އައްޑޫގައި އިންޑިއާގެ ކޮންސިއުލޭޓެއް ގާއިމްކުރުމުން މުޅި ރާއްޖެއަށް ލިބެން އޮތީ ފައިދާ: ރައީސް ނަޝީދު
އައްޑޫގެ ވިސްނުމަކީ އަބަދުވެސް ދުނިޔެއަށް ހުޅުވިފައިވާ ވިސްނުމެއް
ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު،
އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމްކުރުމުން މުޅި ރާއްޖެއަށް ލިބެން އޮތީ ފައިދާ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އައްޑޫ ސިޓީގައި އިންޑިއާގެ ކޮންސިއުލޭޓް ގާއިމްކުރުމާއި ގުޅޭގޮތުން އެމަނިކުފާނު ކުރެއްވި ޓްވީޓެއްގައި ވިދާޅުވީ އައްޑޫގެ ވިސްނުމަކީ އަބަދުވެސް ދުނިޔެއަށް ހުޅުވިފައިވާ ވިސްނުމެއް ކަމަށާއި، އަމިއްލަ ނޭފަތު ކުރީގައި ތަޅުލެވިފައިނުވާ ވިސްނުމެއް ކަަމަށެވެ.
ރައީސް ނަޝީދު ވިދާޅުވީ ކޮންސިއުލޭޓް ގާއިމްކުރުމުގެ ސަބަބުން އައްޑޫއަށް ވެސް އަދި ރާއްޖެއަށް ވެސް ލިބެން އޮތީ ފައިދާ ކަމަށެވެ.
އައްޑޫ ސިޓީގައި އިންޑިއާގެ ކޮންސިއުލޭޓް ގާއިމްކުރަން ރައީސް ނަޝީދު ތާއީދުކުރެއްވިއިރު، އައްޑޫ ސިޓީ ތަމްސީލް ކުރައްވާ ރައްޔިތުން މަޖިލީހުގެ 7 މެމްބަރުންގެ ތެރެއިން 6 މެމްބަރުން ވަނީ އެކަމަށް ތާއީދު ކުރައްވާ ވާހަކަދައްވާފައެވެ. އެއީ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް، ފޭދޫ ދާއިރާގެ މެމްބަރު މުހައްމަދު ނިހާދު، ހުޅުދޫ ދާއިރާގެ މެމްބަރު އިލްޔާސް ލަބީބް، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް، ހިތަދޫ މެދުދާއިރާގެ މެންބަރު އަހުމަދު ރަޝީދު އަދި މަރަދޫ ދާއިރާގެ މެންބަރު އިބްރާހިމް ޝަރީފް އެވެ.
މެމްބަރުން ފާހަގަކުރައްވާ ގޮތުގައި އިންޑިއާގެ ކޮންސިއުލޭޓެއް ގާއިމްކުރުމަކީ ވިޔަފާރީގެ ގޮތުން ވަރަށް ބޮޑަށް ކުރިއެރުންތައް ލިބޭނެ ކަމެކެވެ. އެގޮތުން އިންވެސްޓްމަންޓްގެ ފުރުސަތުތައް އިތުރުވުމާއި، އައްޑޫ ރައްޔިތުންނަށް ވިސާ ލިބުމުގައި ވެސް ފަސޭހަ ވެގެންދާނެއެވެ. ހުރިހާ ގޮތަކުން ފައިދާހުރި ކަމެއްކަން ފާހަގަކޮށް މެމްބަރުން ވަނީ ކޮންސިއުލޭޓް ގާއިމް ކުރުމުގައި ދޭން ޖެހޭ ހުއްދަތައް ދިނުމަށް ގޮވާލައްވާފައެވެ.
އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމުކުރުމަށް އިންޑިއާ ސަރުކާރުން ނިންމިކަން އިއުލާންކުރުމާއެކު ސަރުކާރާ އިދިކޮޅު ބައެއް ފަރާތްތަކުން ދަނީ ހަގީގަތާއި ޚިލާފު ބައެއް ވާހަކަތައް ފަތުރަމުންނެވެ. ހަގީގަތް އޮޅުވާލުމަށް ބަޔަކު މަސައްކަތް ކުރި ނަމަވެސް އެމަގުސަދު ހާސިލް ނުވާނެ ކަމަށް އައްޑޫއަށް ނިސްބަތްވާ މެމްބަރުން ވިދާޅުވެފައިވެއެވެ. އަދި އައްޑޫގެ ރައްޔިތުންނަށް ދެރައެއް ލިބޭ ގޮތަށް ސަރުކާރުން އެއްވެސް ކަމެއް ނުކުރާނެ ކަމުގެ ޔަގީންކަން ދެއްވާފައިވެއެވެ.
