މެދުއިރުމަތީ ހަނގުރާމަ

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައަކީ "އީރާނާ ދެކޮޅަށް ކުރެވޭ ކުޑަ ކުރިމަތިލުމެއް" ގޮތުގައި ސިފަކުރައްވަމުން، އަސްކަރީ ގޮތުންނާއި މާލީ ގޮތުން ތެހެރާނާ ދެކޮޅަށް ވޮޝިންގްޓަނުން ކުރަމުންދާ މަސައްކަތްތައް ވަރަށް ކާމިޔާބު ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޖޮއިންޓް ބޭސް އެންޑްރޫސްގައި ނޫސްވެރިންނާ ވާހަކަދައްކަވަމުން، އީރާނާއެކު މަޝްވަރާކުރުމުގެ ވިސްނުން ދޫކޮށްލެއްވީތޯ ސުވާލުކުރުމުން ޓްރަމްޕް ވިދާޅުވީ، މިވަގުތު އެފަދަ މަޝްވަރާތަކެއް ކުރިއަށް ނުދާ ކަމަށެވެ. ނަމަވެސް، ކޮންމެވެސް އެއްގޮތަކުން މިކަމަށް ހައްލެއް ލިބޭނެ ކަމަށާއި، އެކަން ވަރަށް އަވަހަށް ހިނގާނެ ކަމަށް ގަބޫލުކުރައްވާ ކަމަށް ޓްރަމްޕް ވިދާޅުވި އެވެ.

ވޮޝިންގޓަންގެ ވައިޓް ހައުސްގެ ސައުތު ލޯންއަށް، 2026 ވަނަ އަހަރުގެ އޮކްޓޫބަރު މަހުގެ 15 ވާ ބުރާސްފަތި ދުވަހުގެ ފަތިހުގެ ވަގުތެއްގައި މެރިން ވަން ހެލިކޮޕްޓަރުގައި ވަޑައިގަތުމަށްފަހު، އެމެރިކާގެ ރައީސް ޑޮނަލްޑް ޓްރަމްޕް އިޝާރާތެއް ކުރައްވަނީ [އޭއެފްޕީ]

ކުރިއަށް އޮތް އެމެރިކާގެ މިޑްޓާމް އިންތިޚާބަށް އިޝާރާތް ކުރައްވައި ޓްރަމްޕް އިތުރަށް ވިދާޅުވީ، ގިނަ ބަޔަކު ގަބޫލުކުރާ ގޮތުގައި މި މައްސަލައަށް ހައްލެއް ފެންނާނީ އިންތިޚާބަށް ފަހުގައި ކަމަށާއި، ކަންތައްތައް ވާގޮތް ބައްލަވާނެ ކަމަށެވެ.

މީގެ އިތުރުން ޓްރަމްޕް ވިދާޅުވީ، އީރާނާ މެދު އެމެރިކާގެ ސަރުކާރުން މިހާތަނަށް އަޅާފައިވާ ފިޔަވަޅުތަކަކީ ހައިރާންވާ ފަދަ ކާމިޔާބު މަސައްކަތްތަކެއް ކަމަށެވެ.

އިސްރާއީލުން ޣައްޒާގައި ބޭނުންކުރަމުންދާ ހިސާރުކުރުމުގެ އުސޫލުތައް، އިސްރާއީލުން އިސްތިއުމާރުކޮށްފައިވާ ހުޅަނގު އައްސޭރީގެ އެކި ސަރަހައްދުތަކަށް ފަތުރަން ފަށައިފި އެވެ.

އުމުރުން 52 އަހަރުގެ ޔޫސުފް ޝަނާރަން އޭނާގެ ގޭގެ ގޯތިތެރޭގައި ވަޅެއް ކޮނުނު ނަމަވެސް، މިއަދު އޭނާއަށް އެ ވަޅާ ހަމައަށް ދެވޭނެ އެއްވެސް ގޮތެއް ނެތެވެ. މިދިޔަ އޮކްޓޫބަރު މަހުގެ 5 ވަނަ ދުވަހުން ފެށިގެން، އިސްރާއީލުގެ ވަޒަންވެރިން ދަނީ ދެކުނު ހެބްރޮން ހިލްސްގެ ހިމޭން ސަރަހައްދެއް ކަމަށްވާ ވަދީ ރަޚީމްގައި ހުންނަ ޝަނާރަންގެ އާއިލީ ގެއަށް ވަދެ ނިކުމެ އުޅުން ހުއްޓުވައި، 24 ގަޑިއިރު އެ ގެ ހިސާރުކޮށްގެންނެވެ. މި ހިސާރުގެ ސަބަބުން އެ އާއިލާގެ މެންބަރުންނަށް އަމިއްލައަށް ބޭރަށް ނިކުމެ އުޅުމުގެ ފުރުސަތު ގެއްލިފައިވާއިރު، ބޯފެން ފޮދެއް ހޯދުމަށް ވަޅާ ހަމައަށް ދިއުމަށްވެސް ވަނީ ހުރަސްތަކެއް ކުރިމަތިވެފަ އެވެ.

ހިފާފައިވާ ހުޅަނގު އައްސޭރީގެ ރާމަﷲގެ ހުޅަނގު އުތުރުގައި އޮންނަ އުއްމު ސަފާގައި ހުންނަ އަބަޔާތު އާއިލާގެ ގޭގެ ބޭރުގައި އިސްރާއީލުގެ ވަޒަންވެރިން މަޑުކޮށްލައިގެން ތިބެނީ [އަލްޖަޒީރާ]

އެ އާއިލާއަށް އެމީހުންގެ އަމިއްލަ ވަޅުން ފެން ނެގުމުގެ ފުރުސަތު ހޯދައިދިނުމަށް އިސްރާއީލުގެ އަސްކަރިއްޔާއިން ކަންކަން ހަމަޖެއްސުމަށް ފަސް ދުވަސް ނެގިއެވެ. ގޭގައި ހުރި ފެން ހުސްވިތާ ތިން ދުވަސް ފަހުން، އިސްރާއީލު ސިފައިން އެ އާއިލާއަށް ވަޅުން ފެން ނެގުމުގެ ހުއްދަ ދީފައިވަނީ މިދިޔަ އަންގާރަ ދުވަހު އެވެ.

ފަލަސްތީނުގެ އަސް-ސަމޫ އަދި ސޫސިޔާ އަވަށާ ދެމެދު އޮންނަ ބިމެއްގައި 2016 ވަނަ އަހަރު ދެބުރި އިމާރާތެއް ބިނާކޮށް، އެތަނުގައި 70 މޭބިސްކަދުރު ގަހާއި 40 އެއްހާ ޒައިތޫނި ގަސް އިންދާފައިވާ ޝަނާރަން، އަލްޖަޒީރާއަށް ފޯނުން ދިން އިންޓަވިއުއެއްގައި ބުނީ ގޭގައި މިހާރު އެއްވެސް ކާބޯތަކެތީގެ ބާވަތެއް ނެތް ކަމަށެވެ.

ޝަނާރަން އިތުރަށް ބުނި ގޮތުގައި، އޭނާ އަމިއްލަ ޚަރަދުގައި ބިނާކުރި ވަޅު ފެނުން ފުރިފައި ހުރި ނަމަވެސް، އެ ވަޅާ ހަމައަށް ދިއުމަށް އިސްރާއީލުގެ ވަޒަންވެރިން ހުރަސްއަޅަނީ އޭނާގެ އަމިއްލަ ގެއިން އޭނާ ނެރެލުމުގެ ބޭނުމުގަ އެވެ.

ސޫރިޔާގެ ދެކުނުގައި އޮންނަ ދަރުޢާ ގަވަރުނަރޭޓްގެ ހުޅަނގު ސަރަހައްދުގެ އަވަށެއް ކަމަށްވާ ޖަމްލާގައި، ނުކުޅެދުންތެރިކަން ހުންނަ މީހެއްގެ ގަޔަށް އިސްރާއީލު ސިފައިން ބަޑިޖަހައި މަރާލައިފި ކަމަށް ސޫރިޔާގެ ދައުލަތުގެ މީޑިއާ، ސަނާ އިން ރިޕޯޓްކޮށްފި އެވެ.

ސަނާ އިން އިތުރަށް ބުނެފައިވާ ގޮތުގައި، އިސްރާއީލު ސިފައިންގެ ހަމަލާގައި ޝަހީދުވި އެ މީހާގެ ހަށިގަނޑު މިހާރު ވަނީ ދަރުޢާ ނޭޝަނަލް ހޮސްޕިޓަލަށް ގެންގޮސްފަ އެވެ.

މީގެ ކުރިން ވެސް ރިޕޯޓްކޮށްފައިވާ ފަދައިން، އިސްރާއީލު ސިފައިން ވަނީ ޖަމްލާ އަވަށަށް ވަދެގަނެ، އެ އަވަށުގެ ގިނަ ގެތަކެއް ބަލައި ފާސްކޮށްފަ އެވެ. އަދި އާންމުން ދިރިއުޅޭ ގޭގޭގެ ފުރާޅުތަކުގެ މައްޗަށް ސްނައިޕަރުން އަރުވައި، މީހުން ދިރިއުޅޭ ސަރަހައްދުތަކަށް އަމާޒެއް ނެތް ގޮތަށް ބަޑީގެ ހަމަލާތައް ދީފައިވާ ކަމަށް ވެސް ރިޕޯޓްތައް ބުނެ އެވެ.

ޔަމަނުގެ ތާއިޒް ގަވަރުނަރޭޓުގައި ފާއިތުވި 48 ގަޑިއިރުގެ ތެރޭގައި ހޫޘީ ހަނގުރާމަވެރިން ހިންގާފައިވާ އިންސާނީ ހައްގުތަކާ ޚިލާފު 109 އަމަލެއް ޔަމަނީ ނެޓްވޯކް ފޯ ރައިޓްސް އެންޑް ފްރީޑަމްސް އިން ރިޕޯޓުކޮށްފި އެވެ.

އެ ޖަމާއަތުން ހާމަކުރި ގޮތުގައި، ހޫޘީ ފައުޖުތަކުން ހިންގި މި ޖަރީމާތަކުގެ ސަބަބުން އާންމުންގެ 8 މީހަކު މަރުވެ، 26 މީހަކު ވަނީ ޒަހަމްވެފައެވެ.

