މެދުއިރުމަތީ ހަނގުރާމަ

އީރާނުގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ކޮމާންޑަރުގެ ސީނިއާ އެޑްވައިޒަރު ބްރިގޭޑިއާ ޖެނެރަލް މުހައްމަދު ރިޒާ ނަޤްދީ ވިދާޅުވީ، އެމެރިކާ ސިފައިން އިރާޤުން ބޭލުމަކީ މެދުއިރުމަތީގައި އެމެރިކާގެ ބާރު ކުޑަވަމުންދާކަމުގެ ހެއްކެއް ކަމަށެވެ. އޭނާ މިހެން ވިދާޅުވިކަމަށް ރިޕޯޓުކޮށްފައިވަނީ އީރާނުގެ ފާރްސް ނިއުސް އެޖެންސީންނެވެ.

ޖެނެރަލް ނަޤްދީ ވިދާޅުވީ، އެމެރިކާއިން ބޮޑެތި ޚަރަދުތަކެއް ކުރުމަށްފަހު އިރާޤުން ފައިބަން މަޖުބޫރުވީ ކަމަށެވެ. އަދި 23 އަހަރަށްފަހު އެމެރިކާގެ ސިފައިން އިރާޤު ދޫކޮށް ދިއުމުން ދޭހަވަނީ، އެމެރިކާގެ ބާރުވެރިކަމަކީ ދުނިޔެއަށް ދައްކާ ފެންވަރުގެ ބާރެއް ނޫންކަން ކަމަށް ވެސް އޭނާ އިތުރަށް ވިދާޅުވި އެވެ.

އެމެރިކާ ސިފައިން އިރާޤުން ފޭބުމާ ގުޅިގެން އެކަން ފާހަގަކުރުމަށް ބަޣުދާދުގައި ހާޝިދު އައްޝާބީ ފޯސްގެ މެންބަރުން އެމެރިކާގެ ދިދައެއްގެ މަތިން އުޅަނދުތައް ދުއްވަނީ- 1 އޮކްޓޫބަރު 2026

ލުބުނާނުގެ ދެކުނުގައި އޮންނަ މަރުޖަޔޫން ސަރަހައްދުގައި ހުންނަ ތެޔޮ ސާފުކުރާ މަރުކަޒެއްގެ ކައިރިއަށް އިސްރާއީލު ސިފައިން މަދުވެގެން ދެ ބަޑީގެ ހަމަލާ ފޮނުވާލާފައިވާ ކަމަށް އެ ގައުމުގެ ނޭޝަނަލް ނިއުސް އެޖެންސީ އިން ރިޕޯޓުކޮށްފި އެވެ.

މީގެ އިތުރުން މައިފަދޫން އަވަށަށާއި ނަބާތިއާގެ ބޭރުގައި އޮންނަ އަލް-ދަބްޝާ ފަރުބަދަ މަތީ ސަރަހައްދަށް އިސްރާއީލުން ދޭތެރެ ދޭތެރެއިން ބަޑީގެ ހަމަލާތައް ދަނީ އަމާޒުކުރަމުންނެވެ. އަދި ކްފާރު ޝޫބާ އަވަށުގެ ކައިރިއަށް ވެސް މެދުކެނޑުމެއް ނެތް ބަޑީގެ ވަރުގަދަ ހަމަލާތަކެއް ދެމުންދާ ކަމަށް އެ އެޖެންސީން ބުނެފައިވެ އެވެ.

މިދިޔަ މަރޗު މަހު އިސްރާއީލުން ލުބުނާނަށް އަރައިގަތް ފަހުން، އެ ގައުމުގެ ދެކުނުން އެންމެ ބޮޑަށް ހަމަލާތައް އަމާޒުވި އެއް ސަރަހައްދު ކަމަށްވާ އަލް-މަންސޫރީ އަވަށަށް، ބުރާސްފަތި ދުވަހު ވެސް އިސްރާއީލުގެ ވައިގެ ސިފައިން ވަނީ ވަރުގަދަ ހަމަލާތަކެއް ދީފަ އެވެ.

އިސްރާއީލުން އަލް-މަންސޫރީ އަވަށަށް ދިން ވައިގެ ހަމަލާއެއްގައި އަމާޒުކުރި ތަނަކުން ދުން އަރަމުންދާ މަންޒަރު- 1 އޮކްޓޫބަރު 2026

އީރާނުން ޔުރޭނިއަމް 60 އިންސައްތައަށް މުއްސަނދި ކުރަމުންދަނީ މަދަނީ ބޭނުމަކަށް ނޫން ކަމަށް އެމެރިކާއިން އދ. އަށް ކަނޑައަޅުއްވާފައި ހުންނަވާ ސަފީރު މައިކް ވޯލްޓްޒް ވިދާޅުވެއްޖެ އެވެ. ސަފީރު ވޯލްޓްޒް ވަނީ އީރާނުން ނިއުކްލިއާ އެއްބަސްވުންތަކާ ޚިލާފުވަމުންދާ ކަމަށާއި، އެ ގައުމުގެ ނިއުކްލިއާ ޕްރޮގްރާމް ހުއްޓާލުމަށް އިންކާރު ކުރަމުންދާ ކަމަށް ތުހުމަތު ކުރައްވާފަ އެވެ.

މީގެ އިތުރުން، ބައިނަލްއަގުވާމީ އެޓޮމިކް ހަކަތައާ ބެހޭ އިދާރާ (އައިއޭއީއޭ) ގެ އިންސްޕެކްޓަރުންނަށް އީރާނުގެ ނިއުކްލިއާ މަރުކަޒުތަކަށް ވަނުމުގެ ހުއްދަ އެ ގައުމުން ތަކުރާރުކޮށް ނުދޭ ކަމަށް ވެސް އޭނާ ވިދާޅުވި އެވެ.

ޔުރޭނިއަމް މުއްސަނދި ކުރުން ހުއްޓާލުމަށް އެމެރިކާއިން ކުރާ އިލްތިމާސްތަކަށް ތެހެރާނުން ވަނީ އިންކާރުކޮށްފަ އެވެ. އީރާނުން ބުނަމުންދަނީ އެ ގައުމުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށްގެންދާ ޕްރޮގްރާމެއް ކަމަށާއި، ޔުރޭނިއަމް މުއްސަނދި ކުރުމަކީ "ނިއުކްލިއާ ނޮން-ޕްރޮލިފަރޭޝަން ޓްރީޓީ" ގެ ދަށުން އެ ގައުމަށް ލިބިގެންވާ ހައްގެއް ކަމަށެވެ. މީގެ އިތުރުން، އީރާނުގެ އޮފިޝަލުން ވަނީ އައިއޭއީއޭ އިން ކަންކަން ސިޔާސީ ކުރަމުންދާ ކަމަށް ތުހުމަތުކޮށް، އެ ގައުމާ ދެކޮޅަށް ފާސްކުރި ގަރާރުތަކަކީ ސިޔާސީ މަގްސަދެއްގައި ނެރެފައިވާ ގަރާރުތަކެއް ކަމަށް ބުނެ އެކަން ކުށްވެރިކޮށްފަ އެވެ.

އދ. ސަލާމަތީ މަޖިލީހުގެ ބައްދަލުވުމެއްގައި، އެމެރިކާއިން އދ. އަށް ކަނޑައަޅާފައި ހުންނަވާ ސަފީރު މައިކް ވޯލްޓްޒް ވާހަކަދައްކަވަނީ- 23 ސެޕްޓެމްބަރު 2026

ބްރެންޓް ކްރޫޑް ފީފާއެއްގެ އަގު ވަނީ 102.60 ޑޮލަރަށް އަރާފަ އެވެ. އަދި އެމެރިކާގެ ވެސްޓް ޓެކްސަސް އިންޓަރމީޑިއޭޓް (ޑަބްލިއުޓީއައި) ގެ އަގު ހުކުރު ދުވަހުގެ ހެނދުނު ވަނީ ފީފާއެއް 93.14 ޑޮލަރަށް އަރާފަ އެވެ.

ނޮވެމްބަރު މަހު އެމެރިކާގައި ބާއްވާ މިޑްޓާމް އިންތިޚާބަށްފަހު އީރާނަށް އަލުން ހަމަލާދިނުމާ މެދު ރައީސް ޓްރަމްޕް ވިސްނަވާކަމަށާއި އެމެރިކާއިން ތިންވަނަ އެއާކްރާފްޓް ކެރިއަރަކާއި އިތުރު 10،000 ސިފައިން މެދުއިރުމައްޗަށް ފޮނުވާ ކަމުގެ ރިޕޯޓްތަކާ ގުޅިގެން، މިދިޔަ ބުރާސްފަތި ދުވަހު ތެލުގެ އަގު ވަނީ ވަރަށް ބޮޑަށް އުފުލިފަ އެވެ.

ބާޒާރުގެ ކަންބޮޑުވުންތައް އިތުރުވީ އޮކްޓޯބަރު މަހު ތެލުގެ އެކްސްޕޯޓް ގާތްގަނޑަކަށް އެއްކޮށް ހުއްޓާލުމަށް ޗައިނާއިން ނިންމުމާ ގުޅިގެންނެވެ. ނަމަވެސް ސައުދީ އަރަބިއްޔާގެ ތެޔޮ އެކްސްޕޯޓް އަލުން ރަނގަޅުވަމުން ދިއުމާއި، ޔޫރަޕްގެ ގައުމުތަކުން ކުއްލި ހާލަތްތަކުގައި ބޭނުންކުރާ ޑީސަލް ރިޒާވް ބާޒާރަށް ނެރުމަށް އެމެރިކާއިން ބާރުއަޅަމުންދާތީ، އަގުތަކަށް އައި ޕްރެޝަރަށް ވަނީ ކޮންމެ ވެސް ވަރެއްގެ ލުޔެއް ލިބިފަ އެވެ.

ނަރަޔަންގަންޖްގައި ހުންނަ ގުދަނެއްގައި މަސައްކަތްތެރިއަކު އަލުން ބޭނުންކުރުމަށްޓަކައި ހުސް ތެޔޮ ފީފާތަކެއް އަތުރަނީ

ޔަމަނުގެ ވަގުތީ ވެރިރަށް އަދަނުގެ އާންމުން ދިރިއުޅޭ ސަރަހައްދުތަކަށް އަމާޒުކޮށް ހޫޘީން ފޮނުވާލި ގޮވާތަކެތި ހަރުކޮށްފައިވާ ޑްރޯންތަކެއް، އެ ގައުމުގެ ވައިގެ ދިފާއީ ނިޒާމުން ހުއްޓުވައި ބިމަށް ވައްޓާލާފައިވާ ކަމަށް ޔަމަނުގެ އަސްކަރިއްޔާގެ ތަރުޖަމާނު ވިދާޅުވެއްޖެ އެވެ.

ޔަމަނުގެ އަސްކަރިއްޔާއިން ހާމަކުރި ގޮތުގައި، އާންމު ރައްޔިތުންނާއި ގައުމުގެ މުހިންމު އުމްރާނީ ވަސީލަތްތަކަށް އަމާޒުކޮށް ކުރިމަތިވެދާނެ ކޮންމެ ހަމަލާއަކަށް ރައްދުދިނުމަށް އެ ގައުމުގެ ސިފައިން ތިބީ ފުރިހަމައަށް ތައްޔާރުވެ، މަތީ ދަރަޖައެއްގެ އެލާޓްގަ އެވެ.

