ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގައުމީ ފުޓުބޯޅަ ޓީމުން ކުރިޔަށް ގެންދާ ފަރިތަކުރުންތައް

އަމިއްލަ ގައުމުގައި އޮކްޓޯބަރު މަހު ފަށާ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގައުމީ ފުޓުބޯޅަ ޓީމުން ވަނީ މިދިޔަ ބުރާސްފަތި ދުވަހުގެރޭ ފަރިތަކުރުންތައް ފަށާފައެވެ. ގައުމީ ޓީމުގެ ފަރިތަކުރުންތައް ފަށާފައިވަނީ 34 ކުޅުންތެރިންގެ ޕްރިލިމިނަރީ ސްކޮޑަކާއިއެކުގައެވެ. ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގައުމީ ޓީމުން ފަރިތަކުރުންތައް ފަށާފައިވާއިރު، ސެޕްޓެމްބަރު މަހު ގައުމީ ޓީމުން ގަތަރުގައި ކޭމްޕް ކުރުމަށްވެސް ވަނީ ނިންމާފައެވެ. ރާއްޖެއިން މި މުބާރާތް އެންމެ ފުރަތަމަ ކާމިޔާބުކުރީ 2008 ވަނަ އަހަރުއެވެ. އެއަހަރުގެ މުބާރާތް ކުރިޔަށްދިޔައީ ރާއްޖެ އާއި ސްރީލަންކާގައެވެ. އޭގެ ފަހުން 2018 ވަނަ އަހަރުވެސް ރާއްޖެއިން ވަނީ މި މުބާރާތް ކާމިޔާބުކޮށްފައެވެ.