ޔަމަނުގެ ސަރުކާރުން ހިންގާ ސަބާ ނިއުސް އެޖެންސީން އާންމުކުރި މި ރިޕޯޓުގައިވާ ގޮތުން، މަރުވި މީހުންގެ ތެރޭގައި ތިން އަންހެނުންނާއި ތިން ކުޑަކުދިން ހިމެނެ އެވެ. އަދި ޒަޚަމްވި މީހުންގެ ތެރޭގައި ހަތް އަންހެނުންނާއި ހަތަރު ކުޑަކުދިން ހިމެނޭ ކަމަށް އެ ރިޕޯޓުގައިވެ އެވެ. ހޫޘީ ހަނގުރާމަވެރިން ތާއިޒް ސިޓީގެ މެދުތެރޭގައި އޮންނަ ސީނާ އަވަށަށް ދެ ބެލިސްޓިކް މިސައިލް ފޮނުވާލާފައިވާ ކަމަށާއި، މީގެ އިތުރުން މޯޓަރު ބަޑިއާއި، ކަޓްޔޫޝާ ރޮކެޓާއި، އާޓިލަރީ އަދި ޑްރޯން ބޭނުންކޮށްގެން މީހުން ދިރިއުޅޭ ސަރަހައްދުތަކަށް ގާތްގަނޑަކަށް 147 ހަމަލާ ދީފައިވާ ކަމަށްވެސް އެ ޖަމާއަތުން ބުނެއެވެ.

އެ ޖަމާއަތުން އިތުރަށް ހާމަކުރި ގޮތުގައި، 24 އާންމުން ރަހީނުކޮށްގެން ނޭނގޭ ތަންތަނަށް ގެންގޮސްފައިވާއިރު، 23 ގެއަކަށް ވަނީ ވަދެގަނެފަ އެވެ. އަދި ދިން ހަމަލާތަކުގެ ސަބަބުން 17 ގެއަކަށާއި އާންމުންގެ 11 އުޅަނދަކަށް އެކިވަރުގެ ގެއްލުންތައް ލިބިފައިވާ ކަމަށްވެސް ރިޕޯޓުގައި ފާހަގަކޮށްފައިވެ އެވެ.

އދ. އިން ވަނީ ތާއިޒްގެ އިންސާނީ ހާލަތު ދުވަހުން ދުވަހަށް ގޯސްވަމުންދާ ކަމަށާއި، ކާބޯތަކެއްޗާއި، ތެލާއި އަދި ބޭސްފަރުވާގެ ސާމާނު ވަރަށް ބޮޑަށް މަދުވަމުންދާ ކަމަށް ބުނެ އިންޒާރު ދީފަ އެވެ.

ޔަމަނުގެ ތިންވަނަ އަށް އެންމެ ބޮޑު ސިޓީ ކަމަށްވާ ތާއިޒް، އޮކްޓޯބަރު މަހުގެ ކުރީކޮޅުން ފެށިގެން ހޫޘީން އޮތީ ވަށާލާފަ އެވެ. އަދި އެ ސިޓީއާއި ޔަމަނު ސަރުކާރުގެ ވަގުތީ ވެރިރަށް ކަމަށްވާ އަދަންއާ ގުޅުވައިދޭ މައި މަގުވެސް ހޫޘީން ވަނީ ބަންދުކޮށްފަ އެވެ.

ހިފާފައިވާ ހުޅަނގު އައްސޭރީގެ ނާބްލަސްގެ ހުޅަނގު އުތުރުގައި އޮންނަ ބުރުގާ ކިޔާ އަވަށެއްގައި، އިސްރާއީލުގެ ވަޒަންވެރިން ފަލަސްތީނުގެ ރައްޔިތުންގެ ދަނޑުބިންތަކުގައި ހުޅުޖަހައިފި ކަމަށް ފަލަސްތީނުގެ ރަސްމީ ނިއުސް އެޖެންސީ "ވާފާ" އިން ރިޕޯޓްކޮށްފި އެވެ.

އެ ސަރަހައްދުގެ މަސްދަރުތަކުން އެ އެޖެންސީއަށް މައުލޫމާތު ދީފައިވާ ގޮތުގައި، ބުދަ ދުވަހުގެ ހެނދުނުގެ ވަގުތެއްގައި އިސްރާއީލުގެ ވަޒަންވެރިން ބުރުގާގެ ދަނޑުބިންތަކަށް ހަމަލާދީ، އެ ބިންތަކުގައި ވަނީ އަލިފާން ރޯކޮށްފަ އެވެ. މި ހަމަލާގެ ސަބަބުން އެ ސަރަހައްދުގެ ބައެއް ދަނޑުބިންތައް ވަނީ އަނދާފަ އެވެ.

ސައުދީ އަރަބިއްޔާގެ މަދީނާއާއި އިރުމަތީ ސަރަހައްދުތަކަށް އަމާޒުކޮށް ފޮނުވާލި ހަތަރު ޑްރޯން، ސައުދީ އިސްވެ އޮންނަ ކޯލިޝަނުން ވައްޓާލައިފި އެވެ.

ސައުދީ އިސްވެ އޮންނަ ކޯލިޝަންގެ ތަރުޖަމާނު ވިދާޅުވީ، ސައުދީ އަރަބިއްޔާއަށް އަމާޒުކޮށް ފޮނުވާލި ހަތަރު ޑްރޯން އެ ގައުމުގެ ވައިގެ ދިފާއީ ނިޒާމުން ހުއްޓުވައި، ގޮއްވާލާފައިވާ ކަމަށެވެ.

މީގެ އިތުރުން، އެކްސްގައި ކުރެއްވި ވަކި ޕޯސްޓެއްގައި ތަރުޖަމާނު ވިދާޅުވީ، މި ޑްރޯންތައް ހުއްޓުވައި ނައްތާލާފައިވަނީ މަދީނާގެ އިތުރުން އެ ގައުމުގެ އިރުމަތީ ސަރަހައްދުތަކުގެ ވައިގެ ސަރަހައްދުން ކަމަށެވެ.

ޣައްޒާ ސިޓީގެ އިރުދެކުނުން އޮންނަ އަލްޒައިތޫން އަވަށަށް އިސްރާއީލުން ދިން ބޮމުގެ ހަމަލާއެއްގައި ފަލަސްތީނުގެ ރައްޔިތަކު ޝަހީދުވެއްޖެ ކަމަށް މެޑިކަލް މަސްދަރުތަކާ ހަވާލާދީ އަލްޖަޒީރާއިން ރިޕޯޓްކޮށްފި އެވެ.

އެމެރިކާއާއި އީރާނާ ދެމެދު ހިނގަމުންދާ ހަމަނުޖެހުންތަކަށް އަސްކަރީ ހައްލެއް ނެތް ކަމަށް ގަތަރުން ބުނެފި އެވެ.

ގަތަރުގެ ފޮރިންގ މިނިސްޓްރީގެ މީޑިއާ ޑައިރެކްޓަރު ވިދާޅުވީ، އެމެރިކާއާއި އީރާނުގެ ހަނގުރާމައަށް ވީ އެންމެ އަވަސް ފުރުސަތެއްގައި ހައްލެއް ލިބޭނެ ކަމަށް އެ ގައުމުން އުންމީދު ކުރާ ކަމަށެވެ.

އޭނާ އިތުރަށް ވިދާޅުވީ، މި މައްސަލައިގައި އަބަދުވެސް އުންމީދު ކަނޑާނުލައި، ބުރަކޮށް މަސައްކަތް ކުރަންޖެހޭ ކަމަށާއި، ހައްލަކަށް ވާސިލުވުމަށް ބޭނުންވާ ކަންކަމަށް ހޭލުންތެރިވާން ޖެހޭނެ ކަމަށެވެ.

މީގެ އިތުރުން، މި މައްސަލައަށް އަސްކަރީ ހައްލެއް ނެތް ކަމަށާއި، މަސްރަހު އިތުރަށް ގޯސްވިޔަ ނުދީ، ސުލްހަވެރި ހައްލެއް ހޯދުމަށް މަޝްވަރާގެ މޭޒަށް އަންނަން ޖެހޭނެ ކަމަށްވެސް އޭނާ ވިދާޅުވި އެވެ.

އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަމަށް އޮތް ހައްލަކީ ސުލްހަވެރި މަގަކުން ކަންކަން ނިންމުން ކަމަށާއި، ވީހާވެސް އަވަހަކަށް ހައްލަކަށް ވާސިލުވުމަކީ އެންމެ މަސްލަހަތު ހުރި ގޮތް ކަމަށް ގަތަރުގެ ފޮރިން މިނިސްޓްރީން ބުނެފި އެވެ.

އެ މިނިސްޓްރީގެ މީޑިއާ ޑިރެކްޓަރު އިތުރަށް ވިދާޅުވީ ކަނޑުދަތުރުފަތުރުގެ މިނިވަންކަމާ ގުޅޭ ބައިނަލްއަގުވާމީ ގާނޫނުތަކަށް އީރާނުން އަމަލުކުރަންޖެހޭ ކަމަށާއި، ހޮރްމޫޒް ކަނޑުއޮޅި ދަތުރުފަތުރަށް ހުޅުވާލެވިފައި އޮންނަންޖެހޭނެ ކަމަށެވެ.

އިންޓަނެޓްގެ ހިދުމަތް މެދުކަނޑާލައިފިނަމަ، އީރާނު ހިމެނޭހެން އެ ސަރަހައްދުގެ ހުރިހާ ގައުމަކަށްވެސް އޭގެ ނޭދެވޭ އަސަރު ކުރާނެ އެވެ.

ހުރްމުޒް ކަނޑުއޮޅީގައި އީރާނުން ދެމުންދާ، ސަރަހައްދަށާއި ރައްޔިތުންނަށް ގެއްލުންދެނިވި ޒިންމާދާރުކަން ކުޑަ ހަމަލާތައް އެ ގައުމުން ހުއްޓާލަންޖެހެ އެވެ.

ސަރަހައްދުގެ ސަލާމަތާއި ހަމަޖެހުން ދެމެހެއްޓޭނެ ހަމައެކަނި މަގަކީ، މަޝްވަރާގެ މޭޒުގެ ދޮށުން ހޯދޭ ސުލްހަވެރި ހައްލެކެވެ.

ޣައްޒާ ސިޓީގެ ހުޅަނގުގައި ހުރި މީހުން ދިރިއުޅޭ އެޕާޓްމަންޓަކަށް އިސްރާއީލުން ދިން ހަމަލާއެއްގައި ފަލަސްތީނުގެ ފިރިހެނަކާއި އޭނާގެ އަންހެނުން ޝަހީދުވެފައިވާ ކަމަށް އަލްޝިފާ ހޮސްޕިޓަލުގެ މަސްދަރުތަކާ ހަވާލާދީ އަލްޖަޒީރާއިން ރިޕޯޓްކޮށްފި އެވެ.