ޔަމަނުގެ ހުޅަނގުގައި އޮންނަ މުޚާ ބަނދަރުގައި ހުރި ސައުދީ އަރަބިއްޔާގެ ސިފައިންގެ މަރުކަޒުތަކަށާއި ހަތިޔާރު ގުދަންތަކަށް އަމާޒުކޮށް، ހޫޘީން ޑްރޯން ހަމަލާއެއް ފޮނުވާލަނީ - ފައިލް ފޮޓޯ

ޔަމަނުގެ ތާއިޒު ޕްރޮވިންސްގައި ހޫޘީ ހަނގުރާމަވެރިން އަސްކަރީ ހަރަކާތްތަކަށާއި މުދާ އުފުލުމަށް ބޭނުންކުރާ މަގުތަކަށް އާންމު ރައްޔިތުން ނުދިއުމަށް އެ ގައުމުގެ އަސްކަރިއްޔާއިން އިންޒާރު ދީފި އެވެ. އަސްކަރިއްޔާއިން ބުނެފައިވަނީ ވަކި ގޮތެއް އަންގަންދެން އެ ސަރަހައްދުތަކުގެ މަގުތައް ބޭނުންކުރުމުން އާންމުން ދުރުހެލިވާންޖެހޭނެ ކަމަށެވެ.

ޔަމަނުގެ އަސްކަރިއްޔާގެ ތަރުޖަމާނު ނެރުއްވި ބަޔާނެއްގައި ވިދާޅުވީ، މި އިންޒާރަކީ ކުރިއަށްދާ އަސްކަރީ އޮޕަރޭޝަންތަކުގެ ސަބަބުން އާންމު ރައްޔިތުންނަށާއި އެމީހުންގެ މުދަލަށް ލިބިދާނެ ގެއްލުންތަކުން ސަލާމަތްކުރުމަށް އެޅި ފިޔަވަޅެއް ކަމަށެވެ. 

މީގެ އިތުރުން، ހޫޘީންގެ އަސްކަރީ ހަރަކާތްތައް ހިނގާ ސަރަހައްދުތަކާއި، އެމީހުން އެއްވެ އުޅޭ ތަންތަނާއި، އަދި ހޫޘީންގެ އަސްކަރީ އުޅަނދުތަކާ ކައިރިނުވުމަށް ވެސް އަސްކަރިއްޔާގެ ބަޔާނުގައި ވަނީ ރައްޔިތުންނަށް އިލްތިމާސްކޮށްފަ އެވެ. 

ތާއިޒްގެ ކުރީސަފުގެ ހަނގުރާމަ ހިނގަމުންދާ ސަރަހައްދަށް ދިއުމަށްޓަކައި ޔަމަނު ސަރުކާރުގެ ސިފައިން އަސްކަރީ ޕިކަޕެއްގައި ދަތުރުކުރަނީ- ފައިލް ފޮޓޯ

ސައުދީ އަރަބިއްޔާގެ މަދީނާގައި ހުންނަ މަސްޖިދުއް ނަބަވީއަށް ކަރަންޓުގެ ޚިދުމަތް ފޯރުކޮށްދޭ ސްޓޭޝަނަކަށާއި، އާންމުން ބޭނުންކުރާ އުމްރާނީ ވަސީލަތްތަކަށް އަމާޒުކޮށް ޔަމަނުގެ ހޫޘީން ދިން ހަމަލާ ގަތަރާއި، ސަރަހައްދީ ގައުމުތަކާއި، އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) އަދި ތުރުކީވިލާތުން ހަރުކަށި އިބާރާތުން ކުށްވެރިކޮށްފި އެވެ. މަދީނާއަށް އަމާޒުކޮށް ދިން މި ހަމަލާއަކީ ސައުދީ އަރަބިއްޔާގެ އިސްތިގުލާލަށް އަރައިގަތުމުގެ "ބޮޑު އުދުވާނެއް" ކަމަށް އެ ގައުމުތަކުން ވަނީ ސިފަކޮށްފަ އެވެ.

ތުރުކީއިން ބުނީ ސައުދީގެ އިސްތިގުލާލާއި ސަލާމަތަށް ނުރައްކާވާ ގޮތަށް އަދި އިސްލާމީ ދުނިޔޭގެ މުގައްދަސް ތަންތަނަށް އަމާޒުކޮށް ދޭ މިފަދަ ފިތުނަވެރި ހަމަލާތައް އެއްވެސް ޝަރުތަކާ ނުލައި ވަގުތުން ހުއްޓާލަން ޖެހޭ ކަމަށެވެ. ގަތަރުން ބުނި ގޮތުގައި ސައުދީ އަރަބިއްޔާގެ ސަލާމަތާއި ރައްކާތެރިކަމަކީ ގަތަރުގެ ސަލާމަތާ ގުޅިފައިވާ ކަމެކެވެ. އަދި އެއީ ގަލްފް ކޯޕަރޭޝަން ކައުންސިލް (ޖީސީސީ) ގެ ގައުމުތަކުގެ ސަލާމަތީ އޮނިގަނޑުގެ މުހިންމު ބައެކެވެ. މީގެ އިތުރުން މުސްލިމް ވޯލްޑް ލީގުން ވެސް ވަނީ އިސްލާމީ މުގައްދަސް ބިނާތައް ހިމާޔަތްކުރުމަށް އަޅާ ފިޔަވަޅުތަކަށް ތާއީދުކުރާކަން ހާމަކޮށްފަ އެވެ.

މަދީނާގައި ހުންނަ މަސްޖިދުއް ނަބަވީއަށް ކަރަންޓުގެ ޚިދުމަތް ފޯރުކޮށްދޭ ސްޓޭޝަންނަށް ހޫޘީން ވަނީ ހަމަލާދީފައި

މޮސްކޯގައި ވާހަކަފުޅު ދައްކަވަމުން ރަޝިޔާގެ ރައީސް ވްލަޑިމިއަރ ޕޫޓިން ވިދާޅުވީ، މުޅި ދުނިޔޭގެ ސަމާލުކަން މިހާރު ހުރީ އީރާނުގައި ހިނގަމުންދާ ކަންކަމަށް ކަމަށާއި، އީރާނުގެ ރައްޔިތުން ދައްކަމުންދާ ހިތްވަރާއި ފަންވަރާއި ސާބިތުކަމާމެދު ދުނިޔެ ހައިރާންވެފައިވާ ކަމަށެވެ.

އެމެރިކާއިން އީރާނާ ދެކޮޅަށް މާލީ ގޮތުން އައު ފިޔަވަޅުތަކެއް އަޅަމުންދާއިރު، ރަޝިޔާއަކީ މިހާރުވެސް އެމެރިކާގެ ގިނަ ދަތިކުރުމުގެ ފިޔަވަޅުތަކެއްގެ ދަށުގައި އޮތް ގައުމެކެވެ.

މޮސްކޯއާއި ތެހެރާނުން ވަނީ ހުޅަނގުގެ ގައުމުތަކަށް ފިލައިގެން ވިޔަފާރިއާއި އަސްކަރީ ގުޅުންތައް ބަދަހިކުރުމުގައި ގިނަ އަހަރުތަކެއް ހޭދަކޮށްފަ އެވެ. އެގޮތުން، ދަތިކުރުމުގެ ފިޔަވަޅުތައް އަޅާފައިވާ ތެލުގެ އިތުރުން، ރަޝިޔާއާ ދެކޮޅަށް އެމެރިކާއިން މާލީ ފިޔަވަޅުތައް އަޅާފައި އޮތް ނަމަވެސް، ކެސްޕިއަން ކަނޑު މެދުވެރިކޮށް ރަޝިޔާއާއި އީރާނުން ހަތިޔާރާއި އަސްކަރީ ސާމާނު ބަދަލުކޮށްފައިވާ ކަމަށް ރިޕޯޓުތައް ބުނެ އެވެ.

އީރާންގެ ރައީސް ޕެޒެޝްކިއާން އަދި ރަޝިޔާގެ ރައީސް ޕޫޓިން

އެމެރިކާގެ ރައީސް ޑޮނަލްޑް ޓްރަމްޕްގެ ދަނބިދަރިކަލުން އަދި މެދުއިރުމަތީގެ ސުލްހައިގެ ކަންކަމުގައި އެމެރިކާގެ އިސް މަންދޫބެއްގެ ގޮތުގައި މަސައްކަތްކުރައްވާ ޖެރެޑް ކުޝްނަރ އަކީ، އިސްރާއީލުގެ އަސްކަރިއްޔާއަށް އެހީތެރިކަން ފޯރުކޮށްދޭ ކުންފުނިތަކުގައި އިންވެސްޓްކުރާ އިސްރާއީލުގެ ކުންފުންޏެއްގެ ބޮޑު ހިއްސާއެއް އޮންނަ ފަރާތެއްކަން ސީއެންއެންގެ ރިޕޯޓަކުން ހާމަވެއްޖެ އެވެ.

ކުޝްނަރގެ އިންވެސްޓްމަންޓް ގްރޫޕެއް ކަމަށްވާ "އެފިނިޓީ ޕާޓްނާސް" އިން ވަނީ، ތެލް އަވީވްގައި ހުންނަ "ފީނިކްސް ފައިނޭންޝަލް" ކުންފުނީގައި އޮތް އެ ގްރޫޕްގެ ހިއްސާ މިދިޔަ އަހަރު ދެގުނައަށް އިތުރުކޮށްފަ އެވެ.

އިސްރާއީލުގެ މާލީ ދެފުށް ފެންނަ ގާނޫނުތަކުގެ ދަށުން ސީއެންއެންއަށް ލިބިފައިވާ ރެކޯޑުތަކުން ދައްކާ ގޮތުގައި، ފީނިކްސް ފައިނޭންޝަލް އިން ވަނީ އިސްރާއީލުގެ އެންމެ ބޮޑު ހަތިޔާރު އުފައްދާ ކުންފުނި ކަމަށްވާ "އެލްބިޓް ސިސްޓަމްސް" ގައި އެތައް މިލިއަން ޑޮލަރެއް އިންވެސްޓްކޮށްފަ އެވެ.

23 ސެޕްޓެމްބަރު 2026 ގައި ބޯޑް އޮފް ޕީސްގެ ބްރީފިންއެއްގައި، އެމެރިކާގެ ހާއްސަ މަންދޫބު ޖެރެޑް ކުޝްނަރ ވާހަކަދައްކަވަނީ

ހުރްމުޒް ކަނޑުއޮޅީގެ ބައިނަލްއަގުވާމީ ކަނޑުދަތުރުފަތުރަށް ހުޅުވިގެންދާނެ ކަމަށް އުންމީދު ކުރައްވާ ކަމަށާއި، އަދި އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އެންމެ ފަހުން އުވާލެވޭނެ ކަމަށް ގަބޫލުކުރައްވާ ކަމަށް ރަޝިޔާގެ ރައީސް ވްލަޑިމިއަރ ޕޫޓިން ވިދާޅުވެއްޖެ އެވެ.

މޮސްކޯގައި ބޭއްވި ވަލްޑާއި ފޯރަމްގައި ވާހަކަފުޅު ދައްކަވަމުން ރަޝިޔާގެ ރައީސް ވިދާޅުވީ، އެމެރިކާއާއެކު ކުރިއަށް އޮތް ތަނުގައި ވެވޭ ސުލްހައިގެ އެއްބަސްވުމެއްގެ ދަށުން އީރާނުން ބޭރުކުރާ އެ ގައުމުގެ މުއްސަނދިކޮށްފައިވާ ޔުރޭނިއަމްތައް ރަޝިޔާއާ ހަވާލުކުރުމަށް މީގެ ކުރިން ހުށަހެޅި ހުށަހެޅުން އަދިވެސް ދެމިއޮތް ކަމަށެވެ.

ރަޝިޔާގެ ރައީސް ވްލަޑިމިއަރ ޕޫޓިން އާއި އީރާނުން ރަޝިޔާއަށް ކަނޑައަޅުއްވާފައި ހުންނަވާ ސަފީރު ކާޒިމް ޖަލާލީގެ އިތުރުން އީރާނުގެ ޚާރިޖީ ވަޒީރު އައްބާސް އަރާގްޗީ

ރަޝިޔާއާ ގުޅުން އޮންނަ އަދި އީރާނުން ބޭނުންކުރަމުންދާ، ކްރިޕްޓޯ ކަރަންސީގެ މައްޗަށް ބިނާވެފައިވާ "ޝެޑޯ ބޭންކިންގ" ނެޓްވޯކަކާ ދެކޮޅަށް އެމެރިކާގެ ޓްރެޜަރީ ޑިޕާޓްމަންޓުން އައު ދަތިކުރުމުގެ ފިޔަވަޅުތަކެއް އަޅައިފި އެވެ.

މިއީ އިގުތިސާދީ ގޮތުން އީރާން އެކަހެރިކުރުމަށް އެމެރިކާއިން ކުރަމުންދާ މަސައްކަތްތައް އިތުރަށް ވަރުގަދަކުރުމުގެ ގޮތުން އެޅި ފިޔަވަޅެކެވެ.

ޑިޖިޓަލް އެސެޓް ނުވަތަ ކްރިޕްޓޯ ކަރަންސީ މެދުވެރިކޮށް ހިންގާ މުއާމަލާތްތަކަށް އަމާޒުކޮށް ދަތިކުރުމުގެ އައު ފިޔަވަޅުތަކެއް އަޅައިފި

އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ތަންފީޒުކުރުމާއި، އެކަންކަން މޮނިޓަރ ކުރުމަށް އުފައްދާ މިނިވަން ޕެނަލްގެ މަސައްކަތަށް ރަޝިޔާއާއި ޗައިނާއިން ހުރަސްއެޅުމާ ގުޅިގެން، އެމެރިކާއިން އަމިއްލަ މިނިވަން ޕެނަލެއް އެކުލަވާލާނެކަން އދ. އަށް ކަނޑައަޅުއްވާފައި ހުންނަވާ އެމެރިކާގެ ސަފީރު މައިކް ވޯލްޓްޒް އިއުލާނު ކުރައްވައިފި އެވެ. 

މީގެ ކުރިން މި މައުޟޫއާ ގުޅޭގޮތުން ހުށަހެޅުނު 6 ގަރާރަކަށް ޗައިނާއާއި ރަޝިޔާއިން ތާއީދުކޮށް ވޯޓު ދީފައިވީ ނަމަވެސް، މިފަހަރު ސަލާމަތީ މަޖިލީހަށް ހުށަހެޅުނު ގަރާރު އެ ދެ ޤައުމުން ވަނީ ވީޓޯ ބޭނުންކޮށްގެން ބޭރުކޮށްލާފަ އެވެ.

އދ. ގެ އާންމު މަޖިލީހުގައި ވާހަކަދައްކަވަމުން ސަފީރު ވޯލްޓްޒް ވިދާޅުވީ، އދ. ގެ ތެރެއިން އެކަން ނުވުމުން، އެމެރިކާއިން އަމިއްލަ އިސްނެގުމުގެ ދަށުން މިނިވަން ޕެނަލެއް އެކުލަވާލާނެ ކަމަށެވެ. އީރާނަށް ދުވަހަކު ވެސް ނިއުކްލިއަރ ހަތިޔާރެއް އުފެއްދުމުގެ ފުރުސަތު ނުދިނުމަށްޓަކައި، އެމެރިކާއިން އުފައްދާ މި ޕެނަލްގައި ބައިވެރިވުމަށް އދ. ގެ މެންބަރު ޤައުމުތަކަށް އޭނާ ވަނީ ދައުވަތު ދީފަ އެވެ.

އދ. އަށް ކަނޑައަޅުއްވާފައި ހުންނަވާ އެމެރިކާގެ ސަފީރު މައިކް ވޯލްޓްޒް

އިނގިރޭސިވިލާތުގެ އާރްއޭއެފް ފެއަރފޯޑް އަސްކަރީ މަރުކަޒުގައި ހިނގައިދިޔަ ހާދިސާ ތަހުގީގު ކުރަމުންދަނިކޮށް، ޓެރަރިޒަމްގެ އަމަލުތަކެއް ހިންގަން އުޅުނުކަމުގެ ތުހުމަތުގައި އިނގިރޭސިވިލާތާއި އީރާނުގެ ރައްޔިތުކަން އޮންނަ މީހަކު ހައްޔަރުކޮށްފި ކަމަށް އެ ގައުމުގެ ކައުންޓަރ ޓެރަރިޒަމް ފުލުހުން ބުނެފި އެވެ.

ވައިގެ ސިފައިންގެ އެ މަރުކަޒަށް ހަމަލާދޭން އުޅުނު ކަމަށް ބުނާ މައްސަލައިގައި އެއްވެސް ބައިވެރިވުމެއް އޮތްކަމަށް ކުރެވޭ ތުހުމަތުތައް އީރާނުން ދަނީ ދޮގުކުރަމުންނެވެ.

ގްލޮސްޓަރޝަޔަރގައި ހުންނަ އިނގިރޭސި ވައިގެ ސިފައިންގެ މި މަރުކަޒަކީ އެމެރިކާއާއި ނޭޓޯގެ ފައުޖުތަކުން ގިނަ ދުވަސްތަކެއް ވަންދެން ބޭނުންކުރަމުން އަންނަ ތަނެކެވެ. މިދިޔަ މާރިޗު މަހުން ފެށިގެން އެމެރިކާއިން އެ މަރުކަޒު ބޭނުންކުރަމުންދަނީ އީރާނަށް ހަމަލާދިނުމަށެވެ. އަދި ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް އަމާޒުކޮށް އީރާނުން މިސައިލް ފޮނުވާ ސަރަހައްދުތަކަށް ހަމަލާދިނުމަށް، އެ މަރުކަޒުގައި ތިބޭ އެމެރިކާގެ ބޮމްބަރ މަތިންދާބޯޓުތަކަށް އިނގިރޭސި ސަރުކާރުން ވަނީ ހުއްދަ ދީފަ އެވެ.

އާރްއޭއެފް ފެއަރފޯޑް ބޭސްގައި ފުލުހުން މުޅި ދުވަހު ހަރަކާތްތެރިވަމުން ގޮސްފައިވޭ

އިނގިރޭސިވިލާތުގެ އާރްއޭއެފް ފެއަރފޯޑް އަސްކަރީ މަރުކަޒަށް ދޭން އުޅުނު ހަމަލާއާ ގުޅުވައިގެން އީރާނުގެ މައްޗަށް ކުރަނީ ދޮގު ތުހުމަތުތަކެއް ކަމަށް ބުނެ، ތެހެރާނުގައި ހުންނަވާ އިނގިރޭސި ސަފީރު ހޫގޯ ޝޯޓަރ އީރާނުގެ ފޮރިން މިނިސްޓްރީއަށް ހާޒިރުކޮށްފި އެވެ.

އެމެރިކާ ސިފައިން ބޭނުންކުރާ އިނގިރޭސިވިލާތުގެ މި އަސްކަރީ މަރުކަޒަށް ގެއްލުން ދިނުމަށް ރޭވި ރޭވުމަކީ އީރާނާ ގުޅުންހުރި ކަމެއް ކަމަށް ބުނެ އިނގިރޭސި ސަރުކާރުން ކުރާ ތުހުމަތުތައް އީރާނު ސަރުކާރުން ދަނީ ދޮގުކުރަމުންނެވެ. އަދި އީރާނާ މެދު އިނގިރޭސިވިލާތުން ގެންގުޅޭ ނުރަނގަޅު ސިޔާސަތު އިސްލާހުކޮށް، އެކަމާ ގުޅޭގޮތުން އިނގިރޭސި ސަރުކާރުން ތަފްސީލީ ބަޔާނެއް ދޭންޖެހޭނެ ކަމަށް ވެސް އީރާނުން ބުނެ އެވެ.

އާރްއޭއެފް ފެއަރފޯޑް އަސްކަރީ މަރުކަޒަކީ އީރާނާއަށް ހަމަލާ ދިނުމަށް އެމެރިކާ އަސްކަރިއްޔާ އިން ބޭނުންކުރި މަރުކަޒެކެވެ.

އިނގިރޭސިވިލާތުގެ ފެއަރފޯޑްގައި ހުންނަ އާރްއޭއެފް ފެއަރފޯޑް އެއަރ ބޭސް އިން ބީ-1 މަރުކާގެ ބޮންއަޅާ ބޯޓެއް އުދުއްސާލުމަށް ތައްޔާރުވަނީ؛29 ސެޕްޓެމްބަރު 2026

ސައުދީ އަރަބިއްޔާގެ މަދީނާގައި ހުންނަ ކަރަންޓު ދޭ މަރުކަޒަކަށް އަމާޒުކޮށް ޔަމަނުގެ ހޫޘީން ހަމަލާއެއް ދީފި އެވެ.

ޔަމަނުގެ ހޫޘީ ހަނގުރާމަވެރިންނާ ދެކޮޅަށް ސައުދީ އަރަބިއްޔާ އިސްވެ އޮވެ އުފައްދާފައިވާ ކޯލިޝަނުން ބުނީ، މި ހަމަލާގެ ސަބަބުން އެ މަރުކަޒުގައި ހުރި ޓްރާންސްފޯމަރެއް ބޭނުންނުކުރެވޭ ވަރަށް ހަލާކުވެފައިވީ ނަމަވެސް، މުޅި ސަރަހައްދުގެ ކަރަންޓުގެ ވިއުގައަށް މީގެ ސަބަބުން އެއްވެސް ބުރޫއެއް އަރާފައި ނުވާކަމަށެވެ.

އެ ކޯލިޝަނުން މިފަދަ ބަޔާނެއް ނެރެފައިވީ ނަމަވެސް، މި ހަމަލާއާ ގުޅޭގޮތުން ހޫޘީންގެ ފަރާތުން އަދި އެއްވެސް އެއްޗެއް ބުނެފައެއް ނުވެ އެވެ.

މަދީނާ، ސައުދީ އަރަބިއްޔާ

އާރްއޭއެފް ފެއަރފޯޑް އެއަރބޭސް ކައިރިން ފަސް މީހަކު ހައްޔަރުކުރުމުގެ ކުރިން، އީރާނުން އިނގިރޭސިވިލާތުގެ ތަނަކަށް ނުވަތަ މުދަލަކަށް ހަމަލާދީފާނެކަމުގެ މައުލޫމާތު އެމެރިކާއަށް ލިބިފައިވާކަމަށް އެމެރިކާގެ ހޯމްލޭންޑް ސެކިއުރިޓީ ސެކްރެޓަރީ މާކްވޭން މުލިން ވިދާޅުވެއްޖެ އެވެ.

މުލިން ވިދާޅުވީ، މިފަދަ ކަމެއް ހިނގައިފާނެކަމުގެ އިންޒާރު އިނގިރޭސިވިލާތަށް ދީފައިވާނެ ކަމަށެވެ. ނަމަވެސް އެ ހަމަލާ އަންނާނީ ކޮން ދިމާލަކުންކަން އެ ވަގުތު ސީދާ ނޭނގޭ ކަމަށް އޭނާ ވިދާޅުވި އެވެ.

