އައްޑޫ ޑިވެލޮޕްމަންޓް ޕްރޮޖެކްޓް (އޭޑީޕީ) ގެ ދަށުން ހިންގާ އައްޑޫ ރިކްލެމޭޝަން ޕްރޮޖެކްޓަށް ބިޑް ހުށައެޅުމުގެ ސުންގަޑި ކަނޑައަޅައިފިއެވެ.

މި ޕްރޮޖެކްޓަށް ބިޑް ހުށައެޅުމުގެ ސުންގަޑިއަކީ 15 ޖޫން 2021 ކަމަށް ރާއްޖޭގައި ހުންނަ އިންޑިއަން ހައިކޮމިޝަނުން މައުލޫމާތު ދެއެވެ. މި މަޝްރޫއުގެ އަގެއްކަމަށް ލަފާކޮށްފައިވަނީ 70-75 މިލިއަން އެމެރިކާ ޑޮލަރެވެ. އަދި މަޝްރޫއުގެ މަސައްކަތް 24 ދުވަަހުގެ ތެރޭގައި ނިންމާލެވޭނެ ކަމަށް ވަނީ ލަފާކޮށްފައެވެ.

މި މަޝްރޫއު މިހާރު ފިނޭންސް މިނިސްޓްރީން ޓެންޑަރިންގ އަށް ހުޅުވާލާފައިވާއިރު، ބައިނަލްއަޤުވާމީ 4 ޑްރެޖިންގ ކުންފުންޏަކުން އެ ކުންފުނިތަކުގެ ސަބްސިޑަރީތައް ބޭނުންކޮށްގެން ބިޑް ހުށައަޅާނެކަމަށް، ކޮމިޝަނުން މައުލޫމާތު ދީފައިވެއެވެ. މި މަޝްރޫއުގެ ޓެކްނިކަލް އަދި ފައިނޭންޝަން އިވެލުއޭޝަން ކުރިއަށް ގެންދަނީ ދިވެހި ސަރުކާރުންނެވެ. އަދި ބިޑް ހުށައެޅުމުގެ ފަހު ތާރީޚަށްފަހު 4-5 ދުވަސް ތެރޭގައި ކޮންޓްރެކްޓް ހަވާލުކުރުމަށް ވަނީ ނިންމާފައެވެ.

އިންޑިއާގެ ލައިން އޮފް ކްރެޑިޓުގެ ދަށުން ހިންގާ މި މަޝްރޫއުގެ ޚާއްސަ ރިކުއަރމަންޓުތަކުގެ ސަބަބުންނާއި، ސަރުކާރުގެ އެދުމުގެ މަތިން އިންޑިއާއިން ވަނީ މި މަޝްރޫއަށް އިންޑިއާއިން ސޯރސްކުރެވޭ ކޮމްޕޮނެންޓުތަކުގެ އިންސައްތަ 55ށް ކުޑަކޮށްދީފައެވެ.

މި މަޝްރޫއުގެ ބިޑިންގ ގައި ބައިނަލްއަގުވާމީ ކުންފުނިތަކުންވެސް ބައިވެރިވުމުގެ ފުރުސަތު ވަނީ ހުޅުވާލާފައެވެ.

މި މަޝްރޫއުގެ ދަށުން އައްޑޫގެ ގުދުރަތީ ރައްކާތެރިކަން ދެމެހެއްޓުމަށް މަސައްކަތް ކުރުމާއެކު، ޑްރެޖިންގ އާއި، ބިން ހިއްކުމާއި، ގޮނޑުދޮށް ހިމާޔަތްކުރުން ހިމެނެއެވެ. މިއީ ރައީސް ސޯލިހުގެ ރިޔާސީ ވައުދުފުޅެއްވެސް މެއެވެ. މި މަޝްރޫއުގެ މަގުސަދަކީ އައްޑޫއަކީ އިޤްތިސާދީ ގޮތުން ވަރުގަދަ ހަބަކަށް ހެދުމާއި، މަގުބޫލު ފަތުރުވެރިކަމުގެ މަންޒިލަކަށް ހެދުމެވެ. އަދި ވަޒީފާގެ ދަތިކަން ހައްލު ކުރުމާއި، ލާމަރުކަޒީ ނިޒާމު ޕްރޮމޯޓު ކުރުމުގެ އިތުރުން، ޕްރައިވެޓް ސެކްޓަރ އަށް ބޭނުންވާ އިންފްރާސްޓްރަކްޗަރ ތަރައްގީކުރުން ވެސް މީގެ ތެރޭގައި ވަނީ ހިމެނިފައެވެ.