އީރާނުގެ އަސްކަރިއްޔާގެ ޗީފް އޮފް ސްޓާފް، މޭޖަރ ޖެނެރަލް އަލީ އަބްދުﷲ ހީ، އިސްރާއީލާއި އެމެރިކާއިން އިތުރު "ނުބައި ހިސާބުތަކެއް" ނުޖެހުމަށް އިންޒާރު ކުރައްވައިފި އެވެ.

އޭނާ ވިދާޅުވީ އިސްރާއީލާއި އެމެރިކާއިން އީރާނުގެ އަޒުމާއި ވަރުގަދަކަން އެތައް ފަހަރަކު އިމްތިހާނު ކޮށްފައިވާ ކަމަށާއި، ނަމަވެސް އެއީ އެ ގައުމުތަކުން ހެދި ބޮޑު ގޯހެއްކަން ސާބިތުވެފައިވާ ކަމަށެވެ.

އީރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، އަލީ އަބްދުﷲ ހީ ވިދާޅުވީ މީގެ ކުރިން ކުރެވުނު ކޮންމެ ހަނގުރާމައެއްގައިވެސް އެމެރިކާއާއި އިސްރާއީލުން ކުރިމަތިލީ އީރާނުގެ އިސްލާމީ ޖުމްހޫރިއްޔާ ވައްޓާލައި، އެ ގައުމު ބައިބައިކޮށް ސުންނާފަތި ކުރުމުގެ ޝިއާރުތަކާއެކު ކަމަށެވެ. ނަމަވެސް މިއަދު ފެންނަމުންދަނީ ބާރުގަދަ އީރާނު ސާބިތުކަމާއެކު އޮތް ތަން ކަމަށާއި، އޭގެ ބަދަލުގައި ނެތިގޮސް ވެއްޓެމުންދަނީ އެ ގައުމުތައް ކަމަށް އޭނާ ވިދާޅުވި އެވެ.

އީރާނުގެ ޗީފް އޮފް ސްޓާފް އިތުރަށް ވިދާޅުވީ، އީރާނާ ދެކޮޅަށް ދެން ހަދާ އެފަދަ ކޮންމެ "ނުބައި ހިސާބަކަށް" ނުވަތަ ކުރިމަތިލުމަކަށް، ކުރިއަށްވުރެ މާ ވަރުގަދަ އަދި ހަރުކަށި ރައްދު ހަމަލާތަކެއް ދޭނެ ކަމަށެވެ.

ޔަމަނުގެ ސަރުކާރުން ހާމަކޮށްފައިވާ ގޮތުގައި، އެ ގައުމުގެ ތައީޒް ގަވަރުނަރޭޓްގައި ހޫޘީންގެ ބާރުގެ ދަށުގައި ހުރި ބައެއް ސަރަހައްދުތައް ސަރުކާރުގެ ސިފައިން މިހާރު ވަނީ އަލުން ހިފާފަ އެވެ.

މި ސަރަހައްދުގައި ހަރަކާތްތެރިވާ ރިޕޯޓަރުން މައުލޫމާތުދޭ ގޮތުގައި، ސަރުކާރުގެ ސިފައިން ވަނީ ހޫޘީންނާ ދެކޮޅަށް ވަރުގަދަ ހަމަލާތަކެއް ދިނުމަށްފަހު، ސަނަމާތު ސަރަހައްދު އަލުން ހިފާފަ އެވެ. އަދި ތައީޒް ސިޓީގެ ދެކުނުން އޮންނަ މިސްރާޚް ސަރަހައްދަށް ސިފައިން މިހާރު ދަނީ ކުރިއަރަމުންނެވެ. ހޫޘީން ދިން ބަޑީގެ ހަމަލާތަކުގައި އާންމުންގެ އެކަކު މަރުވެ، އިތުރު ފަސް މީހަކު ޒަޚަމްވެފައިވާ ކަމަށްވެސް ރިޕޯޓްތައް ބުނެއެވެ.

ސަރުކާރުގެ ބާރުގެ ދަށުގައި އޮންނަ ތައީޒް ސިޓީ ވަށާލުމަށް ހޫތީން ދަނީ މަސައްކަތް ކުރަމުންނެވެ. އެ ސިޓީގައި ދިރިއުޅޭ ރައްޔިތުންނަށް ބޭނުންވާ ކާބޯތަކެތި ހުސްވަމުންދާ ކަމުގެ އިންޒާރު އދ. އިން ދީފައިވާއިރު، ތައީޒްގެ ސަރުކާރުން ވަނީ ފެން ފޯރުކޮށްދޭ ޓޭންކަރުތައް އެ ސިޓީއަށް ވަނުމަށް ހޫޘީން ހުރަސް އަޅަމުންދާ ކަމަށް ތުހުމަތުކޮށްފަ އެވެ.

މީގެ އިތުރުން، ތައީޒް ސިޓީއާއި ވަގުތީ ވެރިރަށް އަދަނާ ދެމެދު އޮންނަ މައި ހައިވޭއަށް ގެއްލުންދީ ހަލާކުކޮށްލާފައިވާތީ، ސަރުކާރުން ވަނީ އެކަން ކުށްވެރިކޮށްފަ އެވެ. އަދި މިކަމުގެ ސަބަބުން އާންމު ރައްޔިތުންގެ ފުރާނައަށް ނުރައްކާވެފައިވާ ކަމަށްވެސް ސަރުކާރުން ބުނެފައިވެ އެވެ.

ޣައްޒާގެ 1.4 މިލިއަން ފަލަސްތީނު ރައްޔިތުން އަދިވެސް ތިބީ ކާބޯތަކެތީގެ ނާމާންކަމެއްގެ ތެރޭގައި ކަމަށް އދ. އިން ބުނެފި އެވެ.

އދ. ގެ ވޯލްޑް ފުޑް ޕްރޮގްރާމް (ޑަބްލިއު.އެފް.ޕީ) އިން ހާމަކޮށްފައިވާ ގޮތުގައި، ޣައްޒާގެ އާބާދީގެ ތިންބައިކުޅަ ދެބައި މީހުން އަދިވެސް ދަނީ ކާބޯތަކެތި ލިބުމުން މަހްރޫމްވެ، ބަނޑުހައިހޫނުކަމުގެ ނުރައްކަލާ ކުރިމަތިލަމުންނެވެ.

މީގެ އިތުރުން، ފޯރުކޮށްދެމުންދާ ކާބޯތަކެތީގެ ރޭޝަންތައް މިހާރު ވަނީ ދެބައިކުޅަ އެއްބަޔަށް މަދުކޮށްފަ އެވެ. ޑަބްލިއު.އެފް.ޕީ އިން ބުނި ގޮތުގައި އެހީގެ މިންވަރު ތިންބައިކުޅަ އެއްބަޔަށް މަދުކުރަން ޖެހުނީ ބަޖެޓުގެ ދަތިކަމާ ހުރެއެވެ. މީގެ މާނައަކީ ޣައްޒާގައި ދިރިއުޅޭ 500،000 ފަލަސްތީނު ރައްޔިތުންނަށް ދެމުންދިޔަ އެހީތައް މެދުކެނޑިގެން ދިއުމެވެ.

"މީހުންނަށް އެއްވެސް ރައްކާތެރިކަމެއް ނެތް. ކޮންމެ ދުވަހަކު ވައިގެ ހަމަލާތައް ދަނީ ދެމުން. މީހުން ދަނީ ގެދޮރު ދޫކޮށް ހާލުގައި ޖެހެމުން،" އޭ.އެފް.ޕީ ނިއުސް އެޖެންސީއަށް ދެއްވި ބަސްދީގަތުމެއްގައި ޑަބްލިއު.އެފް.ޕީ ގެ ކަންޓްރީ ޑައިރެކްޓަރު ޝޯން ހިއުސް ވިދާޅުވި އެވެ.

އޭނާ އިތުރަށް ވިދާޅުވީ، ޣައްޒާގެ ގާތްގަނޑަކަށް ހުރިހާ ރައްޔިތުންނަކީ މިހާރު ދާއިމީ ބޯހިޔާވަހިކަމެއް ނެތް މީހުން ކަމަށާއި، އެ ސަރަހައްދުގެ އިންސާނީ ހާލަތު އޮތީ އިންތިހާއަށް ގޯސްވެފައި ކަމަށެވެ.

އެހީގެ މިންވަރު މަދުކުރަން ޖެހިފައި މިވަނީ، އިސްރާއީލުން ޣައްޒާއަށް ވިޔަފާރި މުދާ އެތެރެކުރުން ހުއްޓުވާފައިވާ ދަނޑިވަޅެއްގަ އެވެ.

އީރާނުގެ ފަރާތުން ގަތަރަށް ހަމަލާތަކެއް އަމާޒުވެފައިވީ ނަމަވެސް އަދި ސަރަހައްދީ މައްސަލަތަކުގައި ދެ ގައުމުގެ މެދުގައި ހިޔާލުތަފާތުވުންތަކެއް ހުރި ނަމަވެސް، އީރާނާއެކު އޮންނަ މުއާމަލާތްތައް މެދުނުކެނޑި ކުރިއަށްދާ ކަމަށް ގަތަރުގެ ބޮޑުވަޒީރުގެ ނައިބު ޝައިޚް ސައުދު ބިން އަބްދުއްރަހްމާން އަލްޘާނީ ވިދާޅުވެއްޖެ އެވެ.

ޝައިޚް ސައުދު ވިދާޅުވީ، ހަމަލާތައް ފެށުމުގެ ކުރިންވެސް ގަތަރާއި އީރާނާ ދެމެދު އިތުބާރުގެ ގުޅުމެއް އޮތް ކަމަށެވެ. މިގޮތުން ދެ ގައުމުން ހިއްސާކުރާ ގޭސް ފީލްޑަކީ މި ގުޅުން ދަމަހައްޓައިދޭ މުހިންމު ބަހާއެއްކަން އޭނާ ފާހަގަކުރެއްވި އެވެ.

"މިދިޔަ އަހަރުގެ ޖޫން މަހާ ހަމައަށް އީރާނާއެކު އެއްވެސް ހާދިސާއެއް ހިނގާފައެއް ނުވޭ،" 2025 ވަނަ އަހަރު އެމެރިކާއިން އީރާނުގެ ނިއުކްލިއާ މަރުކަޒުތަކަށް ދިން ހަމަލާތަކުގެ ބަދަލުހިފުމުގެ ގޮތުން އީރާނުން ދިން ހަމަލާތަކަށް އިޝާރާތް ކުރައްވައި ޝައިޚް ސައުދު ވިދާޅުވި އެވެ.