ޓެރަރިސްޓު އަމަލެއް ހިންގަން އުޅުމުގެ ތުހުމަތުގައި އާރްއޭއެފް ފެއަރފޯޑް އެއަރބޭސް ކައިރިން ހައްޔަރުކުރި ފަސް މީހުން ވަނީ ކަފާލާތުގެ ދަށުން ދޫކޮށްލާފަ އެވެ.

އިނގިރޭސި ބޮޑުވަޒީރު އެންޑީ ބާންހަމް ބުދަ ދުވަހު ވިދާޅުވީ، އެއަރބޭސް ކައިރީގައި ހިނގައިދިޔަ ސަލާމަތީ ނުރައްކަލުގެ އެ ހާދިސާގައި އީރާނުގެ ބައިވެރިވުން އޮތްކަމުގެ "ވަރުގަދަ ނިޝާންތަކެއް" އެބަހުރި ކަމަށެވެ.

ލަންޑަނުގައި ތިބި އެމެރިކާގެ ބައިވެރިންނާއެކު މި މައްސަލަ ވަރަށް ގާތުން ބަލަމުންދިޔަ ކަމަށާއި، އެ ފަރާތްތަކަށް ސަމާލުވާންޖެހޭ ކަންކަމުގެ މައުލޫމާތު ދެމުންދިޔަކަމަށް މުލިން ވިދާޅުވި

ޔަމަނުގެ ހޫޘީ ހަނގުރާމަވެރިންނާ ދެކޮޅަށް ކުރަމުންދާ ވަރުގަދަ ހަނގުރާމައިގެ ތެރެއިން، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރުގެ ބަޖެޓަށް އެހީވުމަށް ސައުދީ އަރަބިއްޔާއިން 224 މިލިއަން ސައުދީ ރިޔާލް (59.7 މިލިއަން އެމެރިކާ ޑޮލަރު) ދޫކުރުމަށް ނިންމައިފި އެވެ.

ސައުދީ އަރަބިއްޔާއިން ޔަމަނަށް ކަނޑައަޅުއްވާފައި ހުންނަވާ ސަފީރު މުހައްމަދު އަލްޖާބިރު އެކްސްގައި ކުރެއްވި ޕޯސްޓެއްގައި ވިދާޅުވީ، ބަޖެޓަށް އެހީވުމަށް މި ފައިސާ ދޫކުރަން ނިންމީ ޔަމަނުގެ ސަރުކާރުން އެކަމަށް އެދުމާ ގުޅިގެން ކަމަށެވެ.

މި ފައިސާގެ އެހީގެ ސަބަބުން ޔަމަނުގެ ސަރުކާރުގެ މާލީ މުއާމަލާތްތައް ގަވާއިދުން ހިންގުމަށް މަގުފަހިވެ، ދައުލަތުގެ މާލީ ސިޔާސަތުތަކުގެ ހަރުދަނާކަން އިތުރުވެގެންދާނެ ކަމަށް އަލްޖާބިރު ވިދާޅުވި އެވެ. މީގެ އިތުރުން، މި އެހީގެ ސަބަބުން ޔަމަނުގެ ރައްޔިތުންގެ މާލީ ތަނަވަސްކަމާއި ތަކެތި ގަތުމުގެ ގާބިލުކަން އިތުރުކުރުމަށް ބާރަކަށް ވާނެ ކަމަށް ވެސް އޭނާ ފާހަގަކުރެއްވި އެވެ.

ސައުދީ އަރަބިއްޔާގެ ބޮޑުވަޒީރު އަދި ވަލީއަހުދު މުހައްމަދު ބިން ސަލްމާން

ހުރްމުޒް ކަނޑުއޮޅިން ގަސްކާނާ އުފުލާ އުޅަނދުފަހަރަށް ހުރަސްތަކެއް ކުރިމަތިވަމުންދާތީ، އޭގެ ސަބަބުން ދުނިޔޭގެ އެތައް މިލިއަން ބަޔަކަށް ބޮޑު ބަނޑުހައިހޫނުކަމަކާ ކުރިމަތިލާންޖެހިދާނެ ކަމުގެ އިންޒާރު އދ. އިން ދީފި އެވެ.

އދ. ގެ އަންޑަރ ސެކްރެޓަރީ ޖެނެރަލް އަދި ހުރްމުޒް ކަނޑުއޮޅިއާ ބެހޭ އދ. ގެ ޓާސްކް ފޯހުގެ ވެރިޔާ ޖޯޖް މޮރެއިރާ ޑަ ސިލްވާ ވިދާޅުވީ، މި މައްސަލައަށް ހައްލެއް ހޯދުމަށް ފިޔަވަޅު ނާޅައިފިނަމަ، އޭގެ ނަތީޖާ ތަރައްގީވަމުން އަންނަ ގައުމުތަކަށް ވަރަށް ހިތްދަތިވާނެ ކަމަށެވެ.

ގަލްފް ސަރަހައްދުން ފޮނުވާ ގަސްކާނާއަށް އެންމެ ބޮޑަށް ބަރޯސާވާ ގައުމުތަކަކީ އިގުތިސާދީ ގޮތުން އެންމެ ނާޒުކު ހާލަތުގައިވާ ގައުމުތައްކަން ފާހަގަކުރައްވަމުން، އޭނާ ވަނީ ސޫދާން، ސޯމާލިއާ، މޮޒަމްބީކް އަދި ޓެންޒޭނިއާ ފަދަ ގައުމުތަކުގެ ނަން މިސާލެއްގެ ގޮތުގައި ފާހަގަކުރައްވާފަ އެވެ. ހުރްމުޒް ކަނޑުއޮޅީގެ މައްސަލައާ ގުޅިގެން މިހާރު ވެސް ގަސްކާނާގެ އަގުތައް އިންތިހާއަށް އުފުލި، ދަނޑުވެރިކަމުގައި ގަސްކާނާ ބޭނުންކުރާ މިންވަރު ދަށްވެފައިވާ ކަމަށް ވެސް އޭނާ ވިދާޅުވި އެވެ.

އދ. ގެ އަންޑަރ ސެކްރެޓަރީ ޖެނެރަލް އަދި ހުރްމުޒް ކަނޑުއޮޅިއާ ބެހޭ އދ. ގެ ޓާސްކް ފޯހުގެ ވެރިޔާ ޖޯޖް މޮރެއިރާ ޑަ ސިލްވާ

އެމެރިކާގެ ނޭވީގެ ރޫޒްވެލްޓް އެއަރކްރާފްޓް ކެރިއަރ ސްޓްރައިކް ގްރޫޕް މެދުއިރުމައްޗަށް ދަތުރުކުރަމުންދާ ކަމަށް އެމެރިކާގެ އޮފިޝަލަކު އަލްޖަޒީރާ އިން ރިޕޯޓުކޮށްފި އެވެ. އެމެރިކާ ސަރުކާރުގެ އޮފިޝަލަކު އަލްޖަޒީރާ އަރަބިކްއަށް މައުލޫމާތު ދީފައިވާ ގޮތުގައި، އީރާން ވަށައިގެންވާ ކަނޑުގެ ސަރަހައްދުތަކުގައި ހަރަކާތްތެރިވުމަށް ތިން އެއަރކްރާފްޓް ކެރިއަރާއި ދެ ލޭންޑިންގ ގްރޫޕެއް މިހާރު ދަނީ ތައްޔާރުވަމުންނެވެ.

މީގެ އިތުރުން، 2،000 އަށްވުރެ ގިނަ ކަނޑުގެ ސިފައިންނާއެކު މޭކިން އައިލެންޑް މެރިން އެކްސްޕެޑިޝަނަރީ ފޯސް ވެސް ހޯމަ ދުވަހު ވަނީ ސެން ޑިއޭގޯއިން މެދުއިރުމައްޗަށް ދިއުމަށް ފުރާފަ އެވެ.

ނޮވެމްބަރު މަސް ނިމުމުގެ ކުރިން، ޖުމްލަ ތިން އެއަރކްރާފްޓް ކެރިއަރާއި ދެ ލޭންޑިންގ ގްރޫޕް އީރާންގެ ވަށައިގެންވާ ސަރަހައްދުތަކުގައި ގާއިމުވެ ތިބޭނެ އެވެ.

ޔޫއެސްއެސް ތިއޮޑޯ ރޫޒަވެލްޓް ސެން ޑިއޭގޯއިން ފުރަނީ- 27 ސެޕްޓެމްބަރު 2026

ޔަމަނުގެ ތާއިޒު ގަވަރުނަރޭޓްގައި ހަރަކާތްތެރިވާ ހޫޘީންގެ ބައެއް މަރުކަޒުތަކަށް އަމާޒުކޮށް އެ ގައުމުގެ ސަރުކާރު ސިފައިން ވަރުގަދަ ހަމަލާތަކެއް ދީފި އެވެ. ޔަމަނުގެ ހަތިޔާރުއެޅި ސިފައިންގެ ރަސްމީ އެކްސް އެކައުންޓުން ނެރުނު ބަޔާނެއްގައި ބުނެފައިވަނީ، މި ހަމަލާތަކުގައި ހޫޘީންނަށް ބޮޑެތި ގެއްލުންތަކެއް ދީފައިވާ ކަމަށެވެ.

ސައުދީ އަރަބިއްޔާގެ އެހީތެރިކަން ލިބޭ ޔަމަނުގެ ސަރުކާރު ސިފައިންގެ އަސްކަރީ މަސްދަރަކާ ހަވާލާދީ ބުނެފައިވާ ގޮތުގައި، ތާއިޒުގެ ހުޅަނގާއި ދެކުނު އިރުމަތީ ސަރަހައްދުތަކުގައި ދިން މި ހަމަލާތަކުގައި ހޫޘީންގެ 30 އަށްވުރެ ގިނަ ހަނގުރާމަވެރިން މަރާލާފައިވެ އެވެ. މީގެ އިތުރުން މި ހަމަލާތަކުގައި އެ ޖަމާއަތުގެ ގިނަ އަދަދެއްގެ ބަޔަކު ޒަޚަމްވެފައިވާ ކަމަށް ވެސް އެ ފަރާތުން މައުލޫމާތުދެ އެވެ.

ރައީސް ޕެޒެޝްކިއަން އިތުރަށް ވިދާޅުވީ، އެމެރިކާއިން އީރާނަށް އަމާޒުކޮށް ތިން ފަހަރެއްގެ މަތިން ހަމަލާދީފައިވީ ނަމަވެސް، އީރާނުން ދުވަހަކުވެސް މަޝްވަރާގެ މޭޒަށް ދިއުމަށް އިންކާރުކޮށްފައި ނުވާނެ ކަމަށާއި، ކުރިއަށް އޮތް ތަނުގައިވެސް އެފަދަ ފުރުސަތަކަށް ފަސްނުޖެހޭނެ ކަމަށެވެ. އަދި ދައުލަތުގެ އެންމެ އިސްވެރިންގެ މެދުގައި މިކަމުގައި ބަދަހި ގުޅުމެއް އޮތްކަން ފާހަގަކުރައްވައި، ހުރިހާ ބޭފުޅުން ވެސް މަސައްކަތް ކުރައްވަމުން ގެންދަވަނީ ގައުމަށް ކުރިމަތިވެފައިވާ މައްސަލަތަކާއި އުނިކަންކަން ހައްލުކުރުމަށް ކަމަށް އެމަނިކުފާނު ވިދާޅުވި އެވެ.

ކަނޑުގެ މަގުން މުދާ އުފުލުމުގައި ދަތިތަކެއް ހުރި ނަމަވެސް، ޕާކިސްތާނާއި، އިރާޤާއި، ތުރުކީގެ އިތުރުން އަޒަރުބައިޖާނާއެކު އެއްގަމު މަގުން މުދާ އިމްޕޯޓް އަދި އެކްސްޕޯޓް ކުރުމުގެ ފުރުސަތުތައް ފުޅާކުރުމަށް އީރާނުން މަސައްކަތް ކުރަމުންދާ ކަމަށް ވެސް ޕެޒެޝްކިއަން ވިދާޅުވި އެވެ.

ތެހެރާންގައި ބޭއްވި ޕަބްލިކް ރިލޭޝަންސް އޮފިޝަލުންގެ ބައްދަލުވުމެއްގައި، އީރާނުގެ ރައީސް މަސްއޫދު ޕެޒެޝްކިއަން ވާހަކަފުޅު ދައްކަވަނީ

ޔަމަނުގެ ހޫޘީ ހަނގުރާމަވެރިން ވިޔަފާރި އުޅަނދުފަހަރަށް ހަމަލާދޭނެ ކަމުގެ އިންޒާރު ދެމުންދާތީ، ފާއިތުވި ހަފުތާގެ ތެރޭގައި ފްރާންސްގެ އަސްކަރީ މަނަވަރަކުން ބާބުލް މަންދަބު ކަނޑުއޮޅިން މަދުވެގެން 10 އުޅަނދަކަށް ސަލާމަތީ ރައްކާތެރިކަން ފޯރުކޮށްދީފި އެވެ.

ފްރާންސްގެ އަސްކަރިއްޔާގެ ތަރުޖަމާނު ޒޭވިއާ ރިވަލް ވިދާޅުވީ، މި މަނަވަރަކީ ހޫޘީންގެ ހަމަލާތަކުން އުޅަނދުފަހަރު ސަލާމަތްކުރުމަށް ޔޫރަޕިއަން ޔޫނިއަން (އީޔޫ) އިން ރަތްކަނޑުގައި ކުރިއަށްގެންދާ މިޝަނުގެ ދަށުން ހަރަކާތްތެރިވާ އުޅަނދެއް ކަމަށެވެ.

ފްރާންސްގެ ރައީސް އިމަނުއެލް މެކްރޮން މިދިޔަ މަހުގެ ފަހުކޮޅު ވިދާޅުވެފައިވަނީ، ސައުދީ އަރަބިއްޔާއިން ދުވާލަކު އެތައް މިލިއަން ފީފާ ތެލެއް ބޭރުކުރާ ރަތްކަނޑުގެ ބަނދަރެއް ކަމަށްވާ ޔަންބޫއަށް، ފަރަންސޭސި ސިފައިންނާއި ރޭޑާ އަދި ދިފާއީ ނިޒާމުތައް ފޮނުވަމުންދާ ކަމަށެވެ.

ސައުދީ އަރަބިއްޔާގެ ގައުމީ ތެޔޮ ކުންފުނި، އަރަމްކޯއިން ރަތްކަނޑުގެ ބަނދަރު ރަށެއް ކަމަށްވާ ޔަންބޫގައި ހިންގަމުންދާ ޕެޓްރޯކެމިކަލް ކޮމްޕްލެކްސް އެއް

ޔޫރަޕްގެ ގައުމުތަކުގައި ޑީސަލްގެ އަގު ރެކޯޑް މިންވަރަކަށް އުފުލިފައިވާ ކަމަށް ޔޫރަޕިއަން ޔޫނިއަން (އީޔޫ) ކޮމިޝަނުން ހާމަކޮށްފި އެވެ. އީޔޫ ކޮމިޝަނުގެ ތަފާސްހިސާބުތަކުން ދައްކާ ގޮތުގައި، ޔޫރަޕްގެ ބާޒާރުގައި ޑީސަލް ލީޓަރެއްގެ އެވްރެޖް އަގު މިހާރު ވަނީ މީގެ ކުރިން ދުވަހަކުވެސް މައްޗަށް ނުދާ މިންވަރަކަށް، 2.53 ޑޮލަރު އަށް އުފުލިފަ އެވެ.

ތެޔޮ ލިބުމުގައި ހުރި ދަތިތަކާއި، ތެލުގެ އަގު ބޮޑުވުމާ ގުޅިގެން ޔޫރަޕްގެ އެއަރލައިންތަކަށް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފަ އެވެ. އީރާނާ ދެކޮޅަށް އެމެރިކާ އާއި އިސްރާއީލުން ކުރަމުންދާ ހަނގުރާމައާ ގުޅިގެން، ތެޔޮ ސާފުކުރާ މިންވަރު މަދުވެ، ބާޒާރަށް ތެޔޮ ސަޕްލައިކޮށްދޭ މިންވަރު ދަށްވުމުގެ ސަބަބުން ޕެޓްރޯލާއި ޑީސަލްގެ އަގުތައް ވަނީ އިންތިހާއަށް އުފުލިފަ އެވެ.

ހަކަތައިގެ ބާޒާރުގައި ޑީސަލްގެ އަގުތައް އުފުލެމުންދަނީ ދުނިޔޭގެ ބާޒާރުގައި ތެލުގެ އަގަށް އަންނަމުންދާ ބަދަލުތަކާއި ސަޕްލައިއަށް ދިމާވެފައިވާ ގޮންޖެހުންތަކާ ގުޅިގެން

އިސްރާއީލުން ހިފާފައިވާ ހުޅަނގު އައްސޭރީގައި ހުރި ފަލަސްތީނުގެ ޒައިތޫނި ބަގީޗާތަކަށް، އިސްރާއީލުގެ ވަޒަންވެރިން ގިނަ ހަމަލާތަކެއް ދީފި އެވެ.

ރާމަﷲ ކައިރީގައި އޮންނަ އަލް-މުޣައްޔިރު އަވަށުގައި ހިނގި ހާދިސާއެއްގައި، އިސްރާއީލު ސިފައިންގެ ހިމާޔަތުގައި ތިބެ، ޣައިރުގާނޫނީ ވަޒަންވެރިން ވަނީ ފަލަސްތީނުގެ ދަނޑުވެރިންގެ އަތުން ޒައިތޫނިތައް ފޭރިގެންފަ އެވެ. މީގެ އިތުރުން، ނާބްލަސްގެ ދެކުނުން އޮންނަ އޮދްލާ އަވަށުގައި ފަލަސްތީނުގެ ރައްޔިތުން ޒައިތޫނި ކަނޑަން ތިއްބާ، ވަޒަންވެރިން ވަނީ އެ މީހުންނަށް ހަމަލާދީފަ އެވެ.

އދ. އިން ހާމަކޮށްފައިވާ ގޮތުގައި، މި އަހަރުގެ ފުރަތަމަ ހަތަރު މަސްދުވަހުގެ ތެރޭގައި ހުޅަނގު އައްސޭރީގައި ވަޒަންވެރިން ފަލަސްތީނު މީހުންނަށް ދީފައިވާ 1،330 އަށްވުރެ ގިނަ ހަމަލާ ވަނީ ރެކޯޑު ކުރެވިފަ އެވެ. މިއީ ދުވާލަކު އެވްރެޖްކޮށް ހަ ހަމަލާ ކަމަށްވާއިރު، މިއީ ފާއިތުވި ވިހި އަހަރު ދުވަހުގެ ތެރޭގައި މިފަދަ ހަމަލާތައް މިހާ ހަލުވި މިނެއްގައި އިތުރުވި ފުރަތަމަ ފަހަރެވެ.

ފަލަސްތީނުގެ ޖެނީން ކައިރީގައި ހުރި ދަނޑެއްގައި ހުރި ޒައިތޫނި ގަސްތައް، އިސްރާއީލު ސިފައިންގެ ބުލްޑޯޒަރަކުން އުފުރާލަނީ

އީރާނުގެ ވެރިރަށް ތެހެރާން ކައިރީގައި އޮންނަ މަންޖީލްއާބާދުގައި ޓެރަރިސްޓް އަމަލެއް ހިންގަން ރާވަމުންދިޔަ ކަމަށް ތުހުމަތުކުރެވޭ "ޓެރަރިސްޓް ގްރޫޕެއް" ގެ 6 މެންބަރަކު އީރާނުގެ ސަލާމަތީ ބާރުތަކުން ބަޑިޖަހައި މަރާލާފައިވާކަމަށް ބުނެފި އެވެ. 

އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ސިފައިން ވަނީ އެ ސަރަހައްދުގެ ގެއަކުން ގޮވާތަކެތި ހޯދާފަ އެވެ. އަދި ވެރިރަށް ތެހެރާނުގެ ހުޅަނގު ދެކުނުން 44 ކިލޯމީޓަރު ދުރުގައި އޮންނަ އެ އަވަށުގައި ސަރަހައްދު ސާފުކުރުމުގެ މަސައްކަތް މިހާރު ވެސް ދަނީ ކުރިއަށެވެ.

އީރާނުގެ އިދިކޮޅު ގްރޫޕްތަކަށް ހަތިޔާރާއި ފައިސާގެ އެހީތެރިކަން ފޯރުކޮށްދީގެން، އެ ގައުމުގެ ހަމަޖެހުން ނަގާލުމަށް އެމެރިކާ އާއި އިސްރާއީލުން މަސައްކަތް ކުރަމުންދާ ކަމަށް އީރާނުން ތަކުރާރުކޮށް ދަނީ ތުހުމަތު ކުރަމުންނެވެ.

އައިއާރުޖީސީއާ ގުޅުން އޮންނަ ބަސީޖް ޕެރާމިލިޓަރީ ސިފައިން

މި 105 މީހުންގެ ހަށިގަނޑުތަކަކީ އިސްރާއީލުން ޣައްޒާގައި ހިންގަމުންދާ ގަތުލުއާންމުގެ ކުރީކޮޅު، އެ ސިޓީގެ މީހުން ދިރިއުޅޭ އިމާރާތްތަކަކަށް ދިން ހަމަލާތަކުގައި ސުންނާފަތިވި އިމާރާތްތަކުގެ ކުނިތަކުގެ ދަށުން ފެނުނު ހަށިގަނޑުތަކެކެވެ.

2023 ވަނަ އަހަރުގެ އޮކްޓޫބަރު މަހު ފެށި މި ހަނގުރާމައިގެ ފުރަތަމަ ހަފުތާތަކުގައި، އިސްރާއީލުން ވަނީ ތާޖު ކޮމްޕްލެކްސްއަށް ތަކުރާރުކޮށް ބޮން އަޅާފަ އެވެ. މި ހަމަލާތަކުގައި އެ ކޮމްޕްލެކްސް ވަށައިގެން ހުރި ގިނަ އިމާރާތްތަކެއް ބިމާހަމަވެފައިވަނީ ގިނަ އަދަދެއްގެ ބަޔަކު އެ އިމާރާތްތަކުގެ ތެރޭގައި ތިއްބަ އެވެ. އެ އިމާރާތްތަކުގެ ތެރޭގައި ތިބި މީހުންގެ ތެރޭގައި ގިނައީ، ޣައްޒާގެ އުތުރު ސަރަހައްދުން ހިޖުރަކޮށް، ޣައްޒާ ސިޓީގައި ތިބި އެމީހުންގެ ތިމާގެ މީހުންގެ ގާތަށް ވަގުތީ ގޮތުން ބަދަލުވި ފަލަސްތީނުގެ ރައްޔިތުންނެވެ.

ޣައްޒާގެ ސުންނާފަތިވެފައިވާ އިމާރާތްތަކުގެ ކުނިތަކުގެ ދަށުގައި އަދިވެސް 8،000 އަށްވުރެ ގިނަ މީހުންގެ ހަށިގަނޑު ވާނެ ކަމަށް އަންދާޒާކުރެވޭއިރު، އެ ހަށިތައް ނެގުމަށް ބޭނުންވާ އިމާރާތްކުރުމުގެ ސާމާނު ޣައްޒާއަށް އެތެރެވިޔަނުދީ އެމެރިކާއާއި އިސްރާއީލުން އަދިވެސް ދަނީ ހުރަސްއަޅަމުންނެވެ.

25 އޮކްޓޫބަރު 2023 ގައި އިސްރާއީލުން ބޮން އެޅި ޣައްޒާ ސިޓީގެ ޔަރުމުކް މަގުގައި ހުރި އިމާރާތްތަކުގެ ކުނިތަކުގެ ދަށުން 105 މީހުންގެ ހަށިގަނޑު ފެނުމާ ގުޅިގެން އެ މީހުންގެ ޖަނާޒާ ބާއްވަނީ

2027 ވަނަ އަހަރުގެ މެދުތެރެއާ ހަމައަށް ދާއިރު، އިރާޤުގައި ހަރަކާތްތެރިވާ ހަތިޔާރު އެޅި ހުރިހާ ޖަމާއަތްތަކެއްގެ އަތުން ހަތިޔާރު އަތުލުމުގެ މަޝްރޫއެއް އެ ގައުމުގެ ސަރުކާރުން އެކުލަވާލާފައިވާ ކަމަށް އިރާޤުގެ ފޮރިން މިނިސްޓަރު ފުއާދު ހުސައިން އިއުލާނުކުރައްވައިފި އެވެ.

އިރާޤުގެ ފޮރިން މިނިސްޓްރީން ނެރުނު ބަޔާނެއްގައި ބުނީ، މި މަޝްރޫއުގެ ދެލިކޮޕީ ކުރިއަށް އޮތް ދުވަސްތަކުގައި ހުށަހެޅުމަށް ތާވަލުކުރެވިފައިވާ ކަމަށެވެ. އަދި ހަތިޔާރު އެޅި ޖަމާއަތްތަކުގެ އަތުން ހަތިޔާރު އަތުލައި، އެކަން މުޅިން ނިންމުމަށް އެ ގައުމުގެ ބޮޑުވަޒީރު ކަނޑައަޅުއްވާފައިވާ ސުންގަޑިއަކީ އަންނަ އަހަރުގެ ޖޫން މަހެވެ.

ހަތިޔާރު އަތުލުމުގެ މި މަސައްކަތް އަވަސްކުރުމުގެ މައިގަނޑު ސަބަބަކީ، އީރާނާ ގުޅިގެން ސަރަހައްދީ މަސްލަހަތު ގޯސްވަމުން ހިނގައިދާނެކަމަށް ބުނެ އެމެރިކާއިން ކުރިމަތިކުރަމުންދާ ފިއްތުންތަކުގެ ސަބަބުންނެވެ. މީގެ އިތުރުން، އިރާޤަށް ކުރިމަތިވެފައިވާ އިގުތިސާދީ ގޮންޖެހުންތަކުން އަރައިގަތުމަށާއި، ބޭރުގެ އިންވެސްޓްމަންޓްތައް ގައުމަށް ގެނައުމަށްޓަކައި މި ފިޔަވަޅު އެޅުން ވަނީ މަޖުބޫރުވެފަ އެވެ.

އައިސިސްއާ ދެކޮޅަށް އެމެރިކާ އިސްވެ އޮވެ އުފައްދާފައިވާ ކޯލިޝަންގެ ސިފައިން އިރާޤުން ބޭލުމާ ގުޅިގެން، އެކަން ފާހަގަކުރުމަށްޓަކައި އީރާނަށް ތާއީދުކުރާ ހަތިޔާރު އެޅި ޖަމާއަތްތަކުން 30 ސެޕްޓެމްބަރު 2026 ގައި ބަޣުދާދުގައި ބޭއްވި އެއްވުމެއްގެ ތެރެއިން

ޔަމަނުގެ ސަރުކާރުގެ ފައުޖުތަކުން ހާމަކޮށްފައިވާ ގޮތުގައި، ތާއިޒްގެ އިރުދެކުނުން އޮންނަ ހައިފާން ޑިސްޓްރިކްޓްގެ ހަނގުރާމަވެރި ސަރަހައްދުތަކާއި އަލް-އަކްބޫޝް ސަރަހައްދުގައި ހުރި ހޫޘީންގެ މަރުކަޒުތަކަށް އަމާޒުކޮށް، ވައިގެ މަގުން 6 ހަމަލާއެއް ވަނީ ދީފަ އެވެ. 

މި ހާދިސާގައި އެއްވެސް މީހަކަށް އަނިޔާވިކަމުގެ ނުވަތަ މުދަލަކަށް ގެއްލުމެއް ލިބުނުކަމުގެ މައުލޫމާތެއް އަދި މިހާތަނަށް ލިބިފައެއް ނުވެ އެވެ.

ޔަމަނުގެ ސްޓްރެޓީޖިކް ސަރަހައްދެއް ކަމަށްވާ މައުންޓް ގަރްފާންގައި ހުރި އެ ޤައުމުގެ ސަރުކާރުގެ ސިފައިންގެ މީހަކު، ހޫޘީ ހަނގުރާމަވެރިންނަށް އަމާޒުކޮށް ބަޑިޖަހަން ތައްޔާރުވަނީ

އީރާނުގެ ދައުލަތުގެ މީޑިޔާ، އިރްނާ އިން ރިޕޯޓްކޮށްފައިވާ ގޮތުގައި އީރާނުގެ ފައިނޭންސް މިނިސްޓަރު އަލީ މަދަނީޒާދޭ، ޗައިނާއިން އީރާނަށް ކަނޑައަޅުއްވާފައި ހުންނަވާ ސަފީރު ކޮންގް ޕެއިވޫއާ ބައްދަލުކުރައްވައި، އީރާނުގެ މިނިވަންކަމާއި ސިޔާދަތު ދެމެހެއްޓުމަށް ޗައިނާއިން ދޭ އެއްބާރުލުމަށް ޝުކުރު އަދާކުރައްވާ، ބްރިކްސް އާއި ޝަންހާއީ ކޯޕަރޭޝަން އޯގަނައިޒޭޝަން އަދި މާލީ އިދާރާތައް މެދުވެރިކޮށް ދެ ގައުމުގެ ދެމެދުގައި އޮންނަ އެއްބާރުލުން އިތުރުކުރުމުގެ މުހިންމުކަމަށް އަލިއަޅުއްވާލެއްވި އެވެ.

މިދިޔަ އަންގާރަ ދުވަހު، އީރާނުގެ އަސްކަރިއްޔާއަށް ބޭނުންވާ ހަތިޔާރާއި އޭގެ ބައިތައް ހޯދައިދިނުމުގައި އެހީތެރިވި ކަމުގެ ތުހުމަތުގައި، ޗައިނާގެ ބައެއް ކުންފުނިތަކާއި ވިޔަފާރިވެރިންނާ ދެކޮޅަށް އެމެރިކާގެ ޓްރެޜަރީ ޑިޕާޓްމަންޓުން ވަނީ ދަތިކުރުމުގެ ފިޔަވަޅުތައް އަޅާފަ އެވެ.

އެމެރިކާގެ ފިޔަވަޅުތަކާއެކު ވެސް، ޗައިނާއަކީ އަދިވެސް އީރާނުގެ އެންމެ ބޮޑު އެއް ވިޔަފާރި ބައިވެރިޔާ އެވެ. އަދި އީރާނުގެ އިގުތިސާދުގައި ޗައިނާގެ ބައިވެރިވުން އޮތް މިންވަރާ ގުޅިގެން، ޓްރަމްޕްގެ ސަރުކާރުން ބެއިޖިންއާ ދެކޮޅަށް ކިހާ ވަރުގަދަ ފިޔަވަޅުތަކެއް އަޅާނެތޯ މިހާރު ވަނީ ސުވާލު އުފެދިފަ އެވެ.

ތެހެރާނުން ފުރައިގެން ޝަންހާއީއަށް ދިޔަ މީހަކު، ޝަންހާއީ ޕުޑޮންގް އިންޓަނޭޝަނަލް އެއާޕޯޓުގެ ތެރޭގައި ހިނގާފައި ދަނީ. އެމެރިކާއިން އީރާނަށް އެޅި އޭވިއޭޝަންގެ ދާއިރާގެ ދަތިކުރުމުގެ ފިޔަވަޅަށް އަމަލުކުރުމަށް ވެސް ޗައިނާއިން ވަނީ ފާޅުގައި ދެކޮޅު ހަދާފައި

އެމެރިކާއާއި އީރާނާ ދެމެދު ކުރިއަށްދާ މަޝްވަރާތަކާއި، މިދިޔަ އޮގަސްޓު މަހު ތެލުގެ އަގަށް އައި ބޮޑު ބަދަލުތަކާ ގުޅިގެން މާކެޓުގެ ހާލަތު ދިރާސާކުރާ ފަރާތްތަކުން ފާރަވެރިވަމުންދާތީ، ބުރާސްފަތި ދުވަހުގެ ހެނދުނު އޭޝިއާގެ ބާޒާރުގައި ތެލުގެ އަގުތައް އެއްވަރެއްގައި ހިފެހެއްޓިފައި ހުރިކަން ފާހަގަކުރެވިއްޖެ އެވެ.

މީގެ އިތުރުން ސަރަހައްދީ ގައުމުތަކުން ސާފުނުކުރާ ތެޔޮ ބޭރުކުރާ މިންވަރަށް އަންނަ ބަދަލުތަކަށް ވެސް އިންވެސްޓަރުން ދަނީ ބަލަމުންނެވެ.

ބްރެންޓް ކްރޫޑްގެ އަގު ވަނީ 12 ސެންޓު ނުވަތަ 0.1 އިންސައްތަ މައްޗަށް ގޮސް، ފީފާއެއްގެ އަގު 98.15 ޑޮލަރަށް އަރާފަ އެވެ. ނަމަވެސް އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ގެ އަގު ވަނީ 7 ސެންޓު ނުވަތަ 0.1 އިންސައްތަ ދަށަށް ގޮސް، ފީފާއެއްގެ އަގު 90.35 ޑޮލަރަށް ތިރިވެފަ އެވެ.

ސޫރިޔާގެ ބަނިޔާސްގައި ހުންނަ ތެޔޮ ޓާމިނަލަށް އިރާގުން ފޮނުވި ތެޔޮ، ފީފާއަކަށް އަޅަނީ

އިނގިރޭސިވިލާތުގެ އާރްއޭއެފް ފެއަރފޯޑް ވައިގެ މަރުކަޒަށް ދޭން އުޅުނު ހަމަލާގައި އީރާނުގެ ބައިވެރިވުމެއް އޮތް ކަމަށް ބުނެ އެ ގައުމުން ކުރާ ތުހުމަތުތައް އީރާނުގެ ޚާރިޖީ ވަޒީރު އައްބާސް އަރަގްޗީ ދޮގުކުރައްވައިފި އެވެ. އަރަގްޗީ ވަނީ އިނގިރޭސިވިލާތުން މަސައްކަތް ކުރަނީ އަސްލު މައްސަލަ އޮޅުވާލައި، ނުބައި ދިމާލަކަށް އިނގިލި ދިއްކުރަން ކަމަށް ވިދާޅުވެ އެ ގައުމަށް ފާޑުވިދާޅުވެފަ އެވެ.

އިނގިރޭސި ބޮޑުވަޒީރު އެންޑީ ބާންހަމް، އެ ހާދިސާގައި "އީރާނުގެ އަތެއްވާ ކަމަށް" ސަރުކާރަށް ގަބޫލުކުރެވޭ ކަމަށް ވިދާޅުވި ވިދާޅުވުމަށް ރައްދު ދެއްވަމުން އަރަގްޗީ އެކްސްގައި ކުރެއްވި ޕޯސްޓެއްގައި ވިދާޅުވީ، ބޭރު ގައުމުތަކަށް މަސައްކަތްކޮށްދޭ ކަމަށް ބުނާ ޓެރަރިސްޓުން މިނިވަންކުރުމުން ހުރިހާ ކަމެއް ވަރަށް ސާފުވާ ކަމަށެވެ. އަދި އިނގިރޭސިވިލާތުން ތުހުމަތުތައް އަމާޒުކުރަނީ މުޅިން ނުބައި ދިމާލަކަށް ކަމަށް ވެސް އޭނާ ވިދާޅުވި އެވެ.

އިސްރާއީލުގެ ޖަލުތަކުގައި 9،000 އަށްވުރެ ގިނަ ފަލަސްތީނު ރައްޔިތުން ބަންދުކޮށްފައިވާ ކަމަށް އދ. އިން ހާމަކޮށްފި އެވެ.

ފަލަސްތީނުގައި ހުންނަ އދ. ގެ ހިއުމަން ރައިޓްސް އޮފީހުގެ ޑެޕިއުޓީ ހެޑް ނީލް ޓޯބިން ވިދާޅުވީ އިސްރާއީލުގެ ޖަލުތަކުގައި ތިބި ފަލަސްތީނު މީހުންގެ ތެރެއިން ތިންބައިކުޅަ އެއްބައި މީހުން ބަންދުކޮށްފައިވަނީ އެއްވެސް ދައުވާއަކާ ނުލައި އިދާރީ ބަންދުގެ ދަށުން ކަމަށެވެ. އަދި ޣައްޒާއިން ހައްޔަރުކުރި 1،000 އަށްވުރެ ގިނަ މީހުން ބަންދުކޮށްފައިވަނީ "ޣައިރު ގާނޫނީ ހަނގުރާމަވެރިން" ގެ ގޮތުގައި ކަމަށް ވެސް އޭނާ ފާހަގަކުރެއްވި އެވެ. މީގެއިތުރުން، ޖަލުތަކުގެ ހާލަތު ހުރިގޮތުން ފަލަސްތީނުގެ އަސީރުންނަށް އެއްވެސް އުސޫލެއް ނެތި ގިނަ ދުވަސްތަކެއް ވަންދެން މިނިވަންކަން ގެއްލުމާއި، އަނިޔާކުރުމާއި، އިހާނެތިކޮށް ހިތުމުގެ އިތުރުން، ވީނުވީއެއް ނޭނގި ގެއްލުވާލުމުގެ ބިރު އެބައޮތް ކަމަށް ވެސް ޓޯބިން ވިދާޅުވި އެވެ.

1967 ވަނަ އަހަރު އިސްރާއީލުން ފަލަސްތީނުގެ ބިންތަކަށް ވެރިވެގަތް ފަހުން، އެ ގައުމުގެ ޖަލުތަކުގައި ބަންދުކޮށްފައިވާ 800،000 އަށްވުރެ ގިނަ ފަލަސްތީނު ރައްޔިތުންގެ ތެރެއިން ބޮޑު އަޣުލަބިއްޔަތަކަށް ބައިނަލްއަގުވާމީ މުޖުތަމައުގެ ސަމާލުކަން ލިބިފައެއް ނުވޭ

އިރާޤު ހަނގުރާމައިގައި އެމެރިކާގެ 4،500 އަށްވުރެ ގިނަ ސިފައިން މަރުވެ، 31،000 ސިފައިން ޒަޚަމްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

މިކަމާ ގުޅޭގޮތުން ވާހަކަދައްކަވަމުން ޓްރަމްޕް ވިދާޅުވީ، އެމެރިކާއިން އެ ހަނގުރާމައިގައި މަޝްޣޫލުވެފައިވާތާ 23 އަހަރު ވެފައިވާ ކަމަށާއި، މި މުއްދަތުގެ ތެރޭގައި އެމެރިކާގެ 4،500 އަށްވުރެ ގިނަ ސިފައިން މަރުވެފައިވާ ކަމަށެވެ. މީގެ އިތުރުން 31،000 ސިފައިން ޒަޚަމްވެފައިވާއިރު، އޭގެ ތެރެއިން ބައެއް މީހުންނަށް ވަރަށް ބޮޑެތި އަނިޔާތައް ލިބިފައިވާ ކަމަށާއި، އަދި އެމެރިކާ ސަރުކާރަށް މަސައްކަތްކޮށްދޭ ކޮންޓްރެކްޓަރުންގެ ގޮތުގައި ތިބި އެތައް ސަތޭކަ އާންމުންނެއް ވެސް މި ހަނގުރާމައިގައި މަރުވެފައިވާ ކަމަށް ޓްރަމްޕް ވިދާޅުވި އެވެ.

އިރާޤުގައި ތިބި އެމެރިކާގެ ސިފައިން ބޭނުންކުރި އެމެރިކާގެ ދިދަ ބޭލުމަށްފަހު، އަސްކަރިއްޔާގެ އާދައިގެ މަތިން އެ ދިދަ އޮޅާލައި ކެމަފްލާޖް ފޮތިގަނޑަކުން ވަނީ ބަންދުކޮށްފައި

ފާއިތުވި ބައި ގަރުނަށްވުރެ ގިނަ ދުވަހުގެ ތެރޭގައި ފުރަތަމަ ފަހަރަށް، ދުނިޔޭގެ އިސްތިރާތީޖީ ނިއުކްލިއަރ ހަތިޔާރުތައް ކޮންޓްރޯލްކުރުމަށް ހުރި ހުރަސްތައް ނެތިގޮސްފައިވާ ކަމަށާއި މީގެ ސަބަބުން މުޅި ބައިނަލްއަގުވާމީ މުޖުތަމައުގެ ސަލާމަތާއި ރައްކާތެރިކަމަށް ނުރައްކާ ކުރިމަތިވެފައިވާ ކަމަށް އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވެއްޖެ އެވެ. 

މިއަހަރުގެ ކުރީކޮޅު "ނިއު ސްޓާޓް" މުއާހަދާގެ މުއްދަތު ހަމަވުމާ ގުޅިގެންނާއި، ނިއުކްލިއަރ ހަތިޔާރު ފެތުރުން ހުއްޓުވުމާ ބެހޭ މުއާހަދާގެ 11 ވަނަ ރިވިއު ކޮންފަރެންސްގައި އެދެވޭ ނަތީޖާއަކާ ހަމައަށް އައުމަށް އެއްބަސްވުމަކަށް ނާދެވުމުން، ގުޓަރޭޒް ވަނީ ކަންބޮޑުވުން ފާޅުކުރައްވާފަ އެވެ. މީގެ އިތުރުން، އދ. ގެ ޑިސްއާމަމަންޓް ކޮމިޝަނުން ތިން އަހަރުގެ ދައުރެއް ނިންމާލިއިރު، ހަތިޔާރު މަދުކުރުމާ ގުޅޭގޮތުން އެދެވޭ އެއްވެސް ލަފައެއް ނުވަތަ ހުށަހެޅުމެއް ނެރެވިފައި ނުވާކަން ވެސް އޭނާ ފާހަގަކުރެއްވި އެވެ.

ދިރާސާވެރިން ބުނާ ގޮތުގައި މި މައްސަލައިގައި ގޮތް ނިންމާ ހަމައެކަނި ފަރާތަކީ އެމެރިކާ ކަމަށް ބެލެވޭއިރު، ބައިނަލްއަގުވާމީ ގާނޫނުތައް ހަމަހަމަކަމާއެކު ތަންފީޒުކުރުމުގައި އދ. އިން ވަނީ އެންމެ މުހިންމު ޒިންމާ އަދާކުރުމުގައި ނުކުޅެދިފަ އެވެ. ނަތީޖާއެއްގެ ގޮތުން، ނަސްލު ނައްތާލުމުގެ ލާއިންސާނީ އަމަލުތައް ހިންގާ ގައުމުތަކުގެ އަތުގައި ނިއުކްލިއަރ ހަތިޔާރު ހުރި ނަމަވެސް، އެފަދަ ހަތިޔާރެއް ނެތް އީރާނަށް ފާޑުކިޔުންތަކާއި ހަނގުރާމައިގެ އިންޒާރުތައް އަމާޒުވަނީ ހަމައެކަނި އެމެރިކާއިން އެގޮތަށް ބޭނުންވާތީ ކަމަށް ދިރާސާވެރިން ބުނެ އެވެ.  

ގަތަރުގެ މެދުވެރިވުމާއެކު އެމެރިކާއިން އީރާނުގެ ޚާރިޖީ ވަޒީރު އައްބާސް އަރާގްޗީއަށް ފޮނުއްވި ހުށަހެޅުމުގައި ހިމެނެނީ ކޮން ކަންތައްތަކެއްކަން މިހާތަނަށް އަދި ސާފުވެފައެއް ނުވެ އެވެ.

ނަމަވެސް، އެމެރިކާގެ ފަރާތުން އޭނާއަށް ހުށަހެޅުމެއް ލިބިވަޑައިގެންފައިވާކަމާއި، އެ ހުށަހެޅުން އީރާނުގެ ކެބިނެޓަށް ހުށަހަޅުއްވައި މަޝްވަރާތައް ފައްޓަވާފައިވާކަން ވަނީ ކަށަވަރުވެފަ އެވެ.

އަލްޖަރީޒާ އިން ރިޕޯޓުކޮށްފައިވާ ގޮތުގައި، އީރާނުގެ ސިޔާސީ ނިޒާމު ރޭވިފައިވާ ގޮތުން، މިއީ ވަރަށް ގިނަ ވަގުތު ނަގާނެ ދިގު މަރުހަލާއެކެވެ. އެގޮތުން އެ ގައުމުގެ އެންމެ މަތީ ބާރަކީ ސުޕްރީމް ލީޑަރު މުޖުތަބާ ޚާމަނާއީ އާއި ސުޕްރީމް ނޭޝަނަލް ސެކިއުރިޓީ ކައުންސިލެވެ. މީގެ އިތުރުން، ކެބިނެޓާއި، އަސްކަރިއްޔާގެ ދެ ގޯޅި ކަމަށްވާ އީރާނު ސިފައިންނާއި އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) ވެސް މި ނިޒާމުގެ ތެރޭގައި ހިމެނެ އެވެ.

އެހެންކަމުން، އެމެރިކާއިން ހުށަހެޅި ކަންކަން މުތާލިއާކޮށް، އެއަށް ވަކި ގޮތެއް ނިންމުމަށް އީރާނުގެ ސަރުކާރަށް ގިނަ ދުވަސްތަކެއް ބޭނުންވާނެ އެވެ.

އީރާނުގެ ރައީސް މަސްއޫދު ޕެޒެޝްކިއަން ޖޫން މަހުގެ ތެރޭގައި ފަހުމުނާމާއެއްގައި ސޮއިކުރެއްވުމުގެ ތެރެއިން. ފައިލް ފޮޓޯ

ގަތަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުހައްމަދު ބިން އަބްދުއްރަހްމާން އާލްޘާނީ، މިސްރުގެ ޚާރިޖީ ވަޒީރު ބަދުރު އަބްދުލްއާތީއާ ފޯނުން ގުޅުއްވައި މުހިންމު މަޝްވަރާތަކެއް ކުރައްވައިފި އެވެ.

ޤަތަރުގެ ޚާރިޖީ ވުޒާރާއިން އެކްސްގައި އާންމުކުރި ބަޔާނެއްގައިވާ ގޮތުން، މި ފޯނު ކޯލުގައި ދެ ބޭފުޅުން ވަނީ ސަރަހައްދީ މަސްރަހުގައި ހިނގަމުންދާ އެންމެ ފަހުގެ ކަންތައްތަކާ ގުޅޭގޮތުން ވާހަކަދައްކަވާފަ އެވެ. ވަކިން ޚާއްސަކޮށް، ސަރަހައްދީ ނުތަނަވަސްކަން ކުޑަކުރުމަށާއި، ސަލާމަތާއި ހަމަޖެހުން ގާއިމުކުރުމަށްޓަކައި ކުރަމުންދާ ޑިޕްލޮމެޓިކް މަސައްކަތްތަކާއި، ދެ ޤައުމު ގުޅިގެން ކުރެވިދާނެ ކަންކަމާ ގުޅޭގޮތުން ދެ ބޭފުޅުން ފުޅާދާއިރާއެއްގައި މަޝްވަރާކުރެއްވި އެވެ.

މި މަޝްވަރާތަކުގައި ޝައިޚް މުހައްމަދު ވަނީ، ކަނޑުދަތުރުފަތުރުގެ މިނިވަންކަން ކަށަވަރުކޮށްދޭ ފަދަ ހައްލެއް ހޯދުމަށްޓަކައި ކުރެވޭ ހުރިހާ ޑިޕްލޮމެޓިކް މަސައްކަތްތަކަށް ގަތަރުން ފުރިހަމައަށް ތާއީދުކުރާނެކަމުގެ ޔަގީންކަން އަލުން ދެއްވާފަ އެވެ.

މިސްރުގެ ޚާރިޖީ ވަޒީރު ބަދުރު އަބްދުލްއާތީ އާއި ގަތަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުހައްމަދު ބިން އަބްދުއްރަހްމާން އައްޘާނީ

އީރާނުގެ ރައީސް މަސްއޫދު ޕެޒެޝްކިއަން  ވިދާޅުވީ، އަސްކަރީ ހަނގުރާމައެއްގެ ތެރެއިން އީރާނުގެ ރައްޔިތުން ކުޑަކަކޫ ޖައްސުވައި އަމާންދޭން މަޖުބޫރު ކުރުވުމުގައި ދުޝްމަނުން ނާކާމިޔާބުވެފައިވާ ކަމަށެވެ. އަދި އޭގެ ބަދަލުގައި މިހާރު އެ ފަރާތްތަކުން މުޅި ރޭވުން އަމާޒުކޮށްފައިވަނީ އީރާނުގެ އެތެރޭގައި ބައިބައިވުން އުފައްދައި، އެކަން އިތުރަށް ވަރުގަދަ ކުރުމަށް ކަމަށެވެ.

ޕެޒެޝްކިއަން އިތުރަށް ވިދާޅުވީ، ދުޝްމަނުންގެ ރޭވުންތަކުން އަރައިގަތުމަށް އޮތް އެންމެ މުހިންމު މަގަކީ ހުރިހާ ރައްޔިތުންގެ ބައިވެރިވުން ހިމެނޭ ގޮތަށް ގައުމީ ކަންކަމުގައި ކުރިއަށްދިއުން ކަމަށެވެ.

އދ. ގެ އާންމު މަޖިލީހުގައި ވާހަކަދައްކަވަމުން، އިސްރާއީލުގެ ބޮޑުވަޒީރު ނަތަންޔާހޫ ވިދާޅުވީ އީރާނުގެ ރައްޔިތުން ވަރަށް އަވަހަށް މުޒާހަރާތަކަށް ނުކުމެ އެ ޤައުމުގެ ވެރިކަން ވަރަށް އަވަހަށް ބަދަލުކޮށްލާނެ ކަމަށެވެ. އަދި އެމެރިކާގެ ރައީސް ޓްރަމްޕް ވެސް ވަނީ އީރާނުގެ އިސްވެރިންގެ ޖަދަލުކުރުމުގެ ސަބަބުން، އެ ޤައުމުގެ އިގުތިސާދު ފުނޑެމުންދާތީ، އީރާން ރައްޔިތުން އެކަމާ ވަރުބަލިވެފައިވާ ކަމަށް ދާދި ފަހުން ވިދާޅުވެފަ އެވެ. 

އީރާނުގެ ވެރިރަށް ތެހެރާންގައި ބޭއްވި އަސްކަރީ ޕެރޭޑެއްގެ ތެރެއިން، ރައީސް މަސްއޫދު ޕެޒެޝްކިއަން އާއި ސަރުކާރުގެ އިސް ވެރިން- 18 ސެޕްޓެމްބަރު 2026

އީރާނަކީ އަބަދުވެސް ގަތަރާ އަވަށްޓެރި ގައުމެއްގެ ގޮތުގައި ދެމިއޮންނާނެ ގައުމެއް ކަމަށް ގަތަރުގެ ބޮޑުވަޒީރު ޝެއިޚް މުޙައްމަދު ބިން އަބްދުއްރަޙްމާން ބިން ޖާސިމް އައްޘާނީ ވިދާޅުވެއްޖެ އެވެ.

އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ދެ ގައުމުގެ ދެމެދުގައި އޮންނަ އެއްބާރުލުންތަކަށް ހުރަސްތަކެއް ކުރިމަތިވެފައިވީ ނަމަވެސް، އަވަށްޓެރި ގައުމެއްގެ ގޮތުގައި ބާއްވަންޖެހޭ ބަދަހި ގުޅުން ދެމެހެއްޓުމަށް ގަތަރުން އެންމެ ފުރިހަމައަށް މަސައްކަތް ކުރަމުންދާ ކަމަށް ވެސް އޭނާ ފާހަގަކުރެއްވި އެވެ.

ގަތަރުގެ 'ނޯތު ފީލްޑް' އާއި އީރާނުގެ 'ސައުތު ފާސް' އަކީ އެއް ގޭސް ފީލްޑެއް ހިއްސާކުރާ ދެ ސަރަހައްދެވެ. މީގެ އިތުރުން، ހުރްމުޒް ކަނޑުއޮޅި މެދުވެރިކޮށް ހަކަތަ އެކްސްޕޯޓް ކުރުމަށް ކުރިމަތިވެފައިވާ ގޮންޖެހުންތަކާއެކު، އީރާނުގެ ވެރިރަށް ތެހެރާނާ ގާތް ގުޅުމެއް ބޭއްވުމަކީ ގަތަރުގެ ވެރިރަށް ދޯހާއަށް އެންމެ ފައިދާހުރި ގޮތް ކަމަށް އެ ގައުމުން ގަބޫލުކުރެ އެވެ.

ގަތަރުގެ ބޮޑުވަޒީރު ޝެއިޚް މުޙައްމަދު ބިން އަބްދުއްރަޙްމާން ބިން ޖާސިމް އައްޘާނީ

ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް ކޮންމެ ދުވަހަކު ވެސް ހަމަލާދެމުންދާ ކަމަށާއި، ނަމަވެސް އެމެރިކާއިން އެކަމަށް އެއްވެސް ރައްދެއް ނުދޭ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނެފި އެވެ. 

އިއާރްޖީސީގެ ތަރުޖަމާނު ހުސައިން މުހިއްބީ ވިދާޅުވީ، ހުރްމުޒް ކަނޑުއޮޅީގައި ކޮންމެ ދުވަހަކު ވެސް "އަސްކަރީ ކުރިމަތިލުންތަކެއް" ހިނގަމުންދާ ކަމަށެވެ.

މުހިއްބީ ވިދާޅުވީ، އެ ސަރަހައްދުން ދަތުރުކުރާ ކުދި އުޅަނދުފަހަރަށް ހަމަލާދީ، އެ ތަކެތި ހުރަސްކުރުން ހުއްޓުވާތާ މިހާރު ގިނަ ދުވަސްތަކެއް ވެފައިވާ ކަމަށެވެ. އަދި މިގޮތަށް އީރާނުން އަމަލުކުރަމުންދާއިރު ވެސް، އެމެރިކާއިން އެއްވެސް ރައްދެއް ނުދޭކަން އޭނާ ފާހަގަކުރެއްވި އެވެ.

އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް އެޖެންސީން ބުނި ގޮތުގައި، ދުނިޔޭގެ ވިޔަފާރީގައި މުހިންމު ދައުރެއް އަދާކުރާ މި ކަނޑުގެ ސަރަހައްދުން ދަތުރުކުރި މަދުވެގެން ތިން އުޅަނދަކަށް އަންގާރަ ދުވަހު ވަނީ ހަމަލާދީފަ އެވެ.

ހުރްމުޒް ކަނޑުއޮޅިން ދަތުރުކުރަމުންދިޔަ އުޅަނދަކާ އީރާނުގެ އަސްކަރިއްޔާގެ ސްޕީޑްބޯޓެއް ކައިރިކުރަނީ

އީރާނު ސަރުކާރުގެ ތަރުޖަމާނު ފާތިމާ މުހާޖިރާނީ ވިދާޅުވީ، މިހާރު ހިނގަމުންދާ ހަނގުރާމައިގެ ސަބަބުން ކުރިމަތިވެފައިވާ "މަރުތަޅު ނައްޓުވާލުމަށް" ކުރަމުންދާ ހާރިޖީ މަސައްކަތްތަކުގެ ތެރެއިން، އެމެރިކާގެ ހުށަހެޅުމެއް އެ ގައުމަށް މިހާރު ލިބިފައިވާ ކަމަށެވެ.

އެކްސްގައި ކުރެއްވި ޕޯސްޓެއްގައި މުހާޖިރާނީ ވިދާޅުވީ، ބުދަ ދުވަހު ބޭއްވި ކެބިނެޓް ބައްދަލުވުމެއްގައި، އެމެރިކާގެ ފަރާތުން އެ ހުށަހެޅުން ލިބިފައިވާކަން އީރާނުގެ ހާރިޖީ ވަޒީރު އައްބާސް އަރާގްޗީ ކަށަވަރުކޮށްދެއްވާފައިވާ ކަމަށެވެ. ނަމަވެސް، އެމެރިކާގެ ޖަވާބާ ގުޅޭ އިތުރު ތަފްސީލެއް އޭނާ ހާމަކުރައްވާފައެއް ނުވެ އެވެ.

މި ކެބިނެޓް ބައްދަލުވުމުގައި އަރާގްޗީ ވަނީ ވިލާތުގެ ގައުމުތަކާއި ގަލްފުގެ ގައުމުތަކުގެ ލީޑަރުންނާއެކު ބޭއްވި ބައްދަލުވުންތަކުގެ މައުލޫމާތާއި، ހުރްމުޒް ކަނޑުއޮޅި އަލުން ހުޅުވާލުމަށްޓަކައި އީރާނުން އެމެރިކާއަށް ހުށަހެޅި ޝަރުތުތަކުގެ ތަފްސީލުތައް ހިމެނެ އެވެ.

އީރާން ސަރުކާރުގެ ތަރުޖަމާނު ފާތިމާ މުހާޖިރާނީ