަދި އަބަދުވެސް މަސައްކަތް ކުރަމުންދަނީ އެފަދަ މީހުން ރަނގަޅު ކުރުމަށް ކަމަށާއި، އަދި އެމީހުންނަށް އެކަމަށް ވަރަށް ބޮޑަށް އެއްބާރުލުން ދެމުންދާ ކަމަށެވެ. އަދި މީހަކު އެއްކޮށް ރަނގަޅުވެ މުޖުތަމައުއަށް ނުކުތުމަކީ އެންޑީއޭއަށް ވެސް ލިބޭ އެންމެ ބޮޑު ކުރިއެރުންކަން ފާހަގަކުރިއެވެ.
ލިއުޝާގެ މަރާގުޅޭ ގޮތުން އިންޓަނޭޝަނަލް ސެޓިފައިޑް އެޑިކްޝަން ޕްރޮފެޝަނަލް އެންޑް ގްލޯބަލް ޑްރަގް ރިޑަކްޝަން ޓްރެއިނަރ އަލީ އަދީބު ވިދާޅުވީ ލިއުޝާ ޕްރޮގްރާމަށް ނައުމުން އެންޑީއޭއިން ވީ ކިހިނެއްތޯ ބަލަން ޖެހޭ ކަމަށާއި މިއަށްވުރެ ބޮޑަށް ޒިންމާދާރުވާން ޖެހޭ ކަމަށެވެ. އެހާ ދުވަސްވެގެންދާއިރު ޚަބަރު ބަލައިނުލެވުން އެއީ ވަރަށް ބޮޑު ކަންބޮޑުވުމެއް ކަމަށް އަދީބު ވިދާޅުވިއެވެ.
ރާއްޖޭގައި އެންޑީއޭ ފިޔަވައި ފަރުވާ ހޯދުމަށް ދާނެ އެހެންތަނެއް ނެތްއިރު މިއަށްވުރެ ބޮޑަށް މިފަދަ ކޭސްތަކަށް ސަމާލުވާން ޖެހޭކަން އަދީބު ފާހަގަކުރެއްވިއެވެ. އަދި ދުނިޔޭގެ އެހެން ގައުމުތަކުގައި ފަރުވާ ނަގާ ކުދިން ފަރުވާއަށް ނައުމުން އެކުއްޖަކު ހުރި ހިސާބަކަށް ގޮސް ކަންކަން ބަލާކަމަށް އޭނާ ވިދާޅުވިއެވެ. އަދީބު ވިދާޅުވީ އެއްވެސް އުސޫލެއް މިންގަނޑެއްނެތި ކަންކަން ކުރުމުގެ ނަތީޖާއަކީ ފަރުވާއޭ ކިޔައިގެން ކުރެވޭ ކަންކަމުން ލިބެންޖެހޭ ފައިދާއަށްވުރެ ގެއްލުން ބޮޑުވުން ކަމަށެވެ. މީގެ އިތުރުން އަދީބު ވިދާޅުވީ ރާއްޖޭގައި ފަރުވާ ބައްޓަން ވަނީ ވަރަށް އަމުރުވެރިކޮށް ކަމަށެވެ. ދެމުންދާ ފަރުވާތަކަކީ ކޮން އުސޫލުތަކެއްގެ މައްޗަށް ބިނާވެފައިވާ ފަރުވާއެއްކަން ބުނެދޭން ޖެހޭ ކަމަށެވެ.
ގަލޮޅު ގެއަކުން ކުނި ވަސް ދުވާތީ ބެލިއިރު ލިއުޝާގެ ހަށިގަނޑު ފެނިފައިވަނީ މި މަހުގެ 2 ވީ ބުދަ ދުވަހުގެ ރޭ މެންދަމު 2:33 ހާއިރުއެވެ. ލިއުޝާ މަރުވީ ފިޓް ޖެހިގެން ކަމަށް އާއިލާއިން ބުނެފައިވާއިރު، މި މައްސަލަ ފުލުހުން ވެސް ދަނީ އިތުރަށް ތަހުގީގު ކުރަމުންނެވެ.