ގަތަރުގެ ރަސް ލައްފާން ގޭސް ފެސިލިޓީއަށް އީރާނުން ދިން ހަމަލާއާ ގުޅޭގޮތުން ސުވާލު ކުރުމުން ޝައިޚް ސައުދު ވިދާޅުވީ، އެ ހަމަލާއަކީ ދޯހާއަށް ލިބުނު ކުއްލި ސިހުމެއް ކަމަށެވެ. އަދި އެ ހާދިސާއަށްފަހު ތެހެރާނާއެކު މަޝްވަރާތައް ކުރިއަށް ގެންގޮސްފައިވާ ކަމަށްވެސް އޭނާ ވިދާޅުވި އެވެ.

ދެ ގައުމުގެ މެދުގައި ހިޔާލުތަފާތުވުންތައް ހުރި ނަމަވެސް، އެކި ފެންވަރުގައި އީރާނާއެކު ގުޅުން ބާއްވަމުންދާ ކަމަށާއި، މުއާމަލާތް ކުރުން ދުވަހަކުވެސް ހުއްޓާނުލާނެ ކަމަށް ޝައިޚް ސައުދު ވިދާޅުވި އެވެ. މީގެ އިތުރުން، މިހާރު ދެ ފަރާތުންވެސް "އެއްބަސްވެވޭ އުސޫލުތަކަކަށް" އާދެވިފައިވާ ކަމަށް އޭނާ ފާހަގަކުރެއްވި އެވެ.

ޤަތަރުން ސަރަހައްދީ ދިފާއީ އައު އިއްތިހާދެއް އިއުލާނުކުރަން އުޅޭކަމަށް އެޤައުމުގެ ބޮޑުވަޒީރުގެ ނައިބު ވިދާޅުވެއްޖެ އެވެ.

ދޯހާގައި މިހާރު ކުރިއަށްދާ "ގްލޯބަލް ސެކިއުރިޓީ ފޯރަމް" ގައި ވާހަކަދައްކަވަމުން ޤަތަރުގެ ބޮޑުވަޒީރުގެ ނައިބު ވަނީ، އެ ޤައުމުގެ ދިފާއީ ސިޔާސަތުތަކާ ގުޅޭ އިތުރު މައުލޫމާތުތަކެއް ހިއްސާކުރައްވާފަ އެވެ.

"އަޅުގަނޑުމެން ވަރަށް އަވަހަށް އައު އިއްތިހާދެއް އިއުލާނުކުރާނެ ވާހަކަ ދަންނަވަނީ އުފަލާއެކު،" ސަރަހައްދީ ބައިވެރިންނާއެކު ދިފާއީ ދާއިރާއިން އައު މަސައްކަތްތަކެއް ފެށުމަށް ރާވާފައިވާ ރޭވުންތަކަށް އިޝާރާތްކުރައްވައި ޝައިޚް ސައުދު ވިދާޅުވި އެވެ.

ޝައިޚް ސައުދު ވިދާޅުވީ، ޤަތަރުގެ ދިފާއީ ގާބިލުކަން ދާދިފަހުން މުރާޖައާކޮށްފައިވާ ކަމަށާއި، މިހާރު އެންމެ ބޮޑު އިސްކަމެއް ދެނީ ވައިގެ ދިފާއީ ނިޒާމު ވަރުގަދަކުރުމަށާއި، ޑްރޯން ހަމަލާތަކުން ރައްކާތެރިވުމަށާއި، ސައިބަރ ސެކިއުރިޓީގެ އިތުރުން ފެނުގެ ރައްކާތެރިކަން ކަށަވަރުކުރުމަށް ކަމަށެވެ.

މީގެއިތުރުން، ގަލްފް ކޯޕަރޭޝަން ކައުންސިލް (ޖީސީސީ) ގެ ޤައުމުތަކުގެ މެދުގައި އޮންނަ އެއްބާރުލުން އިތުރުކުރުމުގެ މުހިންމުކަމުގެ މައްޗަށްވެސް އެމަނިކުފާނު އަލިއަޅުއްވާލެއްވި އެވެ.

އެމެރިކާއާއެކު އޮންނަ ގުޅުމުގެ ސަބަބުން ގަލްފް ސަރަޙައްދުގެ ދިފާއީ ގާބިލުކަން އިތުރަށް ވަރުގަދަވެފައިވާކަން ފާހަގަކުރައްވަމުން ޝައިޚް ސައުދު ވިދާޅުވީ، އީރާނު ހަނގުރާމައިގެ ތެރޭގައި ދެވުނު ހަމަލާތަކުގެ 90 އިންސައްތައަށްވުރެ ގިނަ ހަމަލާ ހުއްޓުވުނީ، އެތައް އަހަރެއް ވަންދެން އަސްކަރީ ދާއިރާއަށް ކުރި އިންވެސްޓްމަންޓްތަކާއި ހިއްސާކުރެވުނު ފަންނީ ތަޖުރިބާގެ އެހީގައި ކަމަށެވެ.

އީރާނުގެ ޚާރިޖީ ވަޒީރު އައްބާސް އަރަގްޗީ، މިސްރުގެ ޚާރިޖީ ވަޒީރު ބަދުރު އަބްދުލްއާތިއާ ފޯނުން ގުޅުއްވައި މަޝްވަރާ ކުރައްވައިފި އެވެ.

މި ފޯނު ކޯލާ ގުޅޭގޮތުން އީރާނުގެ ޚާރިޖީ ވަޒީރު އަރަގްޗީގެ ޓެލެގްރާމް ޗެނަލްގައި ވިދާޅުވީ، ދެ ބޭފުޅުންގެ މި މަޝްވަރާގައި ސަރަހައްދީ މަސްރަހުގައި ހިނގަމުންދާ އެންމެ ފަހުގެ ކަންތައްތަކަށް ބައްލަވާލައްވާފައިވާ ކަމަށެވެ. މީގެ އިތުރުން، މަސްރަހުގައި އުފެދިފައިވާ ނުތަނަވަސްކަން ކުޑަކުރުމަށާއި، ސަރަހައްދީ ހަމަޖެހުން ދެމެހެއްޓުމަށްޓަކައި ކުރެވެމުންދާ ޑިޕްލޮމެޓިކް މަސައްކަތްތަކާއި އިސްނެގުންތަކާ ގުޅޭގޮތުން ދެ ވަޒީރުން ފުޅާދާއިރާއެއްގައި މަޝްވަރާ ކުރެއްވި ކަމަށްވެސް އޭނާ ވިދާޅުވި އެވެ.

ސައޫދީ އަރަބިއްޔާގެ އަބްހާ ސިޓީއަށް "ނުރައްކަލުގެ" އިންޒާރު ނެރެފި އެވެ.

ސައޫދީ އަރަބިއްޔާގެ ސިވިލް ޑިފެންސް އެޖެންސީން ބުނި ގޮތުގައި، އެ ގައުމުގެ ނޭޝަނަލް އާލީ ވޯނިންގ ޕްލެޓްފޯމް މެދުވެރިކޮށް އަބްހާ ސިޓީއަށް "ނުރައްކަލެއް ކުރިމަތިވެދާނެ ކަމުގެ" އިންޒާރު ވަނީ ނެރެފަ އެވެ.

އަބްހާ ސިޓީއަކީ ރަތްކަނޑާ ކައިރީގައި އޮންނަ ސައޫދީ އަރަބިއްޔާގެ ހުޅަނގު ދެކުނު ސަރަހައްދެއް ކަމަށްވާ އަސީރު ޕްރޮވިންސްގެ ވެރިރަށެވެ.

މި އިންޒާރު ނެރުނުތާ ކުޑަވަގުތުކޮޅެއްގެ ތެރޭގައި، އެ ނުރައްކާ މިހާރު ފިލައިގޮސްފައިވާ ކަމަށް ސިވިލް ޑިފެންސް އެޖެންސީން ވަނީ އިއުލާނުކޮށްފަ އެވެ. އަދި އާންމުންގެ ސަލާމަތާއި ރައްކާތެރިކަމަށްޓަކައި، ސިވިލް ޑިފެންސްގެ އިރުޝާދުތަކަށް ތަބާވުމަށާއި، މީހުން އެއްވެ އުޅޭ ތަންތަނަށް ނުދިއުމަށާއި، ހާދިސާތައް ވީޑިއޯ ނުކުރުމަށް އެ އިދާރާއިން ވަނީ އިލްތިމާސްކޮށްފަ އެވެ.

ހޫޘީން ސައުދީ އަރަބިއްޔާއަށް ދެމުންދާ ހަމަލާތައް ކުށްވެރިކޮށް، ގަލްފް ކޯޕަރޭޝަން ކައުންސިލް (ޖީސީސީ) އިން ސައުދީއަށް ފުރިހަމައަށް ތާއީދުކުރާކަން ހާމަކޮށްފި އެވެ.

ބަހްރޭންގައި ބޭއްވި ބައްދަލުވުމަށްފަހު ޖީސީސީގެ މިނިސްޓީރިއަލް ކައުންސިލުން ނެރުނު ބަޔާނެއްގައި، ހޫޘީން ސައުދީ އަރަބިއްޔާއަށް ދެމުންދާ ހަމަލާތައް "އެންމެ ހަރުކަށި އިބާރާތުން" ވަނީ ކުށްވެރިކޮށްފަ އެވެ.

މި ބައްދަލުވުމަށްފަހު ނެރުނު ބަޔާނުގައި، ޖީސީސީގެ މެންބަރު ގައުމުތަކުން ސައުދީ އަރަބިއްޔާއާއެކު ސާބިތުކަމާއެކު ތިބިކަމާއި، އެ ގައުމުގެ ސިޔާދަތާއި، ސަލާމަތާއި، މަސްލަހަތު ހިމާޔަތްކުރުމަށް ސައުދީ ސަރުކާރުން އަޅާ ކޮންމެ ފިޔަވަޅަކަށް ފުރިހަމައަށް ތާއީދުކުރާނެކަން ވަނީ ހާމަކޮށްފަ އެވެ.

މީގެ އިތުރުން، ޖީސީސީގެ ގުޅިފައިވާ ދިފާއީ އެއްބަސްވުމުގެ ދަށުން، އެ ކައުންސިލްގެ އެއްވެސް މެންބަރު ގައުމަކަށް ދެވޭ އުދުވާނީ ހަމަލާއަކީ ޖީސީސީގެ ހުރިހާ ގައުމަކަށް ދެވޭ ސީދާ ހަމަލާއެއްގެ ގޮތުގައި ބަލާނެ ކަމަށްވެސް އެ ބަޔާނުގައި ބުނެފައިވެ އެވެ.

ކައުންސިލުން ވަނީ ހޫޘީންނަކީ "ޓެރަރިސްޓް ޖަމާއަތެއް"ގެ ގޮތުގައި ކަނޑައެޅުމަށާއި، ރަތްކަނޑުން ދަތުރުކުރާ އުޅަނދުފަހަރަށް ދޭ ހަމަލާތަކާ ގުޅިގެން އދ.ގެ ސަލާމަތީ މަޖިލީހުން ފާސްކޮށްފައިވާ ގަރާރުތައް ތަންފީޒުކުރުމަށް ގޮވާލާފަ އެވެ.

ޔަމަނުގެ މާރިބަށް މިސައިލް ހަމަލާތަކެއް އަމާޒުވެއްޖެ އެވެ.

ޔަމަނުގެ ބައިނަލްއަގުވާމީ ގޮތުން ބަލައިގަންނަ ސަރުކާރުގެ އަސްކަރިއްޔާއިން ހާމަކޮށްފައިވާ ގޮތުގައި، ހޫޘީ ހަނގުރާމަވެރިން ވަނީ އެ ގައުމުގެ މާރިބު ސިޓީއަށް އަމާޒުކޮށް ފުލުފުލުން މިސައިލް ހަމަލާތަކެއް ދީފަ އެވެ.

މި ހަމަލާތައް ދީފައިވަނީ ޔަމަނުގެ ވެރިރަށް ސަނާއާ ގާތްގަނޑަކަށް 120 ކިލޯމީޓަރު އިރުމަތީގައި އޮންނަ، އެ ގައުމުގެ މެދުތެރޭގެ އުތުރުގައިވާ މާރިބު ސިޓީގައި ސަރުކާރުގެ ސިފައިންނާއި އެ ސިފައިންނާ ގުޅިފައިވާ ހަނގުރާމަވެރިން ވަރުގަދަ އަސްކަރީ އޮޕަރޭޝަނެއް ކުރިއަށް ގެންދަނިކޮށެވެ.

އީރާން އަސްކަރީ ގޮތުންނާއި މާލީ ގޮތުން "ސިސްޓަމެޓިކްކޮށް ނުވަތަ ރޭވުންތެރިކަމާއެކު ސުންނާފަތިކޮށްލާފައިވާ" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނުން އަމަލުކުރަމުންދާ ގޮތްތައް ވަރަށް އަވަހަށް ބަދަލުނުކޮށްފިނަމަ، އެ ގައުމު އެއްކޮށް ހަލާކުކޮށްލުމުގެ މަސައްކަތް އެމެރިކާއިން ވަރަށް އަވަހަށް ނިންމާލާނެ ކަމަށެވެ.

މި މަހުގެ ފަހުކޮޅު ބޭއްވުމަށް ހަމަޖެހިފައިވާ އިސްރާއީލް އިންތިޚާބުގައި އަލުން އިންތިޚާބުވުމަށް މަސައްކަތް ކުރައްވަމުންދާ ބޮޑުވަޒީރު ބެންޖަމިން ނަތަންޔާހޫއަށް ތާއީދުކުރައްވައި ކުރެއްވި ޕޯސްޓެއްގައި ވެސް ޓްރަމްޕް ވަނީ އީރާނަށް ދެއްވާ މި އިންޒާރު ތަކުރާރު ކުރައްވާފަ އެވެ.

ޓްރަމްޕް އިތުރަށް ވިދާޅުވީ، އިސްރާއިލްގެ ލީޑަރަކަށް ނަތަންޔާހޫ ނޫން އެހެން ބޭފުޅަކު ހުރެއްޖެނަމަ، އީރާނާ ދެކޮޅަށް ކުރަންޖެހޭ މި މަސައްކަތްތައް އެމެރިކާއިން އަމިއްލައަށް ކުރަން ޖެހޭނެ ކަމަށާއި، ނަމަވެސް އެގޮތަށް އެކަން ކުރަން ބޭނުންފުޅު ނުވާ ކަމަށެވެ.

ސައުދީ އަރަބިއްޔާގެ ދެކުނު ހުޅަނގުގެ ސިޓީއެއް ކަމަށްވާ ނަޖްރާނަށް ވެއްޓުނު ހަމަލާއެއްގެ ސަބަބުން ހަ މީހަކު ޒަޚަމްވެފައިވާ ކަމަށް އެ ގައުމުގެ ސިވިލް ޑިފެންސް އެޖެންސީން ހާމަކޮށްފި އެވެ.

މި ހާދިސާގައި ހަ މީހަކަށް އަނިޔާވުމުގެ އިތުރުން، އެ ސަރަހައްދުގައި ހުރި ތިން ގެއަކަށާއި ތިން އުޅަނދަކަށް އެކި ވަރުގެ ގެއްލުންތައް ލިބިފައިވާ ކަމަށް ވެސް އެ އިދާރާއިން ރިޕޯޓުކޮށްފައި ވެއެވެ.

ނަޖްރާން ޕްރޮވިންސަށް މި ހަމަލާ އައުމުގެ ކުރިން، އެ ގައުމުގެ ނޭޝަނަލް އާލީ ވޯނިންގ ޕްލެޓްފޯމުން ވަނީ އެ ސަރަހައްދަށް "ނުރައްކަލެއް ކުރިމަތިވެދާނެ ކަމުގެ" އިންޒާރު ނެރެފަ އެވެ.

ލުބުނާނުގެ ޚާރިޖީ ވަޒީރު ޔޫސުފް ރާޖީ، އީރާނާއި އެ ގައުމަށް ތާއީދުކުރާ ފަރާތްތަކުން ގަލްފް ކޯޕަރޭޝަން ކައުންސިލް (ޖީސީސީ) ގެ ގައުމުތަކަށާއި އުރުދުންއަށް ދެމުންދާ ހަމަލާތައް ހުއްޓާލުމަށް ގޮވާލައްވައިފި އެވެ.

ޚާރިޖީ ވަޒީރު ރާޖީ މިހެން ވިދާޅުވީ އީރާނުގެ ޚާރިޖީ ވަޒީރާއެކު ބޭއްވި ދިގު ބައްދަލުވުމަކަށް ފަހު، އޭގެ އަނެއް ދުވަހު އެވެ. އީރާނުގެ ޚާރިޖީ ވަޒީރު އައްބާސް އަރާގްޗީއާއެކު ބޭއްވި އެ ބައްދަލުވުމުގައި، ދެ ގައުމުގެ ދެމެދުގައި ހުރި މައްސަލަތައް ހައްލުކުރެވޭނެ ގޮތްތަކާ ބެހޭގޮތުން ވަރަށް ފުޅާދާއިރާއެއްގައި މަޝްވަރާކޮށް، ޚިޔާލު ބަދަލުކުރެވުނު ކަމަށް ރާޖީ ވިދާޅުވިއެވެ.

ލުބުނާނުގެ ޚާރިޖީ ވަޒީރު ޔޫސުފް ރާޖީ (ވ) އަދި އީރާނުގެ ޚާރިޖީ ވަޒީރު އައްބާސް އަރާގްޗީ، 2026 އޮކްޓޫބަރު 17 ވަނަ ދުވަހު އިރާގުގެ ބަޣުދާދުގައި ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) ގެ ބައްދަލުވުމެއްގެ ތެރެއިން ބައްދަލުކުރައްވަނީ

މީގެ އިތުރުން، އިސްރާއިލުން ލުބުނާނުގެ މިނިވަންކަމާއި އިސްތިގުލާލަށް އަރައިގަނެ، އެ ގައުމުގެ ސަރަހައްދީ ރައްކާތެރިކަން ގެއްލޭ ގޮތަށް މެދުނުކެނޑި ދެމުންދާ ހަމަލާތައް ވެސް ޚާރިޖީ ވަޒީރު ރާޖީ ވަނީ ހަރުކަށި އިބާރާތުން ކުށްވެރިކުރައްވާފަ އެވެ.

ޔަމަނުގެ އުތުރުގައި އޮންނަ ސާދާ ޕްރޮވިންސްގެ ސަހަރު ޑިސްޓްރިކްޓްގައި ހުރި ގެއަކަށް ބޮން އެޅުމުގެ ސަބަބުން، އެތައް ބަޔަކަށް އެކިވަރުގެ އަނިޔާތައް ލިބިފައިވާ ކަމަށް އަލް-މަސީރާ ޓީވީން ރިޕޯޓްކޮށްފި އެވެ. އަމާޒުވި މި ހަމަލާގައި އަނިޔާވި މީހުންގެ ސީދާ އަދަދެއް އަދި މިހާތަނަށް ކަށަވަރުވެފައެއް ނުވެ އެވެ.

އީރާނުގެ ޚާރިޖީ ވަޒީރު އައްބާސް އަރާގްޗީ، ޕާކިސްތާނުގެ ޚާރިޖީ ވަޒީރާ ފޯނުން ގުޅުއްވައި ސަރަހައްދީ މަސްރަހާ ގުޅޭގޮތުން މަޝްވަރާ ކުރައްވައިފި އެވެ.

މި މަޝްވަރާތަކާ ގުޅޭގޮތުން އީރާނުގެ ޚާރިޖީ ވަޒީރު ވިދާޅުވީ، ދެ ޤައުމުގެ ދެމެދުގައި އޮތް އެކި ދާއިރާތަކުގެ ގުޅުންތަކާއި، ސަރަހައްދީ މަސްރަހަށް އަންނަމުންދާ އެންމެ ފަހުގެ ބަދަލުތަކާ ގުޅޭގޮތުން ދެ ބޭފުޅުން ފުޅާ ދާއިރާއެއްގައި ވާހަކަދެއްކެވި ކަމަށެވެ.

މީގެ އިތުރުން، ހުޅަނގު އޭޝިއާ ސަރަހައްދުގެ ނުތަނަވަސްކަން ކުޑަކުރުމަށާއި ހަމަޖެހުން ޤާއިމުކުރުމަށް ކުރެވެމުންދާ ޚާރިޖީ މަސައްކަތްތަކާ ގުޅޭގޮތުން ދެ ޤައުމުގެ ޚާރިޖީ ވަޒީރުން ޚިޔާލު ބަދަލުކުރެއްވި ކަމަށް، އީރާނުގެ ޚާރިޖީ ވަޒީރުގެ ރަސްމީ ޓެލެގްރާމް ޗެނަލްގައި ކުރެއްވި ޕޯސްޓެއްގައި ބަޔާންކުރައްވާފައިވެ އެވެ.

އިސްރާއީލުގެ ސިފައިން ޣައްޒާއަށް ދެމުންދާ ހަމަލާތަކުގައި ފަލަސްތީނުގެ އިތުރު ބަޔަކު ޝަހީދުކޮށްލައިފި އެވެ.

މިއަދު ފަތިހުން ފެށިގެން އިސްރާއީލުގެ ފައުޖުތަކުން ޣައްޒާގެ އެކި ސަރަހައްދުތަކަށް ދެމުންދާ ހަމަލާތަކުގައި، ދެ ކުޑަކުދިން ހިމެނޭހެން ފަލަސްތީނުގެ މަދުވެގެން ފަސް މީހަކު ޝަހީދުކޮށްލާފައިވާ ކަމަށް ހޮސްޕިޓަލްތަކާ ހަވާލާދީ އަލްޖަޒީރާއިން ވަނީ ރިޕޯޓުކޮށްފަ އެވެ.

މީގެ އިތުރުން، އިސްރާއީލުން މިއަދު ދިން އެކި ހަމަލާތަކުގައި ފަލަސްތީނުގެ 11 މީހަކު ޒަޚަމްވެފައިވާ ކަމަށްވެސް މައުލޫމާތު ލިބެ އެވެ.

އިސްރާއީލުން ހިފާފައިވާ ފަލަސްތީނުގެ ބިންތަކުގައި ދިރިއުޅޭ ޔަހޫދީ ވަޒަންވެރިން، ފަލަސްތީނުގެ ރައްޔިތުންނަށާއި އެމީހުންގެ މުދަލަށް ދޭ ހަމަލާތައް ވަނީ ވަރަށް ބޮޑަށް އިތުރުކޮށްފަ އެވެ. މީގެ ތެރޭގައި މިދިޔަ ހުކުރު އަދި ހޮނިހިރު ދުވަހު ދިން ގިނަ ހަމަލާތަކެއް ހިމެނެ އެވެ.

އިސްރާއީލުގެ އަސްކަރިއްޔާގެ އެހީތެރިކަމާއެކު، ރާމަﷲގެ އިރުއުތުރުގައި އޮންނަ އަލް-މުޣައްޔިރު އަވަށުގެ ބޭރު ސަރަހައްދުތަކަށް ވަޒަންވެރިން ހަމަލާދީފައިވާ ކަމަށް އެ ސަރަހައްދުގެ އޮފިޝަލަކު ވަފާ ނިއުސް އެޖެންސީއަށް މައުލޫމާތު ދީފައިވެ އެވެ.

ނާބްލަސްގެ ދެކުނުން އޮންނަ އަލް-ލުއްބާން އަލް-ޝަރްގިއްޔާ އަވަށުގައި މަސައްކަތް ކުރަމުންދިޔަ ފަލަސްތީނުގެ ދަނޑުވެރިންނަށް ޔަހޫދީ ވަޒަންވެރިން ހަމަލާދީ، އެމީހުން ކަނޑާފައިވާ ޒައިތޫނިތައް ފޭރިގަނެފައިވާ ކަމަށްވެސް ވަފާ ނިއުސް އެޖެންސީން ރިޕޯޓުކޮށްފައިވެ އެވެ.

މީގެ އިތުރުން، ތައިބޭ އަވަށުގެ ކައިރިން ދަތުރުކުރި ވިލާތުގެ އިއްތިހާދުގެ ޑިޕްލޮމޭޓުންގެ ވަފުދަކަށްވެސް ވަޒަންވެރިން ވަނީ ހަމަލާދީފަ އެވެ. މި ވަފުދުގައި ފަރަންސޭސިވިލާތުގެ މޭޔަރަކުވެސް ހިމެނިވަޑައިގަންނަވަ އެވެ.

ކޮލޮނައިޒޭޝަން އެންޑް ވޯލް ރެސިސްޓަންސް ކޮމިޝަނުން ހާމަކޮށްފައިވާ ގޮތުގައި، އިސްރާއީލުގެ ސިފައިންނާއި ވަޒަންވެރިން ފަލަސްތީނުގެ ދަނޑުވެރިންނަށާއި، ދަނޑުބިންތަކަށާއި ގަސްގަހާގެއްސަށް އަމާޒުކޮށް ހިންގާފައިވާ 40 އަށްވުރެ ގިނަ ހަމަލާއާއި އުސޫލުތަކާ ހިލާފު އަމަލުތައް އެ ކޮމިޝަނުން ވަނީ ރެކޯޑުކޮށްފަ އެވެ.

ޒައިތޫނި ބިންނަން ތިބި ފަލަސްތީނުގެ މީހުންނަށާއި، އެ ސަރަހައްދުގައި މަސައްކަތް ކުރަމުންދިޔަ ދަ ވޮޝިންޓަން ޕޯސްޓުގެ ފޮޓޯޖާނަލިސްޓަކަށްވެސް ވަޒަންވެރިން ވަނީ ހަމަލާދީފައެވެ. މި ހަމަލާތަކުގައި އަވަށުގެ މީހުންގެ ގައިގައި ތަޅައި އަނިޔާކުރުމުގެ އިތުރުން، ޒައިތޫނި ދަނޑުތަކުގައި ވަނީ އަލިފާން ރޯކޮށްފަ އެވެ.

އިސްތިއުމާރުކޮށްފައިވާ ހުޅަނގު އައްސޭރީގެ ރާމަﷲގެ އުތުރުގައި އޮންނަ ތުރުމުސް އަޔާ ކައިރީގައި، ފަލަސްތީނުގެ ރައްޔިތެއްގެ އަމިއްލަ އުޅަނދަކާއި ޒައިތޫނި ގަހެއްގައި ރޯކޮށްލާފައިވަނިކޮށް، ފަލަސްތީނުގެ ވޮލަންޓިއަރުން އެ އަލިފާންގަނޑު ނިއްވުމަށް މަސައްކަތް ކުރަނީ. 16 އޮކްޓޫބަރު 2026 [އޭއެފްޕީ]

ޣައްޒާގައި މަރުވި މީހުންގެ އަދަދު 74,475 އަށް އަރައިފި އެވެ.

2023 ވަނަ އަހަރުގެ އޮކްޓޫބަރު މަހުން ފެށިގެން އިސްރާއީލުން ޣައްޒާގައި ހިންގަމުންދާ ނަސްލު ނައްތާލުމުގެ ލާއިންސާނީ އުދުވާނުގައި، މިހާތަނަށް މަދުވެގެން 74,475 މީހުން ޝަހީދުވެ، 175,517 މީހުން ޒަޚަމްވެފައިވާ ކަމަށް ޣައްޒާގެ ސިއްހަތާ ބެހޭ ވުޒާރާއިން ވަނީ ރިޕޯޓުކޮށްފަ އެވެ.

ޣައްޒާގެ ސިއްހަތާ ބެހޭ ވުޒާރާއިން ހާމަކޮށްފައިވާ ގޮތުގައި، 2024 ވަނަ އަހަރުގެ އޮކްޓޫބަރު މަހު އިއުލާނުކުރި "ހަނގުރާމަ ހުއްޓާލުމުގެ" އެއްބަސްވުމަށް ފަހުވެސް، ފަލަސްތީނުގެ 1,517 މީހުން ޝަހީދުވެ، 5,400 މީހުން ވަނީ ޒަޚަމްވެފަ އެވެ. މީގެ އިތުރުން، އިމާރާތްތަކުގެ ގޮނޑަދަށުން މިހާތަނަށް 839 މީހެއްގެ ހަށިގަނޑު ފެނިފައިވާ ކަމަށްވެސް އެ ވުޒާރާއިން ބުނެފައިވެ އެވެ.

ޣައްޒާގެ އުތުރުގައިވާ ބައިތު ލާހިޔާ ސަރަހައްދުގައި އިސްރާއީލުގެ ސިފައިން ބަޑިޖަހައި ޒަޚަމްކޮށްލި ފަލަސްތީނުގެ ރައްޔިތަކު، ލިބުނު އަނިޔާތަކަށް ފަރުވާދެމުން ދަނިކޮށް މަރުވެއްޖެ ކަމަށް އަލް-ޝިފާ މެޑިކަލް ކޮމްޕްލެކްސްގެ މަސްދަރުތަކުން އަލްޖަޒީރާއަށް މައުލޫމާތު ދީފި އެވެ.

މިއަދުގެ ވަގުތެއްގައި އިސްރާއީލު ސިފައިން ޣައްޒާގެ އެކި ސަރަހައްދުތަކަށް ދިން ހަމަލާތަކުގައި، ކުޑަކުއްޖަކު ހިމެނޭހެން ފަލަސްތީނުގެ މަދުވެގެން ތިން މީހުން މަރުވެ، 11 މީހަކު ވަނީ ޒަޚަމްވެފަ އެވެ.

ސައުދީ އަރަބިއްޔާގެ ރައްކާތެރިކަމާއި ހަމަޖެހުން ދެމެހެއްޓުމަށްޓަކައި އެ ގައުމަށް ބޭނުންވާ "ހުރިހާ އެހީތެރިކަމަކާއި އެއްބާރުލުމެއް" ފޯރުކޮށްދޭނެ ކަމަށް މިސްރުން ބުނެފި އެވެ.

މިސްރުގެ ރައީސް އަބްދުލް ފައްތާހް އަލް ސީސީ ރިޔާސަތު ބެލެހެއްޓެވި އެ ގައުމުގެ ނޭޝަނަލް ޑިފެންސް ކައުންސިލްގެ ބައްދަލުވުމަކަށްފަހު ބުނެފައިވަނީ، ސައުދީ އަރަބިއްޔާގެ ވަސީލަތްތަކާއި، ބިމުގެ ސަރަހައްދީ ނަޒާހަތްތެރިކަމާއި، އިސްލާމީ މުގައްދަސް ބިނާތަކުގެ ދިފާއުގައި މިސްރުން އެ ގައުމާއެކު "ފުރިހަމައަށް ސާބިތުވެ އޮންނާނެ" ކަމަށެވެ.

މީގެ އިތުރުން، މަސްރަހު ފިނިކުރުމަށްޓަކައި ޚާރިޖީ ދާއިރާއިން ކުރަމުންދާ މަސައްކަތްތައް އިތުރަށް ވަރުގަދަކުރާނެ ކަމަށް ވެސް ރައީސް ސީސީގެ އޮފީހުން ވަނީ ހާމަކޮށްފަ އެވެ.

އީރާނުގެ ޚާރިޖީ ވަޒީރު، ހުރްމުޒް ކަނޑުއޮޅި އަލުން ހުޅުވާލުމަށް އެމެރިކާއަށް ހުށަހަޅާފައިވާ ހުށަހެޅުން ގަބޫލުކުރުމަށް ގޮވާލައްވައިފި އެވެ.

ހަތް ދުވަހުގެ ތެރޭގައި ހުރްމުޒް ކަނޑުއޮޅި އަލުން ހުޅުވާލުމަށް އީރާނުން ވޮޝިންޓަނަށް ހުށަހަޅާފައިވާ ހުށަހެޅުން އަދިވެސް އޮތީ އެގޮތުގައި ކަމަށް އެ ގައުމުގެ ޚާރިޖީ ވަޒީރު ވިދާޅުވި އެވެ.

އީރާނުގެ ޚާރިޖީ ވަޒީރު އައްބާސް އަރާގްޗީ އޭނާގެ ޓެލެގްރާމް ޗެނަލްގައި ވިދާޅުވީ، އީރާނުން ހުށަހަޅާފައިވާ ޝަރުތުތަކަށް އެމެރިކާއިން އަމަލުކޮށްފިނަމަ، ހަވަނައަށް ވާ ދުވަހު ހުރްމުޒް ކަނޑުއޮޅި ހުޅުވާލާނެ ކަމަށާއި، އަދި ހަތްވަނަ ދުވަހު ދެ ގައުމުގެ މެދުގައި މަޝްވަރާތައް ފެށޭނެ ކަމަށެވެ.

މިސްރުގެ ޤާނޫނު ހަދާ މަޖިލީހުން ދިފާއީ އެހީތެރިކަން ފޯރުކޮށްދިނުމުގެ ހުއްދަ ދީފިނަމަ، މަދު ގަޑިއިރުތަކެއްގެ ތެރޭގައި އެ ޤައުމުގެ ސިފައިން ސައުދީ އަރަބިއްޔާގެ އެހީތެރިކަމަށް ފޮނުވިދާނެ ކަމަށް ދިފާއީ ދިރާސާވެރިއަކު އަލްޖަޒީރާއަށް ބުނެފި އެވެ.

ކަނޑުގެ ސަލާމަތާއި ރައްކާތެރިކަމާ ބެހޭ މާހިރެއް ކަމަށްވާ އެލެގްޒެންޑްރޫ ހުޑިސްޓިއާނޫ ބުނި ގޮތުގައި، މިސްރުގެ އަސްކަރީ ބާރުތައް ރަތްކަނޑަށް ފޮނުވުމާއި، ސައުދީގެ ބަނދަރުތަކަށް މަނަވަރުތައް ފޮނުވުން ނުވަތަ ސައުދީގެ ސަރަހައްދުތަކަށް އަސްކަރީ ވަސީލަތްތައް ބަދަލުކުރުމުގެ ފުރުސަތު އެބައޮތެވެ.

ހުޑިސްޓިއާނޫ އިތުރަށް ފާހަގަކުރި ގޮތުގައި، ސައުދީ އަރަބިއްޔާގެ ދިފާއީ ނިޒާމު ވަރުގަދަކުރުމަށްޓަކައި ކައިރޯއިން ފޯރުކޮށްދޭނެ ކަމަށް އެންމެ ބޮޑަށް ބެލެވެނީ ޑްރޯންތަކާއި މިސައިލް ހަމަލާތަކުން ދިފާއުވުމަށް ބޭނުންވާ އެހީތެރިކަމެވެ.

ރައީސް އަބްދުލް ފައްތާހް އަލް ސީސީގެ އެދިވަޑައިގަތުމަކަށް، މިސްރުގެ ޤާނޫނު ހަދާ މަޖިލީހުގެ ކުއްލި ޖަލްސާއެއް މިއަދު މެންދުރުފަހު ބޭއްވުމަށް ވަނީ ތާވަލުކޮށްފަ އެވެ.

ސައުދީ އަރަބިއްޔާއިން އެހީތެރިކަމަށް އެދިއްޖެ ނަމަ، އެ ޤައުމު ހިމާޔަތްކުރުމަށްޓަކައި އަޅަންޖެހޭ "ކޮންމެ ފިޔަވަޅެއް" މިސްރުން އަޅާނެ ކަމަށް ރައީސް ސީސީ ވޭތުވެދިޔަ ހޮނިހިރު ދުވަހު ވަނީ ވިދާޅުވެފަ އެވެ.

މިދިޔަ މަހު ކައިރޯގައި ސައުދީގެ ވަލީއަހުދު މުހައްމަދު ބިން ސަލްމާނާއެކު ބޭއްވެވި ބައްދަލުވުމުގައި ވެސް، ރަތްކަނޑުގެ ދަތުރުފަތުރުގެ ރައްކާތެރިކަން ކަށަވަރުކުރުމަށް ސައުދީން ކުރާ މަސައްކަތްތަކަށް މިސްރުގެ ރައީސް ވަނީ ތާއީދުކުރައްވާފަ އެވެ.

މިސްރުގެ ރައީސް އަބްދުލް ފައްތާހު އަލް ސީސީ، ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާންއާ ސެޕްޓެމްބަރު މަހުގެ 15 ވަނަ ދުވަހު ގާހިރާގައި ބައްދަލުކުރައްވަނީ

ހޫޘީން ދެމުންދާ ހަމަލާތަކާ ދެކޮޅަށް ބައިނަލްއަގުވާމީ މުޖުތަމައުން ސާފު އަދި ވަރުގަދަ ފިޔަވަޅުތަކެއް އެޅުމަށް ގަލްފް ކޯޕަރޭޝަން ކައުންސިލް (ޖީސީސީ) ގެ ސެކްރެޓަރީ ޖެނެރަލް ގޮވާލައްވައިފި އެވެ.

ގަލްފް ސަރަހައްދަށް އަމާޒުކޮށް ހޫޘީން ދެމުންދާ ހަމަލާތަކާ ގުޅޭގޮތުން ވާހަކަދައްކަވަމުން ސެކްރެޓަރީ ޖެނެރަލް ވަނީ ބައިނަލްއަގުވާމީ ފެންވަރުގައި މިކަމާ ދެކޮޅަށް އެއްގަލަކަށް އެރުމަށް ބާރުއަޅުއްވާފަ އެވެ.

ޖީސީސީ ގެ ސެކްރެޓަރީ ޖެނެރަލް ޖާސިމް މުޙައްމަދު އަލްބުދައިވީ ވިދާޅުވީ، ޖީސީސީ ގެ މެންބަރު ގައުމުތަކަށް ތަކުރާރުކޮށް ދެމުންދާ މި ހަމަލާތަކަކީ އެއްވެސް ހާލެއްގައި ފަރުވާކުޑަކޮށް ދޫކޮށްލެވޭނެ ކަންތައްތަކެއް ނޫން ކަމަށެވެ.

މީގެ އިތުރުން، ސައުދީ އަރަބިއްޔާގެ ސަލާމަތާއި ރައްކާތެރިކަމަކީ ޖީސީސީ ގެ މުޅި ސަރަހައްދުގެ ސަލާމަތާ ގުޅިފައިވާ، އޭގެ މުހިންމު ބައެއްކަން އަލްބުދައިވީ ފާހަގަކުރެއްވި އެވެ.

އީރާނުން ބައިނަލްއަގުވާމީ ގާނޫނުތަކަށް އިހުތިރާމްކުރުމަށް ގޮވާލައްވަމުން، ބައިނަލްއަގުވާމީ މުޖުތަމައުން ވެފައިވާ އިގުރާރުތަކާއި ޒިންމާތައް ފުރިހަމައަށް އަދާކުރުމަށް ވެސް އަލްބުދައިވީ ވަނީ ބާރުއަޅުއްވާފަ އެވެ.

އީރާނުގެ އައު ދިފާއީ ވަޒީރު، އެމެރިކާއިން އިތުރު "ނުބައި ހިސާބެއް" ނުޖެހުމަށް އިންޒާރު ދެއްވައިފި އެވެ.

މެހެރްދާދު އަޚްލާގީ ކެތާބްޗީ މިފަދައިން ވިދާޅުވީ، އީރާނުގެ ޕާލަމެންޓުގެ އިތުބާރުގެ ވޯޓު ކާމިޔާބު ކުރައްވައި، އެ ގައުމުގެ ދިފާއީ ވަޒީރުގެ މަގާމާ ހަވާލުވެވަޑައިގަތުމަށްފަހު ދެއްވި ބަޔާނެއްގަ އެވެ.

"ދުޝްމަން އެމެރިކާއިން އިތުރު ނުބައި ހިސާބެއް ޖަހައިފިނަމަ، އީރާނުގެ ފަޚުރުވެރި ރައްޔިތުންނާއި އިސްލާމީ މުޖާހިދުންގެ ފަރާތުން ދޭނެ ރައްދު ވެގެންދާނީ ހައިރާންކުރުވަނިވި އަދި އެހާމެ ވަރުގަދަ ރައްދަކަށް،" ކެތާބްޗީ ވިދާޅުވި އެވެ.

އޭނާ އިތުރަށް ވިދާޅުވި ގޮތުގައި، މިފަދަ ކަމެއްގެ ސަބަބުން ސަރަހައްދީ ފެންވަރުގައާއި ދުނިޔޭގެ ފެންވަރުގައި ކުރިމަތިވާނެ ހުރިހާ ނަތީޖާއެއްގެ ފުރިހަމަ ޒިންމާ އުފުލަންޖެހޭނީ ޓެރަރިސްޓް އެމެރިކާ ސަރުކާރާއި އެ ގައުމުގެ ބައިވެރިންނެވެ.

"12 ދުވަހުގެ ހަނގުރާމައަށްފަހު، އީރާނުގެ ދިފާއީ ގާބިލުކަން ވަނީ ދުޝްމަނުންގެ އަންދާޒާތަކާއި ހިސާބުތައް ބަދަލުކޮށްލަންޖެހޭ މިންވަރަށް ތަރައްގީކޮށް، އެންމެ ޒަމާނީ ފެންވަރަށް އާބާތުރަ ފިލުވާފައި،" އީރާނުގެ އައު ދިފާއީ ވަޒީރު ވިދާޅުވި އެވެ.

އިޒްރޭލުން ދެމުންދާ ހަމަލާތަކުގައި ސުންނާފަތިވެފައިވާ އިމާރާތްތަކުގެ ކުނިބުނިތަކުގެ ދަށުން މަރުވެފައިވާ މީހުންގެ ހަށިތައް ނެގުމަށް ކުރަމުންދާ މަސައްކަތްތަކާ ގުޅޭގޮތުން، ޣައްޒާގެ ސިވިލް ޑިފެންސްގެ ތަރުޖަމާނު އަލްޖަޒީރާއަށް ދެއްވި ބަސްދީގަތުމެއްގައި އިތުރު ތަފްސީލުތައް ވަނީ ހިއްސާކުރައްވާފަ އެވެ.

ސިވިލް ޑިފެންސްގެ ތަރުޖަމާނު ވިދާޅުވީ، ހަށިތައް ނެގުމަށް ކުރަމުންދާ މަސައްކަތްތަކަށް އެހީތެރިވުމަށްޓަކައި، ކުއްލި ހާލަތްތަކުގައި ބޭނުންވާ ސާމާނާއި ޓީމުތައް ޣައްޒާއަށް ވެއްދުމަށް ބާރުއެޅުމަށް ބައިނަލްއަގުވާމީ މުޖުތަމައަށް އިލްތިމާސްކުރާ ކަމަށެވެ.

މީގެ އިތުރުން، ހަށިތައް ނެގުމުގެ މަސައްކަތުގައި ހަރަކާތްތެރިވާ ޓީމުތަކަށް ބޭނުންވާ ރައްކާތެރިކަމުގެ އާލާތްތައް ނެތުމުގެ ސަބަބުން، އެ މުވައްޒަފުންގެ ފުރާނައަށް ބޮޑެތި ނުރައްކާތަކަކާ ކުރިމަތިލާންޖެހިފައިވާކަން އޭނާ ފާހަގަކުރެއްވި އެވެ.

އިމާރާތްތަކުގެ ދަށުން ހަށިތައް ނެގުމުގެ މަސައްކަތް ހަލުވިކުރުމަށްޓަކައި، އެތައް ބައިވަރު އެކްސްކަވޭޓަރާއި، ބުލްޑޯޒަރުގެ އިތުރުން މި މަސައްކަތަށް ބޭނުންވާ އެހެނިހެން މެޝިނަރީތައް އިންތިހާއަށް ބޭނުންވެފައިވާ ކަމަށްވެސް ތަރުޖަމާނު ވިދާޅުވި އެވެ.

އިސްރާއީލުން ދިން ވައިގެ ހަމަލާތަކެއް އަމާޒުވި ގެއެއް ހުރި ސަރަހައްދުގައި ފަލަސްތީނުގެ ރައްޔިތުން ހަރަކާތްތެރިވަނީ

ޣައްޒާގެ ދެކުނުގައި ހުރި ޚާން ޔޫނިސްއަށް އިސްރާއީލު ސިފައިން ދިން ހަމަލާއެއްގައި ފަލަސްތީނުގެ ރައްޔިތަކު ޝަހީދުކޮށްލާފައިވާ ކަމަށް، ނާސިރު މެޑިކަލް ކޮމްޕްލެކްސްގެ މަސްދަރަކާ ހަވާލާދީ އަލްޖަޒީރާއިން ރިޕޯޓްކޮށްފި އެވެ.

މީގެ އިތުރުން، ޣައްޒާ ސިޓީގެ ހުޅަނގަށް އިސްރާއީލުން ދިން ޑްރޯން ހަމަލާއެއްގައި، ކުޑަ އަންހެން ކުއްޖަކާއެކު ޖުމްލަ ހަތަރު ފަލަސްތީނު ރައްޔިތަކު ޒަޚަމްވެފައިވާ ކަމަށް އެމަޖެންސީ ސާވިސަސްގެ މަސްދަރަކުން ވަނީ މައުލޫމާތު ދީފަ އެވެ.

މިސްރުގެ ރައީސް ޢަބްދުލް ފައްތާހް އަލް-ސީސީގެ އެދިވަޑައިގަތުމަކަށް، ސައުދީ އަރަބިއްޔާއިން އެދިއްޖެ ހާލަތެއްގައި އެ ގައުމުގެ ދިފާއުގައި އެހީތެރިކަން ފޯރުކޮށްދިނުމުގެ ހުއްދަ ދިނުމާ މެދު ގޮތެއް ނިންމުމަށް، މިސްރުގެ ރައްޔިތުންގެ މަޖިލީހުގެ ކުއްލި ޖަލްސާއެއް މިއަދު ބޭއްވުމަށް ނިންމައިފި އެވެ. މި ކުއްލި ޖަލްސާ ބޭއްވުމަށް ހަމަޖެހިފައިވަނީ އެ ގައުމުގެ ގަޑިން މިއަދު މެންދުރުފަހު 1:00 (ޖީ.އެމް.ޓީ އިން 10:00) ގައެވެ.

މި ޖަލްސާ ބޭއްވުމަށް ނިންމާފައި މިވަނީ، ސައުދީ އަރަބިއްޔާގެ ރައްކާތެރިކަމަށްޓަކައި އަޅަންޖެހުނު ކޮންމެ ފިޔަވަޅެއް އެޅުމަށް ތައްޔާރަށް އޮތް ކަމަށް ރައީސް އަލް-ސީސީ ވައުދުވެވަޑައިގަތްތާ އެއް ދުވަސް ފަހުންނެވެ. ނަމަވެސް، މިސްރުގެ އަސްކަރިއްޔާއިން މިކަމުގައި ބައިވެރިވާނީ ހަމައެކަނި ދިފާއީ ކަންކަމުގައި ކަމަށް އެމަނިކުފާނު ވަނީ ބާރުއަޅުއްވައި ވިދާޅުވެފަ އެވެ.

މިފަދަ ފިޔަވަޅެއް އެޅުމުގެ ކުރިން މަޖިލީހުގެ ރުހުން ހޯދަންޖެހޭނެކަން ފާހަގަކުރައްވަމުން، ސައުދީން އެހީތެރިކަމަށް އެދިއްޖެ ހާލަތެއްގައި އެ ހުއްދަ ދިނުމަށް މަޖިލީހުން އެއްބަސްވާނެ ކަމަށް އުންމީދު ކުރައްވާ ކަމަށްވެސް ރައީސް އަލް-ސީސީ ވިދާޅުވިއެވެ.

އީރާނުގެ އައު ދިފާއީ ވަޒީރުގެ މަގާމަށް މެހެރްދާދު އަޚްލާގީ ކެތާބްޗީ އައްޔަންކުރުމަށް އެ ގައުމުގެ ގާނޫނު ހަދާ މަޖިލީހުން ރުހުން ދީފި ކަމަށް އެ ގައުމުގެ ދައުލަތުގެ މީޑިއާތަކުން ރިޕޯޓްކޮށްފި އެވެ.

ޣައްޒާ ސިޓީގެ ދަރަޖް އަވަށުން ސިހުޔޫނީން ސުންނާފަތިކޮށްލާފައިވާ އިމާރާތްތަކުގެ ގާބުރިތަކުގެ ދަށުން ފެނުނު 75 ފަލަސްތީނު ރައްޔިތެއްގެ ޖަނާޒާ ބާއްވައިފި އެވެ.

މިކަން ހާމަކޮށްފައިވަނީ ޣައްޒާގެ މިނިސްޓްރީ އޮފް ހެލްތުންނެވެ.

އިސްރާއީލުން ޣައްޒާގައި ހިންގަމުންދާ ގަތުލުއާންމުގައި މިހާތަނަށް މަދުވެގެން 74,469 ފަލަސްތީނު ރައްޔިތުން ޝަހީދުވެފައިވާ ކަމަށް އެ މިނިސްޓްރީން ބުނެއެވެ. އަދި މި ހަމަލާތަކުގައި ޒަޚަމްވި މީހުންގެ އަދަދު މިހާރު ވަނީ 175,492 އަށް އަރާފަ އެވެ.

ސައޫދީ އަރަބިއްޔާއަށާއި އެ ގައުމުގެ މަދަދުލިބޭ ޔަމަނުގެ އިއްތިހާދަށް އަމާޒުކޮށް، ހޫޘީން މިހާތަނަށް ދީފައިވާ އެންމެ ވަރުގަދަ އަދި ނުރައްކާތެރި ހަމަލާތައް ދިނުމުގައި އީރާނުގެ ޖާސޫސީ އެހީތެރިކަން ލިބިފައިވާ ކަމަށް "ވޯލް ސްޓްރީޓް ޖާނަލް" އިން ރިޕޯޓްކޮށްފި އެވެ.

އެމެރިކާގެ ނޫހެއް ކަމަށްވާ ވޯލް ސްޓްރީޓް ޖާނަލްއިން މި ޚަބަރު ރިޕޯޓްކޮށްފައިވަނީ، ސައޫދީ އަރަބިއްޔާއާއި ޔަމަނުގެ ހޫޘީންނާ ދެކޮޅު އިއްތިހާދުގެ ޖާސޫސީ މައުލޫމާތުތައް ލިބިފައިވާ ފަރާތްތަކާ ހަވާލާދީ އެވެ.

އީރާނުގެ އެހީތެރިކަމާއެކު، ޔަމަނުގެ ރަތްކަނޑުގެ އައްސޭރިފަށުގެ ބައެއް ސަރަހައްދުތައް ހޫޘީންގެ ބާރުގެ ދަށަށް ގެނެސްފައިވާއިރު، ސައޫދީގެ ތެޔޮ އުފައްދާ މަރުކަޒުތަކަށާއި އެއާޕޯޓްތަކަށްވެސް ވަނީ ހަމަލާތައް ދީފަ އެވެ. މީގެ ތެރޭގައި މިދިޔަ ހަފުތާގައި ރިޔާޟަށް ދިން ހަމަލާގައި 13 މީހުން މަރުވި ހާދިސާވެސް ހިމެނެ އެވެ.

ނަމަވެސް، ޔަމަނުގެ ދާޚިލީ ކަންކަމުގެ ތެރެއަށް އީރާނުން އަތްބާނާ ކަމަށް ކުރެވޭ ތުހުމަތުތައް އެ ގައުމުން ވަނީ ދޮގުކޮށްފަ އެވެ. އީރާނުން ބުނަމުންދަނީ ހޫޘީންނަކީ އެއްވެސް ފަރާތެއްގެ ނުފޫޒެއް ނެތް، "މުސްތަގިއްލު ބައެއް" ކަމަށެވެ.

މެދުތެރޭ ގާޒާގެ އަލް މަޣާޒީ ރެފިއުޖީ ކޭމްޕުގައި އިސްރާއީލު ސިފައިން ބަޑިޖަހައި ފަލަސްތީނުގެ އަންހެން ކުއްޖަކު ޝަހީދުކޮށްލައިފި އެވެ.

މި ހާދިސާއާ ގުޅޭ މައުލޫމާތު އަލްޖަޒީރާއަށް ދީފައިވަނީ އަލް އަޤްޞާ ހޮސްޕިޓަލުގެ މަސްދަރަކުންނެވެ.