''ސޭވް އައްޑޫ'' ސްލޯގަންއަކީ ސަރުކާރާ ދެކޮޅަށް ގެންގުޅޭ ކެމްޕޭނުގެ ސްލޯގަންއެއް: މެމްބަރު ނިހާދު
ރިޔާސީ އިންތިޚާބު ކައިރިވާ ވަރަކަށް މިފަދަ އަޑުތައް ގަދަވާނެ
ފޭދޫ ދާއިރާގެ މެމްބަރު މުހައްމަދު ނިހާދު،
އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމްކުރަން އިންޑިއާގެ ސަރުކާރުން އިއުލާން ކުރުމާ ގުޅިގެން މީސްމީޑިއާގައި ބޭނުން ކުރަމުންދާ ''ސޭވް އައްޑޫ'' ސްލޯގަންއަކީ ސަރުކާރާ ދެކޮޅަށް ގެންގުޅޭ ކެމްޕޭނު ސްލޯގަންއެއް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
މެމްބަރު ނިހާދު ވިދާޅުވީ ސޭވް އައްޑޫ އަކީ ސަރުކާރާއި އިދިކޮޅު ފަރާތްތަކުން ގެންގުޅޭ ކެމްޕޭން ސްލޯގަންއެއް ކަމަށާއި، ރިޔާސީ އިންތިޚާބު ކައިރިވާ ވަރަކަށް މިފަދަ އަޑުތައް ގަދަވާނެ ކަމަށެވެ. މިއީ ކިހާ އަދަދެއްގެ ފައިސާއެއް ދީގެން ކުރާކަމެއްތޯ މެމްބަރު ނިހާދު ސުވާލު އުފައްދަވާފައިވެއެވެ. އަދި މިއީ ފިތުނައެއްގެ ގޮތުގައި މެމްބަރު ވަނީ ސިފަކުރައްވާފައެވެ.
ސޭވް އައްޑޫ ސްލޯގަންއަށް މެމްބަރު ނިހާދު ވަރުގަދަ ރައްދެއް ދެއްވާފައިރު، މީގެ ކުރިން ވެސް ކޮންސިއުލޭޓް ގާއިމުކުރުމަށް ތާއީދުކޮށް ވާހަކަދައްކަވާފައިވެއެވެ. މެމްބަރު ނިހާދު ވިދާޅުވީ އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމުކުރުމަށް ފޭދޫ ރައްޔިތުން ބޭނުންވާ ކަމަށާއި އެކަމުގެ ސަބަބުން ދެކުނަށް ކުރާ މަންފާ ރައްޔިތުންނަށް އެނގޭ ކަމަށެވެ. ކޮންސިއުލޭޓެއް ގާއިމުކުރެވިއްޖެނަމަ އައްޑޫ އާއި އިންޑިއާ ދެމެދު އިތުރަށް ގުޅުން ބަދަހިވެގެންދާނެ ކަމަށާއި، ފެރީގެ ޚިދުމަތް އިތުރަށް ފުޅާކުރެވި، ކާރގޯ ސަޕްލައި އިތުވެގެންދާނެ ކަމަށް މެމްބަރު ވިދާޅުވިއެވެ.
ސަރުކާރާ ދެކޮޅު ފަރާތްތަކުން ކިޔަމުންދާ ފާޑުކިޔުންތަކަށް އަމާޒުކުރައްވައި މެމްބަރު ވިދާޅުވީ ބައެއް ބޭފުޅުންނަކީ އައްޑޫއަށް ތަރައްގީ ލިބެން ބޭނުންނުވާ ބޭފުޅުން ކަމަށާއި، އެބޭފުޅުން އަބަދުވެސް މަސައްކަތް ކުރަމުން އައީ އައްޑޫ ރައްޔިތުން މާލެސިޓީއަށް ބަރޯސާކުރުވަން ކަމަށެވެ. ނަމަވެސް އެބޭފުޅުންގެ ސަރުކާރެއްގައި ޗައިނާއިން ކުރާ ކަމެއްނަމަ އެކަމަށް އެއްބަސްވާނެ ކަމަށް މެމްބަރު ނިހާދު ވިދާޅުވިއެވެ. މީގެ އިތުރުން މެމްބަރު ނިހާދު ވިދާޅުވީ ހަގީގަތާ ޚިލާފު ގިނަ ވާހަކަތަކެއް ދައްކަމުންދާ ކަމަށާއި، އައްޑޫ ސިޓީގައި އިންޑިއާއިން މިލިޓަރީ ބޭހެއް އަޅަން ނޫޅޭ ކަމަށެވެ. އަދި އެގޮތަށް ހަގީގަތެއް ނެތް ވާހަކަތަކެއް ފެތުރި ނަމަވެސް އައްޑޫ ރައްޔިތުން ހާސްވެގެން ނޫޅޭ ކަމަށެވެ.
އައްޑޫ ސިޓީގައި ކޮންސިއުލޭޓް ގާއިމުކުރުމަށް އެސިޓީއަށް ނިސްބަތްވާ 7 މެމްބަރުންގެ ތެރެއިން 6 މެމްބަރުން އެކަމަށް ތާއީދުކުރައްވާ ވާހަކަދައްކަވާފައިވެއެވެ.
އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމުކުރުމަށް އިންޑިއާ ސަރުކާރުން ނިންމިކަން އިއުލާންކުރުމާއެކު ސަރުކާރާ އިދިކޮޅު ބައެއް ފަރާތްތަކުން ދަނީ ހަގީގަތާ ޚިލާފު ބައެއް ވާހަކަތައް ފަތުރަމުންނެވެ. ހަގީގަތް އޮޅުވާލުމަށް ބަޔަކު މަސައްކަތް ކުރި ނަމަވެސް އެމަޤުސަދު ހާސިލް ނުވާނެ ކަމަށް އައްޑޫއަށް ނިސްބަތްވާ މެމްބަރުން ވިދާޅުވެފައިވެއެވެ. އަދި އައްޑޫގެ ރައްޔިތުންނަށް ދެރައެއް ލިބޭ ގޮތަށް ސަރުކާރުން އެއްވެސް ކަމެއް ނުކުރާނެ ކަމުގެ ޔަގީންކަން ދެއްވާފައިވެއެވެ